Loltoonni Sooriyaa lammiilee nagaa 745 ajjeesuun himataman

Haguuggii Tamsaasa Kallattii

1. 7 Bitooteessa 2025Leenjiisaan garee biyyaleessa Gaaboon ijoollee dhiiraa gudeeduun himatame umurii guutuu dhorkaan irra kaa'ame

   

   Madda suuraa, Getty Images

   Fifaan leenjisaan dargaggoota Gaaboon duraanii taphattoota irratti miidhaa saalaa raawwachuun yakkamaa ta'ee argame, umuriisaa guutuu dhorkaa irra kaa'uun murteessuun isaa ''tarkaanfii jalqabaa gaarii'' ta'ulleen ''yakkamtoonni hedduun jiru'' jechuun qondaalli Waldaa Taphattoota Addunyaa (Fifpro)n BBCtti himaniiru.

   Kibxata darbe Fifaan waggoota kurnaniif leenjisaa olaanaa gareewwan dargaggoota biyyoolessaa Gaaboon kan turan Paatriik Assoumou Eyi yeroo aangoorra turan hundatti ijoollee dhiiraa xixiqqoo hedduurratti miidhaa saalaa raawwachuu isaa murtee dabarse.

   Sarbama mirgaa kubbaa miilaa Gaaboon keessatti babal'ate ilaalchisuun, gabaasa qorannoo BBC Africa Eye bara 2023 taasisee irratti maqaan Eyii ka'ee ture.

   Qorannoo gaggeeffameen, namni lammii Gaaboon duraanii gareewwan dargaggoota Gaaboon eenyu akka taphatu murteessuuf aangoo waan qabuuf ''aangoo waaqaa'' qaba jedheera.

   Eyii kan maqaa Kaapeloo jedhamuun beekaman, ''namoota adabaman keessaa tokkoo yoo ta'an'' garuu ''yekkamtoota biraa hedduutu'' kubbaa miilaa Gaaboon keessa jira jechuun ture gorsaan seeraa Fifpron sagantaa BBC D]Focus On Africa'tti kan himan.

   ''Tarkaaniif gaariidha, garuu kun tarkaanfii jalqabaa qofadha'' jedhan Obbo Alvees.

   Eyiin himannaa guddeeddii, fi humna dargaggoota taphattootaa saamuu ilaalchisuun erga jalqab gaazexaa Gaariyaan UKtiin gabaafameen booda bara 2021tti amananii ture.

   Koreen naamusa walaba Fifa booda keessa Eyii qorachuu eegale.

   Kanaanis umurii guutuudhaaf leenjisummaarraa dhorkamuun alattis Eyii firaankaa Siwiis miliyoona tokko (dolaara miiliyoona 1.1) adabameera. Yeroo ammaa kanattis mana hidhaa keessatti argamu.

2. 7 Bitooteessa 2025Yukireen waan filannoo hin qabneef waliigalu barbaadu- Tiraamp

   

   Madda suuraa, Getty Images

   Doonaald Tiraamp marii waraana Yukireen xumuruuf kaayyeffate irratti yaada isaanii qoodaniiru.

   "Ukireen filannoo waan hin qabneef waliigaltee gochuu barbaaddi jedheen yaada," jechuun Waajjira Ovaal keessatti gaazexeessitootatti hima.

   "Akkasumas Raashiyaanis waliigaltee gochuu barbaaddi jedheen yaada, sababiin isaas karaa adda ta'een, karaa adda ta'e kan ani qofti beekuun, isaanis filannoo hin qaban."

   Akkuma kaleessa gabaasnetti amma jilli Ameerikaa qondaaltota Yukireen Saawudii Arabiyaa keessa jiran waliin wal arguuf karoorfateera.

   Akkasumas, pirezidantiin Ameerikaa Vilaadmiir Puutiin waliinis wal arguuf biyyattii daawwachuu fi dhiisuu isaanii gaafatamanii ture.

   "Hin beeku, sitti himuu hin danda'u," jechuun deebii kennuun, osoo itti dabaluu isaa dura: "Gara Sa'udii Arabiyaan nan deema," jedhan.

3. 7 Bitooteessa 2025Zeleniskiin mariin US waliin taasisuuf jiran 'milkaa'aa' akka ta'u abdachuu ibsan

   

   Madda suuraa, EPA-EFE/REX/Shutterstock

   Pirezidantiin Yukreen Volodmiir Zeleniskiin biyyisaanii marii torban dhufaatti Ameerikaa waliin Saawud Arabiyaatti taasisuuf karoorfatte ''kan hiikaa qabu'' akka ta'u abdii qabaachu ibsan.

   Pirezidantichi Saawudi Arabiyaatti argaman illeen maricha irratti kan hirmaannee yoo ta'u, biyyisaanii nagaa ''waaraafii atatamaa'' fiduudhaaf hojjataa jirti jedhan.

   Ergamaan addaa pirezidantii Ameerikaa Istiivan Wiitikoof gamasaanitiin jilli Ameerikaa sagantaa hojimaataa waraanaa Raashiyaafi Yukireenif furmaata nagaa argamsiisuuf irratti mari'achuu barbaada jedhan.

   Torban darbe keessa dursaan Yukireen Zeleniskiifi oirezidantiin Ameerikaa Tiraam Waayit Hawuusitti marii taasisan irratti walitti bu'iinsi umamee gara afaan walitti darbuutti ce'unsaa ni yaadatama.

   Yeroo sanattis Tiraamp gitaaanii Zeleniskiin waraanicha dhaabuudhaaf qophaa'aa miti jechuun himatanii ture.

   Rakkoo dippilomaasii dureewwan lamaan jidduutti mudate hordofunis Ameerikaan deeggarsa waraanaa kanan dura Yukireeniif taasisaa turte akkasumas jijjirraa odeeffannoo tikaa dhaabuu beeksiifte.

   Zeleniskiinis mariichi gara haala sanaatti ce'unsaa akka isana gaddisiisee ibsanii, Ameerikaa kan biyyasaanitiif meedhaa waraanaa hedduu dhiyeessaa turte waliin walitti dhufeenysaanii deebiisanii sirreeffachuuf yaalaa jiru.

   Guyyaa kamisaa xalayaan ''dhiifamaa'' akkasumas ''galateeffammaa'' Zeleniskii irraa Tiraamp akka qaqabe Wiitikoof dubbataniiru.

4. 7 Bitooteessa 2025'Yoo hin kaafallan ta'e isaanirraa hin ittisnu'- Tiraamp yeroo NATOf deebii kennan

   

   Madda suuraa, Reuters

   Yaada dabalataa Doonaald Tiraamp waajjirasaaniirraa kennan isiniif qabanneerra.

   Pirezidantiin Faransaay Maakroon biyyisaanii michootashee Awurooppaarratti tika niwukilaraashee dheeressuu dandeessi jechuu irratti kan gaafataman Tiraamp, kanarra, "niwukilaraarraa bilisa gochuu" akka deggeran deebii kennan.

   "Guyyoota muraasa darban keessa Yukireen waliin haala gaariirra geenyeerra, Raashiyaa waliinis fooyyee guddaa agarsiifneerra, waa'ee niwukilaraa akkasitti akka hin dubbanneef sana xumura itti gochuun gaarii ta'a," jedha.

   Akkasumas, pirezidantiin Ameerikaa Doonaald Tiraamp yeroo US deeggarsa NATOf taasiftu dhaabuu dandeessii laata jechuun gaafatamaniitti, michoonnisaanii Awurooppaa baasii ittisaa cimsuu akka qaban ejjennoo isaanii irra deebi'anii kan ibsan.

   "Kun waan sirrii beekamaadha, yoo isaan hin kaffalle ani isaanirraa hin ittisuuf," jedha.

   Akkasumas, Traamp akkasumas waa'ee oduu yeroof lammiilee Yukireen 240,000 ta'an kanneen gara UStti baqatan haqamuu mala jedhurratti gaaffii gaafatamaniin, "sana ilaalaa jirra" jedhu.

   Itti dabaluunis: "Isaan miidhuuf hin barbaannu, keessumaa lammiilee Yukireen waan baay'ee keessa darbaniiru," jedhan.

5. 7 Bitooteessa 2025Tamsaasa kallattiitti deebiineera!

   Ashamaa hordooftoonni BBC Afaan Oromoo bakka jirtan maratti.

   Tamsaasni kallattii guyyaa Jimaata har'aa kunoo amm eegale.

   Odeessa biyya keessaafi alaa jala jalaan isin biraan geenya.

   Chaanaalii WhatsApp akkasumas Facebook gubbaa nu hordofaa.

   Oolmaa nagaa qabaadhaa.

6. 6 Bitooteessa 2025Senaatarri Naajeeriyaa miidhaan saal-qunnamtii irra gahuu himatte hojiirraa dhorkamte

   

   Madda suuraa, Naational Assembly

   Naajeeriyaatti Senaatarri pirezidantiin Seneetii miidhaa narraan geessiseera jechuun himatte, iyyata galchitee guyyaa tokkoon booda ji'a ja'aaf hojiirraa dhorkamte.

   Jimaata darbe Nataashaa Akpotii Udughaan namoota siyaasaa biyyattii ol aanoo keessaa tokko ta'e Goodiswil irratti himannaa dhiyeeffatte.

   Koreen naamusaa erga iyyatasheen galfatte fudhatama dhabsiiseen booda dubartiin kun waan fokkuu gara chaambarii kana fidde jechuun akka hojiirraa dhorkamtuufis yaada diyeesse.

   Senaateroonni tokko tokko hojiirraa dhorkamuun ishee kun akka ji'a sadiitti gadi siquuf gaafatanis garuu garri caalan akka ji'a ja'a ta'uuf sagalee caalmaan murteessan.

7. 6 Bitooteessa 2025Yeroof dhukaasa dhaabuun 'fudhatama hin qabu'- Raashiyaa

   

   Madda suuraa, Reuters

   Yaada loltoonni Awurooppaa nagaa eegsisan Yukireenitti akka bobbafamaniifi ji'a tokkoof dhukaasa dhaabuu dhiyaate Raashiyaan 'fudhatama hin qabu' jechuun karaa dubbi-himtuu ministeera dhimma alaashee beeksifte.

   Maariyaa Zaakharoovaa rippoorterotatti akka dubbatetti, Kireemiliin yaada yeroof dhukaasa dhaabuu jedhu hin fudhattu jette.

   "Furmaata dhumaarratti waiigaltee cimaa barbaachisa," jette dubbi-himtuun kun.

   Kanaan ala, gidduutti boqochuu kan jedhu kamiyyu "fudhatama hinqabu", jette itti dabaluun

8. 6 Bitooteessa 2025Deenmaark kana booda tajaajilli poostaa hin barbaachisu jechuun cufte

   

   Madda suuraa, Getty Images

   Tajaajilli Poostaa Deenmaark xalayaa erguu guutummaan akka dhaabu beeksise. Dhuma bara 2025tti guutummaan hojii akka dhaabus ibse.

   Sababni ammoo namoonni xalayaa erguu dhiisuu isaanitti.

   Biyyattiitti dhaabbanni tajaajila poostaa kennu PostNord kan jedhamu yoo ta'u, waggaa 400 darbaniif poostaa ergaa turuura jedhama.

   Jaarraa afur booda yeroo jalqabaaf biyyattiin xalayaa karaa poostaa ergamu dhaabuuf murteessitee jirti.

   Ji'a Waxabajjii dhufurraa kaasee sanduuqiwwan poostaa bakka garaa garaa jiran 1,5000 kaafamuuf jiru.

   Deenmaark qofa osoo hin taane biyyoota Awurrooppaa kaanittis namoonni poostaa fayyadaman baay'ee xiqqaachaa dhufaniiru.

   Tajaajilli Poostaa Jarman gamasaan hojiiwwan 8,000 ta'an akka cufu beeksise. Tajaajilli Poostaa Deenmaark cufauuf jedhu kun ammoo hojjattoota 187,000 qaba.

   Deenmaark biyyoota addunyaarraa hojiiwwan heddu karaa dijitaalaa raawwatan keessaa adda dureedha. Kuni ammoo tajaajilliwwan dur karaa mana poostaa kennaman gara elektirooniksiitti jijjiiramuun tajaajila poostaa gatii dhabsiisera.

   Deenmaarkitti tajaajilli poostaa bara 1624tti eegale.

9. 6 Bitooteessa 2025Kooriyaan Kibbaa dogoggoraan xayyaaran lammiileedhumashee haleelte

   

   Madda suuraa, Reuters

   Humni Qilleensaa Kooriyaa Kibbaa shaakalarra osoo jiruu dogoggoraan lammiilee nagaa haleele.

   Xayyaaronni waraanaa Kooriyaa Kibbaa lama osoo shaakalarra jiranuu boombii saddeet bakka jireenyaa namoota nagaarratti darbachuun namoonni 15 miidhamuu qondaalonni biyyattii beeksisan.

