Umujyi wa Venice mu Butaliyani waciye amande ba mukerarugendo batekeye ikawa hafi y'iteme

Polisi yo mu mujyi wa Venice mu majyaruguru y'Ubutaliyani yaciye amande ba mukerarugendo bakomoka mu Budage batekeye ikawa ku iteme rya Rialto.

Bombi bafite imyaka 32 na 35 y'amavuko, baciwe amande angana n'ama-euro 950 (ni agera hafi kuri miliyoni imwe mu mafaranga y'u Rwanda) kubera gutegura ikawa yo kunywa bakoresheje inkono igendanwa. Banasabwe kuva muri uwo mujyi.

Ubuyobozi bw'umujyi wa Venice bwashyizeho itegeko rihana ibintu bitandukanye bikorewe mu ruhame - birimo no gutemberera ahantu runaka no kutambara ishati mu gihe uri ahantu hahurirwa n'imbaga.

Hafi ba mukerarugendo bagera kuri miliyoni 30 basura uyu mujyi buri mwaka.

Abo ba mukerarugendo bakomoka mu murwa mukuru Berlin w'Ubudage, babonywe bari gutegura ikawa aho iteme rya Rialto ritangirira - iri rikaba ari ryo teme riruta andi mu myaka muri ane agize ikizwi nka Grand Canal. Uwabanyuzeho ni we wabibwiye polisi.

Luigi Brugnaro, umukuru w'umujyi wa Venice, yagize ati: "Venice igomba kubahwa kandi abo bantu batagira ikinyabupfura baza hano bagakora ibyo bishakiye, bagomba kubimenya. Polisi ibidufashijemo, bazajya bahanwa kandi bavanwe hano".

Yavuze ko abafashwe barenga kuri ayo mategeko, umwirondoro wabo uzajya ugezwa ku biro by'uhagarariye ibihugu bakomokamo.

Hashize igihe abaturage ba Venice binubira umubare munini wa ba mukerarugendo basura uyu mujyi - mu byo ukundirwa hakaba harimo n'ubwato bunogeye ijisho.

Mu kwezi kwa cumi na kabiri k'umwaka ushize wa 2018, uyu mujyi watsindiye gushyiraho agera ku ma-euro 10 acibwa buri mukerarugendo uwusuye by'igihe gito.