Loltoonni Sooriyaa lammiilee nagaa 745 ajjeesuun himataman

Haguuggii Tamsaasa Kallattii

1. 4 Bitooteessa 2025Ergamaan duraanii Ameerikaa gargaarsa dhaabuun 'baay'ee dogoggora' jedhan

   

   Madda suuraa, Getty Images

   Bulchiinsa Biil Kilintan jalatti Yukireenitti Ambaasaaddara Ameerikaa kan turan Isteevan Piifer, murtoon gargaarsa dhaabuu “bakka tokkotti qabatamaan dirree waraanaa irratti dhiibbaa waan qabaatuuf ... baay’ee dogoggora” jedhu.

   Piifer akkas jedhan: “Sun anaaf gaaffiin guddaan. Kana jechuun koo, Pirezidanti Tiraamp yoo itti fayyadamu barbaadan Raashiyaa irratti olaantummaa guddaa qaba.

   ''Diinagdee Raashiyaa irratti qqoqqobbii kaa'ame cimsuu danda'a. Qabeenya Baankii Giddugaleessaa Raashiyaa doolaara biiliyoona 300 qabachuudhaan maallaqa sana Yukireeniif akka dhiyaatu biyyoota G7 waliin hojjechuu danda'a."

   Piifer itti dabaluudhaanis, “Nama waa’ee aartii waliigaltee kanaa dubbatuuf immoo, Puutiin waliin olaantummaa isaa cimsuuf homaa hin raawwanne.

   “Inni olaantummaa baay’ee qaba, gargaarsa Ameerikaan Zeleniskii waliin Yukireenif gooteen amma garuu waan ta’e fakkaata, qaama dogoggoraa irratti cimsee dhiibuu fi gadi bu’aa jira.”

2. 4 Bitooteessa 2025US deeggarsa waraanaa Yukireen irraa kutte- Waayit Haawus

   

   Yukireeniif deeggarsa meeshaalee waraanaa, tumsa maallaqaa fi meeshaalee garaagaraa taasisuun gita kan hin qabne US deeggarsa kana yeroof dhaabuu Waayit Haawus beeksiseera.

   Qondaalli Waayit Haawus akkas jechuun miidiyaa michuu BBC ta'e CBS News'tti himan:

   ''Pirezidantichi nagaa buusuurratti akka fuulleffatan ifa. Michuuwwan keenyas galma kanaaf akka kutannoo agarsiisan feena. Yeroof deeggarsa dhaabnee qorataa jirra. Tarkaanfiin kun yoo furmaata fida ta'eef ilaalaa jirra.''

   Erga Tiraamp Waayit Haawus seenanii tarkaanfiiwwan hedduun saffisa kanaan dura hin baramneen fudhataa jiru. Haalonni saffisaan jijjiiramaa jiru.

   Jimaata darbe Pirezidanti Zeleniskii fi Doonaald Tiraamp Waayit Haawusitti walitti mufatanii gargar ba'an.

   Isa booda Ameerikaan deeggarsa waraanaa Yukireen irraa kutuun dhagahame.

   Tiraamp garuu tarkaanfiin kun fudhatamuu ifatti hin dubbanne.

   Duratti Tiraamp waa'ee deeggarsa Yukireen irraa dhaabuu akka hin dubbanne ibsanii turan.

   Garuu ''waan itti aanee mudatu kan ilaallu ta'a,'' jedhan.

3. 4 Bitooteessa 2025Ashamaa!

   Tamsaasa kallattii eegalleerra. Oduu biyya keessaa fi addunyaa hordofnee karaa kanaan isin biraan geenya.

   BBC Afaan Oromoo Chaanaalii WhatsApp akkasumas Facebook irratti hordofaa.

   Nagaan oolaa!

4. 3 Bitooteessa 2025Amma nu gahe, Murannoo Tiraamp nagaa Yukireeniif qabu garamasaarraati- MM UK Istaarmer

   

   Madda suuraa, Reuters

   Waa'ee daawwannaa torban darbe US'tti taasisuun Doonaald Tiraamp waliin Waayit Haawusitti waliin al argan ilaalchisee kan dubbatan yoo ta'u akkas jedha Ministirri Mummee UK Kiir Israarmer: "Deeggarsa Tiraamp ifatti keewwata 5 NATO'f taasisan dabalatee, marii gaarii dhimma nageenyaa Awurooppaa irratti taasifne fudhadheera," jedhan.

   "Biyyoonni keenya lamaan nagaa waaraa Yukireen keessatti akka buu'uuf qophii nageenyaarratti waliin akka hojjatan marii keenya irraa hubannoo argames nan fudhadha."

   Akkasumas, "pirezidant Tiraamp nagaa sanaaf kutannoo itti fufiinsa qabu, kan eenyuumtuu mana maree kana keessa jiru sekondii tokkoofillee shakkuu hin qabne garaa qulqulluun ta'uusaa nan fudhadha," jedhan ministirri mummee UK wayita miseensoota mana maree biyyattiitti dubataniitti.

5. 3 Bitooteessa 2025Pirezidant Tiraamp michuu amanamaa miti-Hogganaa Libaraal Dimookiraat, UK

   

   Madda suuraa, Getty Images

   Hogganaan Paartii Libaraal Dimookiraat Siir Ed Deeviin, pirezidantiin Ameerikaa Doonaald Tiraamp ''kabaja Raashiyaa ilaalchisee michuu amanamaa miti''jedhe.

   "Wanti tokkichi hunda caalaa barbaachisaa ta'e, nagaa waaraa Awurooppaa fi Yukireen keessatti waan ta'eef wanti sanarraa duubatti na deebisu ykn xiyyeeffannoo koo sanarratti kaasuu hin jiru," jechuun deebii kenne ministirri mummichaa kun.

   Dhimma amanamummaa Ameerikaarratti Deeviin waliin irratti walii hin galle jedha.

   "Ameerikaa fi UK walitti dhufeenya cimaa qabu. Ittisa keenya, nageenyi keenya, basaasa keenya guutummaatti walitti hidhamee jira," jechuun itti fufan.

   "Yeroo akkanaa kanatti walitti dhufeenyi laafuu sun kamiyyuu nageenya, ittisa Awurooppaatiif karaa fuulduraa ta'a jedhanii yaaduun dogoggora guddaa ta'a," jedhan.

6. 3 Bitooteessa 2025Hogganaan Mirga Namoomaa UN kallattii ''jijjirrachuu'' Ameerikaa 'baay'ee yaadda'eera jedhe

   

   Madda suuraa, EPA

   Hogganaan Mirga Namoomaa Dhaabbata Biyyoota Gamtoomanii (UN) kallattii ''jijjirachuu'' Ameerikaa ilaalchisee'baay'ee yaadda'eera' jedhe.

   Komishinarri Mirga Namoomaa Dhaabbata Biyyoota Gamtoomanii, ''jijjiirama bu'uuraa'' kallattii Ameerikaa kan ''biyya keessaa fi idil-addunyaatti'' ''baay'ee yaaddoon'' qaba jedheeera.

   Volkar Tark, osoo maqaa Tiraamp hin kaasiin, ''odeeffannoon sobaa'' fi ''sodaachisoon'' gaazexeessitootaa fi qondaaltota mootummaa irratti raawwatamu ''hojii dhaabbilee gadi xiqqeessuu'' akka danda'u dubbatan.

   Yaadni hogganaa kanaa kunis kan kenname erga Ameerikaan marii nagaa Raashiyaa waliin taasiftu deebiftee eegaluudhaan michoota ishee ajaa'ibsiifattee torban muraasa boodadha. Marii nagaa kanarratti qaamni biraa affeeramee hin jiru.

   Akka gabaasa Rooyitarsitti, ''Waraana kana xumuruu ilaalchisee mariin taasifamu kamiyyuu lammiilee Yukireen hammachuu fi mirga namoomaa isaanii guutummaatti kabajuu qaba,'' jedhan Tark.

   Dhaabbanni oduu kun itti dabaluudhaan akka jedhutti, Tark dhaabbileen idil-addunyaa gara maddiitti gatamuusaanii, baajata akka hir'ifamuuf waamicha taasifamuutti ''ajaa'bamu'' dubbatanii, kanaanis ''eegumsa mirga namoomaaf duubatti deebi'iinsa olaanaadha'' jedhan.

7. 3 Bitooteessa 2025Addi waraanaa 'nutti hiyaachaa jira'- Ministira dhimma alaa Faransaay

   

   Madda suuraa, Getty Images

   Ministirri Dhimma Alaa Faransaay Jiin-Noo'ël Baaroot, 'Addi waraanaa' Yukireen caalaa Gamtaa Awurooppaatti dhihaachaa dhufuudhaan, carraan waraanni kun babal'achuu isaa dabalaa jira jedhan.

   Qondaalli kun turtii Raadiyoo Faransaay Intar waliin taasisaniin, balaan waraanni Awurooppaa keessatti ka'uu gonkumaa akkanaan ''hangas yaaddeessaa ta'ee hin beeku ture'' jedhan.

   Baaroot itti dabaluudhaan, walgahiin Dilbata darbe Landanitti gaggeeffame ''kutaa guutuu biyyoota Awurooppaatti kanneen dhugaa jiru hubachuu didaniif dammaqsituudha'' jedhan. Amma akka qondaalli kun jedhaniitti, ardiin kun ittisaafi nageenya mataasaa mirkaneessuu akka qabdu amananii jiru.

   Yeroo dhiyootti, mariin Pirezidantii Yukireen Volodyiirr Zeleniskii fi pirezidantii Ameerikaa Doonaald Tiraamp gidduutti taasifamu deebi'ee jalqabuu ''danda'a'' jechuun, ''fedhii impaayeraalistii'' dhaabuuf Yukireen, Ameerikaafi Awurooppaa gidduutti fedhii ''hubannoo waloo'' jiraachuu dubbata.

8. 3 Bitooteessa 2025Marii barbaaddu taanaan, nu haleeluu dhaabaa-Zeleniskii

   

   Madda suuraa, Getty Images

   Yoo dhugumatti marii nagaa barbaaddu ta’e balastik misaa’eliin namootarratti xiyyeeffattanii haleeluu dhaabaa jechuun Raashiaati hime Pirezidant Zeleniskiin. Pirezidanichi kana kan jedhan haleellaa Ykireen irratti Raashiyaan gaggeessite hordofeeti.

   Zeleniskiin akka jedhutti, torban darbe keessa “dirooniiwwan halaaleellaa gaggeessan 1,050, boombiiwwan 1,300 fi misaa’eloonni 20 ol” Karaakiiv dabalatee Yukireenitti dhukaafamaniiru.

   Zeleniskiin kana kan dubbate dubbii jajjaba Pirezidant Donaald Tiraamp fi ittiaanaa isaa JD Vaaans waliin Jimaata Waajira Ovaal keessatti ture dabalatee torban dippilomaasii muddamaa US fi Awurooppaa keessatti dabarsaniin boodadha.

   Afaan kessa wal bahu Waashiginten keessa tureef yeroo jalqabaatiif deebii kan kennite Raashiyaan “dandeetti dippilomaasii dhabuu” Zeleniskiidha jechuu” jette.

   Kana malees, “Qoqqoodamuu warra lixaa jalqabeera,” jette Raashiyaan.

9. 3 Bitooteessa 2025Raashiyaan yeroo kana dhandhamachaa jirti

   

   Madda suuraa, Reuters

   Yoo xiqqaate ifatti, Kiremlin taateewwan torban darban keessa raawwataman irratti shakkii tokko malee gammachuun itti dhagahamaa jira.

   Hariiroo Ameerikaa kan Pirezidanti Doonaald Tiraampiin eggalamuu gara Moskootti jijjiiramuu jalqabame irraa kan eegale yoo ta'u, Raashiyaan Jimaata darbe waan Waayit Haawusitti ta'e akka Volodymiir Zeleniskiin ummata duratti salphisuutti ilaaltu waliin sadarkaa haaraa irra ga'eera.

   Dubbi himaan Pirezidantii Puutiin Dimitirii Peeskov waa'ee biyyoonni lixaa adda qoqqodamuu dubbataniiru. Inni dogoggora hin qabu.

   Garuu hoggantoonni Awurooppaa bulchiinsi Tiraamp Yukireeniif wabii nageenyaa waloo irratti akka waliigalu amansiisuuf yaaluudhaan yaada bocuuf yaalaa jiru. Kunis, nageenyi taasifamu kamiyyuu haqa qabeessaa fi waaraa akka ta'u mirkaneessuu kan ilaalatuudha.

   Peeskov ammoo karoora biyyoonni Awurooppaa Kiiviif gargaarsa waraanaa kennuu itti fufuuf, humnoota Raashiyaa weerartuu mormuuf qaban qeeqaniiru.

   Akkaataa kamiinuu "waraana deggeruu" jechuun kan isaan ibse yoo ta'u, keessumaa yeroo walfakkaa amma waraanni Raashiyaan Yukireen irratti haleellaa geggeessuu itti fufuu cimsee kanatti akkasiin dubbachuu isaa yoo ilaalamu yaadni kun tuffii fakkaata.

10. 3 Bitooteessa 2025Hooliiwud akkuma badhaasni Oscar gaggeeffameen kirkirri lafaa mudate

    

    Madda suuraa, Getty Images

    Guyyaa badhaasni Oscar itti gaggeeffame Dilbata kaleessaa galgala ykn Bitooteessaa 2, 2025tti Hooliiwud kirkira lafaatiin rukutamuun ibsame.

    Jidduugalli kirkira lafaa kan tures bakka badhaasni Oskaar itti qophaa'ee kaaba Hooliiwud dhiheenya tiyaatira Doolbii akka ture ibsame.

    Haata'u malee, kirkirri lafaa reektar iskeelii 3.9 ta'uun galmaa'e kun badii qaqabsiise ilaalchisee kan jedhame omtuu hin jiru.

    Kirkirri lafaa kun kan mudates badhaasa Oscar hordofee qophii barruun Vaantii Feeyiir beekamaan qopheessuufi kan namoonni beekamoo hedduun waliitti qabamanii turanittidha.

    Yeroon kirkirri lafaa sun itti mudatees akka sa'aatii biyyaatti halkan keessaa naannoo sa'aatii afur jedhameera.

    Namoonni bakkicha turan humni tasaa akka isaanitti dhagahamee ture kan ibsan yoo ta'u, namoonni hedduun gamoowwan dheeroon yoo kirkiran argan iyyaa turan dubbatan.

    Qorannoon Ji'ooloojii Ameerikaa (AGS) kirkirri lafaa dhiheenya magaalaa Loos Anjalasiitti kiloomeetira baayyee haguuguun akka dhagahame gabaasa dhiyeesseera.

    Waajjiirri Ittisa Balaa Abiddaa Loos Anjalas hangi kirkira lafaa itti dhagahame Magaalaa Loos Anjalas kan dabalate ta'ulleen, waajirrichi garuu taatee ''kirkira lafaa'' mudateen yaaddoon natti hin dhagahamne jedheera.

    Qaamooleen yeroo kirkirri lafaa cimaan mudatuutti deebii jalqabaa kennaniifi aanga'oonni miidhaan caasaa gamoolee fi bu'uuraalee misoommaarra gahe yoo jiraateef qorannoo ni taassisu jedhameera.

    

    Madda suuraa, Getty Images

    Kirkirri lafaa kibba Kaaliifooriyaatti mudate kunis guyyoota keessatti yeroo 40ffaaf ta'u ibsameera.

    Kirkirri lafaa kanaan dura ture baayyeen riiktar iskeelii 1okko kan ture yoo ta'u, jiraattoonni hedduunis mudachusaatu hin dhageenye turan jedhameera.

    Baatii darbe keessaa Maliinu kan bulchiinsa Kaaliifoorniyaa keessatti argamtuutti kirkirri lafaa reektar isikeelii 3.7 mudatee ture.

    Baatiiwwan muraasaan dura ammoo kirkirri lafaa baayyee cimaa jedhame reekitar iskeeliin 7 kaaba Kaaliifoorniyaatti mutatee ture.

11. 3 Bitooteessa 2025'Waan ta’ee hin beekne' – hojjettoonni saalqunnamtii halkan guddaa Anooraan badhaasa Oscar guurraterratti deebii kennan

    

    Madda suuraa, Getty Images

    Badhaasa Oskaarii (Oscar) Dilbata gaggeeffameen fiilmiin Anooraa jedhamu badhaasa guurrateera. Fiilmiin Siin Baakeriin qindeeffame kun Mikii Maadisan kan akka dubartii qullaa buusuutti shubbistuutti taphatte, badhaasa taphattuu cimtuun moatteetti.

    Anooraan akaakuu ja'aaf badhaasa kanaaf kaadhimamee, shaniin mo'achuun ajaa'iba jedhameera.

    Dubartii umrii waggaa 25 Maadisan, gaheeshee akka gaaritti taphachuuf dubartoota warra jireenyisaanii qullaa shubbisuutti hojette. Isheenis badhaasa kanaan taatoo milkooftuu badhaafamte taateetti.

    Viidiyoo cidhaa hojjechuurraa hanga badhaasa 'Oscar' afur argachuurra kan gahe Siin Baaker, fiilmii tokkicha qofaarratti akaakuu afuruun badhaasa mo’achuu danda’eera.

    Waa'ee fiilmii kanaa ballinaan asirraa hubadhaa.

12. 3 Bitooteessa 2025Qoqqoodamuun biyyoota Lixaa eegalaa jira jette Raashiyaan

    

    Madda suuraa, Reuters

    Dubbii himaan Raashiyaa Dimitrii Peeskov ibsa gaazexeessitootaaf kennan irratti akka jedhanitti, hanga kaayyoon hundi galma ga'utti 'oppireeshiniin waraanaa' Yukireen keessaa ittuma fufa.

    Dhimma Yukireen waliin nagaa buusuu jedhuurratti ammatti ajandaan ''qindaa'ee'' dhihaate akka hin jirre ykn waanti sirnaan "jalqabame" hin jiru jedhan.

    Waa'ee qoqqoodinsa biyyoota lixaa guddachaa jiruu jedhanirratti yoo dubbatan ammoo akkas jedhan:

    Dubbi himaan Raashiyaa Dimitirii Peeskov itti dabaluudhaan, walgahii Yukireen kaleessa Landanitti gaggeeffame eeruudhaan: "Gareen biyyootaa amma jiranii dhaaba waraanaa kan ta'anidha... [biyyoonni sun] Yukireen waraana akka itti fuftuu kan barbaadanii fi kan waraanaaf dhiyeessii dhiyeessuun deeggaraa jiranidha."

    Ministirri Muummee UK Istaarmar Dilbata darbe misaa'ela ittisa qilleensaa 5,000 ol bitachuuf faayinaansii al-ergii UK Paawundii biiliyoona 1.6 ($2bn) dabalataan kan labsan yoo ta'u, kunis waraana Yukireeniif deeggarsa dabalataa gochuuf liqii Paawundii biiliyoona 2.2 kennuu kan dabaluudha.

13. 3 Bitooteessa 2025Waliigalteen dhukaasa dhaabuu Yukireeniifi Raashiyaa Awurooppaarraa 'wabii' barbaada

    

    Madda suuraa, EPA

    Waliigalteen dhukaasa dhaabuu Faransaayiin dhihaate Yukireeniifi Raashiyaan baatii tokkoof akka meeshaa lafa kaa’an gaafata.

    Kunis, guyyaa kaleessaa galgala Pirezidantii Faransaayiin ifa ta’eera.

    Koree dhimma alaa Faransaay irraa Eléonore Caroit waan jiru BBC Radio 4 sagantaa Today jedhamutti dubbataniiru

    Maakroon karoora isaanii keessatti ifa ta'uu kaasuudhaan, biyyoonni Awurooppaa baasii waraanasaanii guutuu ardii keessatti dabaluu akka qaban himani.

    Murteen siyaasaa lammaffaan ammoo yaada ''dhukaasa dhaabuu mootummoota lamaati'' kan jedhudha jedhan.

    "Yoo sun kabajame, innumti yeroo ji'a tokkootiin booda, erga Faransaayii fi UKn nageenyi mirkanneeffameen booda lola lafoo irratti ni raawwatama ture."

    Yaada karoora kanarratti UKn ganaa yaadashee hin kennine.

    Itti dabaluudhaanis, ''karoora gaarii'' akka ta'e akka itti fakkaatuufi ''yoo barbaanne waan tokko gochuu akka dandeenyu'' Awurooppaaf ''ergaa baayyee cimaa'' akka dabarsu dubbatan.

    "Kunis yaada dhiyeessuuf dandeettii akka qabnuu fi yaadonni kun gara ta'eetti geessuu akka danda'uu kan agarsiisuudha," jedhan.

    Akkasumas, qabeenyi Raashiyaa uggurame fayyadamuu akka danda'amuufi "gargaarsa Ameerikaa homaa osoo hin baasin bakka bu'uu akka danda'u" dubbatan.

14. 3 Bitooteessa 2025Yukireen Tiraamp waliin waliigaltee mallatteessuuf 'qophiidha' - Zeleeniskii

    

    Madda suuraa, Reuters

    Pirezidantiin Yukireen Voloodimiir Zeleeniskii waliigaltee albuudaa US waliin '‘mallatteessuuf qophii’’ ta’uu himan.

    Kun kan dhagahames erga gaafa Jimaataa Tiraamp waliin walitti dheekkaman boodadha.

    Tiraamp waliin waliigaluu dhabanis ammallee waliin '‘marii ijaaraa’’ taasisuuf fedha akka qaban dubbatan.

    '‘Ani ejjennoon Yukireen akka dhagahamuun barbaada,’’ jechuunis dubbatan.

    '‘Waraana kana keessatti eenyu akka weerara bane michoonni keenya akka hubatan barbaanna,’’ jechuun dabalan.

    Hariiroon US fi Yukireen kan rakkoo godhachuu eegale yeroo Ameerikaan dhimma Yukireen irratti Raashiyaa waliin marii eegaltedha.

    Waliigalteen albuudaa Ameerikaafi Yukreen walii mallatteessuu yaadan hariiroo nageenyaa biyyoota lameenii jabeessuuf yaadameeti.

    Haata’u malee, Zeleeniskiin wabii nageenyaa akka US biraa barbaadan ibsuun osoo wal hin galiin hafan.

    Tiraamp osoo US albuuda akka Litiyeemii qabduu Yukireenirraa maaliif barbaadan?

15. 3 Bitooteessa 2025Tiraamp hordoftoonni 'waa'ee Puutiin baayyee 'akka hin yaaddoofne' itti himan

    

    Madda suuraa, EPA

    Pirezidaantiin Ameerikaa Doonaald Tiraamp, kan walgahii Awurooppaa dhuma torbee kanaa irratti gaggeeffame irratti kan hin argamne, 'waa'ee Puutiin baayyee yaadda'uun'' akka hin barbaachiifne miidiyaa hawaasaa isaa Truth Social irratti akeekkachiisan.

    Yeroon baayyee, waltajjii miidiyaa hawaasaa isaarratti sa'aatii gara ganamaa kan barreessan, baayyee yaadda'uun kan qabaatamu "waa'ee gareewwan wanbadoota godaantoota guddeeddii raawwatan, kanneen qoricha sammuu hadoochu dadabarsan, ajjeestootaa fi namoota dhaabbilee sammuun dhukkubsatu irraa dhufuun biyyattii keessa seenan ta'u qabaa'' jedhan.

    Itti dabaluudhaanis, kun "akka biyyoota Awurooppaatti akka hin xumuramne" mirkaneessu qabna jedha.

    Yaadachiisa: Mariin Yukireen Dilbata darbe Landanitti geggeeffameeen, kan irra jiraan hoggantoonni Awurooppaa baay'inaan irratti hirmaatan, osoo waldhabdeen gaafa Jimaataa Zeleniskii fi Tiraamp jidduutti hin mudatiin dura kan qindaa'e ture.

16. 3 Bitooteessa 2025US hin galateeffanne kan jedhaman Zeleeniskiin 'tokkummaa' Awurooppaa faarsan

    

    Madda suuraa, Reuters

    Zeleniskiin akkuma UK bahaniin osoo hin turiin "Barbaachisummaa Ameerikaa ni hubanna, deeggarsa Ameerikaa irraa arganne hundaafis ni galateeffanna," jechuun toora X isaanii irratti barreessan.

    Kunis kan ta'e erga dubbii jajjaba walitti isaan buuse Zeleniskii fi pirezidantii Ameerikaa gidduutti Waajjira Ovaal keessatti taasifamee guyyoota muraasa booda yoo ta'u, Traampii fi itti aanaan isaanii, Zeleniskiin deeggarsa waraanaa fi siyaasaa Ameerikaan taasifteef galata gahaa akka hin qabne himan.

    Zelenskiin itti dabaluudhaan barreeffama isaarratti, ''guyyaan tokkoof illee'' yeroon Yukireen galata itti hin galchiine hin turre, jechuudhaan, kunis ''galata walabummaa keenya eeguuti'' jechuun ibsa.

