نوواک جوکووچ پانچواں ومبلڈن جیتنے میں کامیاب، فائنل میں فیڈرر کو شکست
،تصویر کا ذریعہGetty Images
نوواک جوکووچ نے ایک سنسنی خیز مقابلے کے بعد عالمی نمبر تین راجر فیڈرر کو آخری سیٹ میں ٹائی بریک پر شکست دے کر اپنا پانچواں ومبلڈن ٹائٹل جیت لیا ہے۔
سربیا کے جوکووچ نے فیڈرر کو دو کے مقابلے میں تین سیٹس سے شکست دی اور اس کے ساتھ انھوں نے اپنا 16واں گرینڈ سلیم ٹائٹل جیتا۔
ومبلڈن کی تاریخ کا یہ سب سے لمبے دورانیے والا فائنل مقابلہ تھا جو ریکارڈ چار گھنٹے اور 57 منٹ تک جاری رہا۔
یہ بھی پڑھیے
نوواک جوکووچ نے فائنل جیتنے کے بعد اظہار خیال کرتے ہوئے کہا کہ ’مجھے یقین نہیں آ رہا کہ یہ حقیقت میں ہو گیا ہے۔‘
End of سب سے زیادہ پڑھی جانے والی
37 سالہ راجر فیڈرر اس میچ میں جیت کے خواہاں تھے تاکہ وہ ومبلڈن کی تاریخ میں دوسرے کھلاڑی بن جاتے جنھوں نے نو ومبلڈن ٹائٹل اپنے نام کیے۔
فیڈر اس ریکارڈ کو تو برابر نہ کر پائے مگر میچ کے بعد انھوں نے جوکووچ کو مبارکباد دی اور کہا کہ ’یہ ایک شاندار میچ تھا جس میں سب کچھ تھا۔‘
میچ کے شروع میں جوکووچ نے پہلا سیٹ سات کے مقابلے چھ سے جیتا جبکہ فیڈرر نے دوسرا سیٹ چھ کے مقابلے میں ایک سے جیت کر مقابلہ برابر کر دیا۔
جوکووچ نے پھر تیسرا سیٹ سیٹ پوائنٹ بچا کر چھ کے مقابلے سات گیمز سے جیتا، جس کے فوراً بعد فیڈرر نے کم بیک کیا اور چوتھا سیٹ چار کے مقابلے چھ گیمز سے جیت لیا۔
پانچواں اور آخری سیٹ 12، 12 گیمز برابر ہونے کے بعد ٹائی بریکر پر ختم ہوا۔
،تصویر کا ذریعہGetty Images
11 سال بعد ومبلڈن میں نڈال کو شکست
فیڈرر نے ایک سنسنی خیز مقابلے کے بعد اپنے سب سے بڑے حریف سپین کے رافیل نڈال کو شکست دے کر ومبلڈن کے فائنل میں جگہ بنائی تھی۔
دونوں کھلاڑیوں کے مابین اب تک 47 میچ کھیلے جا چکے ہیں جن میں سے 22 میں فیڈرر اور 25 میں جوکووچ کو کامیابی حاصل ہوئی ہے۔ البتہ آخری دس مقابلوں میں سے آٹھ مقابلے جوکووچ نے جیتے ہیں۔
سیمی فائنل میں فیڈرر نے نڈال کو ایک کے مقابلے میں تین سیٹس سے شکست دی تھی۔
'عمر کا عمل دخل ہوتا ہے'
فیڈرر ایک ماہ بعد 38 برس کے ہو جائیں گے اور وہ سنہ 1974 میں کین روزوال کے بعد فائنل کھیلنے والے سب سے عمر رسیدہ کھلاڑی بن جائیں گے۔
حالانکہ ان کی عمر نے انھیں ریکارڈ 12ویں مرتبہ ومبلڈن کے فائنل تک رسائی سے نہیں روکا لیکن انھوں نے نڈال کے خلاف جیت کے بعد اپنے جذبات پر قابو رکھا۔
فیڈرر کے پاس گراس کورٹ پر سب سے زیادہ 19 ٹائٹلز کا اعزاز موجود ہے۔
'حالانکہ میں بہت خوش ہوں لیکن آج رات جشن منانے یا جذباتی ہونے کا کوئی جواز نہیں ہے۔ میرے خیال میں اپنے تجربے سے دونوں چیزوں کو الگ کرسکتا ہوں۔'
یہ فیڈرر اور نڈال کے درمیان گراس کورٹ گرینڈ سلیم میں سنہ 2008 کے بعد سے پہلا میچ ہے۔ اس میچ میں نڈال فتح یاب ہوئے تھے۔
،تصویر کا ذریعہTPN
ہیلیپ کی فتح
دوسری جانب خواتین کے سنگلز مقابلوں کا فائنل سیرینا ولیمز اور سمونا ہیلیپ کے مابین کھیلا گیا جو کہ ہیلیپ نے سٹریٹ سیٹ سے جیت کر ومبلڈن وویمن سنگلز ٹائٹل اپنے نام کر لیا۔
رومانیہ کی ہیلیپ پہلی بار یہ ٹائٹل جیتنے میں کامیاب ہوئی ہیں۔ اس میچ کا سکور چھ دو، چھ دو رہا جس پر ہیلیپ کو کافی سراہا گیا۔
اپنی جیت پر ہیلیپ کا کہنا تھا کہ یہ ان کی زندگی کا سب سے بڑا مقابلہ تھا، اور یہ کہ انھوں نے سیرینا ولیمز کے خلاف اپنے پرانے مقابلوں سے بہت کچھ سیکھ ہے۔
لٹیشا شن اور ایوان ڈوجک نے میکس ڈبل مقابلوں میں فتح حاصل کی۔
