အမေရိကန်ရွေးကောက်ပွဲ - အကြိတ်အနယ်ပြည်နယ်တွေနဲ့ စာတိုက်မဲတွေ အရေးပါလာ

တိုက်ရိုက် ထုတ်လွှင့်ချက်

1. ၃ နိုဝင်ဘာ ၂၀၂၀အမေရိကန်ရွေးကောက်ပွဲမှာ ဖြစ်လာနိုင်တဲ့ သတင်း ၃ ခု, ဘီဘီစီ သတင်းထောက် ဂျွန် ဆိုပယ်က အခုလို မှန်းဆထား

   ရွေးကောက်ပွဲမတိုင်ခင်လုပ်တဲ့ နိုင်ငံတစ်ဝန်းလူထုစစ်တမ်းတွေအရ မစ္စတာ ဘိုင်ဒန်က ရှေ့ကပြေး နေတာ ဆိုပေမဲ့ အဆုံးအဖြတ် ပြည်နယ်တွေမှာတော့ သူမသာ ကိုယ်မသာ အခြေအနေ မှာသာ ရှိနေတာပါ။

   အမေရိကန် သမ္မတရွေးကောက်ပွဲတွေမှာ မဲဆန္ဒရှင်တွေက ပြည်နယ်အလိုက်မဲပေးကြရတာဖြစ်ပြီး အဲဒီပြည်နယ်တွေမှာ သတ်မှတ်ထားတဲ့ သူတို့အခေါ် သမ္မတရွေးချယ်ရေးအဖွဲ့ မဲ (electoral college vote) အနည်းဆုံး ၂၇၀ မဲ ရမှ သက်ဆိုင်ရာ ယှဉ်ပြိုင်သူ သမ္မတလောင်းဟာ သမ္မတအဖြစ် ရွေးချယ်ခံရမှာပါ။ စုစုပေါင်း သမ္မတရွေးချယ်ရေးအဖွဲ့ မဲအရေအတွက်က ၅၃၈ မဲရှိပြီး ပြည်နယ်တွင်းက လူဦးရေ အနည်းအများအလိုက် သက်ဆိုင်ရာ ပြည်နယ်က ပေးပိုင်ခွင့်ရှိတဲ့ သမ္မတရွေးချယ်ရေးအဖွဲ့မဲ အရေအတွက်က ကွဲပြားသွားပါတယ်။ အပြည့်အစုံကို ဒီလင့်ခ်မှာ ဖတ်နိုင်ပါတယ်။

2. ၃ နိုဝင်ဘာ ၂၀၂၀မဲရေတွက်မှုက ရှုပ်ထွေးနိုင်တယ်လို့ ဒေါ်နယ် ထရမ့်ပြော, စာတိုက်က ကြိုတင်မဲတွေကို ၃ရက်ကြာအထိ ရေတွက် နိုင်တယ်လို့ တရားရုံးချုပ်က အမိန့်ချထား

   အမေရိကန် သမ္မတ ဒေါ်နယ် ထရမ့်ဟာ ဗာဂျီးနီးယား ပြည်နယ်၊ အာလင်တန် မြို့က ရီပတ်ဘလီကန် အမျိုးသားကောင်စီ ရှိရာကို သွားရောက်ခဲ့ပါတယ်။

   အဲဒီမှာ သူ့ရဲ့ မဲဆွယ်စည်းရုံးရေးမှာ ပါဝင်ကူညီခဲ့ကြသူတွေနဲ့ တွေ့ဆုံခဲ့ပြီး ကျေးဇူးတင် စကားဆိုခဲ့ပါတယ်။

   တရားရုံးချုပ်က အမိန့်ချမှတ်ထားတဲ့ စာတိုက်က ကြိုတင်မဲတွေကို ၃ရက်ကြာအထိ ရေတွက် နိုင်တယ် ဆိုတဲ့ ကိစ္စကိုလည်း သူက ထပ်မံဝေဖန်လိုက်ပါတယ်။

