Ўзбекистон: Коронавирус чиқиндилари назоратга олиндими? – видео, koronavirus, Мирзиёев, O‘zbekiston, Mirziyoyev, yangiliklar

Ўзбекистон: Коронавирус чиқиндилари назоратга олиндими? - Хавфли бўлиши мумкин бўлган тиббий чиқиндиларнинг очиқ майдонга ташлаб кетилиши яқинда мамлакатда жамоатчиликнинг кескин норозилигига сабаб бўлганди:

Бир неча кун аввал коронавирус беморларини даволашдан сўнг қолган тиббий чиқиндилар Тошкент вилоятининг бир неча ҳудуди, хусусан, Чирчиқ дарёси атрофига ташлаб кетилгани ҳақида хабарлар чиққан эди.

Хабарларда чиқиндилар дарё сувига қадар сочилиб кетгани айтилган эди.

Хавфли бўлиши мумкин бўлган тиббий чиқиндиларнинг очиқ майдонга бу тахлит ташлаб кетилиши жамоатчиликнинг кескин норозилигига сабаб бўлган.

Муаммо ҳақида биринчилардан бўлиб хабар берган депутат Расул Кушербаев чиқиндилар коронавирус беморларини даволашга мўлжалланган Зангиота махсус шифохонасидан чиққани ҳақида ёзган.

Шунингдек, у карантин қоидаларини бузганлик учун қатъий чоралар қўлланаётган бир вақтда бир қатор масъулларнинг ўзлари коронавирусни тарқатишга атайин йўл қўйиб бераётганини таъкидлаган.

Би-би-си мухбири жамоатчилик эътиборига тушган бу муаммо юзасидан Янгийўл туманининг Чортоқ маҳалласига бориб, вазиятни ўрганди.

"Кечаси тўкиб кетишибди"

Чортоқ маҳалласига пойтахт Тошкентдан атиги бир неча чақирим йўл босилади.

Маҳалланинг этагидан Чирчиқ дарёси оқиб ўтган.

Ўзини Ғайрат дея таништирган маҳаллий тадбиркор дарё ёқасини тўлдириб, ҳосил бўлган қўшимча ерда «Ёшлар гузари» қуришни режалаётгани ва ҳозирда қурилиш давом этаётган ана шу ҳудудга ҳам тиббий чиқиндилар тўкиб кетилганини маълум қилади.

"Toshkent City каби йирик қурилиш объектларидан чиққан чиқиндиларни олиб келиб, менинг еримга тўкадилар. Шундай қилиб, дарё бўйидаги ерларни ишлаб чиқариш зонаси қуриш учун тайёрлаяпмиз", дейди у Би-би-сига.

У, тахминан, 15-16 октябрь куни ишчи ходимлари қурилиш майдонида тиббий чиқиндиларни пайқаб қолгани ҳақида сўзлайди.

"Бориб кўрсам, қопларга солинган шпритслар, маскаларни дарё бўйидаги нишабликка тўкиб кетишибди. Аввалига улар коронавирус чиқиндилари экани ҳаёлимга ҳам келмади, лекин барибир хавфсизлик учун у жойни ўратиб қўйдим, ишчиларимга ҳеч кимни яқинлаштирмасликни тайинладим".

Тадбиркор шундан сўнг яқин атрофдаги шифохоналарга бориб, чиқинди уларга тегишли ёки тегишли эмаслигига аниқлик киритишга ҳаракат қилгани, аммо бундан бирор натижа чиқмаганини айтади.

"Зангиотадаги болнитсага ҳам бордим. Жуда кучли қўриқлашар экан. Ичкарига кира олмадиму, лекин у нарса бизга тегишли эмас, деб айтишди. Шундан сўнг танишлар экология билан боғланишимни маслаҳат бердилар".

"Экологиядан келиб, қопларни текширишди ва бу Зангиотадан чиққан, деб айтишди. Кейин ҳар битта мусорни териб олиб, қаёққадир олиб кетишди", давом этади у.

Тадбиркор ўзига тегишли ҳудуд бошланишига ўрнатилган ягона видеокузатув камерасидан чиқиндилар 11 ноябрдан 12 ноябрга ўтар кечаси тўкиб кетилганини тахмин қилаётганини билдиради.

