Arweinydd Plaid Cymru, Rhun ap Iorwerth, wedi ei ethol yn brif weinidog
Dywedodd yn ei araith fod "ein dyddiau gorau o'n blaenau" i Gymru
Huw Irranca-Davies o'r blaid Lafur wedi'i ethol yn Llywydd, a Kerry Ferguson o Blaid Cymru yn ddirprwy Lywydd
Roedd y Gwyrddion wedi cefnogi ethol Rhun ap Iorwerth, tra bo' Llafur a'r Democratiaid Rhyddfrydol wedi ymatal
Roedd aelodau Reform wedi pleidleisio o blaid Dan Thomas, a'r Ceidwadwyr o blaid Darren Millar
Dyma oedd y tro cyntaf i'r Senedd gwrdd ers yr etholiad yr wythnos diwethaf
Plaid Cymru enillodd y mwyaf o seddi yn yr etholiad - 43 - ond maen nhw chwe aelod yn brin o fwyafrif
Enillodd Reform 34 sedd, Llafur 9, Ceidwadwyr 7, Y Blaid Werdd 2, a'r Democratiaid Rhyddfrydol 1
Mae'r holl aelodau wedi pleidleisio, ac rydyn ni'n aros am ganlyniad swyddogol.
Mae aelodau Llafur a'r unig Ddemocrat Rhyddfrydol yn y Senedd wedi atal eu pleidlais, felly y disgwyl yw y bydd Rhun ap Iorwerth yn llwyddiannus.
Mae Rhun ap Iorwerth yn cael ei enwebu gan Blaid Cymru.
Enwebir Darren Millar gan y Ceidwadwyr.
Mae Dan Thomas yn cael ei enwebu gan Reform.
Mae'r holl aelodau nawr yn pleidleisio ar lafar.
Bydd y bleidlais i gadarnhau pwy fydd brif weinidog yn digwydd wrth i aelodau gyhoeddi enw ar lafar fesul un.
Mae’r drefn hon ychydig yn anghyffredin, a dydyn ni ddim fel arfer yn gweld y math yma o bleidlais yn digwydd yn y Senedd - mae’n golygu bod enwau Aelodau’r Senedd yn cael eu darllen yn uchel fesul un.
Bydd yn rhaid i bob aelod nodi ar lafar pwy maen nhw’n ei gefnogi.
Bydd arweinwyr yn gorfod enwi eu hunain - felly bydd Rhun ap Iorwerth yn gorfod dweud ei fod yn cefnogi Rhun ap Iorwerth.
Dylai arweinydd Plaid Cymru gael ei ethol am fod ganddo gefnogaeth y Blaid Werdd, tra bod disgwyl i’r blaid Lafur a’r Democratiaid Rhyddfrydol ymatal.
Yr enillydd fydd un ai:
Rydym yn symud ymlaen i enwebiadau ar gyfer prif weinidog.
Y dirprwy Lywydd newydd yw Kerry Ferguson, AS newydd Plaid Cymru.
Roedd hi'n arfer bod yn Faer ar dref Aberystwyth, ac mae'n AS ar gyfer Ceredigion Penfro - sy'n cwmpasu ardaloedd Ceredigion a Sir Benfro.
Mae Ms Ferguson yn newydd i'r Senedd ac roedd yn rhan o'r criw Plaid Cymru newydd yn etholiadau'r Senedd yr wythnos diwethaf.
Mae hi'n olynu David Rees fel dirprwy Lywydd, oedd wedi methu â chael ei ailethol y tro hwn.
Mae Plaid Cymru yn cynnig enw Kerry Ferguson i fod yn ddirprwy Lywydd.
Nid oes enwebiad arall, ac nid oes gwrthwynebiad, felly mae hi'n cael ei hethol.
Ffynhonnell y llun, Senedd CymruGwyliwch araith Huw Irranca-Davies wrth iddo gyflwyno ei achos i'w gyd-aelodau ei ethol yn Llywydd yn gynharach.
Huw Irranca-Davies yw'r Llywydd newydd
Mae'r aelodau yn ôl yn y Siambr ac mae Elin Jones yn cyhoeddi canlyniad y bleidlais i ethol Huw Irranca-Davies yn Llywydd.
O blaid - 85
Ymatal - 1
Yn erbyn - 9
Felly mae Huw Irranca-Davies wedi ei ethol yn Llywydd y Senedd, ac ef sy'n cadeirio ar unwaith.
Yr eitem nesaf yw ethol dirprwy Lywydd.
Ffynhonnell y llun, Senedd CymruI'ch atgoffa, mae pleidlais gudd yn digwydd ar hyn o bryd er mwyn ethol Llywydd - mae'r ffrwd gwylio wedi'i atal am y tro tra bod hynny'n digwydd.
Huw Irranca-Davies yw'r unig enwebiad, felly pleidlais o'i blaid neu yn erbyn fydd hon.
Mae BBC Cymru’n deall bod yr AS Ceidwadol Darren Millar wedi gwrthwynebu'r enwebiad.
Mae'n rhaid i'r ASau aros i bleidleisio mewn ystafell ger siambr y Senedd.
Wedi hynny bydd dirprwy Lywydd yn cael ei ethol. Yr awgrym ar hyn o bryd yw mai Kerry Ferguson o Blaid Cymru fydd yr unig enwebiad.
Yna, bydd y broses o ethol prif weinidog yn dechrau.
Dros Ginio
BBC Radio Cymru
Heddiw mae’r 96 aelod newydd yn cwrdd am y tro cyntaf yn y Senedd - ond unwaith y bydd y prif weinidog, Llywydd a’r dirprwy Lywydd wedi eu hethol, faint o gyd-weithio fydd yn digwydd?
Er na fydd Llafur yn gallu ffurfio llywodraeth am y tro cyntaf ers dechrau datganoli, mae ganddyn nhw dal rym, meddai’r sylwebydd gwleidyddol yr Athro Syr Deian Hopkin.
Dywedodd ar raglen Dros Ginio ar BBC Radio Cymru: “Yn y pendraw y cwestiwn mawr ydi beth mae Llafurwyr yn y Senedd - naw ohonyn nhw - yn mynd i wneud, achos mae ganddyn nhw safle mathemategol o fewn y Senedd.
"Achos mae’n rhaid i’r llywodraeth newydd, fydd yn cael ei arwain gan Blaid Cymru, bydd rhaid iddyn nhw ddibynnu ar rai elfennau o’r blaid Lafur i’w cefnogi nhw.
"Mae hynny’n mynd i fod yn gwestiwn diddorol iawn - sut i ddatrys hynny.”
Cemlyn Davies
Gohebydd Gwleidyddol BBC Cymru
Mae 'na ddwsinau o ymgyrchwyr a chefnogwyr Plaid Cymru wedi ymgasglu yn aros i gael mynd i’r oriel i weld Rhun ap Iorwerth yn cael ei ethol yn Brif Weinidog.
Mae’r cyn-arweinydd Ieuan Wyn Jones yma, yn ogystal â’r cyn-Aelod Seneddol ac Aelod Cynulliad Cynog Dafis.
Elliw Gwawr
Gohebydd Gwleidyddol BBC Cymru
'Da ni’n aml yn gweld cryn dipyn o ddadlau a ffraeo rhwng y pleidiau yn y siambr yma.
Ond y gwirionedd yw bod gan yr aelodau lot o barch i’w gilydd ac mae 'na ffrindiau ar draws y pleidiau hefyd.
Wrth i'r aelodau fynd allan i bleidleisio nawr, daeth arweinydd y Ceidwadwyr Darren Millar i fyny at Rhun ap Iorwerth Plaid Cymru i ysgwyd ei law, gyda Huw Irranca-Davies o’r blaid Lafur - yr unig enwebiad i fod yn Llywydd - yn ymuno â nhw am sgwrs hefyd.
Tra bod yr aelodau’n dal i bleidleisio mae Huw Irranca-Davies yn cael gwers sydyn ar sut mae defnyddio cyfrifiadur y Llywydd.
Mi fydd ganddo reolaeth dros feicroffonau’r holl aelodau unwaith y mae yn y sedd.
Dyma oedd yr olygfa yn y prynhawn 'ma wrth i aelodau etholedig newydd Plaid Cymru gyrraedd y Senedd.
Grŵp Plaid Cymru yn cerdded i'r Siambr
Elliw Gwawr
Gohebydd Gwleidyddol BBC Cymru
Dwi’n deall y bydd Plaid Cymru yn cynnig enw Kerry Ferguson ymlaen i fod yn ddirprwy Lywydd.
Byddai hyn yn golygu bod Elin Jones yn pasio’r baton ymlaen i aelod arall o Geredigion - er, fel dirprwy yn hytrach na Llywydd.
Dywed Huw Irranca-Davies bod ganddo y "profiad eang" ar gyfer y swydd a'i fod "yn credu yng ngrym y sefydliad democrataidd hwn i wella bywydau pobl yng Nghymru".
"Os caf fy ethol, dwi'n addo gweithio gyda phawb yn y siambr, gydag atebolrwydd ac yn ddiduedd".
Bydd pleidlais gyfrinachol nawr yn cael ei chynnal, ac mae'r cyfarfod wedi'i atal er mwyn galluogi i aelodau wneud hynny.
Mae Huw Irranca-Davies yn cael ei enwebu ac yn cael ei eilio.
Mae Paul Davies yn cael ei enwebu ond ddim yn cael ei eilio.
Dim ond Huw Irranca-Davies sy'n symud ymlaen felly.
Ond gan fod rhywun yn dweud eu bod yn gwrthwynebu, rydyn ni nawr yn disgwyl pleidlais.
Yn gyntaf, mae gan Mr Irranca Davies y cyfle i gyflwyno ei achos i'r Senedd.
Yr eitem gyntaf yw ethol Llywydd i olynu Elin Jones.
Mae hi'n llongyfarch y 96 Aelod newydd ac yn eu hatgoffa o'r "disgwyliadau uchel" gan bobl Cymru.
Mae'r cadeirydd, Ms Jones, yn galw am enwebiadau.
Rhaid i enwebiad gael ei eilio gan aelod nad yw'n perthyn i'r un grŵp gwleidyddol â'r aelod sy'n enwebu.
Mae'r cyfarfod wedi dechrau - gallwch wylio'r trafodaethau yn fyw trwy glicio'r eicon chwarae ar frig y llif.
Dros Ginio
BBC Radio Cymru
Doedd hi ddim yn glir doe a fyddai'r bleidlais i ethol prif weinidog yn mynd yn ei blaen heddiw, oherwydd ansicrwydd ynghylch pwy fyddai'n cymryd swydd y dirprwy Lywydd.
Yn ôl rheolau sefydlog y Senedd, os yw'r Llywydd yn aelod o wrthblaid, yna mae rhaid i'r dirprwy Lywydd fod yn aelod o'r llywodraeth.
Gydag enwau Huw Irranca-Davies o Lafur a Paul Davies o'r Ceidwadwyr eisoes yn y ras i fod yn Llywydd, roedd disgwyl i Blaid Cymru enwebu dirprwy - rhywbeth mae’r blaid bellach wedi cadarnhau y byddan nhw’n ei wneud.
Yn ôl Dr Elin Royles o Brifysgol Aberystwyth, y rheswm am yr ansicrwydd ydi’r effaith ar y llywodraeth newydd - gan nad ydi'r Llywydd na'r dirprwy fel rheol yn cael pleidleisio.
“Mae ‘na bwysau wedi bod ar Blaid Cymru i fod yn enwebu heddiw ond mi fydd hynna wrth gwrs yn effeithio ar eu mwyafrif nhw fel llywodraeth a dyna pam oedden nhw ychydig yn anfoddog i neud hynny,” meddai Dr Royles ar raglen Dros Ginio ar BBC Radio Cymru.
“Felly mae [ethol y llywydd a’r dirprwy] yn broses ond mae’n broses bwysig er mwyn i’r Senedd allu gweithio mewn ffordd effeithiol ac mae nifer o rolau pwysig o gwmpas y rôl - yn cadeirio'r cyfarfodydd llawn ond hefyd bod yn wleidyddol ddiduedd ac yn y blaen yn y Siambr ac yng ngwaith y Senedd.”
Dros Frecwast
BBC Radio Cymru
Mae Plaid Cymru wedi dweud y byddan nhw'n enwebu dirprwy Lywydd, ond dyw hi ddim yn glir hyd yma pwy fydd hynny.
Mae diddordeb gan "fwy nag un" o fewn Plaid Cymru mewn bod yn ddirprwy Lywydd, yn ôl un o ASau'r blaid.
Dywedodd Llyr Gruffydd ar Dros Frecwast y bore 'ma bod "dau ymgeisydd arbennig iawn" i fod yn Llywydd - Huw Irranca-Davies a Paul Davies.
Er y byddai'n ddigon hapus gweld un yn llywydd a'r llall yn ddirprwy, "nid dyna sy’n cael ei ganiatáu o fewn y rheolau".
Gyda'r disgwyliad y bydd Plaid Cymru'n ffurfio'r llywodraeth nesaf, dywedodd: "Ein bwriad ar hyn o bryd yw bydd un o’r gwrthbleidiau ac un o’r llywodraeth.”