Hogganaa Olaanaan Iraan Ayaatolaa Alii Khameneen haleellaan Israa'el 'tuffatamu' hin qabaatu jedhan

Haguuggii Tamsaasa Kallattii

1. 23 Onkololeessa 2024Dipilomaatiin Olaanaan US dhimma gargaarsa Gaazaarratti Israa'el akeekkachiisan

   

   Madda suuraa, PA

   Dippilomaatii olaanaan US Antoonii Bilikan Gaazaa marfamte keessatti deeggarsi namoomaa akka qaqabuuf ''caalaa hojjatamu qabaata'' jechuun dureewwan Israa'elitti himan. Yoo tarkaanfiin hin fudhatamne ta'e seera Ameerikaatiin rakkoo qabaachu akka danda'u akeekkachiisan.

   Qondaalli olaanaan bulchiinsa Baayidan, Kibxata kaleessaa wal gahii walitti aansuudhaan Jarusaaleemii fi Teel Aviiv keessatti taasisaniin Ministira Mummee Israa'el Beenjaamiin Netaaniyaahuu, Ministira Rayyaa Ittisaa Yo'aav Gaalaan, Ministira Dhimmoota Tarsimoo Roon Deermer fi qondaaltoota waraaanaa olaanoo waliin mari'ataniiru.

   Walgahiin kunis qaama imala rijinichaa kan Ameerikaan akka Israa'el hogganaa Hamaas Yaahiyaa Sinwaar torban darbe Gaazaa keessatti ajjeefteen booda marii dippilomaasii eegaluudhaaf akka carraa ilaalteeti.

   Mariin Bilinkan fuula fuulatti Israa’elootaaf ergaa ittiin dabarse kun kan dhiyaate, erga Ameerikaan meeshaalee waraanaa Israa’eliif dhiyeessitutti fayyadamuuf fedhii waan hin qabneef atatamaan lammiileen nagaa Gaazaatti ajjeefamaa jiran dhaabisiisuu dadhabde jechuun qeeqni baay’achaa dhufeetti.

   Waashingitan qeeqa kana yeroo hunda diddeetti.

   Akkasumas qondaalli kun akka jedhanitti, Blinken hoggansa Israa’el kaaba Gaazaa keessatti waraanni ishee “karoora waliigalaa” jedhamu hojiirra oolchaa jira jedhu irrattis dhiibbaa uume. Tooftaa humnaan lammiilee nagaa jumlaan buqqisuu fi tooftaa harka kennachuu ykn beela’uu hundarratti fayyadamuu jedhamee ibsame kanneen hafan.

   Qondaalli kun akka jedhanitti, Israa’eloonni tooftaa kun “gonkumaa imaammata saanii” miti jedhanii itti himaniiru. Israa’el haleellaan kaaba Gaazaa keessatti raawwatte Hamaas deebiisee akka of hin jaarreef ta'u ibsiteetti.

   Blinken gargaarsa namoomaa irratti akeekkachiisni mul’atu kan kenne torban darbe xalayaasaa kan Ministirri Ittisaa Ameerikaa Looyd Oostiin waliin mallatteesse hordofee kan dhufe yoo ta’u, mootummaan Israa’el gargaarsa gara kaaba Gaazaa seenuu akka dabaluu ta'u yoo baatee ammoo deeggarsa waraanaa muraasa balaa dhaabuutiif saaxilamuuf guyyoota 30 kennee ture.

   ''Dhimma kanarratti mariin dheeraatuu taasifamee ture,'' jedhan qondaalli olaanaa Ministeera Dhimma Alaa kun.

2. 23 Onkololeessa 2024Finciltoonni Huutii Yaman Israa'el irratti dhukaasan eenyu?

3. 22 Onkololeessa 2024Dubartiin mobaayiliishee kufe baasuuf kattaa gidduutti danqamte

   

   Madda suuraa, NSW Ambulance

   Dubartiin Awustiraaliyaatti mobaayilii jalaa kufe kaasuuf otoo jettuu kattaa lamaan gidduutti danqamte hojii baraaraa sa'atii dheeraa booda baate.

   Dubartiin Maatiildaa Kaambeel jedhamtu dhooqa meetira sadii kattaa lamaan gidduutti kan kufte lafoo bashannaaf otoo deemtuuti.

   Hojjettoonni yeroo hatattaamaa hojii baraaruu sa'atii torba fudhateen dhakaa baayyee fonqolchuun booda dha ishee baraaruu danda'an.

   Dhakaa kg500 ulfaatu kaasuun boodas dubartii mataan gadi garagalatee danqamte baasuun rakkoo tahee ture.

   Hojjetaan yeroo balaa tajaajia ambulaansii Piitar Waatis ''hojii baraaruu waggaa 10 keessatti waan akkasii na mudatee hin beeku, akkaan rakkisaa ture garuu ishee baasuutti gammannee,'' jedhe.

   Maatiildaan warra lubbuushee baraaran galateeffattee, bilbila garuu hin argannee jette.

4. 22 Onkololeessa 2024Israa'el garee basaastota Iraan haleellaa gaggeessuf turan jette Yerusaalem keessatti to'achuu beeksifte

   

   Madda suuraa, Reuters

   Israa'el namoota Iraaniif basaasu jette torba Baha Yerusaalem keessatti to'achuu beeksifte.

   Namooni kunneen haleellaa gaggeessuf akka turanis ibsite. Israa'el namoota Iraanif basaasan to'adheera jechuunshee kun kan jalqabaa miti.

   Dhaabbanni nageenya biyya keessaa Shiin Beetifi poolisiin biyyattii ibsa waloo kennaniin namoonni to'ataman kunneen "ajaja Iraanin" saayintistii Israa'eliifi kantiiba magaala [Yerusaalem] ajjeesuuf akka turan ibsan.

   Kaffaltii dolaara 40,000 fudhatanii konkolaataa poolisii gubuufi manarratti boombii darbachuuf ajaja fudhatanii akka turanis ibsame.

   Oduun hidhaa kun kan dhagahame humni nageenyaa lammiilee Israa'eel torba Iraaniif basaasuun shakkaman to'achuu hordofeeti.

   Ibsi Shiin Beetifi poolisiin waliin ta'uun kennan: "Saayintistoonni, kantiibonni, qondaalonni nageenyaa, fi lammiilen Israa'el bebbeekamoon qiyyaafannoo haleellaa Iraani" jechuun Iraan lammiilee Israa'el basaasummaaf qacaruuf tattaafataa akka jirtu ibsa.

   kanneen to'annoo jala oolfaman kun odeeffannoo sochii waraana Israa'el, buufataalee anniisaa Iraaniif kennuu dabalatee ergama 600 ta'u bahachuuf akka ta'etu ibsame.

5. 22 Onkololeessa 2024Gaazaatti erga waraanni eegalee namoonni 42,700 ajjeefaman

   

   Madda suuraa, Getty Images

   Gaazaatti erga gaafa Onkololeessa 7 waraanni eegalee namoonni 42,700 ajjeefamuu Ministeerri Fayyaa Hamaasiin hogganamu ibse.

   Hanga yoonaa namoonni 100,282 madaa'uufi miidhaan qaamaa irra gaheera jedhe.

   Sa'atii 48 darban keessatti haleellaa qilleensaa Israa'eliin yoo xiqqaate namoonni 115 ajjeefamuun lubbuu baraartonni

6. 22 Onkololeessa 2024Hezboollaan Israa'el irratti rookeetiiwwan hedduu dhukaase

   

   Madda suuraa, Reuters

   Kibba Libaanositti haleellaa Israa'el hospitaalarratti raawwatteen daa'ima dabalatee namoonni afur ajjeefamuun wayita gabaafamaa jirutti Hezboollaan rookeetiiwwan hedduu gara Israa'el dhukaasuu ibse.

   Haleellaan rookeetii Hezboollaa kun wayita ministirri dhimma alaa US Antonii Bilinken gara Israa'el seenuuf jedhanitti raawwate.

   Erga Hamaas kibba Israa'eitti haleellaa raawwachuun isa booda waraanni Gaazaa eegalee qondaalli US kun yeroo 11ffaaf garas imaluusaaniiti.

