Dros Frecwast
BBC Radio Cymru

Mae’r cyffro at 2027 wedi codi “hyd yn oed yn fwy” ar ôl wythnos yma yn ôl cadeirydd pwyllgor gwaith Eisteddfod yr Urdd Bro'r Wenynen.

“Ar ôl yr wythnos yma bydd y gêr yn codi i'r nesaf heb os ac onibai - ac felly byddwn yn mynd â'r holl afiaith a'r asbri ni wedi gweld a’i deimlo nôl gyda ni a gobeithio paratoi ar gyfer eisteddfod gwerth chweil y flwyddyn nesaf,” meddai Elin Maher.

Dywedodd nad oedden nhw’n poeni gormod am dargedau ariannol gan mai eu blaenoriaeth yw cyrraedd pob cymuned.

Meddai: “[Rydym yn] ceisio ein gorau i gyrraedd ac i greu a chynnal gweithgarwch ym mhob cymuned ar draws y pum sir. Y lleoliad fydd Casnewydd y flwyddyn nesaf ond mae'r pum sir yn mynd i fod yn cyfrannu.

“Ni'n mynd i rannu'r cyfrifoldeb yna. Ni wedi edrych ar darged Môn, maen nhw wedi bod yn wych iawn, ond wrth gwrs mae’n rhaid ni gofio bod ein hardal ni yn ardal eitha’ gwahanol i Fôn - mae'n ardal fwy poblog ac mae'n ardal sydd â gwahanol elfennau o fewn y gymuned.

“A gobeithio gawn ni gefnogaeth y gymuned - ni wedi cael e'n barod ond hyd yn oed yn fwy dros y misoedd i ddod.”

Eisteddfod yr Urdd

Wedi'r eisteddfod eleni bydd y sylw yn troi i Gasnewydd.

Mae rhanbarth Gwent yn edrych ymlaen i groesawu Eisteddfod yr Urdd 2027 i Dŷ Tredegar.

Dyma fydd y tro cyntaf erioed i Eisteddfod yr Urdd ymweld â Chasnewydd.

Mae rhanbarth Gwent yn cynnwys Caerffili, Blaenau Gwent, Torfaen, Casnewydd a Sir Fynwy, a bydd y pum ardal yn cydweithio gyda'i gilydd i sicrhau bod Eisteddfod yr Urdd Bro'r Wenynen, Gwent 2027 yn llwyddiant, medd y trefnwyr.

Mae Mali yn fyfyrwraig ym Mhrifysgol Caerdydd ac yn gweithio ar stondin y Coleg Cymraeg Cenedlaethol ddoe a heddiw - ac yn mwynhau’r haul!

Mae Llew Dafydd o Gwm-ann yn meddwl bod hi'n 'Steddfod dda!

Roedd yna ychydig o wynt ar y maes ben bore - ond mae'n argoeli'n ddiwrnod braf unwaith eto yng Ngwalchmai.

Mae Gwenan a Siwan o Gaerfyrddin yn barod am ddiwrnod o fwynhau ar y maes.

Eisteddfod yr Urdd

Mae wedi bod yn Eisteddfod lwyddiannus yn ôl y ffigyrau sy'n dangos faint sydd wedi cystadlu.

Roedd 118,089 wedi cofrestru i gystadlu - y nifer mwyaf erioed ar gyfer Eisteddfod a gynhaliwyd yn y gogledd.

Hefyd, roedd mwy nag erioed o blant a phobl ifanc Ynys Môn wedi cofrestru i gystadlu yn yr eisteddfodau eleni - 14,060.

Mae Maria wedi dod o Lerpwl i weld ei hŵyr, Zephyr o Ysgol Pennal, yn derbyn gwobr ar ôl iddo ddod yn ail yn un o gystadlaethau celf a chrefft yr Eisteddfod.

“Mae’r Eisteddfod yn wych i bobl ddi-Gymraeg - dwi wedi cael cymaint o groeso,” meddai.

“Dwi mor falch bod Zephyr wedi ennill gwobr genedlaethol.

"Mae’n arbennig bod cystadlaethau ar gael i bawb. Mae hygyrchedd y maes hefyd wedi bod yn wych. Canmol mawr!’”

Cyfle am un ymarfer olaf cyn i Ysgol Nantgaredig, Sir Gaerfyrddin, gystadlu yn y dawnsio gwerin.

Tra bod rhai wrth eu boddau yn canu, llefaru a dawnsio ar y llwyfan, mae 'na ddigon o gystadlaethau eraill ar gael.

Un o'r rheiny ydi'r Poburdd, y gystadleuaeth goginio, a dwy sy'n cystadlu eleni ydi Emilie o Ysgol Bodedern a Gwenlli o Ysgol Amlwch.

Fe fydd ‘na ambell un blinedig ar y maes bore ‘ma ar ôl iddyn nhw fod yn rhan o’r sioe ieuenctid neithiwr.

Roedd y llwyfan yn llawn o blant a phobl ifanc yn canu a dawnsio yn Ffawd a Ffydd gan y dramodydd Branwen Davies.

