Umukuru w'ibiro bya Trump avuga ko USA idashoboye guhagarika Covid-19

Umujyanama mukuru wa Perezida Donald Trump yemeye ko Amerika "itagiye guhagarika icyorezo" cya coronavirus.

Ahubwo, Mark Meadows ukuriye ibiro bya Perezida Trump yavuze ko Covid-19 yahashywa gusa n'"uburyo bwo kugabanya ubukana" nk'inkingo n'imiti yo kuyoroshya.

Abivuze mu gihe ubwandu bwa coronavirus bukomeje kwiyongera muri Amerika, habura iminsi icyenda ngo amatora ya perezida abe.

Umudemokarate Joe Biden uhatanye na Perezida Trump yavuze ko ibiro bya White House birimo kuzunguza "ibendera ry'umweru ryo kwemera ko byatsinzwe" na Covid-19.

Bwana Biden yongeyeho ko amagambo ya Bwana Meadows agaragaza ko ubutegetsi bwa Trump "bwazibukiriye inshingano yabwo y'ibanze yo kurinda Abanyamerika".

Mu kiganiro na televiziyo CNN, Bwana Meadows yavuze ko guhagarika Covid-19 ari intego itarimo gushyira mu gaciro kuko "ni virusi yanduza cyo kimwe n'ibicurane".

Abaturage b'Amerika barenga 225,000 bamaze kwicwa na Covid-19 kuva iki cyorezo cyatangira. Ni wo mubare wa mbere uri hejuru cyane ku isi.

Ku wa gatandatu, muri Amerika habonetse abanduye Covid-19 bashya 83.718, nkuko bitangazwa na Kaminuza ya Johns Hopkins.

Habuze gato ngo Amerika ikureho umuhigo w'ubwandu bushya yagezeho ku wa gatanu, ahabonetse abanduye bashya 83.757.

Mbere yaho, umubare munini cyane w'abanduye bashya bari barabonetse ku munsi umwe ni abarwayi 77.362 babonetse ku itariki ya 16 y'ukwa karindwi.

Kugeza ubu muri Amerika abantu barenga miliyoni 8,6 batangajwe ko banduye coronavirus.