Rwanda: Gérard Urayeneza uregwa ibyaha bijyanye na jenoside arakomeza gufungwa
Ahavuye isanamu, University of Gitwe
Urukiko rwisumbuye rwa Muhanga rwaraye rutesheje agaciro ubujurire bwa Gérard Urayeneza, rutegeka ko akomeza gukurikiranwa afunze.
Bwana Urayeneza akekwaho icyaha cya Jenoside no kuzimiza ibimenyetso by'amakuru ya Jenoside, ibyaha we ahakana.
Bwana Urayeneza w'ikigero cy'imyaka 70, uzwi cyane mu Rwanda nk'uwashinze amashuri abiri n'ibitaro i Gitwe mu karere ka Ruhango, yafunzwe tariki 14 z'ukwezi gushize kwa gatandatu.
Ubushinjacyaha bumurega ibyaha byerekeranye na jenoside nyuma y'uko mu isambu y'ibitaro yashinze bahasanze imibiri umunani y'abantu bishwe, bikekwa ko ari abazize jenoside.
Uru rukiko rwatangaje umwanzuro warwo mbere y'igihe cyagenwe, ruvuga ko icyo gihe (kuri uyu wa gatatu) "umucamanza azaba afite andi maburanisha".
Uru rukiko rwategetse ko abandi bagabo babiri bari barekuwe by'agateganyo n'urukiko rw'ibanze rwa Ruhango bongera bagafatwa bagafungwa.
Uruhande rwunganira Bwana Urayeneza ruvuga ko aba bagabo bari mu batanga ubuhamya bushinjura Urayeneza.
Mu iburanisha riheruka mu bujurire ku cyemezo cyo gufungwa by'agateganyo yari yakatiwe, ubushinjacyaha bwavuze ko Bwana Urayeneza arekuwe yabangamira iperereza n'abatangabuhamya bamushinja.
Uregwa yasabye urukiko ko yarekurwa agakurikiranwa adafunze kubera uburwayi n'inshingano zikomeye afite.
Abunganizi be bavuze ko hari abatangabuhamya barokotse jenoside bamushinjura urukiko rwagombye kumva, bakavuga ko abamushinja batanze ubuhamya burimo ibinyoma.
Bwana Urayeneza yafatanywe n'abandi bantu umunani, batanu muri bo bamaze kurekurwa.
