'Mootii Ayyaanaa': Sirboota yeroo Ayyaana Masqalaa sirbaman

Ayyaanni Masqalaa ayyaanota birraa keessa bakkeewwan Itoophiyaa garagaraatti sirna baay'ee ho'aan kabajaman keessaa tokko.

Ayyaanni hordoftoota amantaa Kiristaanaa biratti haala adda ta'en kabajamu kuni sadarkaa addunyaatti galmee hambaa Dhaabbata Biyyoota Gamtoomanii (UNESCO) jalattis galmaa’eera.

Birraan abdiidha, yerootti keelloon daraaru. Masqallimmoo ifadha ganna cillimii keessaa bahanii ifa birraa argani yeroo kabajanidha. Ayyaanni kuni Itoophiyaafi Ertiraatti bal’inaan kabajama.

Ioophiyaa keessatti lakkoofsaan ummata guddicha kan ta’e ummanni Oromoo Ayyaana Masqalaa 'mootii ayyaanaati' jechuun waama.

Sirna ho’aa ta’eenis kabajata. Ayyaanichi bifa amantaas, bifa aadaas qaba.

Yeroon birraa namaafis horiifis miira adda ta’e waan qabuuf sirboonni mararteefi gammachuu kana ibsuuf, gamtaa ibsuufis sirbaman danuudha.

'Birraan kan dargaggeessaati'

Yeroo Ayyaana Masqalaa keessumaa Godina Horro Guduruu Wallaggaatti sirboota sirbaman keessaa ijoon Hiyyoolee, Hiyyaasee, Ishobbookoo, emmolee fa'idha.

Weellisaa jireenyaa Dassaalee sirboota kana ammayyeessuun sirbuun beekama. ‘’Akkuma Tuulamni goobeen beekamu, naannoon keenya hiyyooleen beekama,’’ jedha.

Walleewwan Ayyaana Masqalaa kan yeroo kaan weellifamanirraa ‘’addadha’’ jechuunis ibsa.

Sirboonni Masqalaa abaaboo, jaalala, birraa, waliin jireenyaa, fi dhimmoota kaan hedduurratti sirbamu. Ammoo Ayyaanni Masqalaa gahuu dura torban yookiin ji’oota muraasaaf halkan sirbama.

ALI Fulbaana bulti 17 yeroo Ayyaanni Masqalaa erga kabajame booda garuu ‘’Sirba halkanii kuni guyyaatti jijjiirama hanga torbee tokkootti.’’

Sirboota yeroo Ayyaana Masqalaa sirbaman keessaa tokko iyyooleedha.

Iyyoolee korreekoo

Kololee koottu iyyoo jenna

Iyyoolee korreekoo

Kololee haadaan daraare

Iyyoolee korreekoo

Kololee tabba gubbaatti

Iyyoolee korreekoo

Kololee qeerroon wal waame

Iyyoolee ganda durbaatti jechuun Jireenyaan yaadata.

Qeerroon kan hin fuune. Qarreenis kan qarree hin buufanne, durba morma lamaa yookiin kan hinheerumnedha.

Ayyaanni Masqalaa kanneenif yeroo itti wal argan, wal ilaalanidha.

Qarreen qeerroo ija laafu, irree hin jabaanne qeequ. Weellisaa Dassaaleen kana fakkeenyaan ibsa.

Eemmilee jabbilee doorayii

Yaa ameessa baakkoo jabbilee doorayii

Eemmilee jabbilee doorayii

Orogeessa booyyee jabbilee doorayii

Eemmilee jabbilee doorayii

An dabeessa hin jaallu jabbilee doorayii

Eemmilee jabbilee doorayii

Obboleessakoollee jabbilee doorayii

Yoomiyyuu Mul’ataa barreessaadha. ‘’Birraan kan dargaggeessaati. Foolii abaabootu urgaa’a. Abaaboo wajjiin jaalalatu hidhata qaba. Jaalala waliin dargaggeessatu hidhata qaba,’’ jedha.

Yaa bishaan qarsaa yaa taliilakoo

Yaa abbaa durbaa yaa wasiillankoo

Wasiilli obboleessa abbaati. Gaafa dargaggeessi fuudhe abbaa durbaa obboleessa abbaakooti jedhee waama jechuun hima.

Qeerroofi qarreen faallaa walii sirbu, dubbiinis wal tuqu. Ammoo gaafa kaan sirbaan wal bareechu.

Hiyyoolee yaa abaaboon daraartee abaaboon birraa

Akkam naa jirta yaa gurbaa nana gurbaa hiriyyaa

Qeerroonis wal qeeqa. Nama seeraan sirba jalaa hinqabnemmoo komachuuf akkana jedha.

Shumburaan hinjiru simbirri fixxeetti

Draggaggeessi hinjiru gursummaan fixxeetti

Gursummaan kan abbaa warraa hiikte yookiin kan abbaan warraa irraa du’e jechuudha.

Dargaggeessi lo’e lo’ee dhaquu danda’a. Qeerroon kabajamaadha, gursummee bira hin dhaqu jedha Yoomiyyuun.

Hiyyaasee

Sirboota yeroo Ayyaana Masqalaa sirbaman keessaa inni ijoo biraan Hiyyaaseedha. Sirbi kuni sirba Horroon ittiin beekamudha jedhu hawaasichi.

‘’Dargaggeessi birraa yoggaa kabajatu waan fedheyyuu yoo sirbe iyyaaseen keessaa hin dhabamu’’ jedha Yoomiyyuun.

Hiyyaaseen waloon sirbama. Sirbichi kan qeerrooti. Garuu buleeyyiinis ni sirbu.

Iyyaaseen hiyyoodha

Kan fooliin shittoodha

Si yaade marookoo

Yoo kormi goobe

Naa garaftaaree

Yoon sitti boo’e

Yoom naa dhuftaaree

Ammoo hiyyaasee qarreenis gidduu seenanii weellisuu danda’u. ‘‘Dibbeetiin sirbama. Aabbootiin gidduu seenanii haadholiin, qarreen dibbee dhooti,’’ jedha Jireenyaan.

‘’Dhiirri keessa keessa seenaa mudhii walqabatanii sirbu. Dhiirri bifa gellootiin akkana qeeqa jedhu:

Kan daraaruu mukaa malqaqqoo seetanii

Malqaqqoo seetanii iham iham

Kan maraatuu durbaa dargaggoo seetanii

Dargaggoo seetanii joffee baalambassaa iham iham

Qeerroofi qarreen gamaafi gamanaan walirraa fuudhanii sirbuu jechuun himu.

Masqalli quufa

Ayyaanni Masqalaa quufa. Ayyaanaaf gosa nyaataa garagaraatu dhihaata. Horiinis ni qalama, farsoon, buquriin [farsoo geeshoo hinqabne], daamboon guddatee qofaattis tolchama.

‘‘Aannan gaafa sana hin kuufamu. Gara dirree Masqalaa geessama. Achitti hin dhugama,’’ jedha Yoomiyyuun.

Masqalatti quufuun akka milkiittis ilaalama. Ammoo nama qofaaf miti. Horiinillee quufti.

Guyyaa Masqalaa horiin marga itti dalleeffame yookiin eegamaa ture dheeddi. Kanas kaloo jedhu.

‘’Ganna guutuu qonnarra bahanii itti aanee Onkololeessa yeroo qorrii hamaan jiru waan ta’ef Fulbaana keessa marga dheeduutu irra jira,’’ jedha Yoomiyyuun.

Qeerroon wal ijaartee guyyaa Masqalaa abdaarirra [bakka ibsaan Masqalaa gubatu] deemanii sirbu. Namnis waanuma qabu kennaaf.

Hunda qixa hin galateeffatan. Kan baay’isee isaanii kenne guddisanii galateeffatu.

‘’Inni nu laate hammana gaha,’’ jedhanii jaju, dinqisiifatu. ’‘Diinni isaa eessa jirti? Kunoo as jala jirti,‘‘ jedhanii lafa reebu.

Nami dhugaatiis, maallaqas, sooratas kennaaf. Birrii walitti qabaniin yookaan horii bitanii qalatu yookiin qarshii hiratu.

Qabdoo

Gara giddugala Oromiyaa 'wadaajii' jedhamuun beekama. Dargaggoonni birraa kanatti michuu barbaaddatu. Qeerroon dura fedhii gaafata.

Amma amma laaffata dhufe malee ummanni gosaan jiraata. Nami gosa tokko keessa jirummii wal hin kaadhimmatu, haraamuu waan ta’ef.

Kanaaf dargaggeessii sirbaaf gar biraa dhaqa. Araddaa ofiirra hin sirbu. Warri kaanimmoo gara qe’ee isaa dhufu. Yerootti qe’eetti waloon sirbaniis garuu inuma jira.

‘’Gosni asitti sirbe kuniifi gosni gamaafi gamana jirummoo walitti yaa’ee dirree guddaatti waliin sirba. Achi keessatti qabdoo kan barbaadu abaaboo kenna.

‘’Achitti qabdoon isaa suni nama biraa yoo qabdi ta’e ni wallola qeerrooni. Suuqqanni jira,’’ jedha Jireenyaan.

Suuqqanni kennaa dhiirri tokko dubartii jaalateef rifeensa gubbaa suuqudha – kennaa jaalalaadha. Yoo gaaffii isaa simatte qofa waliin sirbiti.

Yoo kana dura suuqqatee maatiinis tole jedhani kennaa biraa kennaaf. Isheen kan isaa ta’us mirkaneeffata.

Eemmo yaa gurraalewoo

Eemmoo natti urgaa’ewoo

Akka ansoosillaa birraa

Akka foon mataa dirraa

Akka cooma waadani

Akka goota faarsani…. jedha Weellisaa Dassaalee.

Qabdoorratti garuu jedha Yoomiyyuun dhungoorra kan darbe akka hinjirre hima. ‘’Gaa’ila dura qunnamtii saalaa raawwachuun nama safuu cabse.’’

Iyyooshee korreekoo kololeekoo

Koottu akka taanu gargar hinbaanu

Yoo gargar baane waliitti hintaanu

Qeerroon wal utubdi. Wal ta'un akka barbaachisu sirbaan ibsu. Namoonni iyyoolee waliin sirban hiriyyummaan isaaniis jabaadha.

Korreen kan sagaleen korrisu jechuun ibsa Yoomiyyuun.

Iyyoohaa korreekoo kololee koo

Koottu akka taanu gargar hin baanus jedhu.

Yookinimmoo qarree dubbiin doorsisu. Icciitii walii beekus waan ta‘ef dubbiin wal qeequ.

Iyyoohaa korreekoo kololeekoo

Daamaraa mure si boraasisa

Iyyoohaa korreekoo kololeekoo

Isa dheengaddaa dhirsakeetti hime

Si gorraasisa

Damaraan muka Ayyaana Masqalaaf gubanidha. Damaraan waan fedherra hin qophaa’u. Muka filatamerraa qophaa’a. Fakkeenyaaf bakkanniisaafi laaftoo.

Dabalataan, anfaarre, abbayyiifi kaanis ni filatamu. Kunneen keessumaa jala bultii Ayyaana Masqalaa ALI Fulbaana bultii 16 qophaa’u.

Dargaggoon laga buutee daamaraa murti. Achi quncisanii manatti hirkisu. Bakkannisa falaxaniimoo daamaraaf qopheessu. Kanaaf qe’een ni urgaa’a.

Galgala sana namuu qe’ee ofiitti guba. Abbaan, haati, ijoolleen:

Hiyyooshee daree

Masqala waggaa daree

Ayyaana Waggaa daree

Ayyaantuutu argaa daree jedhanii sirbu.

Inumaa bakkee tokko tokkootti yoo boqqolloon asheete gahe, daamaraa kana jala waadu.

‘’Mana keessatti, gomjii gidduutti jechuudha damaraa irra kaa’u. Quncee guyyaa quncisan aduu keessa oole sana itti naqu. Qunceemti jiidhaan suni haala ajaa’ibaan boba’a,‘‘ jedha Dassaaleen.

Yoomiyyuunis ‘’Amma manni ho’ee bulluquutti guggubu‘‘ jedha. Achii dhangaa manatti qophaa’u sooratu.

Masqalli boru jedhee ibsaan Masqalaa, guci yookiin xomboraan dursee qophaa’a. Dargaggoon kosorruu, sooyyoma, eebicha goge, gaattiraafi kaanirraa ibsaa masqalaa qopheessu.

Achii bakka dirree Masqalaa ollaaf yookiin gosaaf qophaa’etti daamaraan ni dhaabama.

Barii guyyaa Masqalaa dura abbaan warraa ibidda qabsiisa, eegasii haati warraa itti aanti, hangafa jedhee itti fufe.

Kunneen xombora isaanii qabatanii gara bakka waloo guban geessu.

Osoo manaa hin bahin haati warraa qodaa bukoo itti bukeessan ibsaa sana xuqsiisu. ‘’Beela balleessi jedhu,’’ jedha Jireenyaan.

‘’Naanna’ee hanga daamaraan kuni gubatee hanga daaraa ta’utti dhaabbate bullukkoo isaa uffatee shaashii fakkaatee dhaabatee ilaala namni.’’

Bariis waan ta’ef waan qorruufis dargaggoon teessee qaqqaammatti.

Barbadaan ibiddaa waan baay’atuuf daabboo daabbaa waan jedhamu tolchu. Gara caalu xaafii diimaarraa qophaa’a. Manni hunduu kana ni gumaacha.

Guyyaa Masqalaa dargaggoon Masqalatti marsitee akkana jedhanii sirbu jedha qorannoo isaa keessatti Darajjee Fiixeen:

Ishobbookoo yadaalee …………. Emmolee

Daalee daalachakoo ……………. Emmolee

Dhuftee barbaachakoo ………….. Emmolee

Abbaankee beera qotaa …………. Emmolee

Yabeera qottuu nanaa …………... Emmolee

Argaankee beelaaf tolaa ………… Emmolee

Yabeelaaf toltuu nanaa ………….. Emmolee

Yoo qotteef gaara qotii ………….. Emmolee

Bajjiin qaqaroo qabaa …………… Emmolee

Yoosobdeef jaarsa sobii ………… Emmolee

Alfiin nagaroo qabaa ……………. Emmolee

Ahiihi…. Ahiihii… ahiihii…..

Ergaan isaas qarreen abdii hintaane qeerrootti akka hin kennine akeekkachiisuufi.

Qarreenis akkana jedhanii sirbu:

Otoon guduruu ta’ee …. Seeyye Hadaa Birraan Roobee

Anoo hingurguru harree ... Seeyye Hadaa Birraan Roobee

Ittan daldala malee ... Seeyye Hadaa Birraan Roobee

Otoon durba ta’ee .... Seeyye Hadaa Birraan Roobee

Anoo hingurguru qarree ….. Seeyye Hadaa Birraan Roobee

Ittan basha’a malee .. Seeyye Hadaa Birraan Roobee

Aadaa keessatti dubartiin kabajashee eeggachuun bakka guddaa akka qabu eeruun akka qarreeshee eeggattu kan jajjabeessudha.

Kanneen Masqala hin sirbine

Ayyaanni Masqalaa hawwataa ta’us, kanneen ayyaanicha lagatanis ni jiru. Fakkeenyaaf kan mana isaanii gaddi jiru masqala hin gubani.

Gama kaaniin kanneen abdaariitti wareeggattan jiru. Wareega dhiheessanii yoo dhabanis hin bahan jedha Weellisaa Dassaaleen.

‘’Akka dallansuu wayiitti guyyaa sana ifa baasanii hin bahani. Akkasumas kan maatiin jalaa miidhame yeroo akkasii ifa baatee hin bahu.’’

‘’Ifa sana booda garuu yoo sirba sanatti hirmaachuu baatellee akka hawwaasummaatti osoo sirbi hin eegaliin nyaatee dhugee gara mana isaatti deebi’a.’’