ဘူသီးတောင်က အချုပ်သား ၄ ဦးမှာ ကိုဗစ်တွေ့

ရခိုင်ပြည်နယ် အနောက်ဘက် အစွန်ဆုံး ဘူးသီးတောင် အကျဉ်းထောင်က အချုပ်သား ၄ ဦးမှာ နိုဝင်ဘာ ၅ ရက်က ကိုဗစ်ပိုးတွေ့ရှိခဲ့တယ်လို့ မောင်တောခရိုင် အုပ်ချုပ်ရေးမှူး ဦးစိုးအောင်က ဘီဘီစီကို အတည်ပြု ပြောကြားပါတယ်။

တွေ့ရှိခဲ့သူတွေမှာ ရောဂါလက္ခဏာ ပြတာမရှိဘူးလို့ သူက ပြောပါတယ်။ အကျဥ်းထောင်ကို မပို့ခင် ကိုဗစ်စစ်ဆေးဖို့ စည်းမျဥ်းတွေအရ အချုပ်သားတွေကို စစ်ဆေးခဲ့ရာက အခုလို ပိုးတွေ့ခဲ့တာလို့လည်း သူ ပြောပါတယ်။

ရခိုင်ပြည်နယ်အတွင်းမှာ စစ်တွေ၊ ကျောက်ဖြူ၊ သံတွဲနဲ့ ဘူးသီးတောင် အကျဉ်းထောင် ၄ ခုမှာ ဘူးသီးတောင်ထောင်မှာ အချုပ်သား ၄ ဦးမှာ အခုအခါ ကိုဗစ်ပိုးတွေ့ စတင်တွေရှိခဲ့တာ ဖြစ်ပါတယ်။

စက်တင်ဘာလတုန်းကလည်း ရခိုင်ပြည်နယ်မြို့တော် စစ်တွေမှာ ရဲဝန်ထမ်း ၂၀ ဦးနဲ့ အချုပ်သား ၂၀ နီးပါးတို့မှာ ကိုဗစ်ပိုးကူးစက်ခံခဲ့ရပါတယ်။

မောင်တောခရိုင်အတွင်းမှာတော့ ကိုဗစ်ပိုးတွေ့သူက ၄၀၀ နီးပါးရှိနေပြီး ဆေးရုံက ဆင်းခွင့်ရသူ ၃၀၀ ကျော်ရှိသွားပြီ ဖြစ်ပါတယ်။

ဒါပေမဲ့ မနေ့က တစ်နေ့တည်းမှာ မောင်တောမှာ ၅ ဦး၊ ဘူးသီးတောင်မှာ ၅ ဦးနဲ့ ဘူးသီးတောင်ထောင်မှာ ၄ ဦး ထပ်တိုးခဲ့တယ်လို့ ခရိုင် အုပ်ချုပ်ရေးမှူးက ပြောဆိုပါတယ်။

သေဆုံးသူက မောင်တော ဆေးရုံမှာ ၁ ဦးနဲ့ ဘူးသီးတောင် ဆေးရုံမှာ ၁ ဦးတို့ ဖြစ်ကြပါတယ်။

ရခိုင်တစ်ပြည်နယ်လုံး ဆေးရုံတက် ကုသသူ ၁၇၂ ဦး၊ အများဆုံးက အမ်းနဲ့ မောင်တောမြို့နယ်တို့ဖြစ်ပြီး လူနာ ၂၈ ဦးစီ ရှိတယ်လို့ ရခိုင်ပြည်နယ် ကျန်းမာရေးဦးစီးဌာန လက်ထောက် ညွှန်ကြားရေးမှူး စိုးဝင်းပိုင်က ပြောပါတယ်။

ကိုဗစ်နဲ့ သေဆုံးတာကလည်း မောင်တောခရိုင် အတွင်းမှာ ၂ ဦးထိ ရှိနေပြီ ရခိုင်တစ်ပြည်နယ်လုံးမှာ ၂၁ ဦးရှိသွားပြီ ဖြစ်ပါတယ်။

ရခိုင်ပြည်နယ် အတွင်း ဆေးရုံက ဆင်းသွားတဲ့ လူနာက ၂၇၀၀ ကျော်ရှိသလို စစ်တွေမှာ ပိုးတွေ့လူနာ အရေအတွက် ကျဆင်းသွားပေမယ့် နယ်မြို့ တွေမှာ ထပ်တိုးနေတာတွေရှိတာကြောင့် ချမှတ်ထားတဲ့ စည်းကမ်းသတ်မှတ်ချက်တွေကို လိုက်နာ နေထိုင်ကြဖို့ လိုအပ်တယ်လို့လည်း ဒေါက်တာ စိုးဝင်းပိုင်က ပြောပါတယ်။