Dywedodd cyfarwyddwr cerdd y sioe Catrin Angharad Jones bod y cast yn ‘arbennig’ ac wedi gweithio’n ‘eithriadol o galed’.

Meddai: “Maen nhw wedi bod yn rhoi eu penwythnosau nid jyst i'r sioe, maen nhw wedi bod yn cystadlu gyda'u hysgolion, maen nhw’n cystadlu gyda’u haelwydydd, maen nhw werth eu pwysau mewn aur.

"Ac ynghanol hyn i gyd mae ‘na domen wedi bod yn ymgymryd gyda'u harholiadau. Felly sgen i ddim byd ond edmygedd a balchder yn ein pobl ifanc ni.”

Ffynhonnell y llun, Llun cyfrannydd

Mae Menna Lloyd Williams o Aberystwyth wedi dychwelyd am wythnos i fro ei mebyd ym Môn ac wedi cael Eisteddfod i'w chofio.

Ffynhonnell y llun, Llun cyfrannydd

Dyma un ffordd o grwydro’r maes!

Alaw a’i mam - Menna o Gaerfyrddin - ben bore.

Yn yr Adlen tipyn o sŵn cyn hir gan bod y gystadleuaeth chwarae drymiau ar fin cychwyn.

Mae cryn edrych ymlaen!

Dros Frecwast
BBC Radio Cymru

Wrth i’r Eisteddfod saith diwrnod cyntaf ddirwyn i ben dywedodd prif weithredwr yr Urdd bod yr ymateb i’r drefn newydd wedi bod yn bositif.

Dywedodd Siân Lewis bod yr Urdd wedi trafod gydag eisteddfodwyr drwy’r wythnos er mwyn addasu ar gyfer y flwyddyn nesaf.

Roedd y newidiadau yn cynnwys ehangu cyfnod yr eisteddfod, dechrau ar y dydd Sadwrn a chael cystadlaethau i bobl ifanc ar y penwythnos cyntaf a’r plant iau ar ddiwedd yr wythnos.

Ar Dros Frecwast dywedodd y Prif Weithredwr: “Ni wedi bod yn gwrando drwy gydol yr wythnos ar safbwyntiau athrawon, safbwyntiau pobl ifanc a rhieni i sicrhau wrth symud ymlaen bod ni yn neud unrhyw addasiadau sydd yn angenrheidiol i sicrhau bod yr amserlen yn llifo i ddisgwyliadau pawb.

“Gallai ddweud bod yr ymateb ni wedi cael hyd yma wedi bod yn galonogol dros ben.”

Mae’r Urdd wedi bod yn annog pobl i lenwi holiaduron er mwyn rhannu eu barn a bydd y rheiny yn parhau ar gael am rai wythnosau wedi diwedd yr Eisteddfod.

Meddai Ms Lewis: “Mae'r ymatebion wedi bod yn bositif, a nifer yn gweld y peth fel rhywbeth maen nhw eisiau gweld yn parhau.

“Byddwn yn rhoi gwybod i aelodau'r Urdd cyn mis Medi am y trefniadau bydd yn digwydd o nawr ymlaen.”

Wrth gyrraedd ar y bore olaf dywedodd Ollie, swyddog hygyrchedd Eisteddfod yr Urdd:

“Rydyn ni wedi bod wrthi ers tro yn gwneud yn siŵr bod y maes mor hygyrch â phosib.

"Mae yna doiledau arbennig yma ar gyfer dibyniaeth uchel, yn ogystal â chwmni PIWS sy’n darparu cymorth i deuluoedd sydd â phlentyn ag anabledd.”

Mae Loti a’i theulu o Bontypridd yma am y trydydd diwrnod.

Mae Loti’n cystadlu yn y parti llefaru a’r ymgom heddiw.

Criw Lân Las o Abertawe ar y ffordd i gystadlu ar y dawnsio gwerin.

Maen nhw wedi bod wrthi drwy’r nos yn smwddio’r gwisgoedd!

Mae Mabli o Lanarmon Dyffryn Ceiriog wedi gael 'steddfod brysur wrth iddi gystadlu gydag ysgol Llanarmon ac Aelwyd Dyffryn Ceiriog.

Heddiw mae hi a'i chwaer Buddug yn cystadlu yn yr ymgom.

Eisteddfod yr Urdd

Mae'r cystadlu yn dechrau am 09:00 a'r cystadlaethau cyntaf yw:

Unawd Llinynnol (ac eithrio'r gitâr) Bl. 6 ac iau yn y Pafiliwn Coch

Unawd Offer Taro Bl.6 ac iau yn Yr Adlen

Deuawd Cerdd Dant Bl. 6 ac iau - yn y Pafiliwn Gwyn

Perfformio Golygfa Bl. 6 ac iau yn y Pafiliwn Gwyrdd

Mae'n ddiwrnod olaf wythnos Eisteddfod yr Urdd Ynys Môn - eisteddfod gwbl arloesol gan bod y cystadlu wedi para am saith diwrnod cyfan.

Y plant ieuengaf - Blwyddyn 6 ac iau - fydd yn cloi'r Eisteddfod.

Prif seremoni'r dydd fydd coroni'r llenor buddugol.

Arhoswch gyda ni.