Туркия: Зилзилага яроқсиз топилган касалхона буткул вайрон бўлган - ким айбдор? Янгиликлар Yangiliklar

Бу ерга бир вақтлар одамлар нажот истаб келишарди. Энди эса Искандарун Давлат касалхонасининг жонлантириш бўлими жойлашган биноси бир уюм харобага айланган.

6 февралда юз берган зилзила вақтида, қутқарувчиларга кўра, касалхона ичида 300 киши - тиббий ходимлар, беморлар ва уларни кўришга келган яқинлари бўлишган. Уларнинг қанчаси омон қолгани номаълум.

Туркия: Она ва чақалоғи вайрона тагида қандай тирик қолишди?

Туркия. Зилзила. Бугуннинг саволи: Вайроналар остида қанча вақт тирик қолиш мумкин?

Чодир йўқ, ёрдам йўқ, ҳеч нима йўқ - Дунё Сурияни унутдими?

Бу ердаги ғазаб тобора ошиб боряпти. Чунки кўплар Соғлиқни сақлаш вазирлиги сайтидаги ҳисоботни кўришган. Унда бино ҳақида қуйидаги хулоса берилган бўлган: "Зилзилага чидамлилик синовлари натижаси - манфий".

Бу ҳисобот 2012 йилда чоп этилганди. Ундан бери бинони зилзилага чидамли қилиш йўлида нима иш қилингани, ёки умуман бирон иш қилинган-қилинмагани номаълум. Маҳаллий халқ эса уни муҳокама қилиб, ўзаро бўлишяпти.

Касалхона қулаганида Алижан Кенарнинг бувиси ва амакиси у ерда бўлганлар. Бувисининг жасади сешанба куни - зилзиладан бир ҳафтадан кўп вақт ўтиб топилди.

"Бу бир одам, ё одамлар гуруҳи, ва албатта, ҳукуматнинг айби. Бу кундек равшан, ҳамма кўриб турибди. Бу тақдир эмас, бу хато", - дейди Кенар.

Бошқа оилалар эса кавлагич машиналарга қараб, чангга беланган ҳолда харобалар ёнида кутиб ўтиришибди.

Улар ўз яқинларини топиш учун оғир техника ва ёқилғига ўз ёнларидан пул тўлашганини айтишади.

Баъзилари давлат қутқарувчилари эмас, фақат кўнгиллилар гуруҳларини кўрганларини билдиришди. Кенар илк кунларда баъзи ҳукумат вакилларини кўргани, аммо улар кам бўлгани ва техникаси бўлмаганини айтади.

"Ҳеч ким бу бинога икки-уч кун тегмади. Иш жуда ёмон ташкиллаштирилган. Тайёргарлик кўрилганида, вазият бошқача бўлиши мумкин эди. Биз сабоқ чиқаришимиз керак эди", - дейди у.

Вайрона ёнида турганимизда Туркия давлат AFAD қидирув ва қутқарув гуруҳи етиб келди, аммо одамлар уларни жаҳл билан қарши олишди.

"Тўққиз кундан бери кутамиз!" - қичқирди бир аёл. AFAD жамоаси кетиб қолди, ва бир неча соатдан кейин Би-би-си кетаётганида ҳануз қайтмаганди.

Қутқарувчилар бот-бот ишдан тўхташади - кимдир аёллар сумкасини топди ва унинг кимга тегишли эканини аниқлаш учун ичидаги кармондан ҳужжат қидирди.

Кейин, кимдир қичқиради. Яна бир жасадни топишди. Унинг билагидаги касалхона лентасидан шахсини аниқлашади. Оила ўз телефонларидаги суратлар билан қутқарувчиларга югуради, қутқарувчилар суратга қарайди.

Улар бошларини эгадилар. Бу уларнинг отаси. Унинг жасади қора халтага солиб олиб кетилар экан, қизларининг "ота, ота" деган қийқириқлари атрофни эгаллайди.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.