Chile: 'Habonetse ibisigazwa by'abantu' nyuma yaho indege ya gisirikare iburiye

Inyandiko gusa
Ibyo bisigazwa byabonetse bireremba ku mazi mu gace iyo ndege yaburiwemo irengero ku wa mbere

Ahavuye isanamu, EPA

Insiguro y'isanamu, Ibyo bisigazwa byabonetse bireremba ku mazi mu gace iyo ndege yaburiwemo irengero ku wa mbere
Yatangajwe

Abakora mu bikorwa by'ubutabazi muri Chili babonye ibisigazwa by'abantu nyuma yaho indege ya gisirikare yarimo abantu 38 iburiwe irengero ku wa mbere, nkuko bivugwa na guverineri wo muri iyo ntara.

José Fernández, Guverineri w'intara ya Magallanes, yavuze ko abo mu miryango y'ababuriwe irengero babimenyeshejwe.

Mbere yaho, umukuru w'ingabo zirwanira mu kirere za Chili yari yavuze ko habonetse ibisigazwa bireremba ku mazi mu karere iyo ndege y'ubwikorezi ya gisirikare yo mu bwoko bwa C-130 Hercules yaburiwemo irengero.

Yari irimo kwerekeza ku kigo cya gisirikare kiri mu mpera y'epfo y'isi ya Antarctica.

Guverineri Fernández nta makuru yatanze menshi. Yagize ati: "Twabonye amakuru uyu munsi tuyahawe n'igisirikare kirwanira mu kirere, atubwira ko babonye ibisigazwa bimwe by'iyo ndege ndetse n'ibisigazwa by'imibiri y'abari muri iyo ndege".

Yongeyeho ati: "Iki ni gihe kibabaje cyane". Igisirikare cya Chili kirwanira mu kirere nticyiremeza ayo makuru.

Abo mu miryango y'abari muri iyo ndege bakomeje gutegerereza ku kigo cya Cerrillos cy'abasirikare barwanira mu kirere bategereje amakuru y'ababo

Ahavuye isanamu, AFP

Insiguro y'isanamu, Abo mu miryango y'abari muri iyo ndege bakomeje gutegerereza ku kigo cya Cerrillos cy'abasirikare barwanira mu kirere bategereje amakuru y'ababo

Guverineri yavuze ko umupine w'indege, igice kimwe cy'icyuma igwiraho iyo iguye ku kibuga ndetse n'igihimba cyayo byabonetse, kandi ko n'ibindi bice biri kureremba mu nyanja.

Iyo ndege yari mu kirere iva mu mujyi wa Punta Arenas uri mu majyepfo ya Chili yerekeza ku kigo cya gisirikare cya Presidente Eduardo Frei Montalva cyo mu mpera y'epfo y'isi ya Antarctica.

Skip Ibisomwa cane and continue reading
Ibisomwa cane

End of Ibisomwa cane

Mbere yaho, Jenerali Eduardo Mosqueira ukuriye igisirikare kirwanira mu kirere yari yabwiye abanyamakuru ejo ku wa gatatu ko ibyo bisigazwa byabonywe "bishobora kuba ari ibyo ku gice cy'imbere kijyamo amavuta y'indege".

Bwana Mosqueira yavuze ko igisirikare kirwanira mu kirere "kizakora igenzura" ngo cyemeze neza niba ibyo bisigazwa ari ibyo kuri iyo ndege yaburiwe irengero.

Iyi ndege yo mu bwoko bwa C-130 ubusanzwe ikoreshwa mu gutwara abantu n'ibintu berekeza ku kigo cya gisirikare kiri muri Antarctica

Ahavuye isanamu, AFP

Insiguro y'isanamu, Iyi ndege yo mu bwoko bwa C-130 ubusanzwe ikoreshwa mu gutwara abantu n'ibintu berekeza ku kigo cya gisirikare kiri muri Antarctica

Iyo ndege yaburiwe irengero ku wa mbere ku isaha ya saa kumi n'ebyiri n'iminota 13 z'umugoroba ku isaha yaho, nyuma gato yo guhaguruka ku kibuga cy'indege cyo mu mujyi wa Punta Arenas.

Igisirikare cya Chili kirwanira mu kirere cyatangaje ikarita igaragaza urugendo rwayo n'ikibuga yagombaga kugwaho saa moya na 17 z'umugoroba zo kuri uwo wa mbere.

Igikorwa kigari cyo gushakisha cyo mu kirere no mu mazi cyahise gitangira nyuma gato yo kuburirwa irengero kwayo.

Ibihugu bya Argentina, Brazil, Ubwongereza na Uruguay byohereje indege zo gufasha muri icyo gikorwa cyo gushakisha mu mazi akonje nk'urubura yo muri icyo gice.

Mu gihe Amerika na Israel byo biri gutanga ubufasha bw'amafoto y'ibyogajuru.