   ရွေးကောက်ပွဲပြီးနောက်ပိုင်းရက်တွေ အထိ မဲတွေကို ရေတွက်တာက ရှုပ်ထွေးမှု အများကြီ ဖြစ်စေတယ်လို့လည်း ဒေါ်နယ် ထရမ့်က ဆိုပါတယ်။ အလားတူ ပြောဆိုမှုကို သူ့ရဲ့ လူမှုကွန်ရက် တွစ်တာမှာ တင်ခဲ့ပေမယ့် တွစ်တာ ဘက်က အဲဒီပို့စ်ဟာ သတင်းမှား တမင်ပေးတာဆိုပြီး ဖယ်ရှား ခဲ့ပါတယ်။

   ရွေးကောက်ပွဲညမှာ အလားအလာကောင်းတယ်လို့လည်း သူက ဆိုလိုက်ပြီး၊ ဖလော်ရီဒါနဲ့ တက္ကဆက်က မဲဆွယ်စည်းရုံးမှုတွေကလည်း အခြေအနေ ကောင်းမွန်တယ်လို့ သူက ပြောပါတယ်။

3. ၃ နိုဝင်ဘာ ၂၀၂၀အမေရိကန် သမ္မတ ရွေးကောက်ပွဲ ကျင်းပ, ရွေးကောက်ပွဲရဲ့ အဖြေကိုရော ဘယ်တော့ သိနိုင်ကြမလဲ

   အမေရိကန် ပြည်ထောင်စုမှာ သမ္မတရွေးကောက်ပွဲ ကျင်းပပြီ ဖြစ်ပါတယ်။ ရွေးကောက်ပွဲရဲ့ အဖြေကိုရော ဘယ်တော့ သိနိုင်ကြမလဲ။ များသောအားဖြင့်ကတော့ နောက်တနေ့ မနက်ပိုင်း အစောပိုင်းမှာ ဘယ်သူနိုင်တယ်ဆိုတာ အဖြေထွက်လာလေ့ ရှိတတ်ပါတယ်။ ဒါပေမယ့် ဒီတကြိမ်ကတော့ တမျိုးဖြစ်နိုင်ပါတယ်။ ဒါကလည်း စာတိုက်ကနေ ထည့်ရတဲ့ ကြိုတင်မဲတွေကြောင့် ဖြစ်တယ်လို့ အာဏာပိုင်တွေက ဆိုပါတယ်။ ဘီဘီစီသတင်းထောက် ဟာနန် ရာဇက်ရဲ့ သတင်းကို မသီဒါနွယ်က ပြောပြမှာပါ။

4. ၃ နိုဝင်ဘာ ၂၀၂၀အာရှ အမေရိကန် ရီပတ်ဘလီကန်တွေ ဘိုင်ဒန်ကို မဲပေးဖို့ တိုက်တွန်း, ၂၀၁၆ ခုနှစ်တုန်းက ဒီအဖွဲ့ဟာ ဒေါ်နယ် ထရမ့် ကို ထောက်ခံခဲ့တာ ဖြစ်ပါတယ်။

   အာရှ အမေရိကန် ရီပတ်ဘလီကန် အဖွဲ့ဟာ ဂျိုးဘိုင်ဒန် ကို တရားဝင်ထောက်ခံလိုက်ပြီး၊ သူ့ကိုမဲပေးကြဖို့ အဖွဲ့ဝင်တွေကို တိုက်တွန်း လိုက်ပါတယ်။

