Israa'el Libaanositti eddoo Hezbollaan buufate erga haleelteen booda amma buufataalee misoomaa Huutii Yeman keessaa haleelluu himte

Haguuggii Tamsaasa Kallattii

1. 23 Fuulbaana 2024Haleellaan Libaanos irratti raawwatamuu babal’achuu mala - Ministira Raayyaa Ittisaa Israa'el

   

   Madda suuraa, Reuters

   Ministirri Raayyaa Ittisa Biyyaa Israa’el Yo'av Galanti walga’ii qondaaltota waraanaa waliin Tel Avivitti geggeessan irratti haleellaan Libaanos irratti raawwatamaa jiru babal’achaa jira jedhan.

   Tarkaanfiwwaan itti aananii fudhatamanis ''hanga kaayyoo keenya galmaan geenyutti itti fufu" jedhan. Ministirichi haasawa afaan Ibruutin taasisaniin kaayyoon isaanii inni guddaan jiraattota kaabaa Israa'el irraa buqqa'an karaa nagaan gara qe'ee isaaniitti deebisuu ta'uu himan.

   "Guyyoonni ummanni nagaa fi tasgabbiin qe'ee isaanii keessa jiraatan ni dhufas' jedhan.

   Hizbullaan Onkoloolessa 8 bara 2023 eegalee rookkeettii gara daangaa Israa’elitti erge dhukaasuu jalqabee booda lammiileen Israa’el gara 60,000 ta’an naannawa kaaba Israa'el irraa baqatan hanga yoona gara qe'ee isaanii hin deebi'in jiru.

2. 23 Fuulbaana 2024Egamaan UN muddamni Libanos keessaa akka hir'atu gaafate

   

   Madda suuraa, EPA

   Humni Yeroo Dhaabbata Biyyoota Gamtoomanii Libaanos (UNIFIL) dhimma nageenya lammiilee nagaa kibba Libaanos keessa jiranii irratti ''yaaddoo cimaa'' qabaachuu ibse.

   Hogganaan ergama kanaa Jeneraal Aroldoo Laazaaroo, qaamoolee lamaan; kan Libaanosii fi Israa’el qunnamuudhaan, hatattamaan muddama hir’isuun barbaachisaa ta’uu cimsanii dubbatan.

   "Haalli balaa kana daran hammachuun waan cimaa fi hamaa fiduu danda'a."

   UNIFILn humna UN nagaa eegsisuu ta’e, haleellaan namoota nagaa irratti raawwatamu kan seera idil-addunyaa cabsu ta’uusaa fi yakka waraanaa ta’uu akka danda’u akeekkachiisa.

3. 23 Fuulbaana 2024Somaaliyaan meshaalee waraanaa guddaa Masirii irraa argachuun himame

4. 23 Fuulbaana 2024Baha Giddu-galeessaatti yaaddoon gara walitti bu’insa bal’aatti seenuu guddaadha

   

   Madda suuraa, EPA

   Lolli Israa’el fi Hezboollaa giduutti babal’ataa jiru, carraa humnoota Baha Giddu-galeessaa keessa jiran harkisuu qabateera.

   Dilbata gurmuun milishootaa michuu Iraan ta’an maqaa Islaamik Reziistaans in Iraaq (IRI) jedhamuun beekamu, kiruuz misaa’elii Israa’eliti dhukaasuun diroonii rukkuteera. Gareen kun gocha isaa kana Libaanos waliin dhaabbachuuf “adda deegarsa taasifnu keessatti sadarkaa haaraa” jedheera.

   IRI Iraaqiifi Sooriyaa keessa kan socho’u yoo ta’u, haleellaa Israa’el fi buufataalee US qaxanaa sana keessa jirurratti taasisu erga Onkoloolessa 2023 waraanni Gaazaa keessatti kaasee cimsee itti fufeera.

   Gareen kun humna waraanaa guddaa Iraan – Islaamik Rivoluushinarii Koorpis (IRGC)tiin kan deeggaramu ta’ee qama humna Iraan Aksis oof Reziistaans jettuudha.

   Humna Aksis oof Reziistaans kana Iraanitu waggoota kurnan dura guutummaa Baha Giddu-galeessaa keessatti dhiibbaa biyyi michuu jabduu Israa’el taate US qaxanaa sana keessatti qabdu dura dhaabbachuudhaaf gareewwan akka Hezboollaa, Hamaas, IRI, akkasumas milishoota Iraaqiifi Sooriyaa, Huutii warra Yaman, walitti fiduun hundeesse.

   Hanguma walitti bu’iinsi Israa’el fi Hezboollaa gidduu hammaachaa dhufe, gareen Aksis oof Reziistaans jedhamu kung ama Hezboollaatiin goranii carraan keessatti hirmaachuu isaanii dabalaa dhufa.

   Kun taanaan ammoo Israa’el humnoota kanneen bakka isaan maandheffatanii Jirani kamittiyyu haleeluu dandeessi.

5. 23 Fuulbaana 2024Mossad: Dhaabbata basaasaa Israa'el 'humniifi biyyi isa daangessu hin jirre'

   

   Madda suuraa, Getty Images

   Mossad humni daangessu akka hin jirre kan dubbatu lammiin Israa’el Yoosii Meelmaan, “hanga qarqara samiitti deemuu danda’a,” jechuun BBC'f ibsa.

   Itti-dabaluun Mossad “biyya michoota ta’an yoo tuqe, daangaa bulchiinsa isaanii keessatti yakka yoo raawwate ykn seera idil-addunyaa ykn kan biyyaalessaa yoo cabse nageenyia Israa’el eegsisuuf akka ta’etti amanama,” jedha.

   Kitaaba waa’ee Mossad ibsurratti”Spy of the Holocaust” jedhamu kan barreesse Yoosiin akka jedhutti dhaabbanni basaasaa kun gocha biyyootaafi mootummoota dheekkamsiisu daangaa bulchiinsa isaanii keessatti raawwatus biyyoonni kunneen dhimmicha cimsanii itti hin fufan.

   Waa'ee Mosaad bal'inaan kana keessaa argattu

6. 23 Fuulbaana 2024Haleellaa Israa’el kibba Libaanos keessatti raawwatte viidiyoon daawwadhaa

   Haleellaa Israa’el kibba Libaanos keessatti gaggeessaa jirtuun aarri duumessa samii fakkaateera.

   Ganamarraa gareen viidiyoo haleellaan kun magaalaa kibba Libaanositti argamtu Taayer keessatti maal akka fakkaatu waraabaniiru.

   Viidiyoon kun haleellaa hordofee aarri ba'u duumessa samii haguuge fakkaatee mul'ata.

   Daawwadhaa!

7. 23 Fuulbaana 2024Haleellaa Israa’el Hezboollaarratti cimstee itti fifteen namoonni 182 ajjeefamaman–Libaanos

   

   Madda suuraa, Reuters

   Haleellaa Israa’el har’a gaggeessiteen yoo xiqqaate namoonni 182 ajjeefamamanii dhibbaan kan lakkaa’aman ammoo madaa’uu ministeerri fayyaa Libaanos beeksise.

   Israa’el ammoo haleellaaa hezboollaa irratti gaggeessitu wayita “cimsaa” jirtutti, lammileen Libaanos biyyattii gama kibbaan jiran akka garee Iraaniin deeggaramu Hezboollaa irraa fagaataniif ergaa bilbilaa itti ergaa jirti.

8. 23 Fuulbaana 2024Libaanositti namoonni 50’n ajjeefamanii 300 ol madaa’an

   

   Madda suuraa, Reuters

   Ministeerri fayyaa Libaanos haleellaa ganama kana mandaroota fi magaalota kibba Libaanositti raawwatameen namoonni 50 ajjeefamuu beeksise.

   Giddugaleessi tajaajila hawaasaa yeroo atattamaa akka beeksisetti, daa’imman, dubartoota fi ogeeyyii lubbu baraarsaa dabalatee namoonni 300 ol kan mada’aaniru.

   Ministeera Odeeffannoo biyyattii dabalatee namoonni kibba Libaanos jiraatan dhaamsi akeekkachisaa barreeffamaa fi sagaleen isaan qaqqabuu himan.

   Namoonni kunneen iddoo Hezbollaan keessa socho’uu akka bahan akeekkachiifaman.

   Gabaasaa BBC dambalii haleellaa kana lola garmalee hamaa ta'uu ibse.

   Ministirri Ittisaa Israa’el ‘’kaayyoo keenya hanga galmaan geenyutti haleellaa ni cimsina’’ jedhan.

9. 23 Fuulbaana 2024Waraanni Israa’el maadheewwan Hezbollaa 300 Libaanositti haleele

   

   Madda suuraa, Reuters

   Waraanni Israa’el toora miidiyaa hawaasaa X gubbaatti 'amma yoonaatti maadheewwan Hezbollaa 300 har’a haleelamaniiru‘‘ jedhan.

   Kana malees qondaalii olaanaa waraanaa Israa’el wayita haleellaan akka raawwatamu ajajan suura agarsiisu miidiyaa hawaasaarratti qoode.

   Ministirri Raayyaa Ittisa Biyyaa Israa’el Yo'av Galanti walga’ii qondaaltota waraanaa waliin Tel Avivitti geggeessan irratti haleellaan Libaanos irratti raawwatamaa jiru babal’achaa jira jedhan.

   Tarkaanfiwwaan itti aananii fudhatamanis ''hanga kaayyoo keenya galmaan geenyutti itti fufna" jedhan.

   Ministirichi haasawa afaan Ibruutin taasisaniin kaayyoon isaanii inni guddaan jiraattota kaabaa Israa'el irraa buqqa'an karaa nagaan gara qe'ee isaaniitti deebisuu ta'uu himan.

   Hezbollaan Onkoloolessa 8 bara 2023 eegalee rookkeettii gara daangaa Israa’elitti dhukaasuu erga jalqabee booda lammiileen Israa’el gara 60,000 ta’an naannawa kaaba Israa'el irraa baqatan hanga yoona gara qe'ee isaanii hin deebi'in jiru.

10. 23 Fuulbaana 2024Kaayyoon gurguddaan waraanni Israa’el Libaanos irratti gaggeessu maali?

    Qondaalli waraana Israa’el galmoota waraana Libaanos keessatti raawwatamu irratti gaafatamee akka ibsetti, ammatti waraana lafoo utuu hin taane haleellaan qilleensarraatu raawwatam.

    Qondaalichi galmoota waraanaa sadii kanneen Israa’el lammiilee buqqa’an kumaatamaan lakkaa’aman gara kaaba biyyattiitti deebisuuf qabdu galmaan ga’uuf duula taasifamu ta'uu himan.

    Israa’el dandeettii Hezbollaan rookkeettiiwwan dhukaasurratti qabu laaffisuu fi loltoota garichaa daangaa Libaanosif Israa’el irraa duubatti deebisuun galma biroo ta'uu qondaalichi eeran

    kana malees,bu'uuraalee misoomaa humna waraana Hezbollaa - humnoota deeggartootan ijaaraman barbadeessuudhan,hawaasa Israa’el duguuggaa, ajjeecha fi ukkaamsaa irra bilisa gochuu fa'i jedhan.

    

    Madda suuraa, Google

11. 23 Fuulbaana 2024Namoonni Libaanos keessa jiran naannawa sochii Hezbollaa irraa akka fagaatan Israa'el akeekachiifte

    

    Madda suuraa, Reuters

    Israa'el haleellaan guddaan eegaluuf waan ta'uuf namoonni Libaanos keessa jiraatan naannawa sochii fi xiyyeeffannaa Hezbollaa irraa akka fagaatan akeekkachiifte.

    Humni waraanaa Israa'el IDF haleellaa Libaanosirraa gara Israa'elitti taasifameef deebii kan ta'u tarkaanfii " bal'aa fi sirrii" ta'e fudhatamuuf qophiin xumuramuu dubbi himaa Raayyaa Ittisa Israa'el Rehar Admiral Daani'el Hagaari Rooyitersitti hime.

    Namoonni 'nageenya isaanif jecha' naannawa qiyyeeffannoo Hezbollaa irraa akka fagaatan dhamnas jedhe. Kunis haleellaa Sanbata darbee Hezbollaa Libaanos irraa rookkeettii 150 Israa’elitti dhukaase haaloo bahuuf ta'uu IDF kan ibse.

    Israa’eel haleellaa qilleensaa kibba Libaanos keessatti bakka sochii Hezbollaa irratti xiyyeeffachuun kan raawwatte yoo ta’u, rookkeettiiwwan kumaatamaan lakkaa’aman barbadeessuu ibsite.

    kana malees haleellaa naannoo kibba Beerutitti raawwateen qondaalli waraanaa olaanan Hezbollaa ajjeefamuun ni yaadatama.

12. 23 Fuulbaana 2024Israa'el kibbaa fi baha Libaanositti haleellaa jabaa banuu ibsite

    

    Madda suuraa, Rooyitars

    Ganama barii sa’aatii 12:30 irraa eegalee kibbaa fi baha biyyattii keessatti haleellaan raawwamuu miidyaaleen biyyattii gabaasan.

    Miidiyaan biyyaleessaa (NNA) akka gabaasetti, kibba Nabati, Bint Jibil fi Marjayuun keessatti qaqqabe.

    Miidiyaan biyyattii kun akka gabaasetti, baha Bekaa jedhamuttis haleellaa xiyyaaraa cimaatu qaqqabe.

    Kaaba baha Libaanositti haleellaa qaqqabeen namni tokko ajjeeffamuu miidiyaan biyyattii kun gabaasera.

13. 23 Fuulbaana 2024'Filannoorratti yoon injifatame deebi’e hin dorgomu'- Tiraamp

    

    Madda suuraa, Getty Images

    Pirezedantiin duraanii Ameerikaa Doonald Tiraamp filannoo Pirezedantummaa Ameerikaa Sadaasa dhuftuurratti yoo injifataman bara 2028 deebi’anii akka hin dorgomne himan.

    Maanguddoon ganna 78 Tiraamp filannoo biyyaaleessaa sadiirratti kaadhimamaa ta’aanii dhiyaachuun madditti, paaartii Rippabiikaanotaa ganna saddeeettan darban bifa haaraa akka qabaatu taasisan.

    Tiraamp yoo filannoo injifatanis seerri Ameerikaa pirezedantiin biyyattii marroo lamaa ol akka tajaajille daangessa.

    Tiraamp kanaan dura filannoorratti injifatamuun mala jedhanii amananii hin beekan, yeroo heddu deeggartootasaaniitiin filannoo ni injifanna jechuun beekamu.

    Tiraamp filannoorratti tarii injifatamuu akka malan akeekuun, Joo Baayidan dorgommii pirezedantummaa keessaa erga bahanii itti aantuun isaanii Kamaala Haaris bakka bu’anii booda haaalli Dimokiraatoonni itti jiran jijjirama agarsiisera.

    Gareen duula filannoo Haaris Hagayya keessa maallaqa Doolara miliyoona 190 yoo walitti qabu, gareen duula filannoo Tiraampitti hidhata qabu Doolara miliyoona 130 walitti qabe.

    Yaada hawaasa akka biyyattii sassaabsameen Haaris deeggarsa argachuun Tiraamp dursaa jiru, yaada hawaasa CBS Dilbata gadhiise akka agarsiisutti Haaris deeggarsa %52 argachuun Tiraamp (%48) akka biyyattii dursaa jiru.

14. 23 Fuulbaana 2024Maatii tokko keessaa namoonni afur mana jige keessatti du’an

    

    Madda suuraa, Vigili del Fuoco

    Ijoollee lama dabalatee miseensonni maatii tokko walumatti afur ta’an dho’insa gaazii kibba Xaaliyaaniitti qaqqabeen du’an.

    Dho’insa mudate kanaan gamoon mana jireenya abbaa darbii lamaa magaalaa Saviyaanoo jedhamutti argamu gartokkeen jiiguun obbolaa dhiiraafi durba, haadha ijoollee kanaa fi akkoosaanii ajjeese.

    Abbaan ijoollee kanaa daa'ima reefu dhalatte wajjiin gamoo jijjige keessaa lubbuun baraaramuu lubbu- baraartonni Xaaliyaanii himan.

    Abbaan ijoollee miidhaman kun hospitaala Naplisitti wal'aanamaa kan jiran yoo ta'u, haala haala lubbuuf yaaddeessu keessaa kan jiru- daa’ima baraaramterra garuu miidhaa salphaatu qaqqabe.

    Sababa gamoon sun akka jiiguuf ka’umsa akka ta’e qorachuuf qorannoon gaggeeffamuu ittifufeera, garuu dho’iinsa gaazii mudate hordifuun gamoon sun jiguutu himame.

    Tajaajilli yeroo balaa Xalaayaanii akka himetti, balaa kun galgalaa naannoo sa'aatii tokkotti mudate.

15. 23 Fuulbaana 2024Israa’el fi Hezbollaan lola hammeessuurraa akka of qusatan akeekkachiifaman

    

    Madda suuraa, Rooyitars

    Israa’el fi Hezbollaan humna qaban hundaan wal waraanutti akka hin ceene hawaasni idil- addunyaa waamicha dhiyeessaa wayita jiranitti gareen lachuu wal-haleeluu cimsuuf wal doorsisaa jiru.

    Waraanni Israa’el akka beeksisetti, rookkeettiiwwan 150 fi misaayiloonni Sambata halkanii fi Dilbata ganama gara Israa’elitti dhukaafamaniiru.

    Irra caalaa meeshaalee waraanaa kanaa Libaanosirra dhukaafaman.

    Meeshaaleen waraanaa kun muraasni iddoo kanaan dura hin qaqqabnetti kan gahan yoo ta’u, manneen jireenya naannoo magaalaa Hayifaa barbadeessuun namoonni dawoo boombii jalaa ittii dhokatanitti baqatan dirqisiise.

    Israa’el Kibba Libaanos haleeluun, rookkeettiiwwan Hezbollaa kumaatamaan lakkaa’aman barbadeesse jette.

    Dilbata darbe MM Israa‘el Beenjamin Neetanahuun‚ Israa’el nageenya deebisuuf ‘‘ tarkaafii barbaachisaa kamiyyuu fudhachuun naannoo daangaa Israa’el fi Libaaanoositti namoota buqqa’an ni deebisti‘‘jedhan.

    Neetanahuun Israa’el miidhaa jabduu Hezbollaarraan gahuu kan himan yoo ta’u, Hogganaa ittaanaan Hezbollaa Naayim Qaasim ‚‘doorsifini nu dhaabu… waraanaa sadarkaa kamifuu qophiidha‘‘ jedha.

    Barreeessaa olaanaa Dhaabbata Biyyoota Gaamtoomanii Antooniyoo Guutereez Libaanoon Gaazaa biraattii akka hin geeddaramneen yaadda‘ jechuun CNNtti dubbatan.

16. 22 Fuulbaana 2024Tamsaasa kallattii toora kanaan argattu.

    Attam jirtu hordoftoota keenyaa?

    Tamsaasa kallattii odeeffannoo Israa'el fi Hezboollaa, Israa'el fi Gaazaa, walumaagalatti taateee Baha Giddu-galeessaatti ta'aa jiru isiniif dhoyeessuu jalqabneerra.

    Nu hordofaa!!