Man Utd: Solskjaer 'ariyizeye' nubwo ikipe ihagaze nabi. Arivana imbere ya Arsenal?
Ahavuye isanamu, Getty Images
Umutoza Ole Gunnar Solskjaer w'ikipe ya Manchester United avuga ko ari mu mwanya mwiza wo gutoza iyi kipe, nubwo ubu ihagaze nabi mu Bwongereza.
Kuva yahabwa akazi nk'umutoza w'igihe kirambye mu kwezi kwa gatatu, uyu mugabo amaze gutsinda imikino itanu mu mikino 18.
Solskjaer w'imyaka 46 ubu aza ku mwanya wa kabiri ku rutonde rw'abatoza bashobora kwirukanwa, inyuma ya Marco Silva utoza Everton.
Bwana Solskjaer agira ati: "Hoya, ntabwo nishidikanyaho, bibaye ari ibyo n'isi yose yabigenza ityo".
Uyu munsi kuwa mbere Manchester irakira ikipe ya Arsenal, irakina uyu mukino mu gihe ubu irushwa amanota 13 na Liverpool.
Solskjaer avuga ko baheruka kugira ibiganiro byagutse kandi noneho ubu "bizeye neza icyo bagiye gukora".
Barakira Arsenal mu gihe banafite ikibazo cy'umutoza w'abanyezamu Emilio Alvarez uherutse kugenda.
Alvarez, wakoranaga neza na David de Gea kuko banabanye muri AtleticoMadrid, ububasha bwe yarabwambuwe buhabwa Richard Hartis wagizwe umutoza mukuru w'abanyezamu.
Hartis, wigeze kumara imyaka 10 atoza muri United, mu bihe bishize yakoranye na Solskjaer mu makipe ya Molde na Cardiff.
Ahavuye isanamu, Getty Images
Kuwa kabiri ushize, Ed Woodward umuyobozi mukuru wungirije wa United yatangaje ko Solskjaer azahabwa igihe kugira ngo ashyire imigambi ye mu bikorwa.
Bishaka gusobanura ko Solskjaer ashobora kuguma muri iyi kipe nubwo iyi shampiyona yarangira atayigejeje mu makipe ane ya mbere.
Kugeza ubu iyi kipe birayigoye cyane gutsinda ibitego, kuva yatsinda bine mu mukino utangiza shampiyona bakinnyemo na Chelsea, ntibarongera kurenza igitego kimwe mu mukino irindwi.
Anthony Martial na Marcus Rashford baravunitse ntabwo bari bukine na Arsenal, ubu barakina bacungira ibitego kuri rutahizamu Mason Greenwood w'imyaka 17.
Nubwo amaze gutsinda ibitego bibiri, hari abacyibaza ukuntu ikizere cyo gutsindira ikipe gihabwa uyu musore muto mu gihe baretse abakinnyi nka Romelu Lukaku na Alexis Sanchez bakagenda.
Kuri ibi, Solskjaer yagize ati: "Rom ntiyashakaga kuguma hano. Bimaze iki kugumana umukinnyi utabishaka?"
