Coronavirus: Muri DR Congo bagize umubare munini w’abayanduye ku munsi

Yatangajwe

Minisiteri y'ubuzima muri DR Congo uyu munsi kuwa gatatu yatangaje ko mu bipimo by'umunsi umwe w'ejo habonetse abantu 92 banduye coronavirus, nibo benshi babonetse ku munsi umwe muri iki gihugu kuva iyi ndwara yahagera.

Muri abo, 69 babonetse mu murwa mukuru Kinshasa, 23 baboneka mu ntara ya Kongo Central bihana imbibi.

Kuva tariki 10 z'ukwezi kwa gatatu Covid-19 igeze muri DR Congo kugeza ubu, hamaze kuboneka abantu 797 banduye coronavirus, 35 yishe na 92 bayikize.

Imfungwa 104 zo muri gereza ya gisirikare ya Ndolo iri i Kinshasa bamaze kuzibonamo iyi ndwara. Minisiteri y'ubuzima ivuga ko abo bashyizwe mu kato ndetse gereza igaterwa imiti ya 'disinfectant'.

Umunyamakuru wa BBC i Kinshasa avuga ko ejo kuwa kabiri, minisitiri w'ubuzima Eteni Longondo yabwiye abanyamakuru ko nubwo imibare iri kuzamuka ibintu bitameze nabi.

Yavuze ko leta iri kureba uburyo yakongera gufungura amashuri, nubwo atavuze itariki bizabera.

Abamaze kwandura coronavirus mu karere nk'uko bivugwa na ministeri z'ubuzima muri ibi bihugu:

  • DR Congo - 797 (92 bashya ejo kuwa mbere)
  • Kenya - 535 (45 bashya ejo kuwa kabiri)
  • Tanzania - 480 (nta mibare mishya kuva kuwa kane)
  • Rwanda - 261 (nta wanduye wabonetse ejo)
  • Uganda - 98 (ejo habonetse 1 mushya)
  • Sudani y'Epfo - 52 (nta mibare mishya kuva kuwa mbere)
  • Burundi - 19 (nta mibare mishya kuva ku gatandatu)