Umushingamateka w'umugore muri Kenya yasohowe kubera yitavye inama afise n'uruyoya

Umushingamateka w'umugore mu gihugu ca Kenya yasohowe mu nama nshingamateka mu gatondo k'uyu wa gatatu kubera yitavye inama afise umwana w'amezi atanu.

Uyo mushingamateka, Zulekha Hassan, yavuze ko yitavye inama afise umwana wiwe kubera yagize ikibazo kidasanzwe.

Umushingamateka Christopher Omulele yari arongoye iyo nama yategetse umupfasoni Hassan gusohoka, avuga ko inyubakwa y'inama nshingamateka atari ikibanza c'irerero ry'umwana wiwe.

Umushingamateka Omulele yavuze ati: "Jewe nk'uwurongoye inama uno munsi, mvuze nti nimba umushingamateka Zulekha akeneye gutunganya umwana wiwe, iki si ikibanza cabigenewe. Nico gituma ntegetse ko asohoka bidatevye, aze kugaruka yarungitse umwana".

Kuri bamwe, ni ibintu bitumvikana kubona hari umushingamateka asohorwa mu nama kubera afise umwana mu gihe isi isanzwe iriko ihimbaza indwi yahariwe kwonsa.

Abashingamateka b'abagabo baneguye ingingo ya Zuleika Hassan yo kwitaba inama afise umwana.

Umukuru w'umurwi w'abashingamateka benshi, Adan Duale, yavuze ko ari ingingo iteye isoni.

Mu gihe yariko arasohoka afise n'umwana wiwe, ibikorwa vy'inama nshingamateka vyahagaze umwanya muto.

Mu mwaka wa 2017, abashingamateka ba Kenya baremeje integuro y'itegeko ritegeka abakoresha kwubaka ivyumba abavyeyi bashobora kwonkerezamwo n'uguhinduriramwo abana.

Mu gihe hari abavuga ko inama nshingamateka yoyo ata cumba c'ukwonkerezamwo yateguriye abashingamateka b'abakenyezi bafise abana, itangazo ryateweko igikumu n'icegera c'umukuru wayo rivuga ko hari icumba cabagenewe co kimwe n'abandi bakozi bo mu nama nshingamateka.

Bwana Moses Cheboi avuga kandi ko abakenyezi bemerewe kujana n'abayaya babo kugira babarerere abana mu gihe bari ku kazi kabo.