   ၂၀၁၆ ခုနှစ်တုန်းက ဒီအဖွဲ့ဟာ ဒေါ်နယ် ထရမ့် ကို ထောက်ခံခဲ့တာ ဖြစ်ပါတယ်။

   ဒီနှစ်မှာတော့ဒေါ်နယ် ထရမ့်ကို မထောက်ခံဘူးလို့ သူတို့ရဲ့ကြေညာချက်မှာဖော်ပြပါတယ်။

   “၂၀၁၆ မှာ ဒေါ်နယ် ထရမ့်ကို မဲပေးခဲ့ကြတာဟာ အိုကေပါတယ်။ အဲဒီတုန်းက အဖွဲ့ဝင် အတော်များများလည်း မဲပေး.ခဲ့ကြတယ်။ စနစ်ကို ပြင်စေချင်တဲ့အတွက် အပြင်လူ တစ်ယောက်ကို ထောက်ခံဖို့ AAR က ပြောခဲ့တာပါ။ ဒါပေမယ့် အဲဒီလူဟာ ဒီစနစ်ကို ဖျက်ဆီးခဲ့တယ်။”

   ဘိုင်ဒန် ရဲ့ မူဝါဒတွေကို သဘောမတူတဲ့လူတွေလည်း ရှိမှာပါ။ ဒါပေမယ့် အမေရိကန် ကို အမေရိကန် အတိုင်းပဲ ဆက်ရှိနေဖို့၊ ပြီးတော့ အာရှနွယ်ဖွားအသိုင်းအဝိုင်းတွေ၊ မိသားစုတွေရဲ့ အနာဂတ်အတွက် အရေးကြီးနေပါပြီ။

   အဲဒီအတွက် ဂျိုးဘိုင်ဒန်ကို မဲပေးကြပါ။ အမေရိကန်ကို ကယ်တင်ကြပါလို့ သူတို့ရဲ့ ထုတ်ပြန်ချက်မှာ ဖော်ပြထားပါတယ်။

5. ၃ နိုဝင်ဘာ ၂၀၂၀သမ္မတ ကတော်လည်း မဲလာပေး, မလာနီယာ ထရမ့်လည်း ဖလော်ရီဒါ. Palm Beach မှာ တစ်ယောက်တည်း မဲလာပေး

   သမ္မတကတော် မလာနီယာ ထရမ့်လည်း ဖလော်ရီဒါ Palm Beach မှာ တစ်ယောက်တည်း မဲလာပေးခဲ့ပါတယ်။

   "ရွေးကောက်ပွဲနေ့ပါ။ ဒါကြောင့် ဒီနေ့မှာမဲပေးချင်တာပါ" လို့ ဆိုခဲ့ပါတယ်။ သတင်းထောက်တွေက လွန်ခဲ့တစ်ပတ်က မဲပေးခဲ့တဲ့ ခင်ပွန်းဖြစ်သူ သမ္မတနဲ့ ဘာကြောင့် အတူ မဲမပေးခဲ့သလဲ ဆိုတာကို ဝိုင်းမေးချိန်မှာ ဖြေကြားခဲ့တာပါ။

   လွန်ခဲ့တဲ့ တစ်နှစ်ကျော် က သမ္မတ နဲ့ သမ္မတ ကတော်တို့ ဟာ နယူးယောက်ကနေ ဖလော်ရီဒါမှာပြောင်းရွှေ့နေထိုင် ခဲ့တာ ဖြစ်ပါတယ်။

6. ၃ နိုဝင်ဘာ ၂၀၂၀ဗိုင်းရပ်စ် ကူးစက်ခံထားရသူတွေ မဲပေးလို့ရ, ကူးစက်ရောဂါ ထိန်းချုပ်ရေး ဌာနက ထုတ်ပြန်ထားတဲ့ စည်းကမ်းတွေ အတိုင်း လိုက်နာပြီးမဲပေးနိုင်

   ဒီနှစ်ရွေးကောက်ပွဲဟာ ပုံမှန်အခြေအနေနဲ့ အလွန်ဝေးကွာပါတယ်။ ကမ္ဘာမှာ ကိုရိုနာဗိုင်းရပ်စ် ကူးစက်မှု အများဆုံးရှိနေတဲ့ နိုင်ငံမှာ ကျင်းပတဲ့ ရွေးကောက်ပွဲ ဖြစ်သလို၊ ကူးစက်မှုနှုန်းကလည်း များပြားနေဆဲပါ။

   ကိုရိုနာဗိုင်းရပ်စ် ကူးစက်ခံထားရသူ လူကိုယ်တိုင် မဲပေးလို့ရလား။

   ကူးစက်ရောဂါ ထိန်းချုပ်ရေး ဌာနက ထုတ်ပြန်ထားတဲ့ စည်းကမ်းတွေ အတိုင်း လိုက်နာပြီး

   ဗိုင်းရပ်စ် ကူးစက်ခံထားရသူ လူကိုင်တိုင် မဲပေးနိုင်ပါတယ်။

   - မဲရုံကိုရောက်လာတဲ့ အခါမှာ သက်ဆိုင်ရာ တာဝန်ရှိသူကို ဗိုင်းရပ်စ် ကူးစက်ခံရမှုနဲ့ ပတ်သက်ပြီး အသိပေးရပါမယ်။

   - နှာခေါင်းစည်း ဝတ်ဆင် ထားရပါမယ်။

   - တခြား မဲပေးသူတွေနဲ့ အနည်းဆုံး ခြောက်ပေ အကွာမှာ နေရပါမယ်။

   - မဲမပေးခင်နဲ့ မဲပေးပြီးနောက်မှာ လက်ဆေးရပါမယ်။

   နာမကျန်း ဖြစ်မှု ဆိုးရွားနေတဲ့ လူနာတွေကတော့ တခြားမဲပေး နိုင်တဲ့ အစီအစဉ်တွေကို လုပ်ဆောင် သင့်တယ်လို့ ကူးစက်ရောဂါ ထိန်းချုပ်ရေး ဌာနက ထုတ်ပြန်ပါတယ်။

   - တခြားနည်းလမ်းရှာပြီး မဲပေးဖို့နဲ့ ထိတွေ့မှု နည်းနိုင်သမျှ နည်းရပါမယ်။

   - မဲပေးသူများတဲ့ အချိန် ဥပမာ လူများတဲ့ မနက်ခင်း အချိန်ကိုရှောင်ရှားပြီး မဲပေးရပါမယ်။

   - ကြန့်ကြာမှု မဖြစ်အောင်လို့ ရှိသင့်တဲ့ စာရွက်စာတမ်းတွေ အားလုံး အသင့်ဆောင်ထားရမယ် လို့ ညွှန်ကြားထားပါတယ်။

7. ၃ နိုဝင်ဘာ ၂၀၂၀သမ္မတလောင်း နှစ်ယောက် လူမှုကွန်ရက် အသုံးပြုမဲဆွယ်, လူကိုယ်တိုင် ဟောပြော စည်းရုံးမှုတွေ ပြီးဆုံးပြီ ဆိုပေမယ့် လူမှုကွန်ရက် အသုံးပြု မဲဆွယ်

   လူကိုယ်တိုင် ဟောပြော မဲဆွယ်စည်းရုံးမှုတွေတော့ ပြီးဆုံးပြီလို့ ဆိုနိုင်ပါတယ်။ ဒါပေမယ့် သမ္မတလောင်း နှစ်ယောက် ဟာ လူမှုကွန်ရက်တွေ အသုံးပြုပြီး မဲဆွယ်မှုတွေတော့ လုပ်နေဆဲပါ။

   ဒေါ်နယ် ထရမ့် က သူကိုယ်တိုင် က နေတဲ့ ဗီဒီယို ကို တင်ပြီး မဲပေး ကြဖို့ နိုးဆော်ခဲ့သလို၊ ဂျိုးဘိုင်ဒန် ကလည်း သူတို့မဲဆွယ်စည်းရုံးရေးမှာသုံးတဲ့ ဗီဒီယိုကို တင်ပြီး မဲပေးဖို့ လှုံ့ဆော်မှုတွေ လုပ်ခဲ့ကြပါတယ်။

8. ၃ နိုဝင်ဘာ ၂၀၂၀အမေရိကန် ရွေးကောက်ပွဲ စနစ်, သိထားသင့်တဲ့ ရွေးကောက်ပွဲ စနစ်ကောက်နှုတ်ချက်

   အမေရိကန် နိုင်ငံရေးမှာ ပါတီကြီး နှစ်ခုက လွှမ်းမိုးထားပါတယ်။ ဒီမိုကရက်တစ် ပါတီ (ဂျိုးဘိုင်ဒန်) ဒါမှမဟုတ် ရီပတ်ဘလီကန် ပါတီ (ဒေါ်နယ် ထရမ့်) က ကိုယ်စားလှယ်တွေသာ သမ္မတ ဖြစ်လေ့ရှိပါတယ်။

   ၄နှစ်မှာ တစ်ကြိမ် ရွေးကောက်ပွဲ ကျင်းပလေ့ရှိပြီး အသက် ၁၈ နှစ်ပြည့်ပြီးသူတိုင်း မဲပေး နိုင်ပါတယ်။

   ပါတီနှစ်ခုက သမ္မတလောင်းတွေဟာ သမ္မတရွေးချယ်တင်မြှောက်ရေးအဖွဲ့ဝင်မဲ (Electoral College) အများစုကို ရရှိရင် ရွေးကောက်ပွဲ အနိုင်ရရှိတာဖြစ်ပါတယ်။ အီလက်တိုရယ် ကောလိပ် ၅၃၈ နေရာရှိပြီး၊ ၂၇၀ ကျော်ရရှိရင် ရွေးကောက်ပွဲ နိင်ပါတယ်။

   အခုရွေးကောက်ပွဲဟာ ဒေါ်နယ် ထရမ့် နဲ့ ဂျိုးဘိုင်ဒန် တို့ နှစ်ဦးထဲက တစ်ဦးကို ရွေးချယ်ရတာ ဆိုပေမယ့် ကွန်ဂရက် လွှတ်တော် အတွက် မဲပေးရမှုတွေလည်း ရှိပါတယ်။

9. ၃ နိုဝင်ဘာ ၂၀၂၀ကိုရိုနာ ဗိုင်းရပ်စ် ကပ်ရောဂါကြောင့် ရွေးကောက်ပွဲ ထိခိုက်နိုင်သလား, အရက်ပျံ ပါဝင်တဲ့ လက်ဆေးရည်ကြောင့် မဲလက်မှတ် ပျက်စီးနိုင်

   ကိုရိုနာဗိုင်းရပ်စ် ကပ်ရောဂါ က အခုရွေးကောက်ပွဲမှာ သက်ရောက်မှု အများကြီး ရှိခဲ့ပါတယ်။ ဒီနေ့မှာ မဲပေးကြသူတွေအတွက်လည်း နောက်ထပ် နည်းလမ်း တစ်မျိုးနဲ့ သက်ရောက်မှု ရှိနိုင်ပါတယ်။

   ဒါကတော့ အရက်ပျံပါဝင်တဲ့ လက်ဆေးရည်ကြောင့် မဲစာရွက်တွေ ပျက်စီး နိုင်တယ်လို့ အမေရိကန် ကူးစက်ရောဂါ ကာကွယ်ရေးဌာန (CDC)က သတိပေးချက် ထုတ်ပြန် လိုက်လို့ပါပဲ။

   လက်ဆေးရည် ပေနေတဲ့ မဲစာရွက်ဟာ အလွယ်တကူ စုတ်ပြဲလွယ်ပြီး မဲရေတွက်တဲ့ စက်ထဲကို ထည့်ရာမှာ ပိတ်ဆို့မှု ဖြစ်နိုင်ပါတယ်။

   မဲပေးသူတွေ အန္တရာယ်ကင်းရေး အတွက် လက်ဆေးရည်တွေ မဲရုံမှာ ရှိသင့်တယ်လို့ CDC က ပြောပေမယ့် မဲမပေးခင်မှာ လက်ကို ခြောက်သွေ့အောင် လုပ်သင့်တယ်လို့လည်း တိုက်တွန်း ထားပါတယ်။

   ဒီနှစ် အစောပိုင်းမှာ လုပ်တဲ့ နယူးဟမ့်ရှိုင်းယား ကောင်စီ ရွေးကောက်ပွဲမှာ စိုစွတ်နေတဲ့ မဲစာရွက် ကြောင့် အခက်အခဲတချို့ ဖြစ်ခဲ့ဖူးပါတယ်။ အဲဒီမှာ လက်ဆေးရည် စိုစွတ်နေတဲ့ မဲလက်မှတ် တချို့ ပျက်စီးမှု ဖြစ်ပေါ် ခဲ့ပြီး၊ မင်တွေ ပျက်ကာ ဖတ်လို့ မရတဲ့အထိ ဖြစ်ခဲ့လို့ မဲလက်မှတ်တွေ ကို ပြန်အစားထိုးပေးခဲ့ရပါတယ်။

10. ၃ နိုဝင်ဘာ ၂၀၂၀အမေရိကန် ရွေးကောက်ပွဲ တိုက်ရိုက် တင်ဆက်မှု, မဲပေးနေမှု အဖြစ်အပျက် အလုံးစုံကို တစ်နေရာတည်းမှာ ကြည့်နိုင်ပြီ။

    မင်္ဂလာပါ

    နိုဝင်ဘာ ၃ ရက်နေ့ ဒီကနေ့မှာ ကျင်းပတဲ့ အမေရိကန် ရွေးကောက်ပွဲ မဲပေးမှုတွေ၊ မဲရေတွက်နေမှုတွေ၊ သမ္မတလောင်းတွေရဲ့ လှုပ်ရှား သွားလာမှု အခြေအနေတွေနဲ့ နောက်ဆုံး မဲရလဒ်တွေကို ဘီဘီစီဝိုင်းတော်သူ ဝိုင်းတော်သားတွေက တင်ဆက်ပေးနေပါပြီ။

    မဲပေးမှု အတွင်းက အဖြစ်အပျက် အလုံးစုံကို တစ်နေရာတည်းမှာ အချိန် နဲ့တပြေးညီ စုစည်းတင်ဆက်ပေးသွားပါ့မယ်။

    အမေရိကန် ရွေးကောက်ပွဲ နဲ့ပတ်သက်လို့ သိချင်တာ၊ မေးချင်တာတွေရှိရင်လည်းဘီဘီစီရဲ့ facebook စာမျက်နှာ၊ ဒါမှမဟုတ် bbcburmese@gmail.com ကို ဆက်သွယ်မေးမြန်း နိုင်ကြပါတယ်။

11. ၃ နိုဝင်ဘာ ၂၀၂၀အမေရိကန်တွေ မဲပေးမှု ဓာတ်ပုံများ, မနက်စောစောပိုင်းမှာကတည်း က မဲရုံတွေ ရှေ့မှာ တန်းစီ ရောက်ရှိနေခဲ့ကြ

    ရွေးကာက်ပွဲမှာ မဲပေးဖို့ အမေရိကန်တွေဟာ မနက်စောစောပိုင်းမှာကတည်း က မဲရုံတွေ ရှေ့မှာ တန်းစီ ရောက်ရှိနေခဲ့ကြပါတယ်။

    နိုင်ငံ နေရာဒေသ အနှံ့အပြားက စာသင်ကျောင်းတွေ၊ စာကြည်တိုက်တွေကို မဲရုံတွေ အဖြစ် ပြောင်းလဲ ဖွင့်လှစ်ထားတာလည်း ဖြစ်ပါတယ်။

12. ၃ နိုဝင်ဘာ ၂၀၂၀ရွေးကောက်ပွဲနေ့မှာ သမ္မတလောင်းတွေ ဘယ်မှာရှိမလဲ, သမ္မတလောင်းတွေဟာ မဲရေတွက်ချိန်ကစပြီး စောင့်ကြည့်မှုတွေ လုပ်လေ့ရှိပါတယ်။

    ဒီနေ့ကျင်းပတဲ့ ရွေးကောက်ပွဲက သမ္မတလောင်းတွေ အတွက် ရင်ခုန် စိတ်အလှုပ်ရှားရဆုံးအချိန်ပါ။ သမ္မတလောင်းတွေဟာ မဲရေတွက်ချိန်ကစပြီး စောင့်ကြည့်မှုတွေ လုပ်လေ့ရှိပါတယ်။

    သမ္မတ ထရမ့်ကတော့ အိမ်ဖြူတော်ကနေ မဲရလဒ်တွေကို စောင့်ကြည့်မှာ ဖြစ်ပါတယ်။ ရုပ်သံလိုင်း တွေကနေ ကြေညာတဲ့ ရလဒ်တွေကို စောင့်ကြည့်ကောင်း စောင့်ကြည့်နိုင်ပါတယ်။ သမ္မတ ထရမ့် ဟာ တီဗီကြည့်တာကို အင်မတန်မှ ခုံမင်သူလို့ ဆိုပါတယ်။ သူ့ရဲ့ အကြိုက် ရုပ်သံ အစီအစဉ် တစ်ခု ဖြစ်တဲ့ Fox and Friends မှာ တယ်လီဖုန်း မေးမြန်းခန်းဖြေဖို့ကိုလည်း စီစဉ် ထားပြီးပါပြီ။

    ရွေးကောက်ပွဲနေ့မှာ သမ္မတလောင်းတွေရဲ့ မဲဆွယ်စည်းရုံးမှု နည်းနိုင်သမျှ နည်းလေ လူတွေရဲ့ ကြိုဆိုမှု ရလေပါပဲ။

    သမ္မတ ဒေါ်နယ် ထရမ့် ဟာ ရွေးကောက်ပွဲ မတိုင်ခင်မှာ မဲဆွယ်စည်းရုံးမှု ၁၄ ကြိမ် လုပ်ခဲ့ပါတယ်။ ဒီနေ့မှာတော့ စည်းရုံးမှုတွေ လုပ်ဖို့ မရှိပေမယ့် သူ့ရဲ့ အောင်နိုင်ရေး အဖွဲ့ကို အိမ်ဖြူတော်မှာ ညစာ နဲ့ တည်ခင်းတာ လုပ်ဖို့ ရှိပါတယ်။

    အဲဒီမှာ ရလဒ်ကို စောင့်ကြည့်မှာပါ။ ဒီမိုကရက် သမ္မတလောင်း ဂျိုးဘိုင်ဒန်လည်း မိသားစုဝင်တွေ နဲ့ အတူ မဲရလဒ်တွေကို စောင့်ကြည့်မှာ မလွဲပါဘူး။

    သူက ပင်ဆယ်ဗေးနီးယား ပြည်နယ်က ဘယ်သူ့ကို မဲပေးရမယ်မှန်း ဆုံးဖြတ်ချက် မချနိုင်သေးတဲ့ မဲပေးကြမယ့်သူတွေကို နောက်ဆုံးအကြိမ် စည်းရုံးမှု လုပ်ခဲ့ပါသေးတယ်။ ဒီပြည်နယ်ဟာ မဲရလဒ် ပြောင်းလဲနိုင်လို့ အဓိက ကျတဲ့ ပြည်နယ် တစ်ခုလည်း ဖြစ်ပါတယ်။

    အဲဒီကနေမှတဆင့် ဒီလာဝဲလ် ပြည်နယ်က နေအိမ်မှာ မဲရလဒ်တွေကို စောင့်ကြည့်သွားမှာ ဖြစ်ပါတယ်။

    မဲရလဒ်တွေ ထွက်ပေါ်လာတဲ့ အခါမှာတော့ ဒီလာဝဲလ်ကနေ ပြီး မိန့်ခွန်းပြောကြားမှာပါ။ အဲဒီမှာ ဒုတိယ သမ္မတလောင်း ဖြစ်တဲ့ ကာမလာ ဟဲရစ်လည်း အတူရှိနေမှာဖြစ်ပါတယ်။