Dhalataa Itoophiyaa dabalatee lammiileen Israa'el ja'a Hamaas bute gadhiifaman

Haguuggii Tamsaasa Kallattii

1. 19 Guraandhala 2025Naannoo Amaaraatti abbootiin murtii akka hin hidhamnee fi hin himatamne labsame

   

   Madda suuraa, Amhara Communications

   Abbootiin murtii seeraa ''harkaafi harkatti yakkaan qabamuu yoo baatan'' to'annoo seeraa jala akka hin oolleefi hin himatamne Manni maree naannichaa labsiin raggaase.

   Labsiin mana marichaan ragga'e abbootiin murtii gocha raawwataniif ykn osoo hin raawwatiin hafaniif himatni akka irratti hin dhiyaanne ittisa seeraa tolcheefiira.

   Labsiin kun ''Mootummaa naannoo Amaaraatti Jajjabeessituu Manneen Murtii'' jedhama. Manni marichaa yaa'ii torban darbe gaggeessaa ture wayita xumuru labsicha raggaase.

   Manni Murtii Waliigalaa naannichaa labsii kana kan qopheesse rifoormii damee haqaarratti gaggeefamu ''seeraan jabeessuuf'' yaadamee akka ta'e ibse.

   Pireeziantiin mana murtichaa Alemaantee Aggideew kaayyoo ijoon labsichaa sirni haqaa naannichaa dhiibbaa keessoofi alaarraa bilisa ta'ee akka hojjetu gochuu ta'uu BBCtti himan.

   Abbootii murtiif ittisa seeraa kennuun murteessaa ta'uus himan.

   Abbootiin murtii naannichaa irra deddeebiin ittisni seeraa akka kennauu gaafachaa turan.

   ''Sababa ittisa seeraa hin qabneef ajajaafi murtoo kennaniin hidhamaa akka turan pirezidantiin waldaa abbootii seeraa naannichaa Obbo Birhaanuu Asese himaniiru.

   Waldaan kun ibsa ji'oota dura baaseen torban lama keessatti hooggansa manneen murtii dabalatee abbootiin murtii 11 hidhamuu ibsee ture.

2. 19 Guraandhala 2025Sudaanitti namoonni nagaa 200 ol ajjeefamuu falmitoonni mirgaa himan

   Namoonni hin hidhanne 200 ol gandoota Sudaan lama keessatti guyyaa sadiitti ajjeefamaniiru.

   Gareen falmitoota mirgoota namoomaa biyyattii ajjeechaa kana Humna Addaa(RSF) biyyattiitu raawwate jedhe

   Gareen Ogeessota Seeraa Hatattamaa haleellaan kuni bulchiinsa Waayit Naayiil ollaawwan al-Kaadaaris fi al-Keelwaat jedhamaniifi waraanni qubatee hin jirretti raawwate jedhe.

   Loltoonni Humna Addaa(RSF) ''ajjeechaa, butuu fi humnaan achi buutee dhabamsiisuu akkasumas saamicha raawwachuun gaafatama fudhatu,'' jedhe gareen kuni.

   Humni Addaa kuni lolli jalqabuun dura waraana biyyattii wajjin hojjechaa kan ture yoo tahu, himannaan miilanaaf deebii hin kennine.

   Qaamoleen lamaan gara aangootti kan dhufan fonqolcha mootummaan yoo tahu - gara bulchiinsa nagaatti deebi'uu irratti garuu waliigaluu hin dandeenye.

   Hogganooti RSF yeroo ammaa Keeniyaa kan jiran yoo tahu lafa to'annoo isaanii jala jirutti mootummaa hundeessuuf karoora isaanii akka ibsan eegama.

   Xiinxaltoonni tarkaanfii kana yoo fudhatan Sudaan keessatti wal-qooduu hammeessa jedhan.

   

   Madda suuraa, Getty Images

3. 19 Guraandhala 2025'Yukireen filannoo otoo hin taane rasaasa barbaaddi'

   Af yaa'iin paarlaamaa Yukireen Raaslaan Isteefaanchaak Yukireenitti filannoo pireezidantummaa haa adeemsifamu jedhu akka hin fudhanne ibsan.

   ''Yukireen rasaasa malee filannoo miti kan barbaaddu,'' jedhan yaada Feesbuukii irratti maxxansaniin.

   ''Otoo haleellaan adeemsifamuu demookiraasii akka haaraatti fiduun demookiraasii miti, diraamaa wal-tajjiiti, kan irraa buufatu ammoo Raashiyaa dha,'' jedhan.

   ''Pireezidant Vilaadmiira Zeleensiki deeggarsa guutuun siif kenna,'' jedhan af yaa'iin paarlaam Yukireen, namni miseensa paartii Zelenskii Tajaajilaa Uummataa(Servant of the People party) tahan Raaslaan.

   Seerri Yukireen yeroo waraanaa filannoo geggeessuu ni dhorka.

4. 19 Guraandhala 2025Tiraamp oduu dogoggorsaan marfamanii jiru - Zeleenskii

   

   Madda suuraa, Getty Images

   Zeleenskiin ammatti hoggantummaan namni isaaniin bakka bu'u yoo jiraate milkaa'uu hin danda'u, sababiinsaas ''fudhatamummaan koo olaanaa'' waan taheefi jedhaniiru.

   Hogganaan Yukireen kuni qorannoo eeruun lammiileen Yukireen dhibbeentaa 58 hoggansa isaaniitti akka amanan himan.

   Dabaluunis ''oduu dogoggorsaa baayyee'' Raashiyaan facaastu Yukireen argaa jirti jedhan.

   ''Kabaja waliin garuu Pireezidant Donaaldi Tiraamp akka hogganaatti naannoo oduu dogoggorsaa qabu keessa jiru,'' jedhan.

   Zelenskiin filannoo bara 2019 kan mo'atan yoo tahu yaada kana kan kennan Tiraamp ''fudhatamummaan Zelenskii ''%4'n gadi bu'eera,'' jechuun booda dha

   Zelenskiin fudhatama isaanii irratti dhibbeentaan 4 gadi bu'eera oduu jedhu kan tamsaasu Raashiyaa tahuuf ''ragaa'' qabnaa, ''dhimmi kunis Raashiyaa fi Ameerikaa gidduutti marii'atamaa jira,'' jedhan.

5. 19 Guraandhala 2025Seneetiin Faransaay wixinee dirree ispoortiitti hijaaba uffachuu dhorku raggaase

   

   Madda suuraa, Getty Images

   Seeneetiin Faransaay dubartootni dirree ispoortii kamuu keessatti hijaaba akka hin uffanne dhorkuuf wixinee qophaaye sagalee olaanaan deeggare.

   Amanistii Internaashinaal wixineen seeraa kun mirga namoomaa sarba jechuun balaaleffate.

   ''Dubartootni marti mirga waan baraadan uffachuu qabu'' kan jedhu ibsi dhaabbatichaa seerri qophaaye kun ''sodaafi jibba Islaamaarraa madda'' jedheera.

   Ilaalcha warri dhiiraa wanta dubartootni uffachuu qabanirratti murteessuuf qaban agarsiisas jedheera.

   Murteen Seeneetii Faransaay kun seera ta'uuf Mana Maree Biyyaalessaatti ce'a.

6. 19 Guraandhala 2025Awurooppaan qoqqobbi haaraa Raashiyaarra kaa'uuf waliigalan

   Ambaasaaddaroonni Gamtaa Awurooppaa (EU) Raashiyaarra qoqqobbiin haaraa marsaa haaraa akka kaa'amuuf waliigalan.

   Qoqqobbiin paakeejii 16 of keessaa qabu kun, Raashiyaarraa aluminiyeemii galchuu dhorkuu, akkasumas dooniiwwan haaraa 73 bobbaafaman adda baasuu dabalata.

   Akka burqaan oduu Roohitars gabaasetti, qoqqobbiin kun Wixata ministiroota EUtiin kan mirkanaa'u yoo ta'u, kun ammoo waggaa sadaffaa Raashiyaan waraana guutuu Yukireen irratti banterrattidha.

7. 19 Guraandhala 2025Humni qilleensaa Yukireen diroonota Raashiyaa 106 itti dhukaasuun kuffiise

   

   Madda suuraa, EPA

   Humni qilleensaa Yukireen diroonota Raashiyaa 106 itti dhukaasuun kuffiisuu hime. Dirooninni humni qilleensaa Yukireen kuffiisuu hime kun kanneen 167 halkan tokkotti haleellaaf itti ergaman keessaati.

   Diroononni biroo 56 ammoo "bakka itti ergaman dogoggoranii" miidhaa omaa hin geessisiin hafan jedhameera.

   Naannoleen Yukireen warri akka Odeesaa, Kiiv, Samii, Cherkasii fi Zaporizhiyaa warra haleelaman ta'uu kan ibse humni qilleensaa Yukireen, garuu ibsa ballaa hin kennine.

   Pirezidant Voloodmiir Zeleniskiin akka jedhanitti, haleellaa Raashiyaan gaggeessite hordofee magaalaa Odeesaa keessatti namoonni 160,000 ta'an ibsaa male ejiru.

8. 19 Guraandhala 2025ABO fi KFO mootummaa waliin har’a marii jalqabu jedhamee eegama

   

   Madda suuraa, Getty Images

   Paartiileen siyaasaa Oromoo Adda Bilisummaa Oromoo fi Kongaransiin Federaalistii Oromoo Mootummaa biyya bulchaa jiru waliin Roobii ganama marii akka jalqaban BBCn maddeen irraa odeeffateera.

   Paartiileen lamaan Oromiyaa keessatti deeggartoota hedduu qabaachuun amanamu kunneen Filannoo darbes ta’e marii biyyoolessaa Itoophiyaan gaggeessaa jirtu irratti qooda osoo hi fudhatin hafan.

   Maddi BBC’n dubbise akka jedhanitti adeemsi marii kanaa erga jalqabamee torbee lama akka caaluu fi gaggeesitoonni mootummaa gaggeesitoota dhaabota siyaasaa lamaan qunnamuun mari’achuu akka qaban waliin dubbiin eegalamuu himan.

   Eega gaggeesitooni dhaabolee lamaanii qaamolee mootummaa waliin dubbataniin boodas gageesitoonni dhaabolee lamaanii ammoo dubbii kana koree hoji raawwachiistuu isaaniif dhiheessuun irratti mari’achuu himan.

   “Dubbii akkanaa gaafatamne jedhamee koree hoji raawwachiistuu irratti dhihaate. Erga irratti mari’anneen booda eenyufaatu marii kanarratti hirmaata kan jedhu adda baasne. Gaggeesitoonni dhaabaa, Koreen hoji raawwachiistuu, jaarsolii fi hayyoota hirmaatanis adda baasne” jedhan namni BBCn dubbise.

   Haaluma Kanaan bakka bu’oonni paartilee lamaan irraa filataman marii mootummaa waliin taasifamu kana irratti hirmaachuuf Kibxata galgala Hoteela seenuu fi Roobii ganama kana mariin jedhame kuni ni eegala jedhamee eegama.

   Mariin addatti mootummaan paartilee Oromiyaa keessa socho’an lamaan ABO fI KFO waliin taasisu kuni qabiyyeen isaa maalirratti akka xiyyeeffatuu fi guyyoota meeqaaf akka turu irratti hanga ammaa wantii ibsame hin jiru.

9. 18 Guraandhala 2025Raashiyaan waliigaltee waraana dhaabuu keessa loltootni Nato Yukireen seenuu 'hin fudhadhu' jette

   Ministirri Haajaa Alaa Raashiyaa Sargee Laavroov waliigaltee waraana dhaabuu kamuu keessa yaada loltootni Nato Yukireen haa galan jedhu akka hin fudhanne ibsan.

   Laavroov yaada kana kan kennan marii gita isaanii US waliin Saawdii Arabiyadiirraatti dhimma waraana Yukireen irratti mariyachuu booda.

   Wiixata darbe ammoo Ministirri Muummee UK Kiir Istaarmeer loltoota isaanii Yukireenitti erguuf fedhaafi qophaa'ina qabaachuu ibsanii ture.

10. 18 Guraandhala 2025Itoophiyaan qamadiidhaan of dandeesseetti - Mootummaa

    

    Madda suuraa, Office of the Prime Minister-Ethiopia

    Mootummaan Itoophiyaa hojii damee qonnaa jajjabeessuun nyaataan of danda'uuf hojjeteen qamadiidhaan guutummaatti biyya of dandeesse uumuu ibse.

    Waajirri Ministira Muummee ibsa bal'aa nyaataan of danda'uuf hojiilee hojjetamaniifi milkaahina argaman ilaalchisee baaseen fedha qamadii lammiilee biyyattii omisha biyya keessaa qofaan guutuu danda'uu beeksise.

    Baroota darban keess fedhii qamadii gabaan biyyaa barbaadu guutuuf mootummaan bittaa qamadiif waggaa waggaan doolaara biliyoona tokko ta'u baasaa akka ture ibse.

    Haata'u malee waggoota darban omisha kilaastaraa, qonna bonaafi sagantaalee adda addaa diriirseen bara 2020/21 irraa kaasee ''qamadii alaa galchuu guutummaatti dhaabneerra'' jedhe.

    Itoophiyaan ''qamadiin of dandeesseetti'' jechuun garuu dhabbileen gargaarsaa biyya alaatii hin galchan jechuu miti jedheera. Dhaabbileen gargaarsaa qamadii biyyaa bituu caala biyya alaatii bitanii galchuu akka filachuu malan ibseera.

    Ce'umsi damee qonnaarratti godhame bu'aa bayii hedduu qabaatus, biyyoota Afrikaa nyaataan of danda'uuf waldhaansoorra jiraniif muuxannoo gaarii ta'a jedha ibsi mootummaa.

    ''Hojii qonna walirraa hin cinnee fi kalaqa irratti hundaa'eef dursa kennuun Afrikaan humna ittiin of soortu...dhalootni hegerees kan nyaataan of danda'e gochuuf Itoophiyaan agarsiistuudha'' jedha ibsichi.

11. 18 Guraandhala 2025Yukireen mirga Gamtaa Awurooppaatti makamuu qabdi - Raashiyaa

    

    Madda suuraa, EPA

    Dubbii himaan mootummaa Raashiyaa Dimtrii Peeskoov yaada gaazexeessitootaaf kennaniin Yukireen Gamtaa Awurooppaatti makamuun nageenya Raashiyaaf yaaddoo miti jedhan.

    ''Tahus ejennoon dhimma nageenyaa, ittisaa fi waraana irratti qabnu adda dha. Inni dhimma biraati, kana namuu waan beeku dha,'' jedhan.

    Yukrieen miseensa Gamtaa Awurooppaa fi Nato tahuu barbaaduun dhimma biyyoota Lixaa wajjin siyaasaan akka michooma uumtu ishee taasise dha.

    Raashiyaan waggoota 11 darbaniif duulli weerar biyyattii irratti taasifte abjuu kanarraa hambisuufi yaalii mirga walabummaa dhorku ture.

    Xiinxaltoonni ejennoon Raashiyaa ammaa kuni ''jijjirama tasaati,'' jedhan.

    Raashiyaan Yukireen miseensa Gamtaa Awurooppaa akka taatu hin dhorku garuu waan dhihootti tahu miti jette.

    Biyyooti michuu Raashiyaa tahan Haangaarii fi Isloovaakiyaan adeemsa miseensa Gamtaa Awurooppaa tahuu Yukireen waan danqan fakkaata.

    Dabalataan Yukireen yoo Gamtaa Awurooppaatti makamte wabii nageenyaa miseensoti Nato kennan otoo hin argatiin tahuuf deema.

    Ameerikaa fi Awurooppaan fuulduratti Yukireeniif wabii nageenyaa hin kennan taanaan baqattoota Yukireen gara Yukireenitti deebisuun rakkoo taha.

12. 18 Guraandhala 2025US fi Raashiyaan waraana Yukreen xumuruuf garee jaarsolii ijaaruufi - Ameerikaa

    Mariin aanga'oota olaanoo US fi Raashiyaa Saawudii Arabiyaatti gaggeeffame xumuramuu hordofee US garee jaarsolii marii nagaa ijaaruuf waliigalteerra gahamuu beeksifte.

    Waajirri Haajaa Alaa US namoota waraana Yukireenitti xumura gochuuf marii nagaa gaggeessan filachuufi jedhee ibsa baaseera.

    Raashiyaan gama isheen mariin sa'aatii afuriif Riyaaditti gaggeeffame ''faara gaarii kan qabuufi ijaaraadha'' jetteetti.

    Ministirri Haajaa Alaa Raashiyaa Serjee Laavroov gita isaanii US Maarkoo Ruubiyoo waliin kan mariyatan yoo ta'u marii kana irratti Yukireenis ta'e Gamtaan Awurooppaa qooda hin qabaanne.

13. 18 Guraandhala 2025Mucayyoon ganna 13 'chokoleetii hatuun' booda ajjeefamnaan dheekkamsi ka'e

    

    Madda suuraa, Getty Images

    Kaaba Paakistaanitti haati warraafi abbaan warraa ol adeemtuu ganna 13 hojii mana keessaa isaan gargaartu chokoleetii hatte jedhanii ajjeesuun shakkaman to'annoo jala oolaniiru.

    Mucayyoon maqaa jalqabaa Iqraa jedhamu qofa qabdu Roobii darbe miidhaa irra deddeebiin irra gaheen hospitaalatti luubbunshee darbeera. Qorannoon jalqabaa poolisii akka agarsiisutti mucaan kuni dararamaa turteetti.

    Dhimmi kuni naannoo Raawaalpiindii keessatti dheekkamsa guddaa kaaseera. Miidiyaa hawaasaa irrattis haashtaagii #JusticeforIqra (Haqa-Iqraaf) jedhu namoonni baayyeen mil'ataniiru.

    Humna daa'immaniifi hojjettoota manaa kaan akka malee fayyadamuu irrattis falmii guddaa kaaseera.

    Daa'imman hojjechisuu irratti seerri biyyattii naannoo tokkoo, kaanitti gargar tahus ijoolleen waggaa 15 gadii hojii mana keessaaf qacaramuu akka hin dandeenye seerri naannoo Punjaab ni dhorka.

    ''Yeroosheen duutu keessi koo guutuu ni rom'e,'' jedhan abbaan Iqraa Saanaa Ullaah.

    Gaafa Roobii poolisii irraa isaaniif bilbilamee yeroo hospitaala gahan Iqraan siree irra ciistee of hin beektu ture. Daqiiqaa shan boodas duute jedhan.

    Iqraan waggaa saddeet irraa qabee mana namaatti hojjechuu kan jalqabde. Abbaanshee namni ganna 45 akkasheen hojjettu kan eeyyaman ofii liqaa keessa waan jiraniif tahuu himaniiru.

    Hojjechistoota muraasaaf kanaan dura hojjechuun booda namoota ajjeechaasheen shakkamaniifi ijoollee saddeet qaban bira hojjechuu kan jalqabde waggaa lama dura yoo tahu ji'ati doolaa 28tu kaffalamaaf ture.

14. 18 Guraandhala 2025‘Puutin yoo barbaachisaa ta’e Zeleniskii waliin ni haasa’a’

    

    Madda suuraa, Getty Images

    Kiremiliin akka jedhutti, Pirezedantiin Raashiyaa Vilaadmiir Puutin ‘’yoo barbaachisaa ta’e’’ Pirezedantii Yukireen Volodmiir Zeleniskii waliin haasa’uuf qophiidha jedha.

    Dubbi-himaan Kiremeliin Dimitrii Peskoov gaazixeessitootatti wayita dubbatan;’’ Yoo barbaachisaa ta’e Zeleniskii waliin mariyachuuf qophiidha jedhaniiru’’ jedhe.

    ‘’Haata’u malee, bu'uurri seeraa waliigaltichaa marii barbaada, innis seera qabeessummaan Zeleniskii gaaffii keessaa waan jiruuf,’’ jedhan.

    Puutin, barri Pirezedantummaa Zeleniskii ji’a Caamsaa darbe kan xumurame waan ta’eef seera qabeessuumman isaa gaaffii keessaa jira jechuun irra deddeebiin dubbata.

15. 18 Guraandhala 2025Raashiyaan halkan edaa Yukireen haleelaa bulte

    

    Madda suuraa, Rooyitars

    Halkan edaa meeshaan ittisa haleellaa qileensaa diroonota 176 Raashiyaan gara Yuukirenitti gadhiifte keessaa 103 qolachuu Humni Qilleesaa Yuukireen beeksise.

    Diroononni kunneen magaalaa guddoo biyyatti Kiiv dabalatee naannolee biroottis rukutamanii kufaman, aarri magaalaa Kiiv irraa mul’ataa ture.

    Wixata halkan jiraattoonni magaalaa Kiiv akka dawoo dhokannaa keessa akka turan kantiibaan magaalichaa akeekkachise.

    Miidhaan Kirovohrad, Karkiiv fi Cherksay bakeewwan jredhamanitti qaqqabeera.

16. 18 Guraandhala 2025Sa'ud Arabiyaan maaliif marii US-Raashiyaatiif filatamte?

    

    Madda suuraa, Reuters

    Pirezdantiin Ameerikaa Doonaald Traamp gitasaanii Raashiyaa Vilaadmiir Puutin waliin Sa'ud Arabiyaatti wal arguun waraanni Yukireen keessaa akkamitti akka xumuramurratti marii taasisuuf maaliif biyya Galoo Galaanaa kana walgahii murteessaa kanaaf akka filatan namoonni hedduun yaadaa jiru.

    Guyyaa walgahiin kun itti gaggeeffamu ibsamuu baatullee yeroo dhiyootti ta'uu akka danda'u eerameera.

    Kana malees, Mootiin Sa'ud Mohaammad bin Salmaan, kan maqaa qubee jalqabaatiin MBS jedhamuun beekamanis, walgahicharratti hirmaachuu akka danda'u yaada dhiheesse.

    Tiraamp kana kan dubbatan erga Puutin fi Pirezidaantii Yukireen Volodimiir Zeleniskii waliin karaa bilbilaatiin adda addatti carraa nagaa irratti xiyyeeffate taasisaniin sa'aatii muraasa boodadha.

    Sa'ud Arabiyaan ibsa kenniteen, haasaa bilbila Tiraampiifi Puutin gidduutti taasifamee fi yaa'iin mootummaa biyyattii keessatti gaggeefamu filachuu diqisiifateetti.

    "Mootummaa Raashiyaafi Yukireen gidduutti nagaa waaraa buusuuf carraaquu akka itti fufan biyyi Galoo Galaanaa[Sa'ud Arabiyaa] ni mirkaneesiti" jedha ibsichi.

    Odeessa kana bal'inaan dubbiifachuudhaaf asiin galtanii ilaaluu dandeessu.

17. 18 Guraandhala 2025Zeleniskiin eessa jira?

    

    Madda suuraa, EPA

    Yeroo jilli Ameerikaafi Raashiyaa dhimma waraana Yukireen dhaabsisuuf Riyaad keessatti teessuma isaanii qabatanii jiranitti, biyyi dhimma kanarratti murteessituu taate Yukireen keessaa hafteetti.

    Kun jalqabbii marii nagaa akka hin taane US cimsitee ibsaa jirtu, garuu ammoo wanuma dhiyootti ta'udha.

    Doonaald Tiraamp osoo hin eegamiin haasaa bilbilaan Vilaadmiir Puutin waliin erga taasisanii booda mariin "hatattamaan" akka jalqabu akeekaniiru.

    Marii har'a Sa'ud Arabiyaa, magaalaa Riyaaditti jalqabame kanarratti Voloodmiir Zeleniskiis ta'e aanga'oonni Yukireen biroon hin argamne. Zeleniskiin akka irratti hirmaatuufis hin hafeeramne.

    "Nuti waliigaltee [nagaa] ofii keessa hin jirra hin barbaadnu," jechuun rippoorterootatti dubbate Zeleniskiin kaleessa wayita gara UAEtti qajeelan.

    Zeleniskiin har'a Pirezidant Ressiip Erdohaan waliin wal arguuf Tarkii jira.

    Daawwannaan isaa kun maal akka ta'e odeeffannoo jala buunee hordofnee isin biraan geenya?

    "

18. 18 Guraandhala 2025Amma nu gahe, Mariin US-Raashiyaa Riyaaditti gaggeeffamu eegaleera

    

    Madda suuraa, Reuters

    Mariin US- Raashiyaan waraana Yukireen dhaabsisuuf akeekee Sa'ud Arabiyaa, Riyaaditti gaggeeffamuu eegaleera.

    Gama Ameeikaatiin maricharratti aanga'oonni argaman walga'iin har'aa kun haraara jalqabuuf akka hin taane himuun, Raashiyaan waraana Yukireen dhaabuudhaf "dhuguma kan dhimmaman" ta'uu ilaaluudhaaf jedhan.

    Raashiyaan ammoo wanti dursi kennamuufiif qabu hariiroo US waliin jiru bakkatti deebisuudha jetti.

    Walga'iin kun yeroo hangamiif dhoksaatti karra cufatanii akka turan wanti beekame hin jiru. Haata'u malee, odeeffannoo haaraa akkuma arganneen isin biraan gahuu itti fufna.

19. 18 Guraandhala 2025Maakiroon waa'ee marii nagaarratti Tiraampii fi Zeleniskii dubbisan

    

    Madda suuraa, Reuters

    Pirezidantiin Faransaay Imaanu'eel Maakiroon waa'ee walga'ii hoggantoonni Awurooppaa kaleessa Faransaay, paarisitti gaggeeffatanii ibsuufiifi Doonaald Tiraamp fi Volodmiir Zeleniskii dubbisuu himan.

    Gaggeessitonni UK fi EU dhimma Yukireen irratti kaleessa walga'ii hatattamaa taa'aniiru. Maaltu akka mariyatame hin beeknu-garuu gabaasaaleen akka agarsiisanitti biyyoonni Awurooppaan mariin dhukaasa dhaabuu jiraannaan humna nagaa eegsisan Yukireenitti ni erguu kan jedhurratti lamatti qoodamaniiru.

    Wixata fuula X isaarratti kan maxxanse Maakiron mariin nagaa kamiyyu "wabi nageenyaa amansiisaa Yukireenotaan karaa mirkaneessuun ta'uu qaba" jedhan.

    "Dhimma kanarratti Awurooppaanota, Ameerikaanotaafi Yukireenota hunda waliin ni hojjenna," jedhan Maakiroon. "Kun dhimma furtuu taatedha."

    Waayit Haawus bilbila michuu Maakiroon waliin taasifame yoo jedhu, Zeleniskiin ammoo wabiin nageenyaa Yukireen kamiyyu "cimaafi amansiisaa" akka ta'u" waliigaleerra jedhan.

20. 18 Guraandhala 2025Eenyu, maal, eessatti? Marii waraana Yuukireen dhaabuurratti waan beekuu qabdan

    

    Madda suuraa, Getty Images

    Aanga’oonni US fi Raashiyaa ganama kana magaalaa guddoo Sa’ud Arabiyaa, Riyaaditti wal argu.

    Gama Ameerikaatiin ministira dhimma alaa US Maarkoo Ruubiyoo, gorsaa nageenya biyyaalessaa Tiraamp Maayik Waaltiz fi ergamaa Baha Giddu-galeessaa Istiiv Witkoof qama garee marii kanaati.

    Witkoof biliyeenera misooma riil isteetiin beekamuufi michuu dhuunfaa Tiraamp yoo ta’u, erga Tiraamp aangootti dhufanii marii nagaa idil-addunyaa irratti nama adda duree ta’edha. Ji’uma kana gara jalqabaa dhimma adda ta’e tokkorratti Puutin waliin wal argeera.

    Gama Raashiyaatiin ammoo, aanga’oota ministira dhimma alaa Sergee Laaviroov, gorsaa imaammata biyya alaa Kireemiliin Yuurii Ushaakov dabalatee ni argamu. Laaviroovis ta’e Ushaakov dippilomaatota muuxannoo guddaa qaban yoo ta’an, Raashiyaan imaammata dhimma alaa akka hojiirra oolchituuf Puutininn gargaaraa turaniiru.

    Kaleessa, Raashiyaan mariin kun osoo Yukireeniifi Awurooppaan hin jiraatiin “of eegannoon gam-lamee” akka ta’e cimsitee ibsiteetti.

    Mariin kun ammoo beellama Tiraamp fi Puutin Sa’ud Arabiyaatti wal arguuf karoorfatan dursee kan ta’edha.