   Israa'el haleellaa kibba magaalaa Beeruutitti hospitaala irratti raawwatteen namoota afur ajjeestee 24 kan caalan madeessuu ministeerri fayyaa Libaanos ibseera.

   Israa'el haleellaa sana kan raawwatteef kuusaa meeshaalee Hezboollaa barbadeessuuf akka ta'e ibsite.

   Kana hordofee Hezboollaan kaaba Israa'el rookeetiidhaan haleeluu itti fufe.

   Ganama kana sagaleen meeshaa waraanaa qillleensarraa kutaalee kaaba Israa'el keessattuu naannawa Samaariyaa jedhamutti dhagahamaa ture.

   Rookeetiiwwan dhukaafaman keessaa irra caalaan qilleensarratti fashalsiifamuu waraanni Israa'el ibseera.

7. 22 Onkololeessa 2024Putiin dhiibbaan warra lixaa akka hin hojjenne mul'isuuf michootasaa walitti qabe

8. 22 Onkololeessa 2024Keenyaan koolugaltoota Tarkii biyyattii deebiisuusheetti baayyee yaadda'u UN ibse

   

   Madda suuraa, Getty Images

   Dhaabbata Biyyota gamtoomaniitti dhaabbanni Baqattootaa (UNHCR) oduu kooluugaltoonni Tarkii afur Keeniyaadhaan gara Tarkiitti deebiifamusaanii dhagahuutti baayyee yaadda'u beeksiise.

   Kooluugaltoonni kunneen haaluma gaafii mootummaa tarkiitiin ta'u ministeerri dhimma alaa Keeniyaa beeksise.

   Ibsi kun kan bahe erga Jimaata darbe magaalaa guddoo Naayiroobii keessatti namoonni hedduun butamuu isaanii gabaafamee boodadha.

   Lammiin Biriteen tokko innii fi lammiilee Turkii hedduun namoota fuulasaaniitti haguuggii uffataniin butamuu BBC'tti himeera.

   Innis booda sa'aatii saddeetiin booda erga koppii paaspoortii Biriteen agarsiiseen booda gadhiifamu beeksiise.

   Ibsa dhaabbanni biyyoota gamtoomanii baaseen, ''Mootummaan Keenyaa seera idil-addunyaa akka kabajuu keessattuu itti gaafatamummaa namoota dirqisiisee qabuudhaan gara biyyasaaniitti deebii'uu dhabuu akka bahatuuf'' akeekkachiiseera.

   Sababii kanaatiinis ''baqattoonniifi kooluugaltoonni bakka itti bilisummaansaanii balaarra bu'uutti deebiifamu hin qabaatan'' jedheera.

   Ministirri dhimma alaa Keniyaa gamasaatiin haaluma waliigaltee mootummaa Tarkii waliin taasiseen lammiilee Tarkii afur deebiisee kennuu ibseera.

   Waliigalteen kunis kan seenaa fi walitti dhufeenya tarsiimoowaa biyyoota lamaanii (keeniyaafi Tarkii) qaban kan hubannoo keessa galche ta'u kaaseera.

9. 22 Onkololeessa 2024Israa'el ammallee gargaarsa namoomaa kaaba Gaazaarraa dhorkaa jirti- UN

   

   Madda suuraa, Getty Images

   Hogganaan dhaabbata biyyota gamtoomanii baqattoota Filsxeemiif (Unrwa), Israa’el ergamoonni gargaarsa namoomaa nyaataa fi qoricha dabalatee, dhiyeessii murteessaa ta’e qabattee kaaba Gaazaa akka hin geenye dhorkuu itti fuftee jirti jedhan.

   “Hospitaalonni haleelamuun ibasaa malee kan hafan yoo ta’u, namoonni miidhaman ammoo kunuunsa malee hafaniiru,” jechuun Filip Laazaariiniin toora X irratti barreesse.

   Akkasumas, dahannoowwan dhaabbatichaa hafan hund garmalee sababii buqqaatootaan guutamaniis, ummannii mana fincaanii keessa fa'i jiraachuuf dirqameera jedhan. Akkasumas gabaasa namoonni baqachuuf yaalaa jiran ajjeefamaa jiru jedhus eeraniiru.

   Waraanni Israa'el looltoonnii Hamas deebiisanii of ijaaraa jiru jechuudhaan kaaba Gaazaa keessatti waraanaa tobaniif itti cimsee gaggeessaa jira. Guyyaa Wiixata kaleessaa jiraattoonnii fi hojjattoonni wallaansa fayyaa loltoonni Israa'el hospitaalootaafi bakka dahannoo buqqaatootaa marsuu himaniiru.

   Waraanni Israa'el ammoo wayita inni ''duula shororkeessitotaa fi bu'uuraalee misoonaa saanii ittatti gaggeessuutti'' namoonni nagaa akka bahuudhaan baqataniif haala mijeessaa fi hospitaaloonni hojiisanii akka itti fufan akka mirkanneessuu himeera.

   Hojjattoonni fayyaa hospitaala Indooneeshiyaa kan kaaba Gaazaa keessaa, loltoonni Israa'el manneen barnootaa haleeluufi osoo gamoo ibidda itti hin qabsiisiin dhiiroota to'achuusaanii oduu Rooyitarsiitti himaniiru.

   Akkasums miidiyaalee Filisxeemootaa guyyaa Wiixataa akka gabaasaniitti, haleellaa waraanni Israa'eel bakka dahanoo namoota buqqaafamuun mana barnootaa Jaabaaliyaa keessatti dahataniirratti raawwatameen yoo xinnaate namoonni 10 ajjeeffamu gabaasaniiru. Eddoonni kunis kaabaa Gaazaa keessaa bakka magaalaa namootti hedduun keessa jiraataniidha.

   Israa'el BBC fi miidiyaaleen idil-addunyaa kaan akka Gaazaa seenuudhaan walabaan gabaasaniif hin hayyamne. Sababii kanaatiinis waan qabatamaa lafarra jiruu mirkanneessuun baayyee cimaadha. Kanaafuu BBC gabaasaa isaatiif waraabbiiwwan viidiyoofi dhugaa bahumsa jiraattootaafi hojjattoota fayyaa irratti bu'ureeffata.

10. 22 Onkololeessa 2024Qabxii dhabuu Kubbaa miilaa Itoophiyaaf sababni maali? Dorgommii dhiisuun filannoo ta'aa?

11. 22 Onkololeessa 2024Libaanos haleellaa Israa'el hospitaalarratti raawwatteen daa'imman dabalatee afur du'an jette

    

    Madda suuraa, Reuters

    Ministeerri Fayyaa Libaanos akka ibsetti, haleellaan kun Hospitaala Yunivarsitii Hariirii irratti kan raawwatame yoo ta'u, namoota ajjeefaman afur keessaa daa'imi tokko.

    Haleellaa Israa'el qilleensarraan raawwatte kanaan namoonni 24 ta'an madaa'uu ibseera ministeerri fayyaa Libaanos.

    Haleellaan hospitaala kanarratti raawwatame haleellaawwan 13 Israa'el Wiixata kaleessaa raawwatte keessaati.

    Humni waraanaa Israa'el qabeenyaa fi maandhee Hezboollaa barbadeessuuf haleellaa kana akka raawwate ibse.

    Duraan dubbi himaan humna waraanaa Israa'el lammiilleen Libaanos kibba Beeruut keessaa akka ba'an akeekkachiisee ture.

    Hospitaalli Hariirii garuu bakka namoonni akka keessaa ba'an akeekkachiifaman keessa hin turre.

    Erga Hezboollaan Onkoloolessa 8, 2023 Israa'el irratti haleellaa eegalee as Israa'el namoota 2,400 caalan Libaanos keessatti ajjeesteetti.

    Kanneen keessaa 1,800 kan ta'an ji'oota shanan darban keessa ajjeefaman.

    Kaaba israa'el fi Goolan Heeititti ammoo namoonni 59 ajjeefamuu israa'el ibsite

12. 22 Onkololeessa 2024Tamsaasi kallattii eegaleera

    Akkam bultan hordoftoota keenya? Tamsaasa kallattii Kibxataa eegalleerra.

    Odeessaalee dhimma walitti bu'iinsa Hezboollaa fi Israa'el akkasumas waraana Gaazaa fi dhimmoota addunyaa irratti raawwataman asii argattu.

    Yeroo gaarii!