Rwanda: Impamvu babona uyu munsi wahariwe Yoga ku isi

"…[Yoga] ni uburyo bwuzuye bwo gusingira amagara n'ubuzima bwiza. Si imyitozo gusa ahubwo ni ukuvumbura ubwawe uwo uri we, isi n'ibiyikikije".

Ako ni agace mu ijambo rya minisitiri w'intebe w'Ubuhinde Narendra Modi yabwiye inteko ya ONU/UN tariki 27/09/ 2014 ayisaba kwemeza umunsi mpuzamahanga wa Yoga.

Abantu benshi ku isi uyu munsi barizihiza ku nshuro ya karindwi umunsi mpuzamahanga wa Yoga, ariko kuwizihiza birongera kuba bidakomeye nanone kubera Covid.

Marie Rose Uwineza ukora akanigisha Yoga i Kigali, avuga ko kuba imfubyi byatumye abana igihe kirekire n'ibikomere agahora mu ntekerezo z'ibyahise, mbere yo gukizwa na Yoga "ngasingira ejo hazaza kandi mbere ntaharebaga".

Yoga ni umurage wa cyera cyane w'Ubuhinde ugizwe n'uruhurirane rw'imyitozo y'umubiri, roho (soul) na gatekerezi (mind) igamije kunga ubumwe bw'ibyo bitatu bigize umuntu.

Aline Mazimpaka umwalimu wa Yoga ukuriye ikigo Ituze Mindfulness and Yoga Center cyiyigisha ati: "Ibyo bintu byose uko ari bitatu iyo bimaze kunga ubumwe biguha ibisubizo byinshi tujya dushakira hanze [yacu].

"Urugero; guterekereza ko abandi bagukunze kugira ngo wumve ko ukunzwe, gutekereza ko abandi bagomba kugira icyo bakora ku buzima bwawe kugira ngo wumve ko hari igihindutse…

"Ariko iyo umaze kunga ubumwe nawe ubwawe usanga ibintu byose wamye ushakashaka hanze burya bitari kure ahubwo biri muri wowe.

"Iyo umuntu yabashije kugera kuri urwo rwego rero nta kintu na kimwe ushaka utageraho mu buzima usibye ko usanga utanakeneye byinshi. Abantu bashyizeho uyu munsi ibyo bintu barabiroye babona ni iby'agaciro."

Yoga ikiza umuntu?

Ikorwa mu myitozo y'ibice bitatu: guhumeka ugashyitsa mu nda, imyitozo ngororamubiri, n'umwitozo wo gutuza (meditation), muri uwo mwitozo niho hazamo ibintu byinshi birimo no kwiyaturiraho ibintu byiza, nk'uko Mazimpaka abivuga.

Ati: "Hari abantu baba barakuze babaturiraho ibintu bibi, bikayobora igice kinini cy'ubuzima bwabo, niho usanga bamwe bakavuga ngo ntibagira amahirwe, 'meditation' rero ifasha guhindura ubuzima, wiyaturiraho ibyiza."

Indi myitozo y'umwihariko ku bibazo byo mu mutwe izwi nka 'breath, body, mind' yahimbwe n'Abanyamerika bamaze kubona ko gukomeza guha imiti abantu bafite ibyo bibazo bidahagije.

Aline Mazimpaka, nawe utanga iyi myitozo, ati: "Babonye ko n'umubiri uba wifitemo ubushobozi, bahimba iyi myitozo kandi bagiye babona ko abarwayi bakoraga iyo myitozo yagiye ibafasha cyane."

Ibi yemeza ko babibona no ku kigo akuriye kiri mu mujyi wa Kigali cyigisha Yoga ababishaka nta kiguzi, kandi ko izo mpinduka badatinda kuzibona.

Ati: "Nanjye hari ibintungura, hari nk'umuntu waje kundeba ngo bamubwiye ko Yoga ikiza kugira umunabi (angoisse) yari umudamu watakaje umwana ntiyashobora kongera gusama, dukoranye amezi atatu arampamagara arambwira ati 'narasamye'…ambwira uko ibintu byose byari bimeze mbere.

"Hari ibijya biba mu ishuri umuntu akambwira ati 'gusinzira byarananiye', iyo ambwiye ibyo mba nzi ibyo ndi bumutoze, nkajya kubona nkabona turangije yasinziriye aho hasi araryamye."

"Ubu ndaseka nkayoberwa n'ibinsekeje"

Marie Rose Uwineza wiciwe ababyeyi be muri jenoside mu 1994, yatangiye gukora Yoga mu 2016, avuga ko mbere yaho atakundaga siporo ndetse atashoboraga no kwiruka metero 500.

Usibye kudakora imyitozo ngororamubiri, Uwineza avuga ko yahoraga mu ntekerezo z'ibyabaye, atasinziraga neza, ntaruhuke neza bityo akanatsindwa no mu ishuri.

Ati: "Ntangiye gukora Yoga numvise nagenda mpinduka, umunsi wa kabiri nakoze Yoga nasinziriye nk'agahinja, nagiye numva ibintu byose bijya ku murongo.

"Mbere, ntabwo nabashaga kureba ngo ejo hanjye hameze gute, nta nubwo numvaga nzarangiza kwiga, nyuma yo kumenya Yoga nibwo natangiye kubona ndi gusingira ejo hazaza kandi mbere ntaharebaga."

Uwineza ubwe yitoza nibura gatatu mu cyumweru, avuga ko inyungu ikomeye yakuye muri Yoga ari ukuba ubu afite ubuzima bushya.

Ati: "Narahindutse mu buryo buboneka, mbere sinavugaga, ubu ndaseka nkayoberwa n'ibinsekeje kandi ntabwo byajyaga bimbaho."

Mu kwezi kwa 12/2014 ibihugu 177 muri ONU byemeje ishyirwaho ry'umunsi wa Yoga ku isi tariki 21/06 buri mwaka, ni wo munsi izuba rizora amasaha menshi kurusha indi yose y'umwaka mu gice cy'isi cya ruguru.

Wizihijwe bwa mbere ku itariki nk'iyi z'uku kwezi mu 2015, icyo gihe i New Delhi mu Buhinde nibwo habaye umuhigo uriho kugeza ubu w'abantu benshi cyane bakoze Yoga bari kumwe, barimo na Narendra Modi.

Narendra Modi, uzwi cyane kuba umuntu ukunda Yoga, nawe uyu munsi yirinze kuyikorera ahari abantu benshi ahubwo atanga ubutumwa bw'uyu munsi akoresheje video.

Uyu munsi kuwa mbere, yavuze ko Yoga yabaye icyizere kuri miliyoni z'abantu bari bahanganye n'iki cyorezo.

Ati: "Nta gihugu cyari cyiteguye ubwo Covid-19 yateraga. Muri ibi bihe bikomeye, twese twabonye ko Yoga yabaye inkomoko ikomeye yo kwigirira icyizere."