    Akkasumas, gargaarsi michoota isaa idil-addunyaa irraa taasifamuuf "nageenya ofii isaaniitiifis" akka ta'e, kaasuun nagaa waaraadhaafis "wabii nageenyaa furtuu ta'uu"kaasan.

    Akkasumas Zeleniskiin waldhabdee isaaniifi Doonaald Tiraamp jidduutti mudateen booda 'tokkummaa, biyyoonni Awurooppaa biyyasaa gargaaruuf agarsiisaniif galateeffatan.

17. 3 Bitooteessa 2025Xiyyaarri hawaa dhuunfaa ji'arra qubatte

    

    Madda suuraa, Reuters

    Xiyyaarri hawaa dhuunfaa Ji'a irra qubachuudhaan xiyyaara hawaa dhuunfaa lammaffaa ergama kana raawwattee taate.

    Xiyyaarri Hawaa Blue Ghost jedhamtu erga dhaabbata Ameerikaa Firefly Aerospace jedhamuun Galaana Kiraayisis, qaama bishaanii dachee irraa argamu qorachuuf yaadamee erga furguggifamee booda, Guraandhala 15 dachee irraa kaate.

    Pirojektiin kun walta’iinsa dhiheenya kana dhaabbata hawaa Ameerikaa Naasaa fi dhaabbilee dhuunfaa jidduutti taasifamedha.

    Dhaabbanni biraa 'Intuitive Machines' jedhamu guyyoota muraasa dhufan keessatti xiyyaara hawaasaa Ateenaa jedhamtu gara naannoo poolii kibbaatiin Ji'aa irra qubachiisuuf abdataa jira.

    Dhaabbanni kunis dhaabbata dhuunfaa plaaneetii Ji'a irra qubachuu danda'eedha.

    Xiyyaarrii hawaa isaa 'Odeysseus' jedhamu bara darbe Guraandha 22 ture kan Ji'a irra qaqqabde.

    Haata'u malee, ergamni kun yeroo gabaabaaf kan ture yoo ta'u, xiyyaarittiin kun qarqara boolla bishaanii irratti waan qubatteef meeshaalee muraasni qubachuun cabuun kuftee jirti.

    Xiyyaarri 'Blue Ghost' ammoo torban lamaan darban keessa rakkoo tokko malee Ji'a irratti naanna'aa turte.

    Hojjettoonni waajjira muummee Firefly Teeksaasitti argamuus yeroo xiyyaarittiin haala milkaa'een qubatteetti gammachuu fi harka rukutuun gammachusaanii ibsaa turan.

    

    Madda suuraa, Reuters

18. 3 Bitooteessa 2025Israa'el ulaa deeggarsi Gaazaatti seenu hunda cufuu mootummoonni Arabaafi UN balaaleeffatan

    

    Madda suuraa, Reuters

    Biyyoonni Arabaa hedduun fi Dhaabbanni Biyyoota Gamtoomanii Israa’el gargaarsi namoomaa hundi gara Gaazaatti akka hin seenne dhorkuushee balaaleffatan.

    Masrii fi Kaataar tarkaanfiin Israa’el guyyaa Dilbataa fudhattee kun kan waliigaltee dhukaasa dhaabuu cabsedha yoo jedhan, hogganaan gargaarsa namoomaa Dhaabbata Biyyoota Gamtoomanii Toom Fileechar ammoo ''yaaddeessaadha'' jechuun ibsan.

    Ministirri Muummee Israa'el Beeniyaamin Netaaniyaahuun biyyi isaanii tarkaanfii kana kan fudhatte sababii Hamaas dhiyeessii hatuudhaan ''maashinii shororkeessummaa isaa maallaqaan gargaaruuf'' itti fayyadamaa jiruufiidha jedhan.

    Akkasumas, gareen Filisxeem kunneen dhukaasa dhaabuu Gaazaa Sambataa darbe guyyaansaa irra darbe dheereessuuf yaada Ameerikaan dheeressuuf dhiheessite didusaanii himan.

    Israa'el garuu yaada kana raggaasisuu himte.

    Dubbi himaan Hamaas uggura Israa'el kanaan ''maqaa balleessaa gatii rakasaa'' fi ''fonqolcha'' waliigaltee dhukaasa dhaabuu irratti raawwatamedha jedhan.

    Waliigalteen dhukaasa dhaabuu kunis lola ji’oota 15'f Hamaas fi waraana Israa’el gidduutti geggeeffamaa ture kan dhaabe yoo ta’u, booji'amtoota Israa'el 33 fi hidhamtoota Filisxeem gara 1,900 ta’aniif akka gadhiifaman taasiseera.

19. 3 Bitooteessa 2025Tiraamp Afaan Ingilizii afaan biyyaalessaa US taasisan

    

    Madda suuraa, Getty Images

    Pirezidant Doonaald Traamp Afaan Ingilizii afaan biyyaalessaa Ameerikaa taasisuuf ajaja hojii raawwachiiftuu mallatteessan.

    Ejansiiwwan mootummaa fi dhaabbileen maallaqa federaalaa kanneen fandii federaalaa argatan, sanadootaa fi tajaajila afaanota Ingiliffaatiin ala ta'een dhiyeessuu fi dhiisuu isaanii filachuu danda'u jechuudha.

    Imaammata qaamoleen akkasii kunneen namoota Afaan Ingilizii hin beekneef gargaarsa afaanii akka kennan gaafatu kan pirezidantiin duraanii Biil Kiliintaniin bara 2000tti mallatteeffame haqa.

    "Afaan Ingilizii akka afaan hojiitti raggaasisuun kominikeeshinii sirreessuu qofaaf osoo hin taane, duudhaawwan biyyaalessaa waliin qabnu cimsuu, hawaasa walitti hidhame fi hawaasa gahumsa qabu ni uuma," jedha ajajni kun.

    Kunis erga biyyattiin waggoota 250 dura hundeeffamtee as US yeroo jalqabaatiif sadarkaa federaalaatti afaan biyyaalessaa kan moggaafte.

    Ajaja kana keessatti ejensiiwwan duraan gargaarsa akkasii kennan kamiyyuu jijjiiruu, haquu ykn dhiyeessuun akka hin barbaachifne hubatameera.

    "Lammiilee Ameerikaa haaraa simachuu keessatti imaammanni afaan biyyaalessaa keenyaa akka barataniifi fudhataman jajjabeessuudhaan Ameerikaa mana waliinii akka taatu gochuufi lammiilee haaraa abjuu Ameerikaa galmaan ga'uuf humna kan kennu ta'a," jedha ajajni kun.

    "Afaan Ingilizii dubbachuun balbala dinagdee banuu qofa osoo hin taane, namoonni haaraa dhufan hawaasa isaanii keessatti akka bobba'an, duudhaa biyyaalessaa irratti akka hirmaatan, deebisanii hawaasa keenyaaf akka kennan gargaara."

    Akkasumas "duudhaa baroota dheeraa lammiilee Ameerikaa afaanota hedduu dubbatan kanneen Afaan Ingiliffaa baratanii dhaloota dhufuufi ijoollee isaaniif dabarsan" kabaja jedha.

    Jiraattota biyyattii miliyoona 340 ta'an keessaa kan gara miliyoona 68 ta'an Afaan Ingiliziin alatti afaan biraa akka dubbatan Biiroon Lakkoofsa Ummataa Ameerikaa ibseera.

    Kunis afaanota dhalattoota Ameerikaa 160 ol kan hammatudha.

    Afaan Ispaanish, afaanota Chaayinaa adda addaa fi Afaan Arabaa Afaan Ingiliffaa itti aanuun afaanota baay'inaan dubbataman keessaa ta'uu Biiroon Lakkoofsa Ummataa beeksiseera.

    Rippablikaanonni kanaan dura Afaan Ingilizii akka afaan hojii US ta'ee akka raggaasifamuuf yaalanii kan turan yoo ta'u, bara 2021tti miseensota mana maree seera baasaniin hin milkaa'iin hafe.

20. 3 Bitooteessa 2025Ashamaa!

    Tamsaasni kallattii BBC Afaan Oromoo eegaleera.

    Oduu biyya keessaafi alaa ijoo ta'an jala jalaan gurra isin buufna.

    BBC Afaan Oromoo Chaanaalii WhatsApp akkasumas Facebook irratti hordofaa.

    Tamsaasa kallattii duraanii dhibdee Tiraamp fi Zeleeniskii akkasumas kaan asii argattu.

    Lafa nagaa oolaa!