غزہ پر بمباری کے بعد ہسپتال میں کفن میں لپٹی لاشوں کے مناظر، نتن یاہو کی حزب اللہ کو تنبیہ

لائیو کوریج

1. 22 اکتوبر 2023حزب اللہ بہت خطرناک کھیل رہی ہے: جوناتھن کونریکس

   اسرائیل ڈیفنس فورسز (IDF) کے ترجمان جوناتھن کونریکس نے کہا ہے کہ’حزب اللہ ایک بہت ہی بہت خطرناک کھیل کھیلتے ہوئے صورتحال کو خراب کر رہی ہے۔‘

   آئئ ڈی ایف کے ترجمان کا کہنا ہے کہ ’اسرائیل صرف اپنا دفاع کر رہا ہے اور اس کے اٹھائے گئے تمام اقدامات اپنی حفاظت اور احتیاط کے پیش نظر ہیں۔

   ترجمان کے ترجمان کے دعوے کے مطابق ’اب تک ہمارا ردعمل نپا تلا، حکمت عملی کے ساتھ بارڈر کے قریب (لبنان کے ساتھ) کے علاقوں تک محدود ہے ۔ تاہم حزب اللہ صورتحال کو خراب کر رہی ہے اور ہم ہر روز زیادہ سے زیادہ حملے دیکھ رہے ہیں۔‘

   جوناتھن کونریکس کا کہنا ہے کہ شمالی اسرائیل میں لبنان کے ساتھ بارڈر کے قریب ترین رہنے والے افراد کو وہاں سے منتقل کر دیا گیا ہے۔

2. 22 اکتوبر 2023امریکہ میں فلسطین کی حمایت میں مظاہرے

   

   ،تصویر کا ذریعہGetty Images

   اسرائیل کے غزہ پر اپنے جوابی فضائی حملوں کو تیز کرنے کرنے کے عزم کے سامنے آنے پر امریکہ میں ہزاروں افراد نے تنازع کے بیچ پھنسے فلسطینیوں کی حمایت میں مظاہرے کیے۔

   ان مظاہروں کی چند تصویری جھلکیاں ذیل میں موجود ہیں۔

   

   ،تصویر کا ذریعہGetty Images

   

   ،تصویر کا ذریعہGetty Images

   

   ،تصویر کا ذریعہGetty Images

3. 22 اکتوبر 2023امریکہ کا مشرق وسطیٰ میں میزائل دفاعی نظام بھیجنے کا اعلان

   پینٹاگون کا کہنا ہے کہ وہ مشرق وسطیٰ میں ٹرمینل ہائی ایلٹیٹیوڈ ایریا ڈیفنس (THAAD) سسٹم بھیج رہا ہے۔

   یہ نظام مختصر اور درمیانے فاصلے تک مار کرنے والے بیلسٹک میزائلوں کو اپنی پرواز کے ٹرمینل مرحلے میں مار گرانے کے لیے ڈیزائن کیا گیا ہے۔

   امریکی وزیر دفاع لائیڈ آسٹن کا کہنا ہے کہ اضافی فوجی خطے میں ’سٹیڈ بائے‘ حالت میں موجود ہیں تاہم انھوں نے ان کی تعداد کے حوالے سے واضح نہیں کیا۔

4. 22 اکتوبر 2023بریکنگ, اسرائیل نے غزہ کے ہسپتال پر حملہ نہیں کیا: کینیڈا

   کینیڈا کے محکمہ دفاع نے دعویٰ کیا ہے کہ 17 اکتوبر کو غزہ کے الاہلی ہسپتال پر حملے کے پیچھے اسرائیل کا ہاتھ نہیں تھا۔

   کینیڈا کے نیشنل ڈپارٹمنٹ آف ڈیفنس نے کہا ہے کہ اوپن سورس اور کلاسیفائیڈ رپورٹنگ کے تجزیے کے حوالے سے اس حملے میں ذیادہ امکان یہی ہے کہ یہ غزہ سے داغے گئے راکٹ کی وجہ سے ہوا۔

   کینیڈا کا یہ دعویٰ فرانسیسی ملٹری انٹیلی جنس کے اس بیان کے ایک روز بعد ہی سامنے آیا ہے جس میں انھوں نے کہا ہے کہ غزہ کے ہسپتال میں ہونے والا دھماکا ممکنہ طور پر اسرائیلی حملے کے بجائے فلسطینی راکٹ کے غلط فائر کی وجہ سے ہوا تھا۔

   یاد رہے کہ حماس نے اس حملے کا الزام اسرائیلی فورسز پر عائد کیا ہے تاہم اسرائیل نے ہسپتال پر حملے کے الزامات کو مسترد کر چکا ہے اور کہا ہے کہ غزہ کے اندر سے فائر کیے گئے ایک غلط راکٹ کے باعث یہ حملہ ہوا۔

   اس سے قبل امریکہ بھی اسرائیل کے غزہ میں ہسپتال پر حملے کی امکانات کو رد کیا ہے۔

5. 22 اکتوبر 2023مغربی کنارے کے پناہ گزین کیمپ پر اسرائیلی حملہ، بچوں سمیت 13 افراد ہلاک: اقوام متحدہ

   

   ،تصویر کا ذریعہEPA-EFE/REX/Shutterstock

   اقوام متحدہ نے کہا ہے کہ مغربی کنارے کے پناہ گزین کیمپ پر ایک اسرائیلی حملے میں پانچ بچوں سمیت 13 افراد ہلاک ہو گئے ہیں۔

   مغربی کنارے میں اسرائیلی حملے کی یہ تازہ ترین خبر اقوام متحدہ کی جانب سے علاقے کے بارے میں ایک علیحدہ اپ ڈیٹ کے بعد سامنے آئی ہے۔

   فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی (UNRWA) کے مطابق نور شمس پناہ گزین کیمپ میں اسرائیلی سکیورٹی فورسز کی کارروائی کے دوران مغربی کنارے میں پانچ بچوں سمیت 13 افراد کے مارے جانے کی اطلاعات ہیں۔

   سنیچر کو جاری کردہ ایک بیان میں ادارے نے بتایا ہے کہ اس حملے میں ایک اسرائیلی فوجی بھی مارا گیا جبکہ دیگر زخمی بھی ہوئے۔

   واضح رہے کہ مغربی کنارے میں 30 لاکھ فلسطینی آباد ہیں۔ پچھلے 50 سالوں میں اسرائیل نے مغربی کنارے اور مشرقی یروشلم میں کئی بستیاں تعمیر کی ہیں جہاں اب سات لاکھ سے زیادہ یہودی بھی رہتے ہیں۔

6. 22 اکتوبر 2023اسرائیلی فوج کا جنین شہر کی مسجد پر میزائل حملہ

   

   ،تصویر کا ذریعہReuters

   اسرائیلی فوج کی جانب سے مغربی کنارے کے شہر جنین میں ایک مسجد کو میزائلوں سے نشانہ بنایا گیا ہے۔

   اسرائیلی ڈیفنس فورسز (IDF) نے کہا کہ ’انٹیلی جنس ایجنسی کے مطابق مسجد کو عام شہریوں کے خلاف حملوں کی منصوبہ بندی اور ان کو انجام دینے کے لیے بطور کمانڈ سینٹر استعمال کیا جاتا تھا۔‘

   

   ،تصویر کا ذریعہReuters

   خبررساں ادارے روئٹرز کے مطابق ایک مقامی طبیب نے بتایا ہے کہ اس واقعے میں دو افراد ہلاک ہو گئے ہیںG

   تاہم بی بی سی ان معلومات کی تاحال آزادانہ تصدیق نہیں کر سکا۔

7. 22 اکتوبر 2023اسرائیل کی غزہ پر تازہ وارننگ اور مغربی کنارے پر حملہ

   اسرائیل اور غزہ جنگ میں تازہ ترین پیش رفت کے لیے ایک نظر اب تک کی چیدہ چیدہ خبروں پر۔

   • اسرائیل ڈیفنس فورسز (IDF) نے مغربی کنارے کے شہر جنین میں ایک عسکریت پسندوں کے ایک کمپاونڈ پر حملہ کرنےکا دعویٰ کیا ہے جس میں ایک مسجد کے اندر حماس کا مبینہ طور پر ایک سیل بھی شامل تھا۔

   • اقوام متحدہ کا کہنا ہے کہ مغربی کنارے کے نور شمس پناہ گزین کیمپ میں اسرائیلی سیکیورٹی فورسز کی کارروائی میں پانچ بچوں سمیت 13 افراد ہلاک ہوئے ہیں۔

   • آئی ڈی ایف کے ترجمان، ڈینیئل ہگاری نے سنیچر کو کی جانے والی ایک نیوز کانفرنس میں کہا تھا کہ اسرائیلی فوج غزہ پر اپنے حملوں کا دائرہ کار وسیع اور شدید کر دے گی۔

   • گنجان آباد غزہ کی پٹی میں امداد لے جانے والے پہلے ٹرک ہفتے کے روز مصر سے فلسطینیوں کو انتھائی ضروری خوراک، پانی اور طبی سامان پہنچا رہے تھے۔
   • دو ہفتے قبل حماس کی جانب سے اسرائیل پر حملے کیے گئے جس میں 1400 سے زائد افراد ہلاک ہوئے تھے۔ اسرائیل نے جوابی فضائی حملوں میں غزہ میں 4,300 سے زائد افراد ہلاک ہو چکے ہیں۔

8. 22 اکتوبر 2023امریکہ کا غزہ میں داخلے کے لیے رفح کراسنگ کُھلی رکھنے کا مطالبہ

   

   ،تصویر کا ذریعہGetty Images

   اقوام متحدہ کی جانب سے جاری ہونے والے ایک بیان میں یہ کہا گیا تھا کہ 20 امدادی ٹرک جو اُس وقت مصر سے غزہ جانے کے منتظر تھے وہ ’سمندر میں ