Édouard Philippe, minisitiri w'intebe w'Ubufaransa, asaba ko habaho 'ubumwe' muri iki gihe cy'imyigaragambyo mishya
Ahavuye isanamu, Reuters
Édouard Philippe, minisitiri w'intebe w'Ubufaransa, yasezeranyije "kugarura ubumwe mu gihugu" nyuma yaho hongeye kuba ibikorwa by'urugomo mu myigaragambyo yo mu mpera y'icyumweru ya kane ikurikiranye.
Polisi y'Ubufaransa yakoresheje imyuka iryana mu maso n'amasasu ya plasitike mu gutatanya abigaragambyaga ku wa gatandatu bazwi nk'abambaye "amajaketi y'umuhondo", bamagana iyongerwa ry'umusoro ku bikomoka kuri peteroli ndetse n'izamuka ry'ibiciro ku by'ibanze bicyenerwa mu buzima.
Abantu barenga 1700 batawe muri yombi, ariko ibikorwa by'urugomo ntibyari ku kigero kimwe n'ibyo mu cyumweru cyabanje.
Bwana Philippe yavuze ko ibiganiro n'abigaragambya mu mahoro "bigomba gukomeza".
Ahavuye isanamu, Getty Images
Yongeyeho ati:
"Nta musoro ukwiye guhungabanya ubumwe bwacu nk'iguhugu. Ubu tugomba kongera kubaka bundi bushya ubwo bumwe biciye mu biganiro, mu kwitabira umurimo, ndetse no gusenyera umugozi umwe".
Yavuze ko Perezida Emmanuel Macron w'Ubufaransa - abigaragambya benshi bashaka ko yegura - vuba aha "azashyiraho ingamba zo gutuma ibi biganiro bigenda neza".
Christophe Castaner, minisitiri w'ubutegetsi bw'igihugu w'Ubufaransa, yashimagije polisi y'Ubufaransa - yari yagabwe ku bwinshi - ku kuba yashoboye guhosha imyigaragambyo.
Mu butumwa yanyujije ku rubuga nkoranyambaga rwa Twitter ku wa gatandatu nijoro, Bwana Macron yashimiye inzego z'umutekano ku "murava n'ubunyamwuga budasanzwe".
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookie n'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Minisiteri y'ubutegetsi bw'igihugu y'Ubufaransa igereranya ko abantu ibihumbi 125 ari bo bitabiriye imyigaragambyo yo ku wa gatandatu yabereye mu bice bitandukanye by'iki gihugu.
Abashinzwe umutekano bagera hafi ku bihumbi 90 ni bo bagabwe mu kuyihosha, barimo ibihumbi umunani bari bagabwe mu murwa mukuru Paris ahitabajwe n'ibimodoka 12 bitamenwa n'amasasu.
Abantu barenga ibihumbi 10 ni bo bigaragambirije i Paris, aho ibikorwa byo kwangiza byiganje. Amadirishya yaramenwe, imodoka ziratwikwa ndetse n'amaduka arasahurwa.
Ahavuye isanamu, Reuters
Videwo yagaragaje abigaragambya bagezweho n'amasasu ya plasitike - harimo no mu maso. Abanyamakuru batatu na bo bari mu bagezweho n'ayo masasu ya plasitike.
Bwana Castaner yavuze ko abapolisi 17 na bo bakomeretse.
Ikusanyabitekerezo ryatangajwe ku wa gatanu ryagaragaje ko abashyigikiye iyi myigaragambyo bagabanutse, ariko ko igishyigikiwe n'abagera kuri 66% by'Abafaransa.
Hagati aho, iri kusanyabitekerezo ryongeyeho ko Abafaransa bakunda Perezida Macron bagabanutse bakagera ku kigero cya 23% muri iki gihe cy'imyigaragambyo.
Ni iki leta y'Ubufaransa yemereye abigaragambya?
Yatangaje ko ikuye mu ngengo y'imari inyongera zamaganwe na rubanda zo ku musoro w'ibikomoka kuri peteroli ndetse ko yahamishije ku kigero biriho ibiciro by'umuriro na gas mu mwaka utaha wa 2019.
Ikibazo ni uko imyigaragambyo yavutse ku bindi bibazo.
Gukemura ibyo abigaragambya basaba ku bibazo bimwe, bishobora kudacubya uburakari bw'abigaragambya bose.
Bamwe muri bo basaba kongererwa imishahara, abandi kugabanyirizwa imisoro, abandi kongererwa amafaranga yo mu gihe cy'izabukuru, koroherezwa kwinjira muri kaminuza, ndetse no kwegura kwa perezida.
Bamwe mu banenga Bwana Macron bamwita "perezida w'abakire".
Bwana Macron ashinja abatavuga rumwe na we kuba ari bo bari inyuma y'iyi myigaragambyo mu rwego rwo kuburizamo amavugurura y'ubutegetsi bwe.
