BBC News, Afaan Oromoo
Qabiyyeetti darbi

Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.

Gara fuula marsariitii guutuutti na geessi

Filannoo daataa qusatu fayyadamu kanarratti hubannoo dabalataaf

Bulchiinsa Kurisk keessatti 'kaayyoo keenya galmaan gahaa jirra' jedhe Zeleniskiin

Pireezidantiin Yukireen Volodimiir Zeleniskii humni waraanaa bulchiinsa Raashiyaa Kurisk keessa galuun ''kaayyoosaa galmaan gahaa jira'' jedhan. Raashiyaan buchiinsa Yukireen Pokroviskii fi naannoo san to'attee lola wayita cimsitetti, Zeleniskiin lafa Raashiyaa qabatan gadhiisuuf fedha akka hin qaben akeeke. Bulchiinsa Raashiyaa amma qabatanii jiran dirree lolarraa bilisa ta'e gochuu akka barbaadanis hime.

Guduunfaa

  • Israa'eliifi Hamaas wal himachuurratti fuulleeffatan, US ammoo waliigalteen dhukaasa dhaabuu akka milkaa'u dhiibbaa cimsiteetti
  • Ministirri dhimma alaa US Antonii Bilinkan erga waraanni Gaazaa eegalee yeroo sagalaffaaf garas imalaniiru
  • Lammiileen Raashiyaa waraana Yukireen daangaasaanii keessatti gaggeessaa jirtuun yaadda'an
  • Oppireeshiniin Yukireen gaggeessaa jirtu karoora Nato fi warra Lixaati- Raashiyaa
  • Waayit Haawus oppireeshinii Yukireen daangaa Raashiyaa ceetee raawwachaa jirtu keessaa harka hin qabu jedhe
  • Yukireen daangaa Raashiyaa keessatti iddoo buufata waraanaa banamchuu himte
  • Somaaliyaafi Masriin waliigaltee waraanaa mallatteessan
  • Hamaas marii waraana dhaabuurratti hin hirmaadhu jedhe
  • Yukireen Raashiyaa seentee waraana bannaan Puutin waan godhu wallaale- Baayidan
  • Tarkaanfiin Yukireen ija jabinaan fudhatte bu’aa buusaa jira – Hogganaa duraanii MI6
  • US ‘muddama Baha Giddu-galeessaa hir’isuuf’ kaayyoo qabaachuu himte
  • aashiyaan haleellan Yukireen itti hammaannan bulchiinsa Belgorood keessatti labsii yeroo muuddamaa labsite

Haguuggii Tamsaasa Kallattii

  1. Atileet Ababaa Aragaawwii waggaa 12 booda waamamtee medaaliyaa naasaa argatte

    Atileet Ababaa Aragaawwii Olompikii Landan bara 2012tti gaggeeffamee irratti hirmaachun dorgommii meetira 1500 irratti shanaffaa baatee turte.

    Miidiyaan biyya keessaa FBCn akka gabaasetti atileetonni yeroo sana 3ffaafi 4ffaa bahan qabxinsaanii waan haqameef atileet Ababaa Aragaawwii gara sadaffaatti akka siqxu ta'e.

    Kanarraa ka'uun waggaa 12 booda medaaliyaa naasaa sirna cufiinsa Olompikii Paaris irratti argattee jirti.

    Atileet Ababaa Aragaawwii qofa osoo hin taane atileetonni biroo kudhan ta'an waggoota heddu booda Olompikii Paaris gaggeeffamerratti medaaliyaan akka kennamuuf Olompikiin Addunyaa beeksisee ture.

    Kunis atleetota Olompikii Sidinii, Beejingiifi Landanitti wal-duraa duuban gaggeeffame irratti hirmaatanii sababa garaa garaan sadarkaarratti fooyya'iinsi godhame kan hammatuudha.

  2. Yukireen daangaa Raashiyaa heektaara kuma 100 tahu qabatte

  3. Mariin Itoophiyaafi Somaaliyaa Turkitti gaggeefamaa ture waliigaltee malee xumurame

  4. 'Raashiyaan nagaa buusuuf dirqisiifamuu qabdi'- Zelenskii

    Pirezidantiin Yukireen Volodymyr Zelenskiin, yeroo Pirezidaanti Vilaadmir Putiin lola itti fufuu barbaadaa jiran kanatti, Raashiyaan ''nagaa buusuuf dirqisiifamuu'' qabdi jedhan.

    Zelenksiin ibsa isaanii galgala keessa taasisaniin, erga Moskoon waraanaa gara biyyoota birootti geessiiteen booda waraanni gara Raashiyaatti deebi'aa akka ture dubbata.

    ''Putiin akkasiin hammeessee yoo waraanaa barbaade, Raashiyaan nagaa buusuuf dirqamuu qabdi,'' jedha Zelenskiin.

    Itti dabalunis, "Raashiyaan warra kaaniif waraana fidde, amma waraanicha qe'ee isheetti deebisneerraaf, arguu qabdi,'' jedhan.

    Yukireen yeroo hundaa nagaa qofa barbaaddi, nagaa mirkaneessuun keenya hin oolu," jechuun dubbatan.

  5. Boordiin Filannoo Biyyaalessaa Korri TPLF borutti waame 'beekamtii hin qabu' jedhe

  6. US Raashiyaan loltootashee Yukireen keessaa baasuu qabdi jette

    US dhaadannoo Puutiin Yukireen adabuuf dubbatan “waan haaraa miti” jechuun, Raashiyaan yoo akkas jettuufi ''jachoota dubbii hammeessan yoo fayyadamtu'' kun kan yeroo jalqabaa miti jette.

    Pirezidaantiin Raashiyaa Yukireen daangaa Raashiyaa seenuu isheetiin “deebii ta'uu malu” akka argattu dubbachuusaanii kanaan dura gabaasuun keenya ni yaadamata.

    Gaazexeessaan BBC har'a ibsa oduu Ministeera Dhimma Alaa Ameerikaa Waashingitanitti kennu irratti argamees, dubbi himaa Vedaant Paatel yaada Puutiin dhiheenya kana kenne irratti maal akka jedhe gaafateera.

    Innis Raashiyaan furmaata yoo barbaaddi ta'e, “humnoonni ishee Yukireen keessaa gadhiisanii ba’uu” akka qaban dubbatan.

    Akkasumas dubbii himaan kun, gabaasni yeroo dhiyoo waa’ee tarkaanfii Yukireen kan ejjennoo Ameerikaa irratti jijjiirama wayi umuu yoo ta'es gaafatamanii ture.

    Yaada Ministeerri Dhimma Alaa torban darbe kennee ture irra deebi’uun, Ameerikaan humnoonni Yukireen tarkaanfii Raashiyaa irraa of ittisuu akka danda’an deeggarti jechuun, imaammata isaanii irrattis wanti jijjiirame akka hin jirre dubbatan.

  7. Yaa'iin nagaa ittaanu Raashiyaa hammachu qaba- MM Iswiizerlaandi

    Ministirri Dhimma Alaa Iswiizarlaand Ignaazoo Kassis gita isaanii Xaaliyaanii waliin ''weerara Raashiyaan Yukireen keessatti raawwattu irratti baayyee yaadda'uu'' ibsuun labsii waloo mallatteessuun.

    Haata'u malee, itti dabaluudhaan yaa’ii nagaa itti aanu irratti Moskoon argamuu qabdi jedhan.

    Walakkeessa baatii Waxabajiitti Isiwiizarlaand yaa'ii haala itti Yukireen keessatti nagaan deebiifamu mari'atamufi kan hoggantoonni addunyaa irratti hirmaatan keessummeessiteetti.

    Amma ammoo, “Yaa’ii nagaa lammaffaa kan Raashiyaa dabalatee, qaamolee hunda irratti hirmaatan gaggeessuu ni deggerra,” jedha Kassis toora X isaanii irratti.

  8. Yukireen naannoo Kuurisk keessatti lafa sq km 1,000 to’attee jirti – hogganaa waraanaa

    Yukireen amma daangaa Raashiyaa keessatti bulchiinsa Kuursk irraa lafa naannoo iskuweer kiiloo meetira 1,000 to’atteetti.

    Ammalleen haleellaa waraanaa itti fuftee akka jirtuu hogganaan waraana biyyattii himan.

    Hogganaan waraana Yukireen, Jeneraal Oleksaandr Siriskii kana kan beeksisan, viidiyoo Pirezidaantiin Yukireen Volodymyr Zelenskiin fuula Telegram isaanii irratti qoodaniiniidha.

    Zelenskiin gama saanitiin naannoo sanaaf ''karoorri namoomaa'' akka qophaa'u ajaja dabarseera jedha.

  9. Suuraan: Putiin bakka haleellaa Yukireen irratti walgahii taa'anu jiraattoonni Kuurskii baafamaa jiru

    Suuraalee haaraa ejansiiwwan oduu Raashiyaa keessaa irratti har'a mul'ata muraasni kunooti:

  10. Yukireen naannoo Kuursh keessaa gandoota 28 to'atteeti- Bulchaa

    Bulchaan bakka bu'aan Kuursk, Aleeksee Ismirnoov ammaa tana Puutiin waliin walgahii qondaaltota irratti dubbataa jiru.

    Smirnoov akka jedhaniitti, Yukireen gandoota naannichaa 28 to'annoo jala oolfateetti. Itti dabaluunis, "Haalli jiru ammallee rakkisaadha," jedha.

    Humnoonni Yukireen naannicha keessa gara maayilii 7.4 (kiiloo meetira 12) kan seenan yoo ta’u, addi sarara achi jiru ammoo bal’inni isaa kiloo meetira 40 akka ta’e dubbata.

    Puutiin dubbiisaanii jidduu galuun dhaabsiisuun, "ministeerri ittisaa hangam akka seenanii fi bal'ina daangaa ni gabaasa" jechuun, isaan "waa'ee haala hawaasummaa fi dinagdee akkasumas akkaataa namoonni itti gargaaramaa jiran nutti himi" jechuun gaafate.

    Aab Smirnoov lammiileen Raashiyaa gara 2,000 ta’an naannoo humnoota Yukireeniin to'atame Kuursk keessatti akka hafan Puutiinitti himan. "Waa'ee hiree isaanii homaa hin beeknu", jedhan dabaluudhaan.

    Bulchaan kunis, naannoo Kuursk keessaa jiraattoonni 121,000 ta'an baafamuufi ammalleen kanneen kuma 59 ol ta'an baasuun akka barbaachisu dubbatan.

  11. Putiin loltoota Yuukireen hedduminaan daangaasaanii galanitti marsuuf wayi turanii?

    Yuukireen erga daangaa Yuukireen seentee haleellaa bantee torban tokko tahaa jira.

    Qumaarri siyaasaa Zeleniskiin jalqaban waan bu'aa argamsiisaafii jiru fakkaata. Garuu ammaaf kan argamaa jiru qofadha.

    Kireemiliin waraana kanaan hedduu rifatteetti. Haamileen Yuukireen daran dabaleera.

    Raashiyaan humna waraanaa ishee Donbaas jiru deebistee gara Kibbaatti bobbaasuuf waan dirqamtu fakkaata.

    Balaa guddaa kan qabu garuu Raashiyaan humna waraanaa gahaa ture bobaastee jirti.

    Waraanni Yuukireen haguma daangaa Raashiyaa keessa ture waraanni Raashiyaa itti marsee karaa bahumsaa dhorkuun akka malee haleeluu danda'a sodaan jedhu jira.

    Loltootni hedduu jalaa booji'amuu fi madaa'uun bu'aa dhiyeenya Yuukireen waraana irratti argataa dhufte jalaa busheessuu danda'a.

  12. Namicha Efiil Taawor koree loogoon Olompikii fannifameen olitti yeroo mul'atu

    Guyyaa dhumaa Olompikii Paaris 2024 irratti namichi tokko Efiil Taawor osoo koraa jiruu argame.

    Viidiyoon miidiyaa hawaasaarratti qoodame akka mul'isutti, namichi kun efiil Taawor (siidaa mallattoo paaris) bakka loogoon Olompikaa itti fannifamee jiru gararraatiin koraa jira.

    Erga kun mul'atee qaami nageenyaa qaqqabee nama kana to'achuu poolisiin himeera.

    Namni kun lammummaan isaa eessa akka ta'eefi maaliif akka Efiil Taawor kana koruu barbaade wanti yeroo sanatti ibsame hin jiru.

  13. Toom Kiruuz cufinsa Olompikii Paarisirratti bantii istaadiyeemiirraa utaaluun hedduu ajaa’ibsiise

    Holiiwuud irratti baayyee beekamaa kan ta’e Toom Kiruuz sirna cufiinsa Olompikii Paaris 2024 Dilbata galgala gaggeeffamerratti bantii istaadiyeemiirraa utaalee seenuun daawwattoota ajaa’ibsiiseera.

    Lammiin Ameerikaa Fiilmii Akshin keessatti adda-duree ta’e sirna cufiinsa istaadiyeemii Istaa Dee Firaans keessatti gaggeeffamaa turerratti finyoo/wadarootti hidhamee osoo fiixee istaadiyeemiirraa gadi of darbatuu argame.

    Hojii fiilmii ‘Mission Impossible’ jedhamuun kan beekamu Toom Kiruuz, yeroo fiixee istaadiyeemiirratti mul’ate daawwattoonni iyyaafi harka rukkutuun gammacuusaanii ibsataniiru.

    Weellistuun beekamtuu Ameerikaa Keer osoo gitaarasheetiin muuziqaa dhiyeessaa jirtuu ture Toom Kiruuz jaakkettaa gogaafi gowaantii godhatee kan hordoftootatti makame.

    Toom Kiruuz tamsaasa kallattii TV irratti erga kana raawateen booda osoo paarisirraa gara Ameerikaatti imaluu viidiyoon agarsiisu iskiriinii guddaa istaadiyeemicha keessa jirurratti mul’ateera.

    Kun kan ta’e ammoo Olompikii qopheessuudhaaf magaalaan Ameerikaa -Loos Anjeles Paarisirraa fudhachuushee agarsiisuufidha.

    Los aanjeles bara 2028 Olompikii qopheessuudhaaf ‘xuwwaa’ fudhatteetti.

  14. Hamaas waliigalteen dhukaasa dhaabuu akkaataa karoora Baayidaniin ta'uu qaba jedhe

    Gaazaa keessatti dhukaasa dhaabuuf waliigalteen taasifamu kamiyyuu akkaataa karoora duraan kaa'ameen ta'uu qaba malee mariin biraa hin barbaachisu jedhe Hamaas.

    Marii dhukaasa dhaabuu keessatti biyyoonni jaarsummaatti jiran Qataar, Masirii fi US torbee darbe keessa Israa'eliifi Hamaas marii dhukaasa dhaabuurratti akka hirmaataniifi hanga Hagayya 15tti namoonni ugguramanii jiran akka gadhiifaman akeekkachiisanii turan.

    Israa'el garee marii dhukaasa dhaabuuf taasifamurratti hirmaatu akka ergitu Kamisa darbe beeksisteetti.

    Mariin kun ji'a darbe keessa wayita karoorri haaraan kan duraan ture irratti dabalamu gufate.

    Karoorri duraan ture kan Pirezidantiin US Joo Baayidan Caamsaa darbe keessa dhiyeessan ture.

    Biyyoonni jaarsummaa taa'aa jiran kunneen torbee darbe ibsa baasaniin mariin Hagayya 15 Dohaa yookiin Kaayirootti taa'amuu danda'a jedhan.

    Ibsi kun Israa'eliifi Hamaas haal-duree baayyisuu dhiisanii waliigaltee dhukaasa dhaabuu fudhachuun hojiirra ooluu akka qaban gaafate.

    Karoorri qajeeltoo waliigaltee kan Pirezidant Baayidan Caamsaa 31 dhiyeessan ammallee akkuma sanatti jira kan jedhe ibsi kun, Israa'eliifi Hamaas hatattamaan hojiitti qabu jedhe.

    Karoorri Baayidan kun dhukaasi guutummaatti akka dhaabbatuufi namoonni ugguraman hundi akka gadhiifaman gaafata.

    Dhimma kanarratti Hamaas ibsa baaseen akkaataa karoora Baayidaniin waliigalteen akka raawwatu fedha qabaachuu mirkaneesseera.

    Mariin taasifamus kan kanaan dura eegalamerraa akka itti fufuufi marii haaraan eegaluun akka hin barbaachifne ibse Hamaas.

    Hamaas Gaazaa keessatti dhukaasiguutummaatti akka dhaabbatu fedhii agarsiisaa ture.

  15. Daawwadhaa: Loltoonni Yukireen daangaa Raashiyaa keessatti alaabaa biyyasaanii yeroo fannisan

    Yukireen Kibxata darberraa kaastee tasa osoo hin eegamiin daangaa Raashiyaa keessa hanga kiiloomeetira 30 seenuun haleellaa gaggeessite. Kun ammoo erga Mooskoon Guraandhala 2022 Yukireen irratti weerara bantee hanga kana Raashiyaa keessa fagaattee yoo haleeltu isa jalqabaati.

    Pirezidantiin Yukireen Volodmiir Zeleniskiin daangaa Raashiyaa keessa seenanii oppereeshinii gaggeessaa akka jiran Sambata darbe haasaa taasisaniin amananiiru.

    Raashiyaanis loltoonni Yukireen daangaashee keessa seenanii haleellaa gaggeessaa akka jiran amanuun deebiin kennu daran hammaataa ta'a jechuun dhaadatteetti.

    Viidiyoon kun ammoo loltoonni Yukireen daangaa Raashiyaa keessa seenaniin alaabaa biyyasaanii yeroo fannisan agarsiisa.

    Daawwadhaa

  16. Abiddi buufata nukilaraatti qabachuu hordofee Yukireeniifi Raashiyaan quba walitti qabaa jiru

    Abiddi buufata annisaa nukilaraa Zaapporeezhiyaa qabacuu hordofee Yukireeniifi Raashiyaan quba walitti qabaa jiru.

    Pirezidantiin Yukireen Volodmiir Zeleniskiin akka jedhanitti, buufata nukilaraa kanatti humnoota Raashiyaa wagga lamaa oliif bakka sana to’atanii jiranitu abidda qabsiise.

    Buchaan Raashiyaan naannoo buufata nukilaraa Zaapporeezhiyaa kanatti muudde garuu haleellaa boombii Ykireen gaggeessitetu abidda sana uume jedhe.

    Qaamni dhaabbata Biyyoota Gamtoomanii (UN) dhimma nukilaraa hordofu, “aarrri cimaa gur’aachi” dhaabbaticha keessaa yeroo ba’u argeera jedhe. Haata’u malee, nageenya nukilaraaatiif “dhiibbaan gabaafame hin jiru”.

    Abiddi buufata nukilaraatti qabachuun kun kan dhaga’ame loltoonni Ykireen daangaa Raashiyaa keessa kiiloomeetira 30 seenaniin lolaa yeroo jiranittidha.

    Yukireen erga Guraandhala 2022 Mooskoon weerara guutuu irratti bantee daangaa Raashiyaa keessa hanga kanaa yeroo seentu kun isa jalqabaati.