Israa'el haleellaa Gaazaatti gaggeessiteen 'komaandara' Hamaas dabalatee namoota jaha ajjeeste

Haguuggii Tamsaasa Kallattii

1. 14 Onkololeessa 2025Pirezidantiin Somaalilaand faana gitasaanii Somaaliyaa hordofuun gara Finfinnee imalan

   

   Madda suuraa, Ministry of Foreign Affairs - Somaliland

   Biyya walabaa ta'u kan labsitu Somaalilandiin kan bulchan Pirezidant Abdirahmaan Mohaammad Abdullaahii har’a waaree booda kaabinee isaanii waliin gara Finfinnee imalan.

   Pirezidaantiin Somaaliyaa Hasan Sheek Mohamamud daawwannaasaanii Fifnfinnee raawwachuu guyyaa tokko boodha Pirezidantiin Somaalilaand gara Finfinnee imalaa kan jiran.

   Ministirri Dhimma Alaa Somaalilaand, Ministirri Maallaqaa, ajajaan waraana biyyattii, fi qondaaltonni nageenya biyyaalessaa preezdaantii waliin gara Finfinnee imalaa akka jiran gabaaseera.

   Ibsa dubbi himaan mootummaa Somaalilaandi baaseen daawwannaan preezdaanti kun hariiroo biyyoota lamaanii keessattuu gama nageenyaa, diinagdee, daldalaa, fi geejjibaa cimsuuf kan akeekedha.

   Waliigalteen Itoophiyaa fi Somaalilaand ulaa galanaa ilaalchisee mallatteessa Somaaliyaa wajji muddama jabaa uumuu booda filannoo godhameen aangoo kan qabatan Pirezidantiin haaraa kun yeroo jalqabaaf gara Finfinnee imalaa jiru.

2. 14 Onkololeessa 2025Hamaas Gaazaa keessatti namoota saddet addabaabayii irratti ajjeese

   BBC'n viiidyoo yeroo hidhattoonni Hamaas namoota saddet Gaazaa keessatti ajjeesan agarsiisu adda baase.

   Viiidyoo kana irratti hidhattoonni yeroo dhiirota saddet tarree galchanii dhaabbachiisan agarsiisa.

   Harki jaraa duubatti hidhameera. Addababayiitti bahuun namoonni hedduu itti marsanii ilaalaa turan.

   BBC'n yeroo viidiyoo kana qoratu eenyummaa namoota sanaa adda baasuu hin dandeenye.

   Gariin isaanii garuu mataa isaaniitti marata halluu magariisa qabu hidhataniiru. Yeroo baay'ee Hamaastu kanaan beekama.

   Daqiiqaa muraasa booda hidhattoonni Hamaas saddeettan isaaniitti dhukaasuun ajjeessan.

   'Allahu Akbar' ykn Waaqayyo Guddaadha kan jedhu uummata achi ture keessaa dhagahamaa ture.

   Yeroo sana hidhattoonni reeffa namoota ajjeesanii irra dhaabbataa turan.

   BBC'n akka adda baasetti viidiyoon kun daandii guddaa magaalaa Gaazaa irratti waraabame.

   Hamaas ibsa baaseen ragaa homaas osoo irratti hin dhiyeessiin ''isaan kunneen yakkamtootaa fi warreen Israa'el deeggaraa turan'' jedhe.

   Guyyoota darban kana Gaazaa keessatti hidhattoota Hamaasii fi hidhattoota gosaa achi keessa jiran gidduutti dhukaasni banameera.

   Gosti cimaa fi beekamaan Gaazaa keessaa Maatii Duugmush jedhamu yoo tahu Hamaas isaan waliin wlaitti bu'uun lubbuun namoota hedduu darbeera.

   Maatiin kun ajjeechaa Hamaas raawwate ''yakka'' jedhan.

3. 14 Onkololeessa 2025Amma nu gahe, Fincilli qeerroo Madagaaskaar pirezidaantii biyyaa hariinaan waraanni aangoo qabachuu labse

   

   Madda suuraa, AFP via Getty Images

   Madagaaskaritti mormii qeerroon biyyattii eegaleen pirezidaantiin biyyaa baqatee humni waraanaa aangoo qabachuu beeksise.

   Pirezidaant Raajoo'elinaa ammaayyuu ammayyuu gaggeessaan ana jechuun bu'uu dideera.

   Partiisaa dabalatee miseensonni paarlaamaa biyyattii har'a sagalee kennaniin akka aangorraa bu'u murteessaniiru.

   Kana hordofee humni waraana biyyattii "Elite" jedhamu aangoo dhuunfachuu ifatti beeksise.

   Ajajaan humna waraanaa "Elite" jedhamuu Koloneel Mikaa'el Raandiriyaniriinaa ibsa gareensaa baase yeroo dubbisu, "aangoo qabannee jirra" jechuun beeksise.

   Gareen humna waraana biyyattii kun warraaqsa qeerroon Madagaaskaar kaase sirriidha jechuun waliin akka hiriiru dhuma torbee darbee beeksisee ture.

4. 14 Onkololeessa 2025Lakkoofsa bilbilaa Tiraamp dabalatee kan gaggeessitoota biyyoota hedduu marsariitii irratti qoodame

   

   Madda suuraa, Getty Images

   Lakkoofsa bilbila dhuunfaa Doonaald Tiraamp fi Ministiira Muummee Awustiraaliyaa Antoonii Albaniis dabalatee kan namoota bebbeekamoo hedduu marsariitii US tokkorratti qoodame.

   Waajjiri Ministiira Muummee Awustiraaliyaa lakkoofsi bilbila dhuunfaa gaggeessaa biyyattii miidiyaa hawaasaa irratti qoodamuu quba akka qabu beeksise.

   Miidiyaan biyyattii Ette Media jedhamu akka gabaasetti qondaalonni Awustiraaliyaa lakkoofsi Ministiira Muummee Awustiraaliyaa akkamitti akka miidiyaa hawaasarratti qoodame akka qoratu beeksise.

   Kan Tiraamp fi Antoonii Albaanis qofaa osoo hin taane lakkoofsi bilbilaa gaggeessaa paartii mormituu Awustiraliyaas qoodameera.

   Marsariitiin lakkoofsa bilbilaa gaggeessitoota biyyootaa kanneen ifa godhe kun kansaanii qofa osoo hin taane, kan namoota miliyeenan lakkaa'amanii akka qabu ibse.

   Bilbila dhuunfaa namoota akka Baarak Obaamaa, Biil Kiliintanifi bilbila biiroo Ministiira Muummee UK Kiir Istaarmar fa'aa akka qabu BBCn mirkaneeffateera.

5. 14 Onkololeessa 2025Kantibaan magaalaa Finfinnee ALI bara 2018 keessa misoomni Koridarii haaraan eegalamu hin jiru jedhan

   

   Madda suuraa, Mayor Office of Addis Ababa

   Kantiibaan magaalaa Finfinnee Aadde Adaanach Abeebee yaa'ii idilee mana maree magaalichaatiif haasaa taasisan keessatti misoomni Koridarii haaraan eegalamu hin jiru jedhan.

   Piroojektiin misooma kooridarii ALI Guraandhala 2016 eegalame midhagina magaalaa irratti xiyyeeffachuun daandii lafoofi konkolataa bal'isuuf miidhagsuu idoowwan balfaa kan turan gara magariisaafi badhannanaatti geeddaruuratti xiyyeefate.

   Piroojektichi miidhagina Finfinnee hedduun dinqisiifatan mul'isuu danda'us, adeemsi namootni qe'eerraa buqqa'uunfi beenyaan kaffalamu wajjin walqabatee komiin irratti ka'aa ture.

   Mootummaan Ameerikaa torbanoota dura ibsa baaseen buqqaatiin sababa misooma koridariin mudate abbootiin qabeenyaa investi akka hin goone yaaddoo uumeera jedhee ture.

   Aadde Adaanach misoomni kooriidarii haraan kan hin eegalamne bulchiinsi magaalachaa ijarsa manneeniifi dhiyeessii bishaan qulqulluurratti akka xiyyeefatu ibsaniiru.

   Hojiileen misooma kooridarii amma dura eegalaman garuu akka xumuraman ibsaniiru.

6. 14 Onkololeessa 2025'Loltoonni Israa'el har'a Gaazatti Filisxeemota torba ajjeesan'

   

   Madda suuraa, Reuters

   Gaazaatti dhukaasi dhaabachuun labsamus loltoonni Israa'el har'a Filisxeemota torba ajjeesuu Humni Ittisaa Sivilii Filisxeem BBCtti hime.

   Israa'el dhukaasa Gaazaa keessatti bakka lamatti banteeni namoonni torba kan ajjeefaman.

   Israa'eel haleellaa diroonii Baha Gaazaafi Kaan Yuunis keessatti gaggeessiteeni namoonni kun du'an.

   Maddi oduu Wafa jedhamu akka gabaasetti, Filisxeemonni shan kan ajjeefaman osoo manasaanii haleellaa Israa'eliin jalaa diigame daawwataa jiranii haleellaa diroonii gaggeeffameeni.

   Waraanni Israa'el ammoo namoonni sarara loltoonni Israa'el qubatanitti cehuu hordofee dhukaasa banuu beeksise.

7. 14 Onkololeessa 2025Baankonni Keeniyaa sodaa qabaatanis Itoophiyaa seenuuf murteessuu ibsan

   

   Madda suuraa, Reuters

   Baankonni Keeniyaa yaaddoo qabaatanis Itoophiyaa seenuuf kaayyeffachuu beeksisan.

   Baankonni gurguddoon Keeniyaa lamaan carraa dinagdee bilisaa Itoophiyaan taasiftetti fayyadamuuf Itoohpiyaa seenuun hojii isaanii eegaluuf karoora qaban saffisiisaa jiru

   Baankonni kunneen, gabaasa Baankii Addunyaa dhiheenya baaseen, kan dhaabbati telekoomii guddaan Safaricom biyyattii keessatti taasisaa jiru keessatti qormaata guddaa mudate ibse hordofee yaaddoo qabaatanillee karoora kana itti fuufuf hojjataa akka jiran ibsan

   Baankonni Keeniyaa fedhii tajaajila faayinaansii dargaggoota biratti dabalaa dhufe irratti baankii godhachuun gabaa seenuuf qophaa’aa jiru. Ji’a Hagayyaa keessa Baankiin Daldalaa Keeniyaa baankii Itoophiyaa hin ibsamne keessaa qooda %40 argachuuf akka yaadu beeksisee ture.

   Baatii darbe keessas Baankiin Equity Keeniyaa Itoophiyaa seenuuf karoora qabu ibseera.Baankiin Addunyaa dhiheenya kana gabaasa madaallii gabaa Itoophiyaa keessatti haalli dorgommii haqa qabeessa ta’e akka hin jirre kan akeeke yoo ta’u, keessumaa dhimma Safaricom irratti “qorannoo dabalataa akka taasifamu hubachiisera.

8. 14 Onkololeessa 2025Veenzuweelaan hoggantuun paartii mormituu badhaasa Noobeelii waan mo'atteef Imbaasii ishee Noorweey jiru cufuufi

   

   Madda suuraa, Getty Images

   Veenzuweelaan hoggantuun paartii mormituu María Corina Machado badhaasa Noobeelii nageenyaa erga fudhattee booda Imbaasii ishee Noorweey jiru cufuuf murteessite.

   Wixata kaleessaa mootummaan Venezu’eelaa imbaasii isaa Osloo cufuu kan beeksise yoo ta'u garuu badhaasa Machado waliin akka wal hin qabannee haale.

   Tarkaanfiin kun qaama tajaajila alaa biyyatti irra deebiin gurmeessuu ta’uu ibse. Ministeerri dhimma alaa Noorweey cufamuu Imbaasichi mirkaneessus sababa maalif akka ta'e hin ibsine. Garuu murtee kana ''kan nama gaddisiisu'' jechuun ibseera.

   Koreen Noobeelii Jimaata darbe Machaadoon mirga dimokiraasii ummata Venezuweelaa eegsisuuf carraaqqii boqonnaa malee taasifteef badhaasicha akka kenneef kan beeksise yoo ta'u, hogganaan Veenzuweelaa Niikoolaas Maaduroo ammoo badhaasicha ''falfala maraattotaa'' jechuun moggaaseera.

   Dubbi himtuun ministeera dhimma alaa Norway badhaasni Noobeelii "mootummaa Noorweey irraa dhiibbaa akka hin qabnes" ibsiteetti

9. 14 Onkololeessa 2025Namichi seexanatu na erge jedhe Masaraa mootummaatti loltuu eegumsarra ture xiyyaan ajjeese

   

   Madda suuraa, AFP via Getty Images

   Namichi masaraa mootummaa Keeniyaa bira deeme loltuu hidhachuun eegumsarra ture xiyyaan ajjeesuu midiiyaaleen Keeniyaa gabaasan.

   Shakkamaan kun xiyyaan balbala masaraa mootummaa, Balbala D, jedhamu deemuun gochaa kana raawwate.

   Balbala kanaan uummanni dhimma Masaraa mootummaatii qabu ittiin ol gala.

   Loltuun ajjeefame waayillan isaa kaan waliin tahee yeroo sana eegumsa irra ture.

   Xiyyi sun cinaacha isaa karaa bitaan seenuun gara Hospitaala Biyyaalessaa Keeniyaataa geeffamus lubbuun hin oolle.

   Shakkamaan kun loltuu ajjeese kana beekaafi hin beekuu isaa hin baramne. Garuu yeruma sana qabamuun qoratamaa ture.

   Pirezidaant Wiiliyaam Ruutoon yeroo sana mooraa keessa ture. Daawwannaa gara bakka Machaakos jedhamuutti gochuuf bahuuf ture.

   Shakkamaan kun seexanatu akkan yakka kana hojjedhu na erge jechuun poolisiif yaada kenne jedhe poolisiin dhimmicha qorachaa jiru.

   Manguddoon ganna 56 kun akkuma namoota kaanii deemaa ture. Keeshaa keessatti xiyya qabatee ture. Achuma keessaa baasuun ajjeese jedhame.

   Yeroo inni gocha kana raawwatu eegdonni lama biroo konkolaattota masaraa mootummaa seenaa turan sakatta'aa turan.

10. 13 Onkololeessa 2025Badhaasni 'Order of the Nile' Masriin Tiraampiin badhaaste maali?

    

    Madda suuraa, Reuters

    Pirezidantiin Masrii Abdul Fattaa Al Siisi Pirezidantii US Doonaald Tiaraampiif badhaasa (beekamtii) 'Order of the Nile' jedhamu biyyattiitti sadarkaa isa olaanaa ta'e badhaaseera.

    Waajirri Pirezidantii Masrii ibsa galgala kana baaseen beekamtiin kun gahee Tiraamp hariiroo tarsiimawaa biyyoota lamaaniif cimsuuf baheef kenname jedha.

    Beekamtiin 'Nile Necklace' jedhamuunis beekamu kun namoota Masriifi ykn namoomaaf gumaata olaanaa bahaniif kennama.

    Badhaasni mormatti diramu kun guutummaatti warqeerraa hojjetama.

    Beekamtii kana amma dura Pirezidantiin duraanii US Jiimii kaarteer bara 1979 waliigaltee nagaa Masriifi Israa'el milkeessuu isaaniif argataniiru.

    Giiftiin Eelizaabeet lammaffaa bara 1975tti Pirezidantiin Afrikaa Kibbaa Neelsan Maadeellaa ammoo bara 1990tti badhaasa Order Of the Nile jedhamu kana argataniiru.

11. 13 Onkololeessa 2025Waliigaltee dhukaasa dhaabuu yoo mallatteessu ''hunduu gammadaadha'' jedhe Tiraamp

    

    Madda suuraa, EPA

    Pirezidantiin Ameerikaa Doonaald Tiraamp Shaarm el Sheekitti dureewwan biyyaa hedduu waliin yaa'ii gaggeessu yoo eegalu sanada waliigaltee dhukaasa dhaabuu Gaazaa mallatteesseera.

    Yeroo mariin dhukaasa dhaabuu kun gaggeeffamu deeggarsa godhaniif dureewwan kana galateeffateera.

    Ammoo ''hunduu gammadaadha'' jedhe. ''Amma dura waliigalteewwan hedduun ta'aniiru kuni akka rookkeettii dhuka'e'' jedhe.

    Amma dura waraanni addunyaa sadaffaa Baha Giddugalaatti eegala sodaan jedhu ture '' kuni ta'uuf hin jiru'' jedhe.

    Sanada kana yoo mallatteessu ''wanti kun sadarkaa kana gahuuf waggoota 3,000 fudhate, ni amantuu? jedhe.

    Waliigaltee kana dureewwan akka Al Siisii, mootii Kataariifi Pireezidantii Tarkii wal harkaa fuudhuun mallatteessaniiru.

    Marii kanarratti dureewwan biyyoota adda addaa hedduun Tiraamp waliin suura ka'aniiru.

    Pirezidantii Filisxeem Mahaammud Abbaas waliinis harka walfuudhaniiru.

12. 13 Onkololeessa 2025Beenishaangul Gumuz magaala Barbaritti yeroo lammataaf waajirri mootummaa gubate

    

    Madda suuraa, Getty Images

    Ji'oota sadii dura waajirri mana qopheessaa kan jalaa gubata magaala Barab kan naannoo Beenishaangul Gumuzitti argamutti haleellaa haaraa banameen waajirri gandaa gubate.

    JIraattotniifi aanga'aan naannichaa yaada BBCf kennaniin haleellaa kana kan raawwate hidhattoota naannoo Oromiyaa keessa socho'an WBOti.

    Hidhattootni kun magaalaa guddoo aanaa Dibaatii Barbar irratti haleellaa kan banan Sambata xiqqaa barii gara halkan sa'aa 11tti ta'uu jiraattotni lamaafi hogganaan mana qopheessaa magaalaa Barbar Obbo Mangistuu Yaaddessaa himaniiru.

    Jiraattotni waajirichi gubachuu hubatan bariidhaan ibiddicha dhaamsuuf birmachuun waajiraale ebiroo cinaa jiran oolchuu danda'uu ibsaniiru.

    Balaa kanaan ragaalee ijoon hanga waggaa 40 turan manca'uus dubbataniiru.

    Obbo Mangistuun haleellaan akka kanaa magaalichatti haaraa akka hin taane yoo himan ji'a Waxabajjii darbe waajirri mana qopheessaa waajiraalee adda addaa jaha qabatu haleellaa hidhattoota isaan ''Shanee'' jedhaniin gubatee hedduu miidhamuu ibsaniiru.

13. 13 Onkololeessa 2025Martiin Odegaard ji'a tokko oliif hin taphatu

    Dursaan taphattootaa Arsenaal Maartiin Odegaard miidhama jilbasaa mudaterraa kan ka'e hanga Sadaasa gara dhumaatti Arsenaaliif akka hin taphanne mirkanaa'e.

    Odegaard Onkololessa 4 tapha Arsenaal Westihaamiin injifaterraatti jilbasaa miidhamni mudate. Arsenaal guyyaa itti aanu ibsa baaseen taphataan sarara gidduu kun morkii gulaallii waancaa addunyaarratti biyyasaa Noorwaay bakka bu'ee akka hin taphanne mirkaneessee ture.

    Amma ammoo Odegaard tapha Arsenaal Fulhaam, Kiristaal Paalaas, Barnileey fi Sandarlaand waliin godhu, morkii Shaampiyoonsi Liigiin ammoo tapha Atileetikoo Maadriidiifi Slaaviyaa Piraag waliin qaburratti hin hirmaatu.

    

    Madda suuraa, Getty Images

14. 13 Onkololeessa 2025Bulchiinsi amala sirreessaa Israa'el Filisxeemota 1,968 gadhiise

    

    Madda suuraa, Reuters

    Tajaajilli amala sirreessaa Israa'el waliigaltee dhukaasa dhaau Gaazaarratti hundaa'iin waljijjiirraa hidhamtootan Filisxeemota 1,968 hidhaarraa gadhiisuu beeksise.

    Garee lamaan gadhiifaman. Kan jalqabaa mana hidha aOfer jedhamurraa kutaa Weesti Baank isa kan biraatti ergaman.

    Gareen inni lammataa ammoo mana hidhaa Ketziot jedhamurraa gara Kibba Israa'el Kareem Shaaloomitti gadhiifaman. Bank kun daangaa Gaazaaarratti argama.

    Ibsi waajirichaa hidhamtootni kun poolisiin dabaalamanii gaggeeffaman.

15. 13 Onkololeessa 2025Kun 'barii seenaa' Baha Giddu-galeessaa haaraati -Tiraamp

    

    Madda suuraa, Reuters

    Pirezidantiin Ameerikaa Doonaald Tiraamp haasaa paarlaamaa Israa'el irratti tasisaa jiruun, "kun 'barii seenaa' Baha Giddu-galeessaati," jedhe.

    Tiraamp "nama jabaa addaadha" kan jedhe Ministira Muummee Israa'el Benjaamiin Netaaniyaahuu galateeffateera.

    Namoota walitti qabamanii jiran keessaa "Bibi" jechuun sagalee ol fuudhanii jajachuun iyyan. "Bibi" maqaa masoo Netaaniyaahuuti.

    Kana malees, Tiraamp biyyoota Arabaa nagaa buusuuf jaarsummaa keessatti hirmaatan galateeffateera.

    Waliin ta'uudhaan hojii "mo'icha ajaa'ibaa" argamsiise hojjetaniiru jedhe.

    Amma "Israa'eliif bara warqeedha. Akkasuma naannichaafis guutuufis bara warqeedha," jedhe Tiraamp itti dabaluun.

16. 13 Onkololeessa 2025Paarlaamaa Israa'el irratti simannaan ho'aan yeroo taasifamuufitti

    Yeroo Tiraamp paarlaama Israa'elittti dhiyaataan miseensonni ka'anii simatan.

    Daawwadhaa!

17. 13 Onkololeessa 2025Ummanni West Baank Filisxeemota Israa'el gadhiiste simachaa jiru

    Ummanni West Baank Filisxeemota Israa'el gadhiiste simachaa jiru.

    Daawwadhaa!

18. 13 Onkololeessa 2025Booji'amtoonni gadhiifaman yeroo jalqabaaf IDF irraa dhiyaatan

    Booji'amtoonni gadhiifaman yeroo jalqabaaf IDF irraa dhiyaatan.

    Daawwadhaa!

19. 13 Onkololeessa 2025''Yeroo kana eegaa turre''- MM Israa'el Benyaamin Netaaniyaahuu

    

    Madda suuraa, Reuters

    Netaaniyaahuun haasawaa taasian irratti ''Waliin taanee nageenya mirakaneessuu dandeenyerraa jechuun dubbatan.

    ''Doonaald Tiraamp michuu hunda caalu Israa'el Waayit Haawus keessatti qabdudha,'' jechuunis jajaniiru. Netaaniyaahuun karoora nagaa Tiraamp kanaan gara nagaa deemuuf “murteessuu” ibsuun, “Ani nagaa kanaaf of kenneera, isin nagaa kanaaf of kennitaniittu, waliin taanee nagaa kana galmaan ni geenya” jechuun ibsaniiru.

    Guyyaa kun"seenaa keessatti ni galmaa'a" Tiraamp illee "seenaa saba keenyaa fi addunyaa keessatti ni galmaa'a" jedhan

    "Yeroo kana yeroo dheeraf eegaa turrees jedhan.

    Netaaniyaahuun loltoota Israa'el wareegaman kaasuun sababa gootota kanaatiin sabni keenya ni jiraata, nagaa ni qabaata," jedhan

20. 13 Onkololeessa 2025Walitti bu'iinsa humnoota Hamaasiifi gosota hidhatan gidddutti uumameen namootni 32 ajjeefaman

    

    Madda suuraa, Reuters

    Hamaas Dilbata kaleessaa loltoota Gaazaa keessatti bobbaasee kan ture yoo ta’u, namoonni haleellaa Onkoloolessa 7 butaman wayita gadi dhiifaman hiriira galuun eegaa turan.

    Akka gabaasni Rooyiters irra argame mul'isutti gareen kun humna isaanii agarsiisuuf kan mul'atan yoo ta'u, akka maddeen Hamaas jedhanitti, ammoo namoota butaman sana eeguuf dirqama waan qabaniif eegaa turan jedhu.

    Gaazatti walitti bu'iinsa cimaa humnoota Hamaas fi namoota gosa Dugmush hidhatan gidduutti uumameen yoo xiqqaate namoonni 32 ajjeefamaniiru.

    Dabalataanis, hookkara kanaan humnootni Hamaas jaha ajjeefamaniiru maddi nageenyaa Hamaas himaniiru.

    Akka qondaalli kun ibsanitti, hojiin ''baandaa'' magaalaa Gaazaa keessaa qulqulleessuu kan itti fufe ta'uu fi namoota dhuunfaa 24 to'annoo jala oolchu fi 30 kan ta'an madeessuu ibseera.