Ubwongereza bwahagaritse umusanzu wabwo mu bunyamabanga bukuru bwa Commonwealth
Ahavuye isanamu, Getty Images
BBC yamenye ko leta y'Ubwongereza yabaye ihagaritse umusanzu wayo mu bunyamabanga bukuru bwa Commonwealth.
Uru nirwo rwego ruyobora uwo muryango uhuriweho n'ibihugu byiganjemo ibyahoze bikolonijwe n'Ubwongereza rukaba rufite ikicaro gikuru i Londres.
Abadipolomate b'Ubwongereza babwiye umunyamabanga mukuru w'umuryango wa Commonwealth Lady Scotland ko umusanzu w'iki gihugu ungana na miliyoni £4.7 utangwa ku bushake ugiye kuba uhagaritswe kugeza igihe ibiro by'ubunyamabanga bukuru bwawo ayoboye buzaba bumaze kuvugurura imicungire yabyo y'imali.
Ibyo biro ariko bishumangira ko birimo gushyira mu bikorwa inama byagiriwe n'abagenzuzi b'imali bigenga.
Iki cyemezo cy'Ubwongereza kije nyuma yaho abagenzuzi b'imali banengeye Lady Scotland bavuga ko yanyuze inyuma amategeko asanzwe agenga gupiganira amasoko igihe yemereraga isoko ikigo cy'inshuti ye - Lord Patel.
Abagenzuzi b'imali kandi basanze amategeko agenga igurwa ry'ibikoresho atarakurikijwe n'ubwo bunyamabanga bukuru ku nshuro zitari munsi 50 mu myaka itatu iri mbere.
Abunganira mu mategeko Lady Scotland bashimangira ko icyemezo cyo guha isoko ikigo cya Lord Patel cyari gisobanutse neza kandi gikurikije amategeko icyo gihe.
Ibihugu bya Nouvelle Zelande na Australia nabyo byabaye bihagaritse umusanzu wabyo utangwa ku bushake mu bunyamabanga bukuru bw'umuryango wa Commonwealth kugeza igihe imali yabwo izaba icungwa neza kandi bimaze kwemezwa n'abagenzuzi bigenga.
Iki cyemezo cy'Ubwongereza gishobora gutuma ubunyamabanga bukuru by'umuryango wa Commonwealth bwinjira mu bibazo bikomeye by'imali kandi ubuyobozi bw'umunyamabanga mukuru wawo Lady Scotland bukaba bushobora kurushaho gushyirwa mu majwi.
Abakuru b'ibihugu bigize umuryango wa Commonwealth barangije kwima amatwi abasaba ko Lady Scotland atangira manda ye ya kabiri nkuko byagombye kugenda narangiza iya mbere muri uyu mwaka.
Ubunyamabanga bw'umuryango wa Commonwealth nibwo buhurizwamo ibikorwa byo kuyobora uwo muryango ugizwe n'ibihugu 54 byiganjemo ibyahoze bikolonijwe n'Ubwongereza bikaba bituwe hafi na kimwe cya gatatu cy'abatuye isi .
Ahavuye isanamu, Getty Images
Hafi bibiri bya gatatu by'ingengo y'imali y'ubunyamabanga bukuru bwa Commonwealth - miliyoni £18.4 muri 2018 - itangwa n'ibihugu biwugize.
Ariko rero hari ikindi gice cya kabiri kijya mu kigega gishinzwe ubutwererane mu rwego rwa tekinike gitangwa ku bushake kingana na miliyoni £12, Ubwongereza akaba aribwo butanga menshi muri ayo.
Igihugu cya Nouvelle Zelande nacyo cyabaye gihagaritse umusanzu wacyo ungana na miliyoni £1.5.
Australia yo yabaye ihagaritse gutanga £414, 000 ku musanzu wayo maze ivuga ko andi £260, 000 azatangwa ari uko amavugurura atangiye gushyirwa mu bikorwa.
