Crynodeb

  • Syr Keir Starmer yn cyhoeddi y tu allan i 10 Downing Street y bydd yn ymddiswyddo fel arweinydd y blaid Lafur

  • Mae Prif Weinidog y DU wedi wynebu pwysau cynyddol i ymddiswyddo dros y penwythnos

  • Daw hynny yn dilyn buddugoliaeth Andy Burnham yn isetholiad Makerfield yr wythnos diwethaf, ond roedd pwysau wedi bod ar Syr Keir ers rhai misoedd bellach

  • Bydd yn aros yn brif weinidog tan i olynydd gael ei ethol

  • Mae Andy Burnham wedi cadarnhau y bydd yn ymgeisio am yr arweinyddiaeth, ac mae Wes Streeting - oedd yn cael ei weld fel ymgeisydd arall posib - wedi ei gefnogi

  • Mae Starmer wedi dilyn y strategaeth wleidyddol anghywir trwy geisio apelio at bleidleiswyr asgell dde, yn ôl Golygydd Materion Cymreig y BBC Vaughan Roderick

Y diweddaraf yn fyw

  1. Keir Starmer i ymddiswyddo fel Prif Weinidog y DU
    Newydd dorri

    Mae Syr Keir yn dweud ei fod yn bwriadu ymddiswyddo fel Prif Weinidog y DU.

  2. Keir Starmer yn dechrau ei ddatganiad
    Newydd dorri

    Mae Syr Keir Starmer wedi camu allan o 10 Downing Street ac mae wedi dechrau ar ei ddatganiad.

    Mae'n dechrau trwy ddweud cymaint o lwyddiannau mae ei blaid wedi eu cyflawni yn eu dwy flynedd mewn grym.

    Ond does bosib bod cyhoeddiad mawr i ddod...

  3. Disgwyl i Keir Starmer ymddiswyddo

    Y disgwyl yw y bydd Syr Keir Starmer yn ymddiswyddo fel Prif Weinidog y DU y bore 'ma, ar ôl colli cefnogaeth rhai o aelodau allweddol y blaid Lafur.

    Daw ei gyhoeddiad yn dilyn cyfnod cythryblus i'r llywodraeth, sydd ond mewn grym ers Gorffennaf 2024.

    Wedi canlyniadau trychinebus i Lafur mewn etholiadau ar draws y DU, fe wnaeth dwsinau o ASau alw'n gyhoeddus am newid gan gynnwys - maes o law - aelodau amlwg o fewn y cabinet.

    Fe wnaeth y pwysau gynyddu ar y prif weinidog wedi i gyn-Faer Manceinion, Andy Burnham ennill is-etholiad Makerfield ddydd Iau diwethaf, gyda'r disgwyl ei fod â'i fryd ar olynu Syr Keir yn Downing Street.

  4. Croeso

    Bore da a chroeso i'n llif byw ar ddiwrnod allai fod yn un enfawr i wleidyddiaeth yn y Deyrnas Unedig.

    Mae'r prif weinidog Syr Keir Starmer ar fin gwneud cyhoeddiad y tu allan i 10 Downing Street o fewn y munudau nesaf, wrth i'r pwysau gynyddu arno i ymddiswyddo.

    Arhoswch gyda ni am y diweddaraf wrth i ni ddod â'r holl ymateb i chi ar ein llif byw.