Ўзбекистон- Россия: ОМОНчиларни қувган ўзбек ишчиларининг талаблари бажарилди - O'zbekiston

13 июль куни Россиянинг Амур вилояти Свободний туманида ғалаён кўтарган меҳнат муҳожирларининг, деярли барча талаблари бажарилди. Қарийб уч кун давом этган иш ташлаш ва қарама қаршиликдан сўнг уларнинг ойлиги 5% га кўтарилган, овқатларининг сифати яхшиланиб, таркибида гўшт пайдо бўлган.

Би-би-си Амур газни қайта ишловчи завод қурилишида ишлаётган ўзбекистонлик мигрант билан гаплашишга муваффақ бўлди. Унинг айтишича, ишчилар ғалаён кўтариб, видеолар ижтимоий тармоқларга тарқалиб кетгач ҳудудда телефон ва мобил интернет алоқаси 2 кун узиб қўйилган.

«Патент пулларини шу ерда ишлаётган ишчиларнинг ўзига тўлаттирмоқчи бўлган. Маош ҳисобидан, деб қоғозга қўл қўйдирган. Биз ишлаётган жой кенг жой, 900-950 гектар жойга завод қуриляпти. Бир бўлим бош кўтариб чиқиб, раҳбарларнинг офисига бориб ағдар-тўнтар қилиб ташлаган», дейди ишчилардан бири.

Унинг айтишича, сўнгги вақтларда маошлар қисқариб кетган, карантинда ишламаган вақт учун маош берилмагани ишчиларнинг сабр косасини тўлдирган.

Би-би-си манбасининг айтишича, ғалаён фақат офис биноларини вайрон қилиш билан тугамаган.

Ишчилар завод қурилишидан 15 чақирим узоқликда ўзлари ётиб турган шаҳарчада ҳам тўполонни давом эттирган. Улар шаҳарчадаги дўконни вайрон қилган ва ичидаги маҳсулотларини ташиб чиқиб кетган.

Суҳбатдошимизнинг айтишича, бунга асосий сабаб карантин вақти дўкон маҳсулотларнинг нархини асоссиз икки баробар қиммат қилиб қўйгани бўлган.

«Биз бу ерда карантиндамиз, карантиндан сўнг шаҳарга чиқармай қўйди. Шаҳарда доширак ё тушенкаларнинг нархига бир баробар қўшиб қиммат сотарди. Қиммат бўлгани учун жойига қўйиб қўйишди. Шаҳарда 50 рублга оладиган бўлса, бу ерда 100 дан ошиққа сотарди», дейди қурилиш ишчиси.

Ижтимоий тармоқларда тарқалган видеоларда воқеа жойига ОМОНчилар чақирилгани ва кейинчалик улар қочиб юргани тасвирланган.

Би-би-си суҳбатдошининг айтишича, қурилишдаги қўриқлаш хизмати вазиятни назоратдан чиқарганидан сўнг улар шаҳардан ёрдам сифатида ОМОНчиларни чақирган.

Қалқонлари билан етиб келган ОМОНчилар ишчиларнинг ётоқхоналарига киришга уринган.

«Шаҳардан 600-700 ОМОНчи келган. Лекин улар ҳам ичкарига киролмади. 18-19 минг ишчи бор. Қўлига нима илинса олиб, отиб ётоқхонамизга кирмайсан, деган. Кейин губернаторми, ҳокими келди. Нима масала бўлса ечиб берамиз, деди. Кейин 10 та вилоятдан ишчи бўлса, ҳаммаси биттадан одам қўйиб, катталар билан келишишга юборди. Улар хўп, деб маошларни май учун 10 минг, Июнга яна 10 минг, ҳайитга беш минг рубль қўшиб берамиз, дейишди. Ойликларинг 5% ошади, деди».

Гувоҳнинг айтишича, ишчилар ва иш берувчилар ўртасидаги қарама-қаршилик 2,5 кун давом этган. Вазиятни тинчитиш учун келган ОМОНчилар шаҳарчага киролмагач, ғалаён кўтарганлар шаҳарга кетиб қолмаслик учун атрофни чодирлар тикиб ўраб олган.

Би-би-си манбасининг айтишича, айни дамда ишчилар ғалаён кўтарганлар, мол-мулкка зарар берганларнинг ушлангани ҳақида эшитишмаган.

Аксинча Ўзбекистоннинг Россиядаги Бош консули келиб, ишчиларнинг арз-додини эшитган ва уларни ечиш учун амалий қадамлар бошланган.

Қурилишда ишлаётган шахснинг айтишича, ғалаёндан сўнг озиқ-овқатнинг ҳам сифати яхшиланган.

«Шилдир шўрва берарди, ҳозир 3 кундан бери гўштли овқат беряпти. Ош беряпти. Ҳеч кимда қўрқув йўқ. Агар яна раҳбарлар зулм ўтказадиган бўлса, яна кўтариламиз деяпти», дейди у.

Ўзбекистон Россиядаги элчихонасининг хабар беришича, бўлиб ўтган ҳодиса тафсилотларини аниқлаш ҳамда Ўзбекистон Республикаси фуқароларининг қонуний ҳуқуқ ва манфаатлари ҳимоясини таъминлаш мақсадида воқеа жойига элчихона Бош консули етиб борган.

Элчихона россиялик ҳамкорлар билан биргаликда можарони келтириб чиқарган сабаб ва шарт-шароитларни ўрганиш, муаммонинг барча томонлар учун мақбул бўлган ечимни топиш бўйича иш жараёни ва натижалари ҳақида қўшимча ахборот беришини маълум қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek