Украина уруши: Россия поезд бекатига зарба бериб 25 кишини ўлдирди Yangiliklar Dunyo
Сурат манбаси, Reuters
Киевнинг айтишича, Россиянинг Украинадаги поезд бекатига қилган ракета ҳужуми 25 кишини ўлдирди. Ҳалок бўлганлар орасида 6 ва 11 яшар икки бола ҳам борлиги айтилади. 31 киши жароҳат олган.
Президент Володимир Зеленский бу ҳаво зарбаси ҳақида БМТ Хавфсизлик кенгашининг мажлиси ўтаётган вақтда гапирди.
Россия ҳозирча ҳеч қандай изоҳ бермади.
Москва фуқаролик иншоотларини нишонга олишини рад этиб келади. Пайшанба куни БМТ инсон ҳуқуқлари комиссари Мишел Башеле Россия президентини Украинага ҳарбий ҳужумларни тўхтатишга чақирди.
Жаноб Зеленский Днипропетровск вилоятидаги Чаплине тумани поезд бекатига қилинган ҳужум ҳақида Хавфсизлик кенгашида нутқ сўзлашга тайёрланаётганида эшитганини айтди. "Россия БМТ Хавфсизлик кенгаши мажлисига мана шундай тайёрланди", - деди у.
Сурат манбаси, Reuters
"Йўловчи ташувчи вагонларнинг тўрттаси ҳозир ёняпти... талафотлар сони ошиши мумкин", - деди Украина президенти.
Чоршанба куни Украина ўз мустақиллик кунини нишонлади. Зеленский бу байрамни издан чиқариш учун Россия "шафқатсиз" иш қилиши мумкинлигидан огоҳлантирганди.
Аввалроқ у Россия қўшинларини Запорижя атом станциясини "уруш майдони"га айлантириб, завод ва Европа халқларини хавф остига қўйиш, ҳамда жаҳонни "радиация фожеаси" бўсағасига етаклашда айблади.
БМТ бош котиби, айни мажлисда гапира туриб, бу "мантиқсиз уруш" ҳам Украина ва ҳам ҳорижда миллионлаб одамларни қашшоқлик гирдобига улоқтириши мумкинлигини айтди.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