   Bakki haleellan itti gaggeeffame magaala Poocheyoon jedhamtu keessatti yoo ta'u, daangaa Kooriyaa Kaabaatti dhiyaattee argamti.

   Humni Qilleensaa Kooriyaa Kibbaa taatee mudatetti gaabbun dhiifama gaafateera. Miidhaa qaqqabeefis beenyaa akka kaffalu beeksisuun rakkoo mudate qorachuufis waadaa galeera.

   "Xayyaaronni waraanaa KF-16 keenya boombiwwan MK-82 saddeet bakka shaakalaaf qophaa'en alatti buusaniiru," Paayileetota lamaan keessaa tokko qiyyaafannaa dogoggoraa taasiseen miidhan qaqqabuus humni qilleensa biyyattii beeksise.

   Haleellaa kanaan Waldaan Kiristaanaa tokkorra miidhan yoo gahu, manneen jireenyas miidhan irra gaheera.

10. 6 Bitooteessa 2025'Awurooppaan yeroo darberraa hin bartne' jechuun Raashiyaan EU'f deebii kennite

    

    Madda suuraa, Reuters

    Raashiyaan EUn waan yeroo darbeerraa hin baranne jechuun deebii kennite.

    Dubbi- himtuun ministira dhimma alaa Raashiyaa yaadni loltoota Awurooppaa nagaa eegisisan gara Yukireenitti erguu jedhuufi waraana dhaabuu ji'a tokkoof akka turu yaadame waraanicha daran hammeessa jechuun akeekkachiifte.

    "Walitti bu'insi kun akkaataa hambisuun hin danda'amneen humna haaraatiin deebiyee jalqaba... kun ammoo gonkumaa fudhatama kan hin qabnedha," jette Maariyaa Zakaahaaroovaa.

    Yaadni humna EU nagaa eegsisu Yukireenitti erguu gaggeessitoonni Awurooppaa "seenaasaanii darberraa" akka hin baratiin agarsiisa jette.

    Zakahaaroovaa itti dabaluun, hojiirra kan oolu taanaan humni Awurooppaa nagaa eegisisu mootummaa Kiiv "dhiphachaa" jiru akka dandamatu taasisa jette.

11. 6 Bitooteessa 2025'Humna ittisaarratti caalaa invast gochuu qabna'- Itti aantuu Komishinii Awurooppaa

    

    Madda suuraa, Reuters

    Kora Gamtaa Awurooppaa (EU) har'a gaggeeffamu kanarratti dhimmi Yukireen isa guddaa ta'ullee, ministira muummee duraanii Estooniyaa fi pirezidantii itti-aantuu Komishinii Awurooppaa Kajaa Kallaasis akkuma kana guyyaa murteessaadha.

    Gaggeessitoonni EU kan Raashiyaa waliin wal daangessitu Estooniyaan nageenyashee cimsachuuf maal gochuu akka qabduufi dhimma Yukireen irratti waliigalteerra gahuudhaaf ni mari'atu.

    Gaazexeessitootaaf ibsa yeroo kennitutti akkas jette Kaallas, humna ittisaa Estooniyaa maallaqaan deeggaruu ilaalchisee "filannoowwan hunduu minjaalarra jiru."

    "Humna ittisaarratti caalaa invast gochuu qabna," jette.

    Yukireen ilaalchisuun ammoo, ciminni Awurooppaa fi humni dinagdee Awurooppaa xiqqeeffamee ilaalamuu hin qabu jechuun dubbatte.

12. 6 Bitooteessa 2025Korri EU nageenya ardichaatiif ‘yeroo baayyee murtessaadha’ – Aangaaa EU

    

    Madda suuraa, European Council

    Pirezidntiin Mana-maree Awurooppaa Antooniyoo Kostaa pirezidant Zeleniskiifi Ursulaa der Leyen cinaa dhaabachuun har’a nageenya Awurooppaa akka cimu gochuuf “yeroo baayyee barbaachisaa ta’edha” jedhan.

    Aanga’aan EU kun walga’ii kanan dura ji’a amma dura ture kan “yaada wal jijjiiruurratti” fuulleffate kaasuun, har’a ammoo tarkaanfii akka fudhataniifi waan jedhame raawwatan”, ta’e jedhan.

13. 6 Bitooteessa 2025Zeleniskiin deeggarsa ‘cimaa argateef’ EU galateeffate

    

    Madda suuraa, Reuters

    Pirezidantiin Yukireen Volodmiir Zeleniskiin kora hooggatoota Awurooppaa waliin qabuuf haleellaa misaa’elaa Raashiyaan qe’ee dhalootasaaatti gaggeessiteen namoonni afur ajjeefamuu isaaniitiin muraasa booda Biraasals qaqqabeera.

    Zeleniskiin deeggarsa isaan taasisaniif akkas jechuun galateeffate: “Yeroo kana hunda keessa, akkasumallee torban dabre, nu waliin turtan.”

    Korri Biraasals kun deeggarsa Yukireeniif taasifamu cimsuurratti kan fuulleffate yoo ta’u, korri kun US deeggarsa waraanaa Yukireeniif taasiftu addaan kuttee guyyaa muraasa booda kan gaggeeffamudha.

14. 6 Bitooteessa 2025Akkam jirtu? Tamsaasa kallattiin deebineerra.

    Akkam jirtu? Tamsaasa kallattiin deebineerra. Pireziantiin Yukireen Volodmiir Zeleniskiin kora Gamtaa Awurooppaa (EU) deeggarsa biyyasaaf cimsuurratti fuulleefata jedhameerratti aragame.

    Kanaafi odeessaalee Baha Giddu-galeessaa, Ameerikaa, Chaayinaafi kaan kallattiin isiniif dhiyeessuu jalqabneerra.

    Dhiyaadhaa!

15. 5 Bitooteessa 2025Dooniin waraana Raashiyaa qarqara bishaan Biriitishitti mul'atte

    

    Madda suuraa, Royal Navy

    Rooyaal Naaviin [Humna Galanaa] UK doonii waraanaa Raashiyaa Bo'oo Ingiliziifi Norz Sii keessatti guyyoota sadiif arguu hime.

    Dooniin waraanaa maqaan ishee Boikiy jedhamtu doonii kaargoo Sooriyaarraa gara Raashiyaatti deebiyu wara 'ajabu' kessaa turte.

    Xiyyaarri naannoo caqasuufi humnoonni NATO opereeshinii hordoffii doonii kanaarratti tumsa taasisaniiru, jedhe Humni Galaaaa UK kun.

    Boikiy dooniiwwan Raashiyaa baayyee ji'oota dhiyoo keessa qarqara galaanaa Biriitish keessatti argaman keessaa tokkodha.

    Oppereeshiniin kun erga Humni Galaanaa dooniiwwan daldaltootaa Sooriyaarraa gara ulaa Galaanaa Baaltik Raashiyaatti imalan dabaltee dooniiwwan shan hordofee adda baafateen torban lama booda.

16. 5 Bitooteessa 2025Erga waraanni Yukireen jalqabee lakkoofsi Raashiyaanota du'aniifi madaa'anii meeqa gahe?

    

    Madda suuraa, Reuters

    Akka Ministirri Ittisaa UK jedhutti, Raashiyaatti lakkoofsi namoota du'aniifi madaa'anii hir'acha ajira.

    • Erga barri 2025 seenee Raashiyaan keessatti lakkoofsi namoota miidhamanii (du'aniifi madaa'anii) tilmaamaan 90,000 akka ta'u hima Ministirri Ittisaa UK. Kun ammoo erga waraanni kun jalqabee waliigala lakkoofsa Raashiyaanota miidhamanii gara kuma 875,000tti guddiseera.
    • Guraandhalaa keessa, waliigalatti baayyinni miidhaa gama Raashiyaa 35,140 akka ta'e gabaafameera. Kun ammoo kan baatii Amajjii keessa tureerraa 13,000n gadi bu'eera.

    Ministtiri Raayyaa Ittisaa UK akka jedhutti, hir'inni du'a saffisaa namootaa galmaa'e kunis, "saffisa oppareshinii fi haleellaan Raashiyaa hir'achuu kan calaqqisiisuu ta'uu hin oolu".

    Hanga ji'a kanaattis guyyaatti giddu galeessaan Raashiyaa jalaa namoonni 1,000 ol du'uu akka itti fufu tilmaama.

17. 5 Bitooteessa 2025'US odeeffanoo tikaa Yukireen waliin waliif qooduu dhaabde'

    

    Madda suuraa, Reuters

    Gorsaan Nageenya Biyyaalessaa Ameerikaa, Maayik Waaltz akka jedhanitti, US Yukireen waliin odeeffannoo tikaa Yukireen waliin waliif qooduurratti ''tarkaanfii tokko duubatti deebiteetti.''

    Tarkaanfiin kun gargaarsa waraanaadhaauutti dabalataan kan fudhatamedha.

    Waaltz ibsa gaazexeessitootaaf kennaniin, Ameerikaan ''hariiroo kana gama hundaan dhaabbattee gamaaggamaa jirti'' jedhan.

    Akkasumas, gita isaa Yukireen waliin bilbilaan akka dubbates himeera.

    Waaltz akka jedhutti, waa'ee bakkaa fi qabiyyee marii marsaa itti aanuurratti "haasawa gaarii" waliin taasisaniiru.

    Sochiin ''tartiiba baayyee gabaabaa'' ta'een ni jiraata jedhan.

    Haaluma walfakkaatunis hogganaan Ejensii Basaasaa Giddugaleessaa Ameerikaa (CIA) Ameerikaan gargaarsa waraanaa dhaabuu bira darbee, Yukireen waliin odeeffannoo basaasaa qooduu addaan kutuushee mirkaneessuuf mul'atan.

    Gaazexeessituun Fox News Maariyaa Baartiromo US odeeffannoo basaasaa qooduun akka dhaabde akka mirkanneessuuf aafate.

    Joon Raatkiliif akka jedhanitti, Pirezidanti Tiraamp "Pireezidant Zeleniskiin adeemsa nagaa kanaaf kutannoo qabaachuufi dhiisuu isaanii gaaffii dhugaa qabu. Akkasumas 'dhaabnee waa'ee sanaa akka yaaddaniif carraa isiniif kennuu barbaada' jedhan."

18. 5 Bitooteessa 2025Barataan dubartoota of walaalchisee viidiyoo waraabaa yeroo to'atamutti

    Barataan dubartoota kudhan qoricha sammuu adoochuun of walaalchisee osoo waliin saal-qunamtii raawwatuu viidiyoo waraabe yakkamaa hamaa jedhameera.

    Poolisiin yeroo yakkamaa kana to'atutti viidioo waraabame kana daawwadhaa.

19. 5 Bitooteessa 2025Chaayinaan US waliin 'waraana gosa kamiifuu' qophii ta'uu beeksifte

    

    Madda suuraa, Reuters

    Chaayinaan qaraxa daldalaa pirezidaant Doonaald Tiraamp dabalaa dhuferratti erga deebii kennitee booda waraana ''gosa kamiyyuu'' Ameerikaa waliin wal loluudhaaf qophii ta'uushee akeekkachiifteetti.

    Tiraamp meeshaalee Chaayinaa hundarratti qaraxa erga dabalanii booda biyyoota dinagdeen olaanaa addunyaa lamaan jidduutti waraana daldalaa walirratti banuutti dhihaataniiru.

    Chaayinaan battalumatti haaloo ba’uuf jecha omisha qonnaa Ameerikaa irratti qaraxa %10-15 ta'u kaa’uunshee ni yaadatama.

    Imbaasiin Chaayinaa Waashingitanitti argamu barreeffama X irratti maxxanseen, "US kan barbaadduu waraana yoo ta'e, waraana qaraxaas haa ta'uu, waraana daldalaa ykn gosa waraanaa kamiyyuu yoo ta'e, hanga dhumaatti loluudhaaf qophiidha" jedheera.

    Kunis erga Tiraamp pirezidaantii ta’anii kaasee hanga ammaatti Chaayinaarraa jechi cimaan dubbatame keessaa muraasa yoo ta’u, kunis yeroo hoggantoonni olaanoon Kongiresii Ummata Biyyaalessaa waggaa gaggeeffamurratti Beejiingitti walitti qabamanitti kan dhufedha.

    Kibxata darbe Ministirri Muummee Chaayinaa Lii Qi'aang, Chaayinaan bara kana ammas baasii ittisaashee %7.2 akka guddiftu kan beeksisan yoo ta'u, ''jijjiiramni jaarraa tokko keessatti hin mul'anne guutuu addunyaatti saffisaan mul'achaa jiras'' jechuun akeekkachiisaniiru.

    Daballi kunis kan eegamu yoo ta’u, lakkoofsa bara darbe ifoome waliin kan walsimudha.

    Hoggantoonni Beejiing yaaddoo waraana daldalaa keessattilleen dinagdeen biyyattii guddachuu akka danda'u ofitti amanamummaa akka qaban lammiilee Chaayinaa keessa jiraniif ergaa dabarsuuf yaalaa jiru.

    Chaayinaan faallaa Ameerikaan kan waraana Baha Giddugaleessaafi Yukireen keessatti hirmaattee jirti jettee himattutiin, Beejiing haala ta’een fakkii biyya tasgabbooftuu, nagaa qabeettii ta'u agarsiisuuf fedhii guddaa qabdi turte.

    Chaayinaan gocha Tiraamp michoota Ameerikaa kanneen akka Kaanaadaafi Meeksikoo kan qaranni midhee waliin walqabatee raawwate irraas fayyadamuu dandeessi.

    Haata'u malee, michoota addunyaa haaraa ta’uu danda’an sodaachisuuf jecha dubbii kana garmalee ol kaasuu hin barbaaddu.

20. 5 Bitooteessa 2025Barataan dubartoota 10 waliin saal-qunnamtii raawwachaa viidiyoo waraabe, gudeeduun yakkamaa ta’e

    

    Barataan PHD kan ta'eefi dubartoota 10 qorichaan of wallaalichisee saal-qunnamtii waliin raawwachaa viidiyoo kan waraabe badii gudeeduun yakkamaa ta’e.

    Barataan lammii Chaayinaa maqaansaa Zhenhao Zou jedhamuufi umuriinsaa waggaa 28 ta'e kun, dubartootaanni inni qoricha kenneen of wallaachisee waliin saal-qunnamtii raawwate keessaa sagal viidiyoo waraabaa ture.

    Dubartoonni inni yakka irratti raawwate keessaa lama adda kan baafaman yoo ta'u, kanneen hafan saddet ammoo barbaadamaa jiraachuu manni-murtii Inner London Crown Court dhaga'eera.

    Viidiyoo dubartoota saglan kanaa "yaadannoof" akka waraabeefi qabeenya dubartootaa ammoo saanduuqa tokko keessa kaawwachuusaa abbootiin seeraa dhaga'aniiru.

    UK Keessatti barachaa kan jiru Zou, yakka qullaa namoota biroofi yeroo isaan saal-qunnamtii raawwatan ilaaluun miira of gammachiisuun, viidiyoowwan saal-qunnamtii akka malee gadhiisii ta'an (extreme pornographic) ta'an qabachuun, akkasumas sobaan hidhamaa of fakkeessuun yakkamaa ta'eera.

    Zou Yunivarsiitii Kollejjii Landan keessatti barataa ture.

    Abbootiin seeraa ammas qoricha nama adoochan dubartoota ittiin of wallaalchisee gudeeduuf qabatee jira kan jedhu himannaa biraa irratti banaa jiru.

    ‘Gudeeduu akka gahee tapchauutti’ ['Rape role play']

    Gudeeddii inni raawwate keessaa torba yeroo weerara dhibee kooviid Chaayinaa keessatti ture.

    Ragaan miidhaa kana ilaalchisee dhiyaate ammoo viidiyoowwan inni dubartoota of wallaalan waliin osoo saal-qunnamii raawwataa waraabe abbootiin seeraa ilaalanidha. Poolisiin dubatoota kanneen adda hin baafanne.

    Gochi gudeeddii kana keessaa afur Landan keessatti raawwataman. Dubartoonni lama adda baafamanii ragaa kan kennan yoo ta’u, gudeeddiin biroo lama ammoo dubartiidhuma tokkorratti raawwatame, garuu eessa akka jirtu bira hin ga’amne.

    Barataan yakkamaa ta’e kun dubartoota kannene keessaa tokko waliin saal-qunnamtii akkamii akka filatturratti waliin dubbanneerra jechuun abootii seeraatti himeera. Isheenis “gahee tapachuu yuniifoormii” akka jaallattu itti himuus dubbateera.

    “Addatti gahee taphachuu gosa ani jaalladhu gahee gudeeduu taphachuu ilaalchisuun waliin mariyanneerra,” jedhe.

    Viidiyoo waraabuun kunis kan raawwatameef sababii kanaan jechuun mana-murtiirratti dubbate Zou.