Coronavirus: Umubare w'abanduye Covid-19 mu Rwanda wageze kuri 60
Ahavuye isanamu, BBC Gahuza
Minisiteri y'ubuzima mu Rwanda yatangaje ko umubare w'abanduye ubu bwoko bushya bwa coronavirus mu gihugu waraye wiyongereyeho abarwayi batandatu bakagera kuri 60.
Iyi minisiteri ivuga ko abo batandatu bashya barimo bane baturutse i Dubai muri Leta Zunze Ubumwe z'Abarabu, umwe waturutse muri Amerika ndetse n'undi watahuwe ko yahuye n'urwaye coronavirus mu Rwanda.
Mu ijambo Perezida Paul Kagame w'u Rwanda yavuze ku wa gatanu, yaburiye ko umubare w'abanduye "uzakomeza uzamuke kuko hakomeje gushakishwa abahuye n'abarwayi b'iyo ndwara kugira ngo bapimwe, ndetse abagaragayeho uburwayi bavurwe".
Bwana Kagame yavuze ko ari bwo "buryo bwiza bwo gufasha abashobora kuba baranduye mu rwego rwo kurinda imiryango yabo ndetse natwe twese aho dutuye" no gutsinda iki cyorezo vuba.
- CORONAVIRUS: Yavuye he, ifata ite, yakwirindwa gute?
- IBINDI BIBAZO WIBAZA KURI IKI CYOREZO: Ibi ni bimwe mu bisubizo
- UMUBIRI UYIRWANYA GUTE: Abahanga bamenye uko bigenda
- DUSABWA KWIRINDA KWIKORA MU MASO: Twabigenza dute?
- WABA URI MU RUBYIRUKO? OMS ivuga ko utakwirara
- KWISHYIRA MU KATO: Ni ryari? Bikorwa gute? Bitanga iki?
Muri aka karere kugeza mu gitondo cyo kuri iki cyumweru, u Rwanda ni urwa kabiri mu kugira umubare w'abanduye benshi.
Rukurikiye Repubulika ya Demokarasi ya Kongo ifite abanduye 65, Kenya ifite 38, Uganda 30 na Tanzania ifite abanduye 14.
U Burundi ni bwo butaratangazwamo uwanduye coronavirus.
Iyi mibare ya Kaminuza ya Johns Hopkins yo muri Amerika igaragaza kandi ko kugeza muri iki gitondo cyo ku cyumweru, muri Afurika hari abanduye 4,229, ikaba imaze kwica 134 naho 254 bamaze kuyikira.
Ku isi abarenga 670,000 ni bo bamaze kwandura iyi ndwara ya Covid-19 yo mu myanya y'ubuhumekero iterwa na coronavirus, abarenga 31,000 imaze kubica, naho abarenga 145,000 bamaze kuyikira.
