ဖေဖော်ဝါရီ (၂၅)ရက်မှာတော့ ရန်ကုန်မြို့လယ် ဆူးလေမှာ တပ်မတော်ထောက်ခံကြောင်း ဆန္ဒပြသူ လူအုပ်ကြီးကနေ ကားမှန်ရိုက်ခွဲ၊ ဖျက်ဆီးမှုတချို့တွေအပြင် ဓားထိုးမှုပါလုပ်သွားတာကို စီစီတီဗီမှတ်တမ်းတွေ အရ သိရပါတယ်။
ဒီလို အကြမ်းဖက်လုပ်ဆောင်ခဲ့တဲ့နေရာတွေအနီးအနားမှာ လုံခြုံရေးတာဝန်ရှိသူ ရဲတွေရှိခဲ့ ပေမယ့် တစုံတရာတုံ့ပြန်ဖြေရှင်းပေးခဲ့တာမရှိဘူးလို့ မျက်မြင်ပြည်သူတွေကပြောပါတယ်။
ကားမှန်ရိုက်ခွဲခံရသူတစ်ဦးက ကျောက်တံတားမြို့နယ်ရဲစခန်းမှာ သွားရောက်အမှုဖွင့်ပေမယ့် ပ နံပါတ်(အမှုနံပါတ်) မထုတ်ပေးဘဲ တိုင်ချက်သာ လက်ခံပေးခဲ့တယ်လို့ သိရပါတယ်။
ဒါ့အပြင် ဖေဖော်ဝါရီ (၂၅)ရက် မွန်းလွဲ ၁၂ နာရီ လောက်မှာလည်း မင်္ဂလာတောင်ညွန့်မြို့နယ်အတွင်း မသင်္ကာဖွယ်ရာ လူအယောက် (၂၀)ကျော်ကို တွေ့ရှိခဲ့ရလို့ ပြည်သူတွေကဖမ်းဆီးခဲ့ပါတယ်။
ဖမ်းဆီးမိသူတွေကို ရဲလက်ထဲ ပြန်အပ်ခဲ့ပေမယ့် ဘယ်လိုတုံ့ပြန်မှုနဲ့ ကြုံခဲ့ရပါသလဲ။ မျက်မြင်တဦးဖြစ်တဲ့ ကိုဝင်းဇော်လတ်ပြောတာက
"လူထုနဲ့ ဖမ်းထားတဲ့လူတွေကြားမှာ ဘာပြဿနာမှမရှိဘူး။ အေးအေးဆေးဆေးပဲ။ ထိန်းနိုင်တယ်။ သူတို့ဘက်ကို ရောက်တော့မှ သူတို့က ဒိုင်းတွေတုတ်တွေနဲ့ လူထုရဲ့နောက်ကျောဘက်ကနေပိတ်ပြီးတော့မှ မူလရှိနေတဲ့ ရဲတပ်ဖွဲ့အင်အားကို ထပ်ဖြည့်တယ်။ ကျွန်တော်တို့နဲ့ ထိန်းထားတဲ့လူတွေကြားမှာ ဘာပြဿနာမှ အဓိကရုဏ်းမှဖြစ်စရာမလိုဘူး။ ဒါပေမဲ့ ရဲရောက်လာမှ အဲဒီလူတွေနဲ့ ရဲတွေနဲ့ တစ်ဖွဲ့တည်းဖြစ်သွားပြီးတော့ ပြန်ကာကွယ်တဲ့ပုံစံလိုဖြစ်နေတယ်" လို့ ပြောပါတယ်။
နိုင်ငံသားတွေလုံခြုံရေးအရရော ဆန္ဒဖော်ထုတ်မှုနဲ့ အခြားသူတွေ ပဋိပပက္ခ မဖြစ်စေဖို့နဲ့ အဲ့ဒီလို ဖြစ်ခဲ့ရင်လည်း အချိန်မီထိန်းသိမ်းနိုင်အောင် ရဲတပ်ဖွဲ့က လုံလောက်တဲ့လုံခြုံရေး ပေးရမယ်လို့ ငြိမ်းစုစီဉပဒေမှာရော အ႒ ဓိကရုဏ်းနှိမ်နင်းရေးလက်စွဲဉပဒေမှာပါ ပြဌာန်းထားပါတယ်။
ဒါပေမဲ့ လက်ရှိလူမှုကွန်ရက်စာမျက်နှာ တွေမှာသာမက မြေပြင်မှာပါ တွေ့ရှိနေရတဲ့ ရဲအပါအဝင် လုံခြုံရေးအဖွဲ့ဝင်တွေရဲ့ ပြည်သူတွေအပေါ် အကြမ်းဖက်လုပ်ရပ်တွေနဲ့ ပတ်သက်ပြီး ဝေဖန်မှုမြင့်တက်နေပါတယ်။
စစ်ကောင်စီကနေ အာဏာသိမ်းပြီးနောက်ပိုင်း ရဲတပ်ဖွဲ့ဝင်တွေရဲ့ လုပ်ရက်တွေဟာ ရာဇဝတ် ကျင့်ထုံးဉပဒေ၊ ရဲလက်စွဲဉပဒေ တွေအပြင် ရုန်းရင်းဆန်ခတ်မှုလက်ဆွဲဉပဒေပါ ပြဌာန်းချက်တွေကို ချိုးဖောက် နေတယ်လို့ ဉပဒေအကြံပေး ဦးခင်မောင်မြင့်က ပြောပါတယ်။
ဒါနဲ့ပတ်သက်လို့ ရဲတပ်ဖွဲ့ ပြောရေးဆိုခွင့်ရှိသူထံ ဘီဘီစီက ဆက်သွယ်ဖို့ကြိုစားခဲ့ပေမယ့် ဆက်သွယ်လို့မရခဲ့ပါဘူး။
ယမန်နေ့ညနေပိုင်းကလည်း တာမွေ၊ ယုဇနပလာဇာအနီး အောင်မင်္ဂလာရပ်ကွက်မှာ စစ်ကောင်စီက ခန့်တဲ့ ရပ်ကွက်အုပ်ချုပ်ရေးမှူးအလိုမရှိကြောင်း ကန့်ကွက်တဲ့ ရပ်ကွက်နေသူတွေကို ရဲက ပစ်ခတ်ဖြိုခွဲပြီးဖမ်းဆီးမှုတွေလည်း ရှိထားပါတယ်။