«Ҳаммаси жиддийлигини тушунганимиздан кейин камерани кўтардик. Кечаси соат 2.30 атрофида еримизга бегона юк машина кириб келганини аниқладик».

У Би-би-сига тақдим этган видеоёзувда давлат рақами кўринмаган кичик юк машинаси дарё ёқалаб келаётгани кўринади, аммо чиқиндиларни тўкиш жараёни видеокамера ўрнатилган жойдан тасвирга тушмай қолган.

Дарё бўйида қўй боқиб юрган Азиз исмли маҳаллий яшовчи тадбиркорнинг ерини ички ишлар ходимлари дохил турли расмийлар «босиб кетгани»ни айтади.

Маҳаллий тадбиркор эса яқин атрофда маҳаллий аҳоли яшамасада, бу чиқиндилар ҳануз саломатликка хавф туғдириши мумкинлигини таъкидлайди.

"Очиғини айтиш керак, бу ерга кечаси турли ҳудудлардан одамлар мусор ичидан керакли нарса териб олгани келади. Худо кўрсатмасин, улар шпритсларга тегинган бўлса, вирусни ўзи билан олиб кетган бўлиши мумкин".

"Тепароқда яна бор"

Маълум бўлишича, ўрганилган ҳудудда бир неча чақирим нарига - дарёнинг юқори қисмидаги бошқа бир ҳудудга ҳам коронавирус чиқиндилари тўкиб кетилган.

Расмийлар Тошкент вилоятининг, камида, уч ҳудуди - Қуйи Чирчиқ, Янгийўл ва Зангиота туманларида очиқ майдонга ташлаб кетилган коронавирус чиқиндилари топилганини тасдиқлаганлар.

Депутат Расул Кушербаев ўрганиш давомида яқин вақтгача бундай чиқиндиларни йўқ қилиш билан шуғулланиб келган "Med Class Plus" МЧЖ ушбу хизматни тўхтатиши оқибатида шундай муаммо келиб чиққани маълум бўлгани ҳақида ёзган.

Давлат экология қўмитаси матбуот котиби Бунёд Абдуллаев Gazeta.uz нашрига берган интервьюсида "Med Class Plus" компанияси утилизация бўйича самарали фаолиятни йўлга қўйгани, аммо Бош вазир имзолаган баён билан янги — "Pokiza Tozalash" компанияси танланганидан сўнг хизмат кўрсатишни тўхтатганини тан олган.

"'Pokiza Tozalash"нинг утилизация печи бўлмаган. Шу боис компания шифохонанинг ўликхонаси ёнида қўлбола печь ташкил қилган ва тиббиёт чиқиндиларини ҳам шу ерда ёққан. Иш ҳажми катта бўлгани боис компания чиқиндиларни ёқиб улгурмай қолган, оқибатда ҳайдовчи тунда чиқиндиларни дарё бўйига ташлаб келган. Айни вақтда компания биринчи фирманинг қопларидан фойдаланган", деган Абдуллаев интервью давомида.

Мазкур муаммо кенг жамоатчилик эътиборига тушиши ортидан Соғлиқни сақлаш вазирлиги матбуот вакилларига Зангиота махсус шифохонасидаги чиқиндиларнинг йўқ қилиниши жараёнини кўрсатган.

Маълум бўлишича, шифохона ҳудудида қурилган махсус куйдириш печи талабга жавоб бермаганидан шартнома асосида "Med Class Plus" корхонаси чиқиндиларни шу пайтга қадар бошқа ҳудудга олиб чиқиб, йўқ қилиб келган.

Масъуллар, эндиликда, шифохонада катта сиғимли печь ишга туширилаётгани, бу билан эса чиқиндиларнинг ҳеч қаерда тўпланиб қолмаслигини таъминлашга эришиш мумкинлигини таъкидлаганлар.

Бироқ шифохона расмийлари журналистларга чиқиндилар белгиланган ҳудуддан ташқарига чиқиб кетгани тўғрисидаги хабарларни рад этганлар.

Шу тариқа тасвири тарқаб кетган чиқиндилар муаммоси назорат остида экани айтилмоқда.

Аммо бир неча жойга ташаб кетилган тиббий чиқиндилар Ўзбекистонда коронавирус хавфсизлигига оид жиддий хавотирларни юзага келтириб улгурди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek