မြန်မာစစ်ခေါင်းဆောင်တွေကို စုံစမ်းစစ်ဆေးမှု တူရကီ စတင်
ဗိုလ်ချုပ်မှူးကြီးမင်းအောင်လှိုင် အပါအဝင် မြန်မာစစ်ခေါင်းဆောင်တွေ စစ်အာဏာသိမ်းပြီးတဲ့နောက် ကျူးလွန်ခဲ့တဲ့ ရာဇဝတ်မှုတွေနဲ့ပတ်သက်လို့ တူရကီက အရာရှိတွေက စတင်စုံစမ်းစစ်ဆေးတာတွေ လုပ်နေပြီလို့ ယူကေအခြေစိုက် မြန်မာတာဝန်ခံမှုရှိရေးစီမံကိန်း(Myanmar Accountability Project – MAP)အဖွဲ့က ပြောပါတယ်။
မြန်မာစစ်ခေါင်းဆောင်တွေက ပြည်သူတွေအပေါ် ကျူးလွန်ခဲ့တဲ့ ရက်စက်ကြမ်းကြုတ်မှုတွေကို နိုင်ငံရပ်ခြား တိုင်းပြည်တခုကနေ စုံစမ်းစစ်ဆေးတာဟာ ဒါဟာပထမဆုံးအဖြစ်ပါ။
ကုလသမဂ္ဂရဲ့အစီရင်ခံစာတခုအရ စစ်တပ်နဲ့လုံခြုံရေးတပ်ဖွဲ့တွေရဲ့သတ်ဖြတ်မှုကြောင့် အရပ်သားပြည်သူ ၁၅၀၀ ကျော်သေဆုံးခဲ့ရပြီလို့ သိရပါတယ်။ ဒီစာရင်းတွေထဲမှာ လက်နက်ကိုင်ပဋိပက္ခဖြစ်နေတဲ့ နယ်မြေတွေမှာ သတ်ဖြတ်ခံရတာတွေ မပါဝင်သေးတဲ့အတွက် အာဏာသိမ်းပြီးတဲ့နောက် စစ်တပ်ကသတ်ဖြတ်လို့ သေဆုံးရသူတွေဟာ ဒီထက်မက များမယ်လို့ ခန့်မှန်းမှုတွေရှိပါတယ်။
စစ်အာဏာသိမ်းမှုကိုဆန့်ကျင်တဲ့အတွက်အကျဉ်းထောင်တွေထဲမှာထိန်းသိမ်းခံထားရသူအရေအတွက်၁၁,၀၀၀နီးပါးခန့်ရှိမယ်လို့နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)ကထုတ်ပြန်ခဲ့ပါတယ်။ဒီအထဲကရာနဲ့ချီတဲ့လူတွေနှိပ်စက်တာခံခဲ့ကြရမယ်လို့ကုလသမဂ္ဂက လက်ခံယုံကြည်ထားပါတယ်။
MAP ရဲ့ညွှန်ကြားရေးမှူး ခရစ်စ်ဂါးနက်စ်က “ဒီလိုစုံစမ်းစစ်ဆေးတာတွေစတင်လုပ်လာတယ်ဆိုတာဟာ စစ်တပ်က တခြားအဆင့်အရာထမ်းတွေအပါအဝင် စစ်တပ်ခေါင်းဆောင်တွေကို ကမ္ဘာကစောင့်ကြည့်နေတယ်၊ ကျူးလွန်ခဲ့တာတွေအတွက် ပြန်ပြီး အရေးယူခံရမယ်ဆိုတဲ့ သတင်းစကားကိုပါးလိုက်တာ”လို့ဆိုပါတယ်။
မြန်မာစစ်တပ်က ရိုဟင်ဂျာတွေအပေါ် လူမျိုးတုံးသတ်ဖြတ်မှုတွေ ကျူးလွန်နေတယ်ဆိုတဲ့စွပ်စွဲချက်တွေ ထွက်ပေါ်လာပြီးနောက်ပိုင်း တူရကီနိုင်ငံက မြန်မာနိုင်ငံပြည်သူပြည်သားတွေရဲ့အရေးကို ပိုပြီးစိတ်ဝင်စားမှု ရှိလာတာပါ။
တူရကီနိုင်ငံဟာ နှိပ်စက်မှုဆန့်ကျင်ရေး ကုလသမဂ္ဂဆိုင်ရာ သဘောတူညီချက်ကို လက်မှတ်ရေးထိုးထားတဲ့နိုင်ငံဖြစ်ပြီး အာဏာသိမ်းစစ်ကောင်စီရဲ့ စစ်တပ်ကမြန်မာပြည်သူတွေအပေါ် ကျူးလွန်နေမှုတွေကို အရေးယူပေးဖို့MAP အဖွဲ့က ဒီနှစ်အစောပိုင်းကတည်းက တူရကီမြို့တော်ကတရားရုံးတခုမှာ အမှုစွဲတင်ခဲ့ကြပါတယ်။