Covid-19: Ubutaliyani na Espagne, imibare y'abapfa n'abandura iri kumanuka, muri Afurika bite?

Yatangajwe

Espagne niyo ifite imibare minini y'abanduye iyi virus mu Burayi, ariko amakuru atangwa ubu arerekana ko imibare ubu noneho iri kumanuka.

Imibare itangwa na leta muri Espagne yerekana ko abapfuye ku munsi mu minsi ine ishize bamanutse bakagera kuri 637.

Uyu niwo mubare muto w'abapfuye ku munsi uri hasi mu byumweru hafi bibiri bishize. Kuwa kane ushize nibwo hapfuye abantu benshi ku munsi, 950.

Imibare y'abanduye nayo iri kumanuka bigaragara muri Espagne - abahanga bavuga ko ingamba zo guhagarika ubuzima busanzwe (lockdown) zishobora kuba ziri gutanga umusaruro.

Haracyari urugendo rurerure, ndetse leta ya Espagne ivuga ko abantu bashobora kuzakomeza gutegekwa kwambara udupfukamunwa mu bantu benshi no mu gihe izi ngamba zizaba zarakuweho.

Imibare mu Butaliyani, yerekana ko naho biri kumanuka.

Hano niho Covid-19 imaze kwica abantu benshi ku isi, 15,887. Ariko naho, abandura n'abapfa bari kugabanuka.

Mu Butaliyani, ejo ku cyumweru hapfuye abantu 525, umubare muto kurusha iyindi mu byumweru bibiri bishize.

Skip Ibisomwa cane and continue reading
Ibisomwa cane

End of Ibisomwa cane

Gusa, minisitiri w'intebe w'Ubutaliyani Giuseppe Conte yavuze ko atazi neza igihe ibihe bidasanzwe (lockdwon) mu gihugu bizarangirira.

Amakuru ariho ubu muri Afurika:

  • Muri Afurika imibare y'abandura ho iri kuzamuka, uyu munsi bararenge 9,000 mu gihe bari 7,000 kuwa gatandatu.
  • Muri Kenya, Batangaje ko kuva uyu munsi kuwa mbere nijoro bibujijwe kwinjira cyangwa kuva mu murwa mukuru Nairobi mu gihe cy'iminsi 21.
  • Muri Cote d'Ivoire, abigaragambya i Abidjan bashenye ikigo cyahariwe gusuzuma coronavirus bavuga ko cyegereye cyane ingo zabo.
  • Muri Ethiopia hatangajwe abantu ba mbere bishwe n'iyi ndwara kuva yahagera tariki 12/03/2020, abo ni umugore w'imyaka 60 n'umugabo w'imyaka 56.
  • Mahmoud Jebril wahoze ari Minisitiri w'intebe wa Libya yishwe n'iki cyorezo, uyu yayoboye Guverinoma yagiyeho nyuma y'ihirikwa rya Colonel Muammar Gaddafi mu 2011.
  • Tanzania imaze gutangaza abandi bantu babiri bashya babonyemo coronavirus, abayanduye bose muri iki gihugu ubu ni 24.