Nagorno-Karabakh: Armenia na Azerbaijan birashinjanya kurenga ku masezerano mashya y'agahenge

Armenia na Azerbaijan birashinjanya kurenga ku masezerano y'agahenge yo gutuma imbabare zitabwaho mu karere impande zombi zipfa ka Nagorno-Karabakh.

Impande zombi zari zemeranyijwe ko agahenge gatangira gukurikizwa nyuma ya saa sita z'ijoro ku isaha yaho, ni ukuvuga nyuma ya saa yine (22h) za nijoro z'ejo ku wa gatandatu ku isaha yo mu Rwanda no mu Burundi.

Ariko Madamu Shushan Stepanyan, umuvugizi wa minisiteri y'ingabo ya Armenia, yanditse kuri Twitter ko Azerbaijan yarenze kuri ako gahenge hashize iminota ine gusa gatangiye, irasa imbunda za rutura n'ibisasu bya rokete.

Nyuma yaho, Azerbaijan yavuze ko Armenia ari yo yarenze ku masezerano y'agahenge.

Icyemezo cy'ako gahenge cyafashwe bijyanye n'amasezerano y'agahenge yashyizweho umukono mu mpera y'icyumweru gishize.

Ariko gukozanyaho byarakomeje nubwo hari habayeho ayo masezerano.

Imirwano yongeye kwaduka mu kwezi gushize, impande zombi zipfa akarere ka Nagorno-Karabakh kemewe mu mahanga nk'aka Azerbaijan ariko gategekwa n'abo mu bwoko bw'abanya-Armenia.

Abantu babarirwa mu magana bamaze kuhasiga ubuzima.

Iyi ni yo mirwano ya mbere ikaze cyane ibayeho muri ako karere kuva harangira intambara yamaze imyaka itandatu ikarangizwa n'amasezerano y'agahenge mu mwaka wa 1994.

Mbere yaho ejo ku wa gatandatu, impande zombi zari zakomeje kwitana bamwana ku kurenga ku masezerano y'agahenge yo ku wa gatandatu ushize yagizwemo uruhare n'Uburusiya.