Трамп сири, Путин жавоби ва виза қиймати – дунёда нима гап? Rossiya, AQSh, dunyo, yangiliklar

Трамп сири, Путин жавоби ва виза қиймати - боши танасидан жуда қилинган ўқитувчи ҳодисасига Россиянинг алоқаси йўқ. New York Times Трампнинг сирини очди. Ўндан ошиқ аёл виза деб ўлди - халқаро дайжест.

Путин: Боши танасидан жуда қилинган ўқитувчи ҳодисасига Россиянинг алоқаси йўқ.

Ўқитувчи Муҳаммад пайғамбар(с.а.в) ҳажв қилинган карикатура сабаб, ўлдирилган.

Етти гумондор устидан Францияда аллақачон маҳкама жараёни ҳам бошланган.

18 ёшли ҳужумчи Париждаги қотиллик сатҳига яқин ерда Франция полицияси томонидан отиб ўлдирилган. Қотиллик ўтган жума куни юз берганди.

Унинг Москвада туғилган ва асли чеченистонлик экани айтилган.

Францияда 2008 йилдан буён яшаётган бўлган.

Маълум бўлишича, бу масалани Франция президенти Путин билан гаплашиб олган. Сим қоққан.

Путинни террорчилик ва ноқонуний миграцияга қарши ҳамкорликда курашишга ундаган.

Россия президенти ҳужумни "ваҳшиёна қотиллик", деб атаган.

Россия ҳужум ортиданоқ унга бирор бир алоқаси йўқлигини айтиб чиққан.

Ҳужумчининг сўнгги 12 йил ичида Францияда яшаганига асосий урғуни берган.

Яқинда Франциядаги бу ҳодисани Чеченистон президенти ҳам қоралаб чиққан.

Аммо, шунинг баробарида, диндорларни қутқуга солмасликни ҳам сўраб қолганди.

New York Times нимани ўрганди?

Нуфузли нашрнинг ёзишича, АҚШ президенти Дональд Трампнинг Хитойда банк ҳисоби бор.

Бир неча йил давомида Хитойда бизнес лойиҳалари билан шуғулланиб келган.

New York Times га кўра, Трампнинг Хитойдаги банк ҳисобини International Hotels Management юритиб келган. 2013-2015 йиллар оралиғида Хитойга солиқ ҳам тўлаган.

АҚШ президенти матбуот котибининг бунга жавобан айтишича, банк ҳисоби "Осиёда меҳмонхона бизнесини очиш имкониятларини ўрганиш мақсадида очилган".

Трамп АҚШ ширкатларининг Хитойда бизнес қилишларига танқидий қараши билан танилган.

Хитой билан икки ўртада савдо урушининг келиб чиқишига ҳам туртки берган.

Янгилик Трамп яна иккита асосий номзоддан биттаси бўлган АҚШ президент сайловига саноқли ҳафталар қолган пайтда бўй кўрсатган.

Яқинда Трамп сайловдаги рақиби демократчи номзод Жо Байденнинг ўғлини шунга ўхшаш айбловларда айблаб чиққан.

Аммо Байденнинг даромад солиғи тўғрисидаги декларацияси ва молиявий ҳисоботлари Хитой билан бирор бир бизнес алоқасига эга эмаслигини кўрсатган.

Виза деб ўндан ортиқ аёл ўлди

Ҳодиса қўшни Афғонистонда юз берган.

Аёллар Покистонга виза олмоқчи бўлишган.

Аммо талотўпда оёқ остида қолиб, нобуд бўлишган.

Яна кўплаб киши тан жароҳати ҳам олган.

Афғонистон етти ойлик танаффусдан сўнг, Покистонга виза беришни эндигина тиклаган бўлган.

Жалолободлик масъуллар виза олиш истагидаги одамларни идорада қабул қилмай, маҳаллий стадионга юборишган.

Натижада, стадионда минглаб одам йиғилган, талотўп келиб чиққан.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek