Янгиликлар. Россия: Рогозин Донецкда ҳужумга учради, у Ўзбекистонда ҳам бўлган, Мирзиёев билан ҳам учрашган Rossiya Ukraina Putin Yangiliklar

Дмитрий Рогозин раислик қилган комиссия ўз вақтида Ўзбекистон мудофаа саноатини тиклашда ўзбек ҳукуматига маслаҳатчилик ёрдами бериши айтилган. У ҳужумда яраланган. Ҳужум кимнинг иши?

Рогозин Тошкентга 2017 йилда Россия Федерацияси ҳукумат раиси ўринбосари ва Ҳарбий саноат комиссияси коллегияси раиси сифатида ташриф буюрган.

Делегация раиси сифатида ўшанда Ўзбекистон президенти Шавкат Мирзиёев ва Бош вазири Абдулла Ариповлар билан музокаралар олиб боргани хабар берилган.

Алоқадор мавзулар:

Ҳужум тафсилотлари

Хабарларга кўра, Дмитрий Рогозин Донецкда кеча, чоршанба куни кечқурун ҳужумга учраган.

Ҳодисада у билан бирга Россия Украинадан мустақиллигини расман тан олган Донецк Халқ Республикаси ҳукуматининг раиси Виталий Хоценко ҳам яралангани айтилмоқда.

Донецкнинг аннексия қилинган қисмига Россия томонидан тайинланган вакилининг маълум қилишича, отишмада яна икки киши ҳалок бўлган.

Донецкдаги улар бўлган меҳмонхона ва "Шеш-Беш" ресторани ўққа тутилган.

Ҳозирда Россия Федерацияси ҳукумат раисининг собиқ муовини Дмитрий Рогозиннинг айтишича, "3×4 мм ўлчамдаги металл парчаси ўнг курагининг юқорироғига келиб теккан".

"База"нинг ўз маълумотларига таяниб хабар беришича, Рогозин боши, думба қисми ва чап сонидан ҳам яраланган.

Аммо мазкур Telegram канал ҳалича ўз маълумотлари манбасини очиқламаган.

"Шеш-Беш"

"Шеш-Беш" ресторан ва меҳмонхона мажмуаси Донецкнинг жанубий чеккасида, фронт чизиғидан тахминан 20 километрча узоқликда жойлашган.

Рогозиннинг айтишича, "кўнгилли бўлинмалардан бирининг қайтиши ортидан, тор доирада ва осойишта муҳитда ишчи учрашуви ўтказаётган бўлишган".

"База" эса, бундан аввал ҳужумга тутилган пайтда Рогозин ресторанда туғилган кунини нишонлаётгани ҳақида ёзганди.

Яқин яқингача "Роскосмос"га ҳам раҳбарлик қилган Дмитрий Рогозин "Шеш-Беш"нинг сўнгги саккиз йил ичида бирор марта ҳам ҳужумга тутилмаганини таъкидлаган.

"Кимдир маълумотни сиздирган. Соат тахминан 19:45 лар атрофида бир нечта аниқ зарбалар берилди. Биз ўтирган жой ҳам четда қолмади. Улар 120 ёки 150 мм калибрли зарбалар эди", - деб айтган Рогозин.

Унинг ёрдамчиси "зарбадан аниқ мақсад кўзланган"ини тахмин қилган.

"Мутахассисларнинг фикрларича, зарба бериш учун Франциянинг Nexter компанияси томонидан ишлаб чиқилган 155 миллиметрли CAESAR ўзиюрар артиллерия мосламасидан фойдаланилган", - дея қўшимча қилган у.

Аммо шу соатларда ҳам Россия томони ҳужумда кимни гумон қилаётганини очиқламаган.

Бирор бир шахс ёки давлат ҳам бунга масъулиятни ўз зиммасига олиб чиқмаган.

Дмитрий Рогозин

Дмитрий Рогозин бир ой аввал "Царские волки" назоратчилар гуруҳини ташкил этаётганини эълон қилган.

Ўшанда янги гуруҳга катта жанговар тажрибага эга ҳарбий маслаҳатчилар ва экспертлар кириши айтилган.

Агар, унинг сўзларига таянилса, гуруҳдагиларнинг Донбассдаги ҳарбийларни разведка ва ҳужумга ўргатишлари, дронларни ишлаб чиқишда иштирок этишлари кўзда тутилган.

Шу йил июль ойи ўртасига қадар Дмитрий Рогозин "Роскосмос"га бошчилик қилган.

Кейин оммавий ахборот воситаларида унинг Кремлга ишга ўтиши айтилган, аммо ҳозирга қадар бу иш амалга ошмаган.

Дмитрий Песков эса, ТАСС ахборот агентлигига Рогозиннинг истеъфосини унинг иш фаолияти билан боғламаган, вақти келганда, яна унга вазифа берилишини айтганди.

Ноябрь ойига келиб эса, Дмитрий Рогозиннинг кўнгиллилик қилиши маълум бўлган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek