Coronavirus: Amwe mu makuru ari kuvugwa ahandi kuri iki cyorezo

Mu Bwongereza batangiye kuyipima mu mazi y'imyanda

Ubusanzwe ipimirwa mu mazuru no mu kanwa ariko hari undi mugambi wo kuyipima ushobora kuba utarumvise.

Mu bice bitandukanye by'Ubwongereza baratangira gupima coronavirus mu mazi y'imyanda, ngo barebe niba iyi virus itaba ikwirakwira no mu mazi mabi.

Mu mezi ya mbere y'iki cyorezo, abahanga muri siyansi babonye ko abantu bafite iyi virus 'banayisohora' mu mazirantoke yabo.

Kumenya niba ishobora kuboneka mu mazi y'imyanda byatanga impuruza nshya kuri iki cyorezo.

Ibisubizo by'ibipimo biri gufatwa ahatunganyirizwa amazi mabi 44 mu Bwongereza bizamenyekana vuba.

Gusiganwa igice cya marathon ku ikoranabuhanga

Abantu batangiye kwiyandikisha mu isiganwa rya mbere ryiswe 'Virtual Great North Run' aho bazasiganwa igice cya marathon ariko bari ahatandukanye ku isi, hifashishijwe 'application'.

Ni inshuro ya 40 iri siganwa risanzwe ribera mu mujyi wa Newcastle rizaba rigiye kuba, ariko ni ubwa mbere rizaba ribaye muri ubu buryo.

Umuhigo w'abantu 60,000 wari kuzaryitabira ku itariki 13 z'ukwezi kwa cyenda, ariko kubera coronavirus ntabwo bigishobotse ko bahurira mu muhanda umwe bakarushanwa.

Abaritegura ubu bavuze ko abashaka kurushanwa bakwiyandikisha ku buntu maze bagasiganwa muri ubu buryo, bwubahirije amabwiriza yo kutegerana.

App izafasha abiruka gusiganwa bumva amajwi yo mu masiganwa yabanje, bumva ubutumwa bubatera imbaraga, banareba igihe basigaje, izanababwira umwanya uko bitwaye igereranyije n'abandi.

OMS iraburira ko hari igihe nta 'gisubizo nyacyo' cyaboneka

Ukuriye ishami ry'umuryango w'abibumbye ryita ku buzima OMS/WHO avuga ko bishoboka ko hari igihe hataboneka "igisubizo nyacyo" mu gutsinda iyi virus.

Dr Tedros Adhanom Ghebreyesus yabwiye ikiganiro n'abanyamakuru ku ikoranabuhanga ko: "ubu nta gisubizo nyacyo kiraboneka, kandi binashoboka ko nta n'ikizaboneka".

Avuze ibi nyuma y'uko iri shami rya ONU rivuze ko iki cyorezo gishobora "kuba kirekire" kurushaho.

Gusa hari inkingo zo kurwanya iyi virus ziri kugeragezwa ahanyuranye ku isi, hari n'abari kuzikora bagiye bizeza ko izo bari kugerageza zitanga ikizere.

Iki cyorezo mu mibare

Ubu abantu bamaze kucyandura ku isi bararenga miliyoni 18, naho abarenga 700,000 kimaze kubahitana.

Iyi shusho irerekana uko iyi virus ikomeje kuzamuka n'aho yibasiye kurusha ahandi.

Muri Philippines barasubira muri 'lockdown'

Mu murwa mukuru Manila n'inkengero zawo bategetse ko, kuva ejo kuwa kabiri kugeza mu byumweru bibiri, abahatuye basubira mu mabwiriza akomeye yo kuguma mu rugo kubera irindi kwirakwira rya Covid-19.

Umwanzuro wafashwe na Perezida Rodrigo Duterte nyuma y'uko aburiwe n'abaganga ko kwiyongera kw'abanduye bishobora gutuma ubushobozi bw'urwego rw'ubuzima burengerwa.

Leta yavuze ko ishaka guha akazi abakozi bashya mu by'ubuzima bagera ku 10,000.

Ubwandu bwa coronavirus bwongeye kwiyongera muri iki gihugu kiri mu byamaze igihe kinini muri 'lockdown' ku isi, kuko batangiye kuyoroshya mu kwezi kwa gatandatu.

Paul Scholes yabajijwe na polisi

Paul Scholes wahoze ari icyamamare mu mupira w'amaguru yagarutse mu makuru uyu munsi, ariko atari gutanga imipira myiza kuri bagenzi be nk'uko yari abizwiho akiwubashije.

Ni nyuma y'uko polisi y'aho atuye imubajije ku kurenga ku mabwiriza yo kwirinda iki cyorezo akoresha ibirori byo mu rugo.

Ikinyamakuru The Sun kuvuga ko ibirori byabereye mu rugo rwe i Oldham muri Manchester kuwa gatanu nijoro ku isabukuru y'amavuko y'umuhungu we.

Amabwiriza yo muri aka gace abuza abantu guteranira mu ngo ari benshi cyangwa mu busitani.

Scholes w'imyaka 45 wahoze ari umukinnyi wo hagati mu ikipe ya Manachester United, ntacyo aravuga ku byamuvuzweho.