Manni Murtii Yakkaa idiladdunyaa qoqqobbii Tiraamp balaaleeffate

Haguuggii Tamsaasa Kallattii

1. 4 Guraandhala 2025Siwiizerlaand Ertiraan godaantota biyyaashee akka ofitti deebiftuuf deeggarsa kennaa turte adda kutuuf

   Siwiizerlaand Eertiraan godaantotashee ofitti akka fudhattu jajjabeessuuf deeggarsa kennaa turte adda kutuuf murteessite. Murteen kun kan darbe Ertiraan lammiileeshee Siwiizeraand jiran ofitti fudhachuuf fedha agarsiisuu dhabuu isheetiini.

   Mootummaan Siwiizerlaand Eertiraan lammiileeshee akka ofitti fudhattu jajjabeessuuf deeggarsi kennaa ture bu'aa barbaadame akka hin argamsiifne qorannoo gaggeesseen hubachuu hordofee murteen kun darbe.

   Akka gabaasa raadiyoofi Televizhiinii Siwiizerlaanditti, lammiileen Eertiraa beekamtii yeroo muraasaa biyyattii argatan kuma torba ta'an ni argamu. Laammileen Ertiraa dhibba lama ta'anis biyyattii akka deebi'an eegama.

   Siwiizerlaand Ertiraan lammiileeshee kana akka simattu jajjabeessuuf sagantaa ''deeggarsa misoomaa'' jedhu qopheessuun damee leenjii teeknikaafi oogummaa biyyattiirratti erga bara 2017 bajata ramaddee hojjechaa baate.

   Ministirri Haajaa Alaa biyyattii Maayikil Istaayineer daamee leenjii teeknikaa fi oogummaa kana jabeessuuf hojjechaa akka turan miidiyaa biyya keessaatti himaniiru.

   Haata'u malee carraan hojii biyyattii keessa jiru murtaaha ta'uu ibsaniiru.

   Mootummaan Eertiraa dhimma godaantota kana deebisanii simachuurratti dubbachuuf fedha akka hin qabne qorannoon godhame agarsiiseera.

2. 4 Guraandhala 2025Namoonni 'falfaltuu' ajjeesan shan fannifamanii akka ajjeefaman itti murtaa'e

   Naayijeeriyaa bulchiinsa Kaanoo keessatti namoonni falfaltuu ajjeesuun himataman shan fannifamanii akka ajjeefaman itti murtaa'e.

   Namoonni duuti itti murtaa'e kun bara 2023 dubartii 'falfaltuudha' jedhan ajjeesudhaan himataman.

   Dubartiin ganna 67 Dahaaraa Abubakar osoo isheen lafa qonnaa keessaa hojjattuu reebanii waraanuun ajjeesan jedhame.

   Maatin Adde Dahaaree poolisiitti erga iyyatanii booda, namoonni shakkaman adamsamanii to'ataman.

   Haalli dubartiin kun itti ajjeefamte maqaa 'falfaltuu' jedhuun baadiyaa keessatti namoonni heddu du'aafi haleellaa garaa garaaf akka saaxilaman agarsiitudha jedhame.

   Namoonni maatinsaanii yoo du'an, du'an ykn 'carraan hin taane mudate' jechuun falfaltuu jedhanii namoota shakkan himatu. Tarkaanfii garaa garaas irratti fudhatu.

   Abbaan murtii Usmaan Na'aabbaa namoota shanan dubartii ganna 67 'falfaltuu' jedhanii ajjeesan 'fannifamanii akka ajjeefaman' jechuun murtee du'aa dabarse.

3. 4 Guraandhala 2025Chaayinaan Tiraamp haaloo bahuuf omishaalee US irratti qaraxa kaahuufi

   Bulchiinsi pirezidnt Tiraamp omishaalee Chaayinaa irratti qaraxa akka kaahu ibsuu hordofee, haaloo akka baatu kan ibiste Chaayinaan omishaalee US murtaahan qaraxuu akka jalqabdu ibisteetti.

   Bulchiinsi Doonaald Tiraamp Kibxata har'aa omishaalee Chaayinaarraa galan hunda qaraxuu jalqabeera.

   Chaayinaanis guyyaadhuma kana Wiixata dhufurraa eegalee omishaalee US murtaahan irra qaraxa akka keessu beeksiste.

   Omishaaleen Chaayinaan qaraxa irra kahuuf jettu:

   • Dhagaa cilee figaazii dhangala'aa irratti 15%
   • Boba'aa jigita, maashinariiwwan qonnaa, konkolaattota fe'isaafi konkolaattota ispoortii irratti 10%

   US omishaalee Chaayinaatii galan hunda irratti gibira dhibbeentaa 10 kan keesse yoo ta'u, Chaayinaan ammayyuu adeemsa US hordofaa jirti.

   Doonaald Tiraamp omishaalee Chaayinaan cinaatti kan Kaanadaa fi Meeksikoorraa galan irrattis hanga dhibbeentaa 25 kaahuuf murteessaniiru.

   Raawwiinsaa garuu sa'aatii dhumaatti marii gaggeefame hordofee yeroo hin murtoofneef achi butameera.

   Tiraamp wanti Chaayinaarratti xiyyeeffataniif sababa daldalli waligitaa hin jirreefi qoricha Fentaanyil Chaayinaarraa US heddumminaan galuu ibsaniiru.

   Chaayinaan gibira haaloo bahuu kana wayita labsitu ibsa baafteen bulchiinsi Tiraamp seera daldalaa idila addunyaa cabseera jechuun himatte.

   ''US kophaatti gibira kaahuun ishee seera Dhaabbata Daldalaa Addunyaa ni sarba. Rakkooshee hiikuuf kan hin gargaarre ta'uu qofa osoo hin taane Chaayinaa fi US gidduu hariiroo daldalaa jiru ni miidha'' jedha ibsi bahe.

4. 4 Guraandhala 2025Tiraamp fandiin qabeenya biyyattii US TikTok bitachuuf gargaaruu danda'a jedhan

   Kaleessa galgala Tiraamp adeemsa fandii qabeenya biyyaa Ameerikaa hundeessuuf ajaja hojii raawwachiiftuu mallatteessaniiru.

   Kunis herrega invastimantii biyyootaan banamu yoo ta’u, galiin caalmaa baajata waggaa irraa argamu karaa dhaloota dhufu fayyadamoo taasisuun akka itti fayyadamu kan taasisudha.

   Fakkeenyaaf Sa’uudii Arabiyaan fandiisheetti fayyadamuudhaan kan addunyaa ispoortii irratti invast gochuun Niiw Kaastil Yunaayitid to’achuu fi taphattoota kubbaa miilaa gurguddoo addunyaa muraasa gara Baha Giddu Galeessaatti kan fiddeetti.

   Tiraamp hanga ammaatti maallaqni fandii haaraa kanaaf oolu eessaa akka dhufu kan hin ibsine yoo ta'u, garuu yeroo duula filannoo isaaniitti “qaraxaa fi kalaqawwan birootiin” maallaqaan deeggaramuu akka danda’u yaada dhiyeessanii ture.

   Akkasumas, ajaja kana erga mallatteessanii booda, erga ugguramuu TikTok kanaa US keessatti turu taasisaniin booda, pirezidaantichi fandichi rakkoo waltajjii miidiyaa hawaasaa, dhaabbata Chaayinaa kan ta'e, kanaa furuudhaaf akka oolu yaada dhiyeessan.

   ''Waan tokko hojjechuuf jirra, tarii TikTok waliin, tarii immoo hin ta'u,'' jechuun Traamp kanaan dura dubbataniiru. "Yoo waliigaltee sirrii raawwannee ni hojjanna. Yoo kana hin taane, hin... sana fandii qabeenya biyyaa keessa galchuu dandeenya."

5. 4 Guraandhala 2025Jijjiirraa taphattootaa Amajjiin kilaboota kam fa'aatu milkaa'e?

   Jijjiirraan taphattootaa Amajjii kaleessa galgala xumurame.

   Arsenaal taphataa sarara duraa hin qabu waan taheef carraa kanatti fayyadamuun taphataa jabaa tokko mallatteessisa jedhamaa ture. Bukaayoo Saakaa fi Gabri'eel Yesuus miidhamaniiru.

   Arteettaan taphataa gahumsa guddaa qabuu fi qabxii keenya jijjiiruu danda'u yoo arganne mallatteessifna jedhe. Gabaa kana irratti maqaan Beenjaamiin Seeskoo ka'us RB Leebzhiig hi guruguru jedhe.

   Kanaaf Arsenaal dorgommii waancaa nama cimsuuf biraa osoo hin mallatteessisiin hafe.

   Kufaatii kan isa mudate Maanchister Siitiin garee isaa haaromsaa jira. Kilabni Piriimeer Liigii gatii guddaa baasee taphattoota mallatteesise tokko Maanchister Siitiidha.

   Bal'ina gabaasa kanaa asiin galaatii dubbiifadha.

6. 4 Guraandhala 2025Tiraampii fi Maask USAID cufuudhaaf yaadusaanii hordofee mormiin umame

   Bulchiinsi Traamp dhaabbata gargaarsa biyya alaa guddicha mootummaa Ameerikaa Ministeera Dhimma Alaa waliin walitti makuuf akka yaadu gabaafamuu hordofee, hojjettoonni Wiixata kaleessaa waajjira muummee isaa Waashingitan keessaa akka hin baane gaafataman.

   Ministirri Dhimma Alaa, Maarkoo Ruubiyoon gaazexessitootaatti akka himaniitti, amma Ittigaafatamaa ittaanaa Ejensii Misooma Idil-addunyaa Yunaayitid Isteetis (USAID), ejansii addunyaa guutuutti deeggarsa dolaara biiliyoona raabsuu ta’uu isaanii ibsan.

   Seera baastonni paartii Dimookiraatotaa tarkaanfii kanaan ''seeraan ala, heera mootummaa kan faallessu'' fi kan namoota harka qalleeyyii biyya alaa miidhu, akkasumas kan nageenya biyyaa miidhuu fi dhiibbaa Ameerikaan waltajjii addunyaarratti uumtu hir'isu jedhan.

   Pirezidaant Doonaald Tiraampii fi gorsitoota isaanii olaanoo keessaa tokko kan ta’e biliyeenarri Iloon Maask dhaabbaticha cimsanii qeeqaa turan.

   Tiraamp Wiixata kaleessaa Waayit Haawusitti gaazexeessitoota waliin haasawa taasisaniin, dhaabbanni ''finxaaleyyii warra leeftiin'n kan geggeeffamu jechuun, ''hanna guddaa'' jalaa ba'aa jira jedhanii, garuu maqaa qaamolee kanneenis ta'e ibsa bal'aa hin kennine.

   Dhaabbanni USAID bara 1961 Pirezidantii Joon F. Keeneediin kan hundeeffame yoo ta’u, hojjettoota gara 10,000 fi baajata gara doolaara biiliyoona 40 kan qabudha.

   Bajata isaa kana keessaa baasii gargaarsa alaa mootummaan Ameerikaa doolaara biiliyoona 68dha.

   Ministirri Ruubiyoon USAID'n ''ejensiin guutummaatti deebii hin kennine'' jechuun, hojiiwwan dhaabbatichaa hedduun ''ittifufuuf jiru'' jedhan.

   ''Qaama imaammata alaa Ameerikaa ta'uuf deemu, garuu ammoo imaammata alaa Ameerikaa waliin walsimuu qabaatu,'' jechuun El Salvaadoritti ibsa gaazexeessitootaaf kennaniin.

   Bulchiinsi jijjiirama akkanaa akkamitti hojiirra oolchuuf akka karoorfate ifa miti.

7. 4 Guraandhala 2025Mootummaan Keeniyaa Kaaba biyyattiitti hidhattoota WBO irratti oppireeshinii eegaluu ibse

   Mootummaan Keeniyaa kutaalee kaaba biyyattii; Marsaabiit fi Isiyooloo keessatti Waraana Bilisummaa Oromoo (ABO-WBO) irratti oppireeshinii waraanaa eegaluu ibse.

   Maqaa ''Operation Ondoa Jangili (Oppireeshinii Yakkamtoota Baasuu)'' jedhuun Wiixata Guraandhala 03, 2025 kan eegale oppireeshiniin kun, iddoo dahannoo WBO qulqulleessuuf akka ta'e poolisiin Keeniyaa ibseera.

   Oppireeshiniin kun erga mootummaan Itoophiyaa fi Keeniyaan waliin ta'uun WBO yakkoota adda addaa naannawa kana keessatti raawwachuun himatanii eegale.

   Dabalataan dubbisuuf asiin seenaa

8. 4 Guraandhala 2025Chaayinaan qaraxa US'f WTO irratti tarkaanfii fudhatte

   Beejiing qaraxa haaraa bulchiinsi Tiraamp kaa’eef deebii kennuudhaan Dhaabbata Daldala Addunyaa (WTO)tti iyyata dhiheessuuf akeekkachiisa kennite hordofuu dubbatti.

   Ministeerri Daldalaa Chaayinaa ibsa kenneen, ''mirgaa fi dantaa seera qabeessa ishee eegsisuuf'' waldhabdee WTO'tti gargaaramaa jira jedheera.

   "U.S. oomishaalee Chaayinaa irratti qaraxa dabalataa kaa'uun ishee seerota Dhaabbata Daldala Addunyaa haalaan kan cabsudha. Tarkaanfiin kun kan nama gaddisiisu yoo ta'u, fakkeenya addaa gama tokkoon ta'uu fi eegumsa daldalaa kan bakka bu'udha," jechuun dabaliin dubbatan.

9. 4 Guraandhala 2025Ajjeechaan Dr Andu'alam Daanyee Baahirdaariitti attamiin raawwatame?

   Torban darbe Sambata galgala magaalaa Baahirdaaritti dhukaasa itti banameen ajjeefamuun Dr Andu'aalam Daanye jiraattota magaalaa Baahirdaariifi ogeeyyii fayyaa rifaasiseera.

   Ogeessi fayyaa kuni hogganaa kutaa tajaajila wal'aansa baqaqsanii hodhuu hospitaala Ispeeshaalaayizdii Xibaba Giyoon keessa dalagu.

   ''Nama bara meeqa takka dhalatudha,'' jedhu kanneen isaan waliin dalaganiifi isaan waliin guddatan.

   Namoonni BBC'n dubbise kunneen Dr Andu'aalam sadarkaa jalqabaa eegalee barataa cimaa badhaafamaa turan akka ta'an himan.

   Nama 'sammuu qaroo' jechuun kan isaan ibsan hiriyyaan isaanii biroo, Dr Andu'aalam umrii isaanii 37 keessaa 26 barnootarratti dabarsani jechuun ibsu.

   Kanneen isaan waliin hojjetaniifi BBC'n dubbise ogeessi ajjeefaman kuni ogeessa maqaa guddaa horatan, amalaafi beekumsa guddaa qabanidha jedhu. Dabalatasaa asiin dubbiifadhaa.

10. 4 Guraandhala 2025Finciltoonni Koongoo 'dhukaasa dhaabuu' labsan

    Gamtaan garee finciltootaa baha Rippabiliika Dimookiraatawaa Koongoo Kibxata irraa eegalee 'gargaarsa namoomaaf' jecha dhukaasa dhaabuu gamtokkee labsuu beeksisan.

    Finciltoonni M23 Ruwaandaan deeggaraman kuni ibsa kennaniin, dhukaasa dhaabuuf sababni erga naannoo kutaalee baha biyyattii qabatanii booda ''sababoota namoomaa'' ta'u kaasan.

    Dhaabbanni Biyyoota Gamtoomanii akka beeksisetti, lola dhiheenya kana magaalaa guddittii baha DR Koongoo Goomaa fi naannoo ishee finciltootaan erga qabamtee booda, yoo xiqqaate namoonni 900 kan ajjeefaman yoo ta'u, 2,880 ammoo madaa’aniiru.

    Biyyoonni G7 fi Gamtaan Awurooppaa haleellaan kun mirga abbaa biyyummaa DR Koongoo ifatti kan sarbuudha jechuun balaaleffataniiru.

    Gamtaan gareewwan finciltootaa Gamtaa Laga Koongoo jedhamuun beekamu, waraanni Koongoo xiyyaara fayyadamuun naannoolee qabate keessatti boombii darbachuuf namoota ajjeessan jechuun himate.

    Itti dabaluudhaanis, torbee darbe akkas jedhee kan ture ta'ulleen daangaa dabalataa qabachuuf akka hin yaadne kaasuudhaan, bakkuma qabate akka turu ibse.

    Gamtichi ibsa baaseen, "ummata nagaa fi ejjennoo keenyaa fi ummata nagaa eeguu fi ittisuuf kutannoo qabnu irra deebinee ibsina," jedhan.

    Lola naannoo waggoota sadan darban keessa namoonni kuma dhibbaan lakkaa’aman qe’eesaanii irraa buqqa’aniiru.

    Jalqaba bara 2025 irraa eegalee namoonni 400,000 ol ta’an dirqiin qe’ee isaanii irraa akka buqqa'an ta’uu dhaabbati baqattootaa Dhaabbata Mootummoota Gamtoomanii beeksiseera.

11. 4 Guraandhala 2025'Kaansariin qoonqoo sagalee fi gaa'ila koo narraa fudhate'- Meerii

    Tokko tokkoo nama kaansarii dhukkubsatu duuba yeroo hunda seenaa dhuunfaa himamu, dhukkubbii, dandamannaa, jaalalaa fi abdiitu jira.

    Namoonni miliyoonaan lakkaa'aman dhukkuba kanaan wal'aansoo qabanaa jiranis, imalli jreenyisaanii adda addaadha.

    Dhaadannoon duula Guyyaa Kaansarii Addunyaa bara kanaa har'a yaadamee ooluus kanuma ibsa: 'United by Unique' ykn Addaddummaa keessatti tokkummaa' kan jedhuudha.

    Mata dureen kunis seenaa waa'ee namoota kaansarii dhukkubsatanii fi namoonni dhibee kanarraa bayyanatan hin himamne ibsa.

    Odeessa kanarratti dabalataan dubbifachuudhaaf karaa kana seenu dandeessu.

12. 4 Guraandhala 2025Tamsaasa kallattii keenyaan dachaaneerra

    Ashamaa hordoftoonni BBC Afaan Oromoo bakka jirtan maratti.

    Odeessaalee keenya kan karaa tamsaasa kallattiin isin biraan geenya kan Kibxata har'aa kunoo amma eegalleerra.

    Odeessaalee keenya bal'inaan hordofuu yoo barbaaddan ammoo miseensa Chaanaalii WhatsApp fi Facebook BBC Afaan Oromoo ta'aa.

    Oolmaa nagaa qabaadhaa!

13. 3 Guraandhala 2025'Balaan yaaddoo qaraxaa Awurooppaa walitti fide' jedhan hoggantoonni Gamtaa Awurooppaa

    Waa’ee balaa yaaddoo qaraxa Tiraamp ilaalchisee qondaaltonni Gamtaa Awurooppaa deebii kennan.

    Hoggantoonni Gamtaa Awurooppaa keessaa, Pirezidaantiin Faransaay Imaanu’eel Maakroon yoo fedhiin daldalaa Gamtaa Awurooppaa miidhame “of kabajuu fi kanaafis deebii kennuu” qabna jedhan.

    Akkasumas ibsi dhiheenya kana US irraa kenname Awurooppaan akka cimtuu fi tokkummaa akka qabaattu dhiibaa jira jedhan.

    Ministirri Muummee Poolaandi Doonaald Tusk, Gamtaan Awurooppaa “waraana qaraxaa guutummaa guutuutti hin barbaachifnee fi gatii hin qabne kana hambisuudhaaf waan hunda gochuu qabna” jedhu, barbaachisummaa tokkummaa Awurooppaa gara fuulduraatti tarkaanfachuuf cimsanii dubbachuudhaan.

    "Kun tarii qormaata gosa kanaa isa jalqabaa gamtaa fi tokkummaa Gamtaa Awurooppaa haala baayyee hin baratamne keessatti, yeroo nuti michuu keenya dhiyoo irraa taajjabbii akkasii walduraa duubaan wal'aansoo qabnu," jedhan.

14. 3 Guraandhala 2025Amma nu gahe, 'Tiraamp waliigaltee daangaatiin booda qaraxa Meeksikoo kaa'amu baatii tokkoof tursiisuuf'-Pirezidantii Meeksikoo

    Pirezidantii Meeksikoo Kilaawudiyaa Sheenbum ibsa gaazexeessitootaaf kennaniin bilbilaan Tiraamp wajjin erga haasa'anii booda waliigalteerra qaqqabuu himan.

    Kilaawudiyaa akka jedhutti, ''haasawa gaarii'' Tiraamp waliin taasifte hordofee US meeshaalee Meksikoo irraa gara biyyattii seenan irratti qaraxa %25 kaa'uu ji'a tokkoof tursifte.

    Kunis kan ta’e erga hoggantoonni lamaan waliigalteerra ga’anii booda ta’uu dubbachuun, itti dabaluudhaan, kunis Meeksikoon loltoota eegdota kuma 10 ta’an kanneen atattamaan bobbaafamaniin daangaa akka cimsitu dubbatte.

    Isaanis daldala qoricha sammuu hadoochu gara UStti akka hin seenne ittisuuf hojiin isaaniif kennama. Addattis xiyyeeffannoon isaanii 'fentanyl' kan Tiraamp akka yaaddoo tokkootti kaasan, irratti xiyyeeffata.

    Pirezidantiin Meeksiikoo tun itti dabaluudhaan akka himanitti, US meeshaaleen waraanaa humna guddaa qaban gara Meksikootti akka hin daddabarfamneef ittisuufis waadaa galtetti.

15. 3 Guraandhala 2025'Dhungoon Waancaa Addunyaarratti dhungatame injifannoo arganne busheesse'

    Waancaa Addunyaa bara 2023 irratti qondaalli ispoortii Ispeen Luyis Rubiyaales taphattuu Ispeen Jenii Hermosoo jedhamtu hidhiirra dhungatee dhaddacha mana murtii Maadiriiditti Wixata har’aa kana dhiyaate.

    Rubiyaales qoccoollaa saalaa raawwachuu fi taphattuu kana dirqamseera jedhamuun himatame.

    Hermosoon har'a dhaddachatti dhiyaattee '‘dhungoon Rubiyaales jireenyakoo keessatti guyyaan gammade natti busheesse'’jette.

    ''Hogganaan koo na dhugate, taateen akkasii garuu dhimma hawaasummaa fi hojii kamirrattuu ta’uu hin qabu,‘‘jette.

    Hogganaan Federeeshinii kubbaa miilaa Ispeen kan ture Ruubiyaales taphattuu kubbaa garee biyyasaatii Hermosoo dhungachuun ijoo dubbii ta’ee ture.

    Rubiyaalees wayita Hermosoon Awustiraaliyaatti waancaa fudhattu dhungatee mormii cimaan isa mudachuun aangoorraas bu’e.

    Rubiyaalees garuu badiin raawwadhe hin qabu jechuun waakkataa ture.

16. 3 Guraandhala 2025Sababa imaammata lafaarratti hordoftuuf Tiraamp Afrikaa kibbaarraa deeggarsa kutuuf

    Afrikaan kibbaa ''qaamolee hawaasaa murtaa'eerraa lafa dhaaltee, rakkisaa jirti'' himannaa jedhuun Pirezedant Ameerikaa Doonaald Tiraamp maallaqaa biyyattiif kennamu hunda addaan kutuuf akka jiran himan.

    Pirezedantiin Afrikaa kibbaa Siriil Ramafoosaan seera lafti haloota murtaa’an keessatti otoo beenyaan hin kaffalamiin akka dhaalamu eeyyamu ji’a darbe raggaasisan.

    Afrikaa Kibbaa keesatti dhimmi lafaa falmisiisaa yoo ta’u, sirini Appaartaayidii erga goolabamee waggoota 30 boodallee lafti dhuunfaa harki caalaan warreen adii harka jira.

    Mootummaan Afrikaa kibbaa imaammata lafaa akka fooyyessu fi loogii sanyummaaf falaa akka barbaadu gaafatamaa ture.

    Pirezedantiin Afrikaa kibbaa Siriil Ramafoosaan toora X gubbaatti Tiraampiif deebii wayita kennaan:‘‘ Afrikaan kibbaa biyya dimokiraasiin ishee olaantummaa seeraa, haqaa fi walqixxummaarratti hundaa’e,‘ jedhan.

17. 3 Guraandhala 2025Dhaadannoon 'Ameerikaan haa dursitu jedhu tarii Ameerikaa qofa kan jedhu ta’u danda’a'

    Pirezedantiin Ameerikaa Doonaald Tiraamp Gamtaa Awurooppaa irra qaraxa kaa’uuf doorsisuun dhaadannoon 'Ameerikaan haa dursitu jedhu Ameerikaa qofa ta’uu danda’a' jedha gabaasaan dhimma bizinasii BBC Jonaattan Jooseef.

    Tiraamp oomishaaleen Ameerikaan Gamtaa Awurooppaarraa kan bittu kan Gamtaan Awurooppaa Ameeerikaa irra bitan caala jechuun garaa garummaa jiru ol guddisanii dubbatan.

    Ragaan Ameerikaan baaste akka agarsiisutti, garaa garummaan daldalaa jiru bara 2023tti Doolara biliyoona 208 ta’a.

    Bara 2024 ammoo kanarra caala garuu, garaa garummaan daldalaa gidduu isaanii jiru Doolara bilyoona 300 oliidha jechuun waanti Tiraamp haasa’uu hin ta‘u,‘' jedha.

    Bara bulchiinsa Baayidan Ameerikaan Gamtaa Awurooppaa fi Kanaadaa waliin qindoomuun konkolaatota elektirikii Chaayinaan oomishtu irraa qaraxa ka’aanii turan.

18. 3 Guraandhala 2025Qaraxa Tiraamp cimaa dhufe hordofee gabaan addunyaa gadi bu'e

    Pirezidantiin Ameerikaa Doonaald Tiraamp biyyoota akka Kaanaadaa, Meeksiikoo fi Chaayinaa irra qaraxan kaa'a jechuusaanii hordofee gabaa addunyaarratti gaheen Eshiyaa gadi bu'e.

    Gabaawwan aksiyoonaa Awurooppaa gurguddoon hundisaanii %1 oliin kan gadi bu’an yoo ta’u, kanaan dura gabaan aksiyoonaa Jaappaan ammoo %2.7 gadi bu’ee ture.

    Doolaarri Ameerikaa gabaa maallaqaa irratti haalaan cimuudhaan, Yuuwaan maallaqa Chaayinaa waliin wal bira qabamee yoo ilaalamu sadarkaa olaanaa galmeessiseera.

    Doolaarri Kaanaadaa ammoo erga bara 2003 as yeroo jalqabaatiif sadarkaa gadi aanaa ta’etti gadi bu’eera.

    Investaroonni yeroo jeequmsaa galii dhaabbilee gurguddoo miidhuu fi guddina addunyaa kuffisuu danda'uuf qophaa'aa jiru.

    Kaanaadaa fi Meeksikoon al-ergii isaanii gara UStti ergan irratti qaraxa %25 isaan mudachuuf jira. Meeshaaleen Chaayinaan hojjetamanis akkasumas qaraxa amma jiruun alatti, %10 dabalamuufiidha.

    Kaanaadaa fi Meeksikoon qaraxa Tiraamp oomishaalee isaanii irra kaa'e kana haaloo bahuudhaaf deebisan akka kan dubbatan yoo ta’u, Chaayinaan ammoo “tarkaanfii deebii walsimu” kennuudhaan tarkaanfii Tiraamp Dhaabbata Daldala Addunyaa irratti mormuuf dhaadatte.

    Tiraamp qaraxni kun qoricha seeraan alaa fi godaansa gara Ameerikaatti taasifamu dhaabuudhaaf barbaachisaa ta’uu ibsaniiru.

    Pirezidaantiin Ameerikaas qaraxni ''dhugaatti'' Gamtaa Awurooppaa irratti kaa'amu akka danda'u dubbataniiru, garuu ammoo UKn ''sararaan ala'' osoo jirtuu waliigalteen taasifamuu danda'a jedhan.

    ''Investaroonni waraanni daldalaa guutuu ta'e ka'uu danda'a jechuun raafamaniiru,'' kan jette Suzaanaah Istreetar, itti gaafatamtuun maallaqaa fi gabaa Hargiriivs Lanisdaawon.

    Gaheen dhaabbilee konkolaataa Awurooppaa keessatti baayyee gadi bu’uu kan agarsiise yoo ta’u, dameen kun taarifa kanaan addaan cituu irraa kan ka’e balaa guddaa akka qabu himameera.

    Dhaabbanni Stellantis, kan biraandiiwwan Chrysler, Citroen, Fiat, Jeep fi Peugeot of keessaa qabu, aksiyooniin isaa gara %6 gadi bu’eera. Voolsi Waagan (VW) ammoo %5.7 gadi bu’eera.

    Kanamalees, aksiyooniin dhaabbata dhugaatii oomishuu Diageo, kan tekiilaa Meksikoo irraa gara UStti ergu %3 gadi bu'eera.

19. 3 Guraandhala 2025Haleellaa diroonii Jibuutiin daangaa Itoophiyaarratti raawwatte maal beekna?

    Haleellaa diroonii mootummaan Jibuutii daangaa Itoophiyaarratti raawwateen lubbuun namoota saddeetii darbuu, kaan madaa'uu BBC'n jiraattotarraa odeeffate.

    Haleellaan kuni torban darbe Kamisa galgala yoo ta'u haleellaa kanaan daa'imni tokko ajjeefamuu isaas jiraattonni BBC'f mirkaneessaniiru.

    Jiraattonni BBC'n dubbise haleellaan kuni gama Itoophiyaa Naannoo Affaar keessa raawwatuu himani, mootummaan Jibuutiimmoo daangaa kiyya keessan raawwadhe jedhe.

    Dhimma kanarratti hanga ammaa gama mootummaa Itoophiyaa wanti jedhame hin jiru.

    Akkasumas jiraattonni kanneen ajjeefaman namoota nagaa jedhanis, mootummaan Jibuutii immoo 'shororkeessitoota' jedhe.

    Odeessa kanarratti dabalataan dubbiisuudhaaf asiin seenuu dandeessu.

20. 3 Guraandhala 2025Kaanaadaatti faaruun biyyaaleessaa US istaadiyoomiitti akka hin faarfamne dhorkan

    Pirezidaantiin Doonaald Tiraamp Kanaadaa irratti qaraxa cimaa akka kaa’an erga beeksisanii sa’aatiiwwan muraasa booda, deeggartoonni Liigii Hookii Biyyaaleessaa magaalaa Kaanaadaa Otaawaatti gaggeeffameerratti garee Ameerikaa dorgomaa ta'un kan dhiyaatee yoo ta'u, faaruun Ameerikaa akka hin faarfamneef mormiidhaan burjaajeessan.

    Deeggartoonni isteediyemicha keessatti argaman Baanarii Star-Spangled jedhu qabachuun iyyaan faaruun akka hin faarfamne taasisan.

    Deeggartoonni kuphaa Kaanaadaa kana kan raawwatan tarkaanfii qaraxa doonaald Tiraamp oomishaalee biyyasaanii irra kaa'an mormuudhaan.

    Haaluma walfakkaatunis Dilbata darbes, tibba tapha Waldaa Kubbaa Saaphanaa Biyyaalessaa Toroontoo Raaptors fi Los Anjala Kilippars gidduutti taasifameen akkasumas faaruun akka hin dhagahamne taasisan.

    Faaruu dhageessisaa kan turte weellistuun ganna 15 dirree irratti sagaleen ishee sagalee wacaatiin haguuguutti dhiyaatee ture.

    Taateen akkasii biyyoota waliif michuu cimoo turan Ameerikaafi Kaanaadaa biratti waan hin baramne ture. Xinxaltoonni garuu kun qaraxni Tiraamp Kaanaadaa irra kaa'e hangam akka isaan aarse kan agarsiisuudha jedhu.

    Pirezidantiin Ameerikaa Doonaald Tiraamp oomishaalee Kaanaadaa irraa gara Ameerikaa seenan irratti qaraxa %25 kaa'e Kibxata dhufaa irraa ka'e hojiirra akka oolu eegama.

    Kana malees boba'aa irra ammoo qaraxa parsantaa 10 kaa'eera. Kunis daldala alaa Kaanaadaa haalaan akka miidhuu malu yaadama.

    Tiraamp Kaanaadaan qaraxa akkasiin hin barbaachifne irraa bilisa ta'udhaaf yoo barbaaddeetti aka bulchiinsa Ameerikaa 51ffaatti akka itti makamtu qoosa fakkeessuun dubbachuunsaa ni yaadatama.

    Haasaan Tiraamp kun duraan akka qoosaatti kan ilaalamee ture yoo ta'u amma garuu qoosaa akka hin taane qabatamaan hubatamaa jira.

    Xinxalaan damee daldalaa akka jedhaniitti, qaraxni Kaanaadaan tarkaanfii Tiraamp kanaaf deebii kennuuf keessuu, fayyadamtoota Ameerikaa irratti dabala gatii dabalu illeen, waliigalatti miidhamtuun Kaanaadaa ta'u dandeessi jedhan.