Tiraamp ''biyyi keessan si'ooliitti deemaa jirti'' jechuun dureewwan yaa'ii UN hirmaataa jiran akeekkachiisan

Haguuggii Tamsaasa Kallattii

1. 16 Fuulbaana 2025Humnoonni Israa’el gudeeddii fi haleella saalaa biroo raawwachuu gabaasni UN mul'ise

   Gabaasni haaraan Mana Maree Mirgoota Namoomaa Dhaabbata Biyyota Gamtoomanii irraa ba’e Israa’el Gaazaa keessatti duguuggaa sanyii raawwachaa jirti jechuun, “argannoo UN isa cimaa ta'eedha.

   Gabaasni kun humnoonni nageenyaa Israa'el lammiilee Filisxeem Gaazaa irratti '' miidhaa saalaa fi koorniyaa irratti xiyyeefate '' qaqabssiisuu isaanis ibsa.

   Kunis gochoota "gudeeddii, miidhaa saalqunnamtii, fi haleellaa saalaa biroo" kanneen "miidhamtoota irratti miidhaa qaamaa fi sammuu garmalee" geessisan dabalata.

   Gabaasni kun akka jedhutti miidhaan saalaa ummata irratti raawwatame kun qaama tooftaa bal’aa adabbii waloo ummata Filisxeem guutuu cabsuu fi xiqqeessuuf kaayyeffate ta’uu ibseera.

   Dabalataanis, humnoonni Israa’el tarkaanfiiwwan dhala dhorkuu hojiirra oolchuu isaanii bira ga'uufi haleellaa kilinika haala hormaata dhala namaa irratti hojjatu guddicha Gaazaa irratti raawwatame kaasuun, saamuda miciree dhala namaa gara 4,000 barbadeessuu gabaasichi eerera.

2. 16 Fuulbaana 2025Shaakalli waraanaa Beelaaruus fi Raashiyaa Awurooppaaf ergaa akkamii dabarsa?

   Humnoonni waraanaa Beelaaruus fi Raashiyaa shaakala waloo gaggeessaa kan jiran yoo ta'u, taateen kun ammoo erga NATO'n humna waraana isaa cimsuu eegaleeti.

   Haalli kun gara waldhabdee gareetti geessuu malaa yaada jedhuun xiyyeeffannoo miidiyaalee idil-addunyaatiin argaateera. Dirree bal'aa magaalaa guddoo Beelaaruus Minsk irraa 72km fagaatu keessatti shaakallii waraanaa waloo kun itti fufee jira.

   Yeroo xiyyaaronni boombii darbatani fi dhohinsi guddaan uumamuun arri guddaan samii dukkaneessuu ni mul'ata. Naannoon sun guutuummaan dhukaasa meeshaa waraanaa gurguddaan jeeqamaa jira.

   Garuu shaakala waraanaa kana duuba maaltu jira?

   Qaama shaakala waraanaa Zapad-2025 ("West 2025") kana qondaaltonni waraanaa biroo imbaasii adda addaa irraas waan deemaa jiru ilaaluuf achi turan. US, Turkii fi Haangaarii dabalatee bakka bu’oonni naannolee 23 shaakala waraanaa kana daawwataniiru.

   Moskoo fi Minisk shaakalli waraanaa kun ittisa qofa akka ta’e, nageenya Raashiyaa fi Beelaaruus cimsuu fi balaa alaa dhufuu danda’u kamiyyuu qolachuuf kan qophaa’e ta’uu ibsu. Beelaaruus "Nuti eenyuun iyyuu doorsisaa hin jirru. Marii ijaarsaa fi hojiirra ooluu danda'uutti jirra."jette

   Raashiyaa fi Beelaaruus lamaan isaanii iyyuu dhiheenya kana hariiroo Waashingitan waliin qaban fooyyessuu fi bulchiinsa Tiraamp waliin hariiroo uumuuf tattaaffii taasisaniiru. Garuu haalli lamaan isaanii hariiroon Awurooppaa waliin qaban haala hammaataa keessa jira.

3. 16 Fuulbaana 2025US haleellaa doonii Venezuweelaa qoricha sammuu hadoochu deddeebisu jette irratti raawwatteen namoonni sadi ajjeefaman

   Pirezdant Doonaald Tiraamp waraanni Ameerikaa doonii Venezuweelaa qoricha sammuu hadoochu feetee turte jedhamuun laga idil-addunyaa keessaa gara Ameerikaatti imalaa turte barbadeessuu himan.

   Traamp Wiixata kaleessaa akka jedhanitti, haleellaa ''daldala qoricha sammuu hadoochu hamaa'' irratti raawwatameen namoonni sadii ajjeefamaniiru. Haata'u malee, bidiruun kun qoricha sammuu namaa hadoochu fe'attee akka turte ragaa tokkollee hin dhiheessine.

   Yeroo muraasa dura gitasaanii Veenzuweelaa Niikoolaas Maaduroon, Karaakaas ''dubbii barbaacha Ameerikaa'' of ittisti jechuun, dippilomaatii olaanaa Ameerikaa Maarkoo Ruubiyoodhaan ''mootii ajjeechaa fi waraanaa'' jechuun waamuun isaanii ni yaadatama.

   Ameerikaan erga doonii waraanaa gara kibba Kaaribiyaan kan qondaaltonni hojii farra qoricha sammuu hadoochoo jedhan irratti bobbaasuudhaan haleellaa raawwatteen namoota 11 galaafatteen booda waldhabdeen biyyoota lamaan gidduutti uumame hammaateera.

   "Har'a ganama ajaja kootiin humnoonni waraanaa Ameerikaa dadabarsitoota daldala qoricha sammuu hadoochoo fi shororkeessitoota kanneen haala gaariin adda baafaman, balaa addaa qaban irratti tarkaanfii lammaffaa gaggeessaniiru," jechuun Tiraamp 'Truth Social' irratti dubbatan.

   "Dadabarsitoonni daldala qoricha sammuu hadoochoo garmalee balaa uuman kunneen nageenya biyyaalessaa Ameerikaa balaadhaaf kan saaxilaniidha."

4. 16 Fuulbaana 2025Israa’el Gaazaatti duguuggaa sanyii raawwatte - UN

   Komishiniin qorannoo Dhaabbata Biyyoota Gamtoomanii Israa’el lammiilee Falasxiinota Gaazaa irratti duguuggaa sanyii raawwachuu ishee ibseera.

   Akka ibsichaatti gochoota duguuggaa sanyii shanan seera addunyaa jalatti ibsaman keessaa afur erga waraanni Hamaas waliin bara 2023 jalqabee as raawwatamaniiru.

   Kunis miseensota garee tokkoo ajjeesuu, miidhaa qaamaa fi sammuu hamaa irratti geessisuu, itti yaadanii haala garee sana dhabamsiisuuf yaadame uumuu fi dhala dhorkuu fa'i'.

   Ministeerri dhimma alaa Israa'el garuu gabaasa kana ''gabasa dabaa fi soba'' jechuun balaaleffatan.

   Faallaa gabaasichaa inumaa Hamaastu Israa'el keessatti duguuggaa sanyii yaale. jechuun himatan.

   Erga Waraanni kun jalqabee as haleellaa Israa’el Gaazaa keessatti raawwateen yoo xiqqaate namoonni 64,905 ajjeeffamuu isaanii ministeerri fayyaa naannoo sanaa kan Hamaasiin geggeeffamu ibseera.

   Irra caalaan ummataas irra deddeebiin buqqa’aniiru. Manneen 90% ol barbadaa’aniiru. Haallii sirna eegumsa fayyaa tajaajila bishaanii fi wabii nyaataa manca'ee beellii ga'eera.

   Komishiniin Qorannoo Idil-addunyaa Walaba bara 2021 Mana Maree Mirgoota Namoomaa Dhaabbata Biyyoota Gamtoomaniin hundeeffame, sarbama seera namoomaa fi mirga namoomaa idil-addunyaa Gaazaa qorataa tureera.

   Gabaasni Komishiinichi baase akka jedhutti, aangawoonni Israa’elii fi humnoonni Israa’el gochoota duguuggaa sanyii shanan Konveenshinii Duguuggaa Sanyii bara 1948 jalatti ibsaman darbuun dugguuggaa sanyii raawwataniiru.

5. 16 Fuulbaana 2025Hidhi Abbayyaa xumurame, Masriin si'achi Itoophiyaa maal gochuu malti?

   Itoophiyaan hidha guddicha Afrikaa laga Abbayyaarratti ijaarteefi akka kallachaatti ilaaltu osoo Masriin watwaattuu xumurtee hojii eegalsisteetti.

   Hidhi kuni humna maddisiisuun Afrikaa keessaa isa guddichadha. Hidha Masriin ijaartees ni caala. Lammiileen Itoophiyaas gammachuu ibsaniiru.

   Haa ta'u malee, jalqabumaa ijaarsa kana kan mormaa turte Masriin akeekkachiisa baaste.

   ''Callisnee hin ilaallu'' jechuun guyyaa eebba hidha kanaa Mana Maree Nageenyaa Dhaabbata Biyyoota Gamtoomaniitti xalayaa katabde.

   Qaami UN kuni nagaa fi tasgabbii addunyaa kabachiisuu, dhibdee idil-addunyaatti geessu qorachuufi furmaata kennuuf aangoo guddaa qaba.

   Odeessa kanarratti dabalataan dubbifachuu yoo barbaaddan karaa kanaan seenuun guutummaasaa argachu dandeessu.

   Itoophiyaafi Masriin maaliif 'diina' ta'an? Seenaan dudduubee maali?

   Masriin hooggansa Hidha Haaromsa Itoophiyaa mormuun UN'tti xalayaa barreessite

6. 16 Fuulbaana 2025Tamsaasa kallattii keenya eegalleerra.

   Ashamaa hordoftoonni BBC Afaan Oromoo bakka jirtan hundatti.

   Tamsaasa kallattii kan guyyaa Kibxataa amma eegaleerra.

   Odeessaalee keenya bal'inaan dubbifachuu yoo barbaaddan ammoo marsariitii keenya ykn Facebook keenya ykn WhatsApp fi YouTube keenya miladhaa.

   Bakka nagaa oolaa.

7. 15 Fuulbaana 2025MM Ispeen Israa'el ispoortii idil- addunyaa irraa akka dhorkamtu gaafatan

   Ministirri Muummee Ispeen Peedroo Saancheez, Israa'el gocha Gaazaa keessatti raawwatteef dorgommii ispoortii idil-addunyaa irraa akka hambifamtuuf gaafatan.

   "Israa'el waltajjii idil-addunyaa kamiyyuu fayyadamuun fakkiishee bareechifachuu itti fufuu hin dandeessu," jechuun bakka bu'oota filatamoo Paartii Hojjetoota Sooshaalistii isaaniitti himan.

   Israa'elis akkuma Raashiyaa weerara guutuu bara 2022 Yukireen irratti raawwattetti ilaalamuu qabdi jedhan.

   Guyyaa Dilbata darbe Ministirri Dhimma Alaa Israa'el Gidiyoon Saar ministira mummee Ispeeniin "salphaadha" jechuun, mormii deeggartoota Filisxeem Maadriid keessatti, kakaasuudhaan, dorgommiin biskileetii Vuelta a España, kan gareen Israa'el tokko irratti dorgomaa ture sadarkaa dhumaa akka haqamu taasiseera jechuun himatan.

   Jalqaba guyyaa kanaatti Saancheeziin mormiin kanaan dura dorgommii torban sadii kana irratti gaggeeffame Ispeen dhimma Gaazaa irratti ''akka fakkeenyaatti kan boonte'' ibsitu ta'u agarsiisa jedhanii ture.

   Ministiroonni mootummaa Ispeen hedduunis, mormii sadarkaa dhumaa kan namoota gara 100,000 hirmaachise galateeffataniiru jedha maddi ofiisaa.

   "Namoonni kumaatamaa fi kumaatamaan lakkaa'aman duguuggaa sanyii sanarratti socho'uunsaanii boqonnaa naaf ta'a.

   ''Sababiin isaas duguuggaa sanyii waan ta'eef maqaa biraa hin qabu," jedhan ministirri haaroomsa dijitaalaa Óskaar López.

   Israa'el gochi isheen Gaazaa keessatti raawwatte duguuggaa sanyii waliin wal gitu ta'uusaa yeroo hunda kan haaltu yoo ta'u, akka mala of ittisuutti sirrii ta'uu dubbatti.

8. 15 Fuulbaana 2025Viidiyoo aadaa Jimmaa hojjachuun kan beekamu Abbaa Tamaam eenyu?

   Abbaa Tamaam viidiyoosaan beekna. Qoosaa akka ajaa'ibaa dalaga.

   Addattimmoo aadaa Jimmaa hojjeta. Abbaa Tamaam garuu eenyu?

   Boottii godhatee, baadiyyaa keessa deemee viidiyoo maaliif dalaguu filate?

   Gaaffii danuu gaafanne. Isin bashannansiisa, daawwadhaa

   Daawwachuuf: Abbaa Tamaam maal hima?

9. 15 Fuulbaana 2025Namni Chaarlii Kiirk ajjeesuun shakkame qorannoo DNA'n bakka yakki itti raawwatame waliin hidhata qaba: Hogganaan FBI

   Qorannoon qaccee sanyii (DNA) fooxaa qawween Chaarlii Kiirk ittiin ajjeesuuf itti fayyadamuun shakkameetti marfame shakkamaa to'annaa jala oole waliin wal fakkaachuusaa daayreektarri FBI Kaash Paatel Wiixata har'aa ibsan.

   Taayilar Roobinsan, dargaggeessi umuriin ganna 22, ajjeechaa aktivistii beekamaa wara duudhaa durii leellisanii kan sagantaa Roobii darbe Yunivarsiitii Yuutaah Vaaliitti qophaa'e irratti raawwatameen walqabatee to'annoo jala oole.

   Naannoo dhukaasni sun raawwatamee qawween booltii-action jedhamu kan argame yoo ta'u, baaxii manaa irraa dhukaasni lubbuu namaa galaafate irraa dhukaafame irraas piinsaa (screwdriver) argameera.

   "Qorannoon qaccee sanyii fooxaa qawween itti marfamee fi kan piinsarratti argamu shakkamaa to'annaa jala jiruuf haala gaariin akka hojjetame har'a gabaasuu nan danda'a," jechuun Kaash Paatel 'Fox and Friends'tti himan.

   Torban kana himannaan sirnaa ni eegama.

   Himannaan idilee torban kana akka eegalu eegama. Kaayyoon ajjeechaa kanaa garuu ammalleen hin baramne.

   Daarektarri FBI kan haala dhimmicha itti qabate irratti qorannoon isa mudachaa ture, yaadannoo mana shakkamtootaa keessatti argamees eeruun Kiirk "baasuuf" dhaadate.

   "Bu'uuraan... 'Chaarlii Kiirk baasuuf carraan qaba' jechuudha, yaadannoon sun dhukaasaan dura akka barreeffame fudhachuufan deema," jedhan Paatel.

   Itti dabaluudhaanis, "kan barbadaa'e ta'us ragaa fooransikii yaadannoo kanaa arganneerra" jedhan.

   Akka waraqaa galmee hidhamtoota Poolisii Kaawuntii Yuutaah BBCn argatetti, Roobinson ajjeechaa cimaa, haqaa gufachiisuu fi yakka cimaa qawwee dhukaasuun himatama.

10. 15 Fuulbaana 2025Itoophiyaan 3,000m gufachiisaan medaaliyaa malee hafte

    Shaampiyoonaa Atileetiksii Addunyaa Jaappaanitti dorgomamaa jiruun Itoophiyaan 3,000m gufachiisaan medaaliyaa malee hafte.

    Waggoota walitti aananiif shaampiyoonaa kan ture atileetiin Morookoo, Suufiyaan El Bakaalii, xumurarratti atileetii Niiw Ziilaandiin mo'amee lammaffaa bahe.

    Atileetiin Keeniyaa Edmuund Sereem immoo sadaffaa bahe. Saamu'el Fireew 4ffaa, Lammeechaan 6ffaan xumure.

    Atileet Lammeechaa Girmaa Shaampiyoonaa Atileetiksii Addunyaa Dohaa, Yuujiin fi Budaapestitti si'a sadii walitti aanuun meetii injifatee ture.

    Dorgommii baranaa irratti garuu Lammeechaan osoo hin milkaa'in hafe.

    Lammeechaan dorgommii gulaalliirratti kufee ka'e figuun ni yaadatama.

    Itoophiyaan Shaampiyoonaa Atileetiksii Addunyaa 20ffaa dorgomamaa jiruun hanga yoonaa meetii lamaafi nahaasa tokko qabdi.

    Dabalata:

    Maraatoonii Tookiyoo irratti atileetonni Itoophiyaa medaaliyaaf eegaman maaliif adda kutanii bahan?

    ''Warqii nan dhabe jedhee yaaduu hin barbaadu'' - Atileet Tigist

11. 15 Fuulbaana 2025Israa'el Magaalaa Gaazaa boombiin haleeluu itti fufte

    Humni qilleensaa Israa'el sambattan irraa erga Gaazaatti gamoowwan fi manneen jireenyaa dabalataa barbadeessuu ilaalchisee fakkiiwwan mul'achuu eegalanii booda BBC haalicha mirkaneessuu hojjataa jira.

    Kaleessa Raayyaan Ittisa Israa'el (IDF) gamoolee ol dheeroo beekamoo ta'an keessaa akka bahaniif akeekkachiisa afur kenne.

    Boodarra ammoo arfan isaaniitu barbadaa'an yoo ta'u, BBCn viidiyicha mirkaneessee jirra.

    Akeekkachiifni addaa ammoo Dilbata darbe kan kenname yoo ta'u, gamoo sun guyyuma sanatti lafatti makame.

    Suuraan armaan olii kun viidiyoo yeroo gamoowwan haleelaman keessaa tokko kan ta'e 'Al-Kawthar Tower' boombiin itti darbame agarsiisu irraa kan fudhatamedha.

    IDFn amma torbaniin oliif gamoowwan dheeraa guutuu magaalaa Gaazaa keessaa irratti xiyyeeffatee kan ture yoo ta'u, garuu miidiyaa hawaasaa irratti kan ibsaman gamoowwan abbaa darbii hedduu qofa miti.

    Viidiyoonni BBCn mirkaneesse hedduunsaanii barbadaa'uu gamoowwan biroo, akkasumas konkolaattota agarsiisu.

    Gaafa Jimaata darbe IDFn haleellaan qilleensaa isaatiin Gaazaa keessatti ''kiyyeeffannaa 500 ol'' irratti kan xiyyeeffate ta'uu ibseera.

    ''Masaraawwan gara bu'uuraalee waraanaatti jijjiiraman'' akkasumas ''bakka sakatta'iinsaa fi isnaayiparootaa, gamoowwan banaa ulaa lafa jalaa qaban, kuusaawwan meeshaalee waraanaa fi bu'uuraalee shororkeessummaa biroo of keessaa qaban" barbadeessaan jira jedheera.

    Waraanni kunis waan jedhe kana deeggaruf ragaa tokkolleen hin dhiheessine.

    Gama biraatiin, buqqaatonni kumaatamaan lakkaa'aman Gaazaa gadhiisanii gara kibbaatti kan imalan yoo ta'u, achitti buufanni haaraan dhaabbataa jira.

12. 15 Fuulbaana 2025Netaaniyaahun Hamaas haleeluu akka hin dhiifne dubbatan

    Ministirri Muummee Israa'el Benjaamiin Netaaniyaahun hoggantoota Hamaas irratti haleellaa raawwachuu akka hin dhaabne dubbatan.

    Torban darbe haleellaa qondaalota garichaa Kataar jiranirratti taasisteen Israa'el qeeqamteetti.

    Netaaniyaahun garuu ''eessayyuu haa ta'ani'' haleellaarraa bilisa miti jechuun isaan adamsuu akka hin dhiifne himan.

    MM Israa'el Ministira Dhimma Alaa US Maarkoo Ruubiyoo waliin Iyyarusaalem keessatti ibsa yeroo kennanitti kana jedhan.

    Biyyi kamuu ''daangaasheen alatti ofirraa qolachuuf'' mirga qabdi jechuun dubbatan.

    Israa'el hogganoota Hamaas Kataar jiranirratti xiyyeeffachuu ishee Piirezidantiin US Donaald Tiraamp dabalatee sadarkaa idil-addunyaatti qeeqni qunnameeraan.

    Kataar michuu cimtuu US yoo taatu jaarsummaanis beekamti.

    Haleellaa Israa'el booda Hamaas ibsa baasen namoonni jaha ajjeefamuu garuu hogganooti isaa lubbuun ooluu ibsee ture.

    Haleellaa kana keessa US qooda qabaachuu kan gaafataman Netaaniyaahuun ''Ofii keenya raawwanne. Kanuma,'' jedhan.

    Dabalata:

    Xiinxala: Erga Kataar rukutamtee dippiloomaasiin badeera

    Israa'el Kaataar haleeluusheef biyyoonni Arabaa akeekkachiisan

    Mariisisaan olaanaan Hamaas Israa'el Dohaatti irratti xiyyeefatte eenyu?

13. 15 Fuulbaana 2025Chaayinaan fooramii nageenyaa banuuf jetti

    Chaayinaan dhiyeenya agarsiisi waraanaa isheen dhiyeessite cimina addunyaarratti qabdu kan agarsiisedha.

    Carraa dhiibbaa dippolomaasiifi humnaa argatte kanatti fayyadamuun torban kana fooramii nageenyaa qopheessutti jirti.

    Fooramiin kun "Beijing Xiangshan Forum" jedhamuun kan beekamu yoo ta'u, kan baranaa adda kan taasisu, yeroo Chayinaan agarsiisa waraanaa torbanootan dura taasisteen meeshaalee waraanaa ammayyaa qabaachuu addunyaaf ifa gootetti gaggeeffamuu isaati.

    Xinxaalotonniifi dippilomaatonni biyyoota garaa garaa akka jedhanitti, fooramii nageenyaa bara kanaa irratti Chaayinaan karoora toora addunyaa (international order) akka jijjiiramuuf Pirezidaant Shii Jiinpiing ji'a tokko dura dhiyeessanii turan akka hojiirra ooluuf dhiyeessuu dandeessi.

    Fooramii nageenyaa Chaayinaan qopheessitu kanarratti biyyoota 100 irraa qondaalonni siyaasaa, qondaalonni waraanaafi beektonni garaagaraa 1,800 ta'an ni argamu jedhamee eegama.

14. 15 Fuulbaana 2025MM UK alaabaa keenyaa okkoraaf dabarsine hin kenninu jedhan

    Ministirri Muummee Yunaayitid Kingidam Sar Kiir Istaarmar, Biriteen alaabaa ishee kanneen mallattoo okkoora, sodaa fi garaagarummaa gochuun fayydamu barbaadaniif dabarsite hin kennitu jedhan.

    Ministirri Mummee kun alaabaan biyya saanii ''biyya keenya sab-daneetti'' bakka bu'uudhaa kan jedhan yoo ta'u, namoonni haalluu bifa isaanii fi sababii eenyummaa saanitiin sodaan akka itti dhagahamu akak hin taasifne ibsaniiru.

    Haasaan Istaarmar kun kan dhagahame erga namoonni gara kuma 150 ta'an baqattoota mormuudhaaf jidduugala Landaniitti dhaadannoo ''Unite the Kingdom'' jedhu qabachuun hiriira gaggeessaniin boodahda.

    Hiriir kunis nama siyaasa Right-Wing leellisu, Toomii Roobiinsan jedhamuun kan qopheeffame yoo ta'u, hiriirra gara biraa namoota kana mormaniifi baqattoota deeggaraniin achuma Landaniitti gaggeeffameera.

    Haasaa Ministira Mummeetiin dura ammoo Ministirri Daldalaa Piitar Kaayiil hiriirich kan mirga walitti qabamuufi dubbachuu agarsiiseedha jedhanii ture.

    Dilbata waaree booda Istaarmar ''Namoonni mirga hiriira nagaa gaggeessuu qabu. Dudhaa ijoo biyya keenyaati jedhanii'' ture.

    ''Haata'u malee, namoonni bifa isaanitiin daandiirratti yaaddoon itti umamee eeguun qondaaltoota poolisii itti gaafatamummaa saanii bahaa jiran irraan miidhaa qaqabsiisuun hin obsinu'' jedhan.

    Ministirri Mummee kun itti dabaluudhaan, ''Biritaaniyaan biyya wal dandeettii, sab-daneettii fi kan kabaja irratti ijaaramteedha. Alaabaan keenyas kan biyya keenya sab-daneessummaa qabdu bakka bu'a. Kanneen mallattoo okkoraa, sodaa fi garaagarummaa gochuun itti fayydamu barbaadaniif dabarsine hin kenninu'' jedhan.

    Hiriira baqattoota mormuudhaaf gaggeeffame kanarratti kanneen baayyee miidhaman dabalatee qondaaltoonni poolisii 26 miidhaan irra gahuu poolisiin beeksiiseera.

    Namoonni poolisii irraan miidhaa geessisuun shakkaman 24 ammoo to'annoo jala oolfamaniiru.

15. 15 Fuulbaana 2025'Mata jabina' Amoorim moo rakkoo taphattootaatu Maanchister Yuunaayitid kufaatiif saaxilaa jira?

    Maanchister Yuunaayitid Itihaad irratti 3-0 erga mo'amee leenjisaan kilabichaa Ruuben Amoorim injifatamuu keenyaaf ''anatu itti gaafatama isaa fudhata, taphattoonni koo hunduu waan isaan irraa eegamuufi kennuu danda'an hundaa kennanniiru'' jedhan.

    Falaasmni taphaa Amoorim fayyadamuu fi filannoon taphattootaa leenjisichaa gaaffii keessa galaa jira.

    Amoorim garuu mata jabeessa. Waan ofii itti amane malee hin godhu. Piriimer Liigiin garuu haala kanaan ulfaachuu danda'a. Maanchister Yuunaayitid leenjisaa biraa ilaala moo Amoorim waliin haala kanaan itti fufa?

    Erga Maanchister Siitiidhaan mo'amanii Amoorim qabxii gaariid habnus kallattii gaarii irra jirra jedhe.

    ''Nan yaadadha, yeroon Ispoortingi Liisban leenjisaa ture Maanchister Siitiidhaan yeroo mo'annu hanga har'aa kanallee kubba to'annee hin taphanne. Har'a waan gaarii agarsiifne qabna, hojii gaariis hojjechaa jirra, garuu qabxii dhabuun keenya baay'ee na yaadessa'' jedhan.

    Guutuummaa odeessa kanaa dubbiifachuuf karaa kanaan seenuu dandeessu.

16. 15 Fuulbaana 2025Obboleettiin gaggeessaa Kooriyaa Kaabaa US fi Kooriyaa Kibbaa akeekkachiiste

    Obboleettii gaggeessaa Kooriyaa Kaabaa kan taate Kiim Yoo Joong shaakala waraanaa US, Kooriyaa Kibbaa fi Jaappaan taasisuuf karoorsan balaa guddaa fida jechuun akeekkachiisuu miidiyaa biyyattii KCNA waabeffachuun Rooyitars gabaase.

    US, Kooriyaan Kibbaa fi Jaappaan Fulbaana 15 irraa kaasee shaaala waraanaa "Freedom Edge" jedhu gaggeessuuf jedhu.

    Shaakalli waraanaa biyyoonni kunneen gaggeessan humna galaana, kan lafoo, humna qilleesansarraafi waraansa saayibarii kan of keessatti hammateedha.

    Kaayyoon shaakala kanaa yaaddoo misaa'elaa Kooriyaa Kaabaa qolachuu irratti kan xiyyeeffate ta'uu ibse Humni Waraana Kooriyaa Kaabaa.

    Kooriyaan Kaabaa garii shaakala waggaa waggaan biyyoonni sadan waliin gaggeessan kana cimsitee balaaleffatti.

    Obboleettii gaggeessaa Kooriyaa Kaabaa kan taate Kiim Yoo Joong shaakala biyyoonni kunneen gaggeessan isaanuma deebisee balaarra akka buusu dubbatte.

17. 15 Fuulbaana 2025Poolaandiitti aante Romaaniyaan dirooniin Raashiyaa naannoo qilleensa ishee seenuu himatte

    Romaaniyaan dirooniin Raashiyaa naannoo qilleensaa ishee seenuu kan himte yoo taatu, isheenis biyya NATO taatee akkanaa gabaaste lammaffaadha.

    Xiyyaaronni waraanaa Roomaaniyaa gaafa Sambata darbe haleellaa Raashiyaan Yukireen keessatti raawwatte hordofaa kan turan yoo ta'u, naannoo daangaa kibba Yukireenitti diroonii kana adda baasuu akka danda'era jedhe ibsi ministeerri ittisaa baasee.

    Pirezidantiin Yukireen Volodymiir Zeleniskiin daangaa sarbuun kun dogoggora ta'uu hin danda'u jedhan, gochaa ''waraana Raashiyaa babal'ifachuu ifa ta'edha'' jedhan. Moskoo garuu himannaa Romaaniyaa kana irratti yaada hin kennine.

    Gaafa Roobii darbe Poolaand yoo xiqqaate diroonii Raashiyaa sadii kanneen naannoo qilleensaashee seenan kuffisuu ishee ibsuun ni yaadatama.

    Waraanni Romaaniyaa ibsa isaa kanaan, erga ''Raashiyaan bu'uuraalee misoomaa Yukireen Daanubee irratti haleellaa raawwatteen'' booda'' jeettiiwwan waraanaasaanii F-16 lama osoo daangaa biyyattii Yukireeniitti aanuura to'annoo gaggeessanu diroonii Raashiyaa kana adda baasuu ibseera.

    Odeessa kanarratti dabaltaan dubbiifachuudhaaf karaa kanaan seenuu dandeessu.

18. 15 Fuulbaana 2025Kooriyaan Kibbaa sakata'insa tasaa US taasifteen sarbamni mirga namoomaa mudachuu malu qorachuuf

    Mootummaan Kooriyaa Kibbaa yeroo sakatta'iinsaa fi hidhaa hojjettoota lammiilee Kooriyaa aangawoota Ameerikaa raawwatameetti sarbamni mirga namoomaa mudate yoo jiraateef qorachaa akka jiru ibse.

    Kooriyaan Kibbaa ''gadda cimaa'' itti dhagahamuu Ameerikaatti ibsuun, adeemsa seera kabachiisuu irratti mirgi fi faayidaan lammiileeshee akka hin sarbamne ifatti gaafachuushee dubbi himaan pirezidantichaa Wiixata har'a ibsaniiru.

    Hojjettoonni Kooriyaa Kibbaa 300 ol ta'an sakatta'iinsa warshaa baatirii konkolaattota elektirikii Ameerikaa kan bulchiinsa Joorjiyaa keessatti raawwatame hordofuun, torban tokkoof erga hidhamanii booda Jimaata darbe gara biyyaasaanitti deebi'an.

    Dhaabbileen Kooriyaa Kibbaa taarifa cimaa Ameerikaa irraa fagaachuuf waliigaltee daldalaatiin Ameerikaatti investimantii biliyoonaan lakkaa'amu raawwachuuf yeroo jiranittillee, taatee kun hariiroo biyyoota gidduu jirutti qormaata ta'eera.

    Aanga'oonni Kooriyaa Kibbaa dhaabbilee dhimmi ilaallatu waliin ta'uudhaan ''dhiitama mirga namoomaa ykn dhimmoota biroo kamiyyuu jiraachu gadi fageenyaan qorachuuf'' akka hojjetan dubbi himaan pirezidantichaa ibsa gaazexeessitootaaf kennaniin dubbataniiru.

    BBC'n yaada argachuudhaaf Raawwachiisaa Immigireeshinii fi Gumuruuka Ameerikaa (ICE) qunnamee jira.

    Sakatta'iinsi kunis Ameerikaa fi Kooriyaa Kibbaa gidduutti waldhabdee kan uume yoo ta'u, namoonni hidhaman hedduusaanii deebiifamun, investimantiin biyya alaa gara Ameerikaa akka hin seenneef gufachiisuu akka danda'u pirezidfanti Lii Jaa'e-myuung akeekkachiisaniiru.

    Haala kana ''waan namaa hin gallee'' jechuun, dhaabbileen Kooriyaa hojjettoota erguudhaan warshaalee biyya alaa hundeessuuf akka gargaaran gochuun kan barame ta'uu ibsaniiru.

    Torban darbe, banamuun warshaa Haayindiyaa yoo xiqqaate ji'a lamaaf akka harkifatu ibseera.

    Waldaaleen hojjettoota Kooriyaa Kibbaa Tiraamp dhiifama ofiisaa akka dhiyeessaniif gaafateera.

19. 15 Fuulbaana 2025Dargaggoon Oromiyaa keessa naanna'uun rifeensa namoota rakkatanii sirreessu waa'ee hojiisaa maal hima?

    Dargaggoo Araarsaa hanga ammaatti namoota rakkoo garagaraa keessa jiran 1,500 ta'aniif bilisaan rifeensa akka sirreesse hima.

    Taateen dargaggoo Araarsaa Jabeessaa hojii tola ooltummaatti akka ciichu taasise waggaa tokko dura Godina Wallagga Bahaa Magaalaa Naqamtee keessatti kan raawwatamuudha.

    "Maanguddoo magaalaa Naqamtee keessa daandii gubbaa jiraatantu ture. Maanguddoo kana rifeensasaanii irraa mursiisuuf gara mana rifeensaa yemmuun geessu warri mana rifeensaa irraa muruu didan," jedha.

    Sana boodas maashina rifeensa ittiin muran bituun rifeensa maanguddoo daandii gubbaa jiraatan kanaa ofiif sirreesse. Haata'u malee, yeroo kana muuxxannoos ta'e leenjii rifeensa sirreessuu hinqabu ture.

    "Maanguddoo kanaaf daandiidhuma irrattin sirreesseef. Namoonni kaanis gara keenya dhufan. Guyyichattis waliigalatti namoota 14'f rifeensa bareeche" jedha.

    Odeessa kanarratti dabalataan dubbiifachuu yoo barbaaddan karaa kanaan seenun arachuu dandeessu.

    ‘Atis Nama Chaaritii’: Dhaabbata tola-oltummaa harka-qaleeyyii karaarratti kufan kaasaa jiru

20. 15 Fuulbaana 2025Rubiyoon yeroo IDF magaalaa Gaazaa haleelaa jirutti Israa'el jiru

    Wayita ammaa Ministirri Dhimma Alaa Ameerikaa Maarkoo Ruubiyoon haleellaa Israa'el miseensota Hamaas Kaataar irratti raawwatte hordofuun waraana Gaazaa irratti mari'achuuf Israa'el galaniiru.

    ''Hariiroon Ameerikaa fi Israa'el "kana caalaa cimaa ta'ee hin beeku" jedhan ministirri mummee Israa'el.

    Walitti dhufeenyi kun akkuma dhagaa dallaa Lixatti argamuutti cimaa fi kan turu ta'uu Dilbata darbe bakka qulqulluu Yerusaalemitti argamutti ibsa gaazexeessitootaaf kennan.

    Jalqabarratti Ruubiyoon fi Pirezidantiin Ameerikaa Doonaald Tiraamp haleellaa Israa'el michuu Ameerikaa ijoo kan taatee Kaataar irratti raawwateeniitti akka hin gammanne ibsuun, hariiroon Ameerikaa fi Israa'el "baay'ee cimaa" ta'uu cimsanii dubbatan.

    Daawwannaan isaanii kunis kan raawwatame yeroo humnoonni Israa'el magaalaa Gaazaa keessatti gamoolee mana jireenyaa barbadeessuu itti fufanii fi lola lafiitoon dura namoota kumaatamni magaalattii keessaa akka baqataniif dirqisiisaa jiraniittiidha.

    "Ifaadha nuti itti hin gammanne, pirezidantichi itti hin gammadne. Amma gara fuulduraatti tarkaanfachuu fi maaltu akka ittaanu adda baasuu qabna," jechuun Ruubiyoon haleellaa Kaataar keessatti raawwatame irratti osoo gara Israa'el hin deemin dura kan dubbatan.

    Ruubiyoon yaada isaanii Buufata Walloo Andreews keessatti kennaniin, aantummaa Tiraamp namoota butaman hunda deebisuu fi waraanni xumuramuu akka ta'e itti dabaluudhaan dubbataniiru.

    Yeroo Israa'el haleellaa sana raawwattuutti miseensonni Hamaas haaluma yaada Ameerikaan Gaazaa keessatti dhukaasa dhaabuuf dhiheessite irratti mari'achuuf Doohaa keessa turan.

    Haleellaan Dohaa irratti raawwatame fedhii Kaataarii fi US waliin hojjechuuf qabdu walxaxaa taasisuu mala jechuun gaafatamanii, Ruubiyoon ''addawwan hedduudhaan waliif michuu gaarii ta'aniiru'' jedhan.