Ўзбекистон: Президент уйлар нархини туширишга кўрсатма берди - одамлар бундан хурсандми?

Президент Шавкат Мирзиёев 9 октябрь куни пойтахтнинг Олмазор туманида қурилаётган Olmazor Business City лойиҳасини бориб кўрган ва уйлар сонини кўпайтириш ҳамда турар жойлар нархини арзонлатишга кўрсатма берган. Би-би-си одамлар уй-жойлар нархи борасида қандай фикрда эканини ўрганиб кўрди.

Маҳаллий матбуот тарқатган хабарларга кўра, президент Мирзиёев янги қурилаётган турар жойлар нархини 30 фоизга тушириш лозимлигини таъкидлаган.

Ўзбекистон, айниқса, Тошкентда уй-жойлар нархлари одамларнинг топаётган даромадига нисбатан анчайин баланд ҳисобланади.

Тошкентда уйлик бўлиш учун бир неча ўн мингдан, ҳатто, бир неча юз минг АҚШ долларига қадар маблағ талаб этилади.

Бу эса одамлар, прописка муаммосини ҳисобга олмаганда, Тошкентда квартира сотиб олиш учун узоқ йиллар ишлашга мажбур эканини англатади.

Би-би-си билан суҳбатлашган аксар пойтахтликлар яқин орада уй сотиб олиш масаласига дуч келмагани, аммо янги қурилаётган уйлар ва таклиф этилаётган кредитлар эвазига, ҳозирда, уйлик бўлиш аввалгига қараганда мушкул эмаслигига ишонишини айтадилар.

Бироқ «одамларнинг ҳозирги топаётган даромади уй сотиб олиш учун қанчалик етарли» мазмунидаги саволга суҳбатдошларнинг деярли бари етарли эмас, деб жавоб қайтарди.

«Ойлик билан албатта уй олиб бўлмайди, лекин тадбиркорлик қилса, бу муаммо эмас. Ҳозир тадбиркорлик қилишга имконият катта», жавоб қайтаради Сергели мавзесида тикланган янги турар жойларда истиқомат қилувчи ўрта яшар эркак.

Аммо мамлакатнинг бошқа ҳудудларидан пойтахтга келиб, вақтинчалик ижарада яшаётганини билдирган бир неча инсон турар жойлар нархи қимматлигидан, ҳозирча, Тошкентда уй олишни режалаштирмагани ҳақида сўзлайди.

«Очиғи уйлар нархи билан қизиқиб кўрмаган эканман. Аёлимни даволатгани Хоразмдан келганман. Танишлар вақтинча ижарага уй топиб беришди. Албатта, Тошкентда уйлар қиммат бўлиши керак. Биз топаётган даромадимизга бу ердан уй ололмасак керак», сўзлайди ёши олтмишдан ўтган отахон.

Сергелининг 5-мавзесида фарзанди билан сайр қилиб юрган аёл бир йилча бурун бу ҳудудда қурилган арзон уйлардан бирига кўчиб ўтганини маълум қилади. Унга кўра, оиласи билан квартира кредитини тўлашда ҳозирча муаммога юзланмаган.

«Кредитимизни хўжайиним олаётган ойлик билан бемалол узяпмиз. Демак Тошкентда ойлик билан бемалол уйлик бўлиш мумкин, лекин бошқа районлардаги вазият қандай - билмайман», дейди у.

Президент Шавкат Мирзиёев: 'Нархларни 30 фоизга туширинг...ʼ

Хўш, президентнинг уйлар нархини тушириш тўғрисидаги сўзларига одамлар қандай муносабатда бўлмоқда?

«Уйлар сонини кўпайтириш, энергияни тежаш орқали турар жойлар нархини арзонлаштириш керак. Бунинг учун қурилиш материаллари, базальт толаси ишлаб чиқариш корхоналарини кўпайтириб, ҳар бир ҳудудга етказиб бериш зарур», таъкидлаган Шавкат Мирзиёев Олмазор туманига ташриф чоғида.

«30 фоиз жуда катта сумма. Агар ҳозирги нархлар ростдан ҳам шунчага туширилса, анча одам уйлик бўлиб қолар эди», дейди ҳайдовчи бўлиб ишлашини айтган эркак.

Аммо одамлар билан суҳбат чоғида бу янгиликка нисбатан уларда ишончсизлик кайфияти юқорилиги, улар эса бу кайфиятни яширишга урингани кўзга ташланади.

«Нархлар тушса яхши бўларди, лекин ҳозир нимадир, дея олмайман. Ҳаммасини вақт кўрсатади», билдиради ёши ўттизга яқинлашиб қолган йигит.

Ижтимоий тармоқларда эса кўплаб фойдаланувчилар қурилишга сарфланадиган маҳсулотлар таннархини пасайтириш орқали уйлар нархини туширишга уриниш ғоясини танқид остига олган.

Уларнинг фикрича, бунинг оқибатида шундоқ ҳам сифатсиз экани айтилаётган янги уйларнинг зилзилага бардошлилиги ва сифати янада тушиб кетиши мумкин.

"Қурилиш хомашёлари нархини тушириш бўйича чоралар кўрилса бўлгани, қурилиш сифатини пасайтириш ҳисобига эмас фақат. Хомашё нархини тушириш бу яна «имтиёзлар» дегани. Аслида уйлар нархи (қимматлиги)га ишлаб чиқариш харажатлари (таннарх)га алоқадор бўлмаган омиллар кўпроқ таъсир кўрсатади", деб ёзади Дилмурод Юсупов исмли Facebook фойдаланувчиси.

"Бозордаги гўштга ўхшаб, 1 кг гўштга 600 грамм суяк қўшиб, нархини туширмаса бўлгани қурувчиларимиз ҳам", киноя қилади Баҳриддин Чустий.

Ўзбекистон: Тошкент пропискаси осонлашиш ўрнига, қийинлашдими?

Ўзбекистон: Тўрт девор учун фалон пул тўлайсиз ёки пойтахтда уй-жой савдоси қандай кетмоқда?

UzWebiston: Хорижга чиқсамми ё уй олсамми?

Бошқа фойдаланувчилар харидорини топа олмаётган уйларнинг нархи бир неча йил ичида ўз-ўзидан тушиб кетишига ишонишини таъкидлайди.

Бироқ баъзи одамлар уйлар нархи неча фоизга арзонлатилмасин, ўзбекистонликлар олаётган ўртача ойлик маош билан, ҳатто, бир хоналик уйга эришиш осон эмаслигини билдирадилар.

«Агар нархларни 30 фоизга туширишса… Агар янги қурилган уйларда энг арзон бир хоналик квартира 400 миллион турса, оддий ишчи, ҳатто, 280 миллионни ҳам қаердан ола олади?» деган саволни ўртага ташлайди Валерий Ҳалимов исмли фойдаланувчи.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek