Puutiin Yukireen qaama waliigaltee nagaa akka taatuuf wabii nageenyaa kennuuf waliigaluu ergamaan Ameerikaa

Haguuggii Tamsaasa Kallattii

1. 11 Hagayya 2025Paayileetiin 'EasyJet' taatee 'machii fi qullaa' ta'uun hojiirraa dhorkame

   Dhaabbanni 'EasyJet' balaliistota isaa keessaa tokko machaa'ee qullaasaa hoteela qananii ta'e keessa naanna'uun erga gabaafameen booda hojii irraa ari'ate.

   Paayileetiin maqaansaa hin ibsamne kun gaafa Hagayya 5 ganama barii keessaa mana dhugaatii keessatti yeroo dheeraaf dhugaatii erga dhugeen booda, bakka waloo riizoortii abbaa urjii shan kan Keep Verde keessatti argamuutti uffata tokko malee osoo deemaa jiruu argameera jedha 'The Sun'.

   Balaliisaan kuni balalii deebii sa'aatii 36 olitiin gara 'Gatwick' deemuuf kan ture yoo ta'u, garuu daandiin xiyyaaraa kun erga waa'ee taatee kanaarratti komiin isa qaqabeen booda hanga balaliisaa bakka bu'aan ergamuutti xiyyaarichi akka turu taasiseera.

   Dubbi himaan dhaabbata 'EasyJet' BBC'tti akka himanitti, balaliisaa kana amma qorannoon kan isa mudatu yoo ta'u, nageenyi imaltootaa fi hojjettoota xiyyaarichaa ''dhimma dursaa dhaabbatichaa'' ta'u himaniiru.

   Paayilatiin kun Hagayya 4 ture kan biyya odola Afrikaa Lixaa keessatti argamu kan 'Melia Dunas Beach Resort and Spa' jedhamu erga gaheen booda dhugaatii dhuguu jalqabuusaa Sun gabaaseera.

   Borumtaa isaa ganama naannoo sa'aatii 02:30tti (04:30 BST) uffata isaa ofirraa baasee gara simannaa keessa akka burjaaja'u keessummoonni hotichaa argan. Isaan booda ammoo gara bakka jiimii fi ispaa osoo hin ce'iin dura akka argan himameera jedha gaazexaan kun.

   "Namni balaliisaa kana guyyaa balaliitiin duraa sa'aatii qullaasaa asiifi achii wayita imalaa ture arge isa waliin xiyyaara xiyyaara yaabbachuu hin abjootu ture," jedhan maddi daandii qilleensichaa tokko.

2. 11 Hagayya 2025Awustiraaliyaan biyyummaa Filisxeemiif beekamtii kennuun "dogongora hamaadha" jedhan pirezidaantiin Israa'el

   Awustiraaliyaan Filisxeemiif beekamtii biyyummaa akka kennitu beeksisuu hordofee pirezidaantiin Israa'el Isaaq Herzoog "dogoggora hamaadha" jechuun ibsan.

   Awustiraaliyaa dabalatee biyyoonni kaan Filisxeemiif beekamtii kennuuf tarkaanfiin isaan fudhatan "shororkeessitoota badhaasudha" jedhan.

   Dabaluunis, tarkaanfiin biyyoota kanaa kanneen diina dimikiraasii, bilisummaafi walabummaa ta'aniif "akka kennaa kennuutti ilaalama" jedhan Isaak Herzoog.

   Awustiraaliyaan Kora Dhaabbata Biyyoota Gamtoomanii Fulbaana dhufu gaggeeffamurratti Filisxeemiff beekkamtii biyyummaa akka laattu beeksiste.

   Kun ammoo Israa'eliin heddu dheekkamsiisee jira.

   Awustiraaliyaa qofa osoo hin taane, biyyooni michuu Israa'el ta'an kanneen akka Faransaayifi UK fa'aas Fulbaana dhufu Filisxeemif beekamtii laachuu akka danda'an beekasisaniiru.

   Israa'el gamasheen, adeemsi biyyoonni kun hordofan rakkoo Israa'eliifi Filisxeem gidduu jiru kan hammeessu malee furmaata waaraa akka hin taane irra deddeebin ibsite.

3. 11 Hagayya 2025Puutiin ilma aangooftuu CIA Raashiyaaf osoo loluu Yukireenitti ajjeefameef badhaasa ergamaa Tiraampitti ergan

   Pirezidanti Viladmiir Puutiin daareektara ittaantuu dhaabbata basaasaa Ameerikaa (CIA) kan ilmishee osoo Raashiyaaf loluu waraana Yukireeniin jalaa ajjeefame, karaa jila Doonaald Tiraampiin badhasa ergan.

   Puutiin badhaasa Ajaja Leeniin (Order of Lenin) jedhamu Istiiv Wiitkoof'tti kan kennan wayita karoora waraana Yukireen xumuruuf irratti mari'achuuf torban kana gara Moskootti imala taasisan ta'u, maddeen dhimma kana beekan michuu BBC Ameerikaa kan ta'e CBS'tti himaniiru.

   Maayikeel Giloos kan umuriin waggaa 21 fi bara darbe Yukireen keessatti ajjeefames, ilma Juuliyaan Gaaliinaa, CIA'tti itti aantuu daayreektaraa kalaqa dijitaalaa kan taateeti.

   Gabaasni badhaasa kanaa kan dhagahame, yeroo Tiraamp fi Puutiin Jimaata dhufu Alaskaatti wal arguudhaan egeree waraana Yukireen irratti akka mari'atan mirkanaa'eettiidha. Dabalataaf Dabalataan dubbiifachuuf asiin seeni.

4. 11 Hagayya 2025Sirni awwaalcha gaazexeessitoota Aljazeeraa Gaazatti gaggeeffame

   Sirni awwaalcha gaazexeessitoota Al-Jazeeraa shan kanneen haleellaa Israa'eliin ajjeefamanii Gaazatti gaggeeffame.

   Israa'el halkan darbe haleelaa Gaazaa keessatti gaggeessiteen gaazexeessaa Al-Jazeeraa Gaazaa keessaa gabaasuun beekamu Anaas al-Shaariif dabalatee gaazexeessitoota dhaabbatichaa shan ajjeestee turte.

   Humni Waraana Israa'el Anaas al-Shaariif miseensa Hamaas ta'uu isaa sanadoota garaa garaa irraa mirkaneeffadheera jechuun ibse.

   Haata'u garuu, waraanni kun osoo hin eegaliin dura malee sana booda gaazexeessaan Al-Jazeeraa kun Hamaas waliin hidhata qabaachuusaa Israa'el ragaa hin dhiyeessine jedhameera.

   Sirna awwaalcha gaazexeessitoota Al-Jazeeraa har'a Gaazaatti kan gaggeeffame yoo ta'u, namoonni hedduunis sirnicharratti argamaniiru.

5. 11 Hagayya 2025UKn ajjeechaa gaazexessitootaa irratti qorannoon walabaa akka gaggeeffamu gaafatte

   Mootummaan UK ajjeechaa gaazexeessitoota Al Jazeeraa fi miidiyaalee biroo Gaazaa keessatti Israa’el raawwateen “yaaddoo guddaa” keessa jiraachuun ibse.

   Dubbi himaan ofiisaa Ministira Muummee Siir Kiir Istaarmar, ibsa gaazexeessitootaaf kennaniin, Israa’el gaazexeessitoonni nagaan hojjechuu fi sodaa tokko malee gabaasuu akka danda’an mirkaneessuu qabdi jedhan.

   Akkasumas ajjeechaa Anaas al-Shaariif fi waahillan isaa irratti qorannoon walabaa akka gaggeeffamu gaafataniiru.

6. 11 Hagayya 2025Maaliitti loltoonni fonqolcha mootummaa gageessuuf turan jedhaman heddu to'annoo jala oolfaman

   Loltoonni Humna Waraana Maalii mootummaa humna waraanaatiin gaggeeffamurratti fonqolcha gaggeessuuf yaalan jedhaman heddu to'annoo jala oolfamuun gabaafame.

   Halkan edaa guutuu loltoonni heddu to'atamaa buluun kan himame yoo ta'u, mootummaa biyyattii waraanaan gaggeeffamu keessatti muddamni hammaachutu himame.

   Gama biraan ammoo, humnoonni Jihaadistii haleellaa waraana biyyattiirratti gaggeessaniin lafa qabataa jiraachunis muddama uumee jira.

   Mootummaan Maalii garuu waa'ee fonqolcha mootummaa yaalame jedhamee kanaa ilaalchisee homaa hin dubbanne.

   Kanneen fonqolcha mootummaarratti yaalan jedhamanii to'ataman keessaa qondaalonni waraanaa olaanoo biyyattii ni argamu.

7. 11 Hagayya 2025Namoonni daandiirra jiraatan 'hatattamaan' Waashingitan DC keessaa bahuu qabu- Tiraamp

   Pirezidaantiin Ameerikaa Doonaald Tiraamp namoonni mana hin qabne, daandiirra jiraatan ''Hatatamaan'' Waashingitan DC keessaa bahuu akka qaban himan.

   Tiraamp yakka magaalichatti hojjetamu xiqqeessuuf murtoo kana dabarsuu himan.

   Kantiibaan magaalichaa garuu isa Tiraamp magaalaa Waashingitan DC magaalaa Baagidaaditti fakkeessan hin fudhanne.

   ''Bakka jiraattan isiniif kennina. Garuu magaalarraa bakka baay'ee fagoodha'' jedhe Tiraamp.

   Tiraamp magaalicha ''naga qabeessaa fi baay'ee bareedduu'' gochuuf akka hojjetan himan.

   Kantiibaan magaalichaa Muurel Booser, kan paartii Dimokiraatota irraa tahan, ''Yakki magaala keenyatti hin hammaanne'' jedhan. Dabalataan dubbiifachuuf asiin dubbiifachu dandeessu.

8. 11 Hagayya 2025'Ummata koo deeggaruuf ciminakoo hunda kenneera'

   Battaluma ajjeeffamuun gaazexessaa Al Jeezeeraa, Anaas al-Shaariif dhagahame yeroo muraasa booda barreeffamni hiriyyaa isaatiin qoodame fakkaatu tokko akkaawuntii X isaarratti maxxanfame.

   Innis, "Fedhii fi ergaa dhumaa" isaa keessatti, rippoortarri Al Jeezeeraa kun "ummata kootiif deeggaruu fi sagaleesaaniif ta'uuf carraaqqii fi dandeettii koo hunda kenneera" jedha.

   "Gadi fageenyasaa hundaan dhukkubbii keessa darbee jiraadheera, yeroo hunda gidiraa fi kasaaraa dhandhameera, ta'us osoon hin sobiinii fi hin jallisiin dhugaa jiru akkuma jirutti dabarsuu irraa duubatti deebi'ee hin beeku," jechuun barreessa.

   Shariif "ummata Filisxeem, faaya gonfoo addunyaa Muslimaa keessaa, dha'annaa onnee nama bilisaa addunyaa kanaa hundaaf" kabaja ni kenna.

   "Ummatasaa, ijoollee isaanii kanneen qulqulloota garuu dabni irratti raawwatee fi yeroo abjuu arguuf ykn nagaa fi tasgabbiin jiraachuuf carraa hin arganne waliin imaanaa isiniif kenna."

   "Qaamni isaanii qulqulluun boombii fi misaa'ela Israa'el toonii kumaatamaan lakkaa'amu jalatti caccabee, cicciramee gamoowwan irratti faca'e."

9. 11 Hagayya 2025Masiriin eegumsa hidha Abbayyaaf Itoophiyaaf maallaqa kaffaluu qabdii?

   Hidhi Guddicha Itoophiyaa kana booda ofuma isaaf meeshaa guddaa ofiin of tiksu akka tahe xiinxaltoonni BBC'n dubbise himan.

   Hidhi Guddichi Itoophiyaan ijaaraa jirtu [GERD] Hidha Haaromsa Itoophiyaa jedhamuunis beekama. Hidhi kun haaromsa dinagdee guddaa uummata biyyattiif fida jedhamee abdatameera.

   Garuu guyyaa ijaarsi hidha kanaa jalqabee as mormii guddaa keessa darbuun amma gara xumuraatti dhiyaateera. Fulbaana dhufu kanas akka eebbifamu mootummaan Itoophiyaa beeksiseera.

   Gam tokkoon humna, beekumsaa fi baajata biyyattiin qofa hojjetame. Gama biraan dhiibbaa dippilomaasii cimaan Itoopiyaa mudate.

   Masiriif ''dhimma jiraachuu fi jiraachuu dhabuuti.'' Bishaanicha %85 kan gumaachitu ammoo Itoophiyaadha. Garuu Itoophiyaan bishaan kana irraa fayyadamuu qabdi jechuun biyyoonni gurguddoon kaan yeroo falmaniifii yeroo hedduu hin dhagahamu.

   Guutummaa odeessa kanaa dubbiifachuudhaaf asiin seenaa.

   Itoophiyaan dubbii Tiraamp Hidha Abbayyaarratti dubbataniif deebii kennite.

   Dubbii falmisiisaa Tiraamp, galata al-Siisii fi marii Itoophiyaan taasifte

10. 11 Hagayya 2025Haleellaa Israa'el Gaazaa keessatti raawwatteen gaazexeessitoonni shan ajjeefaman

    Haleellaa Israa'el hospitaala Al-Shifa magaalaa Gaazaa keessatti argamurratti raawwatteen gaazexeessitoonni Al Jazeera shan ajjeefamuu miidiyichi ibse.

    Akka gabaasa Al Jazeeratti wayita Israa'el hospitaalicha haleeltu gaazexeessaa Anas al-Shariif fi Mohammad Qreqeh ogeyeyii kaameeraa Ibraahim Zaahir, Mohammad Nuufal fi Mu'amin Aliwaa bakka turtii gaazexessitootaa ulaa hospitaalichaarra jiru keessa turan.

    ''Haleellaan gaazexeessitootarratti qiyyaafate,'' kun haleellaa suukanneessaa walabummaa miidiyaarratti raawwatamedha jedha ibsi Al Jazeera.

    Haleellaan sun raawwatee yeroo muraasa booda Humni Ittisaa Israa'el (IDF) gaazexeessaa Anas irratti xiyyeeffachuun haleeluu amane.

    IDF gaazexeessaan kun ''caasaalee shororkeessitootaa Hamaas hoogganaa ture,'' jechuun Telegram irratti barreesse.

    Bal'ina oduu kanaa as keessaa argattu

11. 11 Hagayya 2025Lammiileen Ertiraa 15 UK seenuuf osoo jedhanii konkolaataa diilalessaa keessatti dhokatanii argaman

    Namoota kunneen keessa daa'imi tokkos jirti. Lammiilleen Ertiraa kunneen konkolaataa diilaleessaa (firiijii) kana Faransaay irraa ka'uun imalaa tureen UK seenuuf wayita jedhan argamuu AFPn gabaaseera.

    Baqattoonni Ertiraa kunneen konkolaataa diilalleessaa kana keessatti kan argaman Sambata darbe yoo ta'u, qorra baayyee hamaa ta'erraa kan ka'e balaa hamaa keessa seenaniiru, kanaafis birmannaa gaafataniiru.

    Namoonni kunneen diilalla hamaadhaan baayyee waan miidhamaniif ogeeyyiin Faransaay wal'aanaa jiraachuu AFPn gabaaseera.

    Konkolaataan kuduraalee fi muduraalee fe'ee gara UK imalaa ture kun kaaba Faransaay boqonnaaf wayita dhaabbatu namoonni kutaa diilalleessaa keessa turan kunneen konkolaachisaatti akka iyyatan aanga'oonni naannoo ibsaniiru.

    Konkolaachisaanis haala ture erga aanga'oota naannoo sanaaf ibsee booda poolisii fi ogeeyyiin fayyaa bakka sana qaqqabuun baqattoonni konkolaataa diilalleessaa kana keessaa akka ba'an gargaaraniiru.

    Baqattoota 15 kunneen keessaa tokko dubartii ta'uu aanga'oonni ibsaniiru.

    Baqattoota kunneen keessaa afur diilallaan baayyee waan miidhamaniif hospitaala geeffamanii wal'aanamaa jiru, afur ammoo umriinsaanii waggaa 18 gadi waan ta'aniif jaarmiyaa eegumsa taasisuufitti dabarfamanii kennamaniiru.

    Lammiileen Ertiraa kunneen irra caalaan isaanii seeraan ala jedhamuun biyyattii keessaa akka ba'an ajaji irratti darbee ture.

    Konkolaachisaa baqattoota kunneen fe'ee ture irratti poolisiin qorannoo homaa akka hin gaggeessine gabaasi AFP ni mul'isa.

12. 11 Hagayya 2025Taphataan buunyaa dorgommii irratti morkataa isaatiin mataarra dhahame du'e

    Hiroomaasaa Uraakaa dargaggeessa ganna 28 yoo tahu, Hagayya 2 Tookiyootti osoo dorgommii irra jiruu morkataa isaatiin mataarra dhahame.

    Miidhaa sammuu isaarra gaheen lubbuun isaa darbite. Morkataa isaa Yoojii Saayito jedhamutu isa rukute.

    Taphataan buunyaa biraa Shigetooshii Kotarii jedhamu Jimaata darbe miidhaa sammuu dorgommii irratti isa mudateen lubbuun isaa darbe.

    Waldaan Buunyaa Addunyaa [WBO] gadda itti dhagahme ibseera. ''Gaddi kun du'aatii Shigootishii hordofee waan nu mudatedha, maatiif, hiriyyootaafi jaalattoota isaaniif jajjabina hawwina'' jedhe.

    Bara 2025 keessa taphataa buunyaa sadaffaatu du'e. Lammii Ayerlaand Joon Kuunii ji'a Guraandhalaa keessa miidhaa wal fakkaataa dorgommii Beelfaasti irratti isa mudateen lubbuun isaa darbe.

13. 11 Hagayya 2025Awustiraaliyaan Fulbaana dhufu beekamtii biyyummaa Filisxeemiif kennuuf

    Ministirri Muummee Awustiraaliyaa Antonii Albaaniis UK, Faransaay fi Kanaadaatti aanuun karoora biyya Filisxeemiif beekamtii kennuu akka qaban ibsan.

    Aanga'oonni Filisxeem waan addunyaan irraa eegdu mara kutannoo raawwachaa jiraachuu Awustiraaliyaan sirriitti beekti kan jedhan MM Albaaniis keessattuu hidhannoorraa bilisa ta'uu, filannoo gaggeessuu fi mirga jiraachuu Israa'el eeguu keessatti kutannoonsaanii jabaadha jedhan.

    ''Biyyoonni lameen akka biyya of danda'anitti walqixa ilaalamuun furmaata argamu qofatu dararaa uummanni Gaazaa argaa jiru, waraana Gaazaa fi rakkoo nageenyaa Baha Giddugaleessaa hambisuu danda'a,'' jedhan.

    Waraana Gaazaa akka dhaabduuf dhiibbaan idiladdunyaa kan itti cimee jiru Israa'el gamasheen Filisxeemiif beekamtii biyyummaa kennuun ''shororkeessitoota cinaa dhaabbachuudha,'' jechuun karoora biyyoonni biyya Filisxeemiif beekamtii kennuuf qabatan balaaleffatti.

    Kutaalee West Baank kan qubattoota Israa'eliin weerarame gara caalu kan bulchan Aanga'oonni Filisxeem, beekamtii biyyummaa Filisxeemiif kennuun deeggarsi uummatichaaf taasifamu dabalaa jiraachuu mul'isa jechuun gammachuu qaban ibsaniiru.

    MM Albaaniis gitoota isaanii kan UK, Faransaay, Niwu Ziilaand fi Jappaan waliin erga mari'atanii booda murtee kanarra ga'an.

    Kanaan dura Kanaadaanis Filisxeemiif beekamtii biyyummaa kennuuf karoora akka qabdu wayita ibsitu US mufachuu ibsitee turte.

    Ameerikaan akka jettutti Filisxeem akka biyya taatuuf beekamtii jechuun Hamaasiif badhaasa guddaadha.

    Pirezidantiin US Doonaald Tiraamp wayita Ministirri Muummee Kanaadaa karoora kana ibsan mufachuun dubbataniiru.

    Bara darbes Ispeen, Aayeerlaand fi Noorway biyya Filisxeemiif beekamtii akka kennan ibsanii turan.

14. 11 Hagayya 2025Tamsaasa kallattii

    Akkam bultan hordoftoota keenya?

    Odeessaalee dhimma Israa'el fi Filisxeem irratti xiyyeeffatan fi kanneen Baha Giddugaleessaa akkasumas addunyaa mara irraa karaa kanaan kallattiin isiniif dhiheessina.

    Odeessaalee duraan tamsaasa kallattiin dabarsaa turre asii argattu.

    Nu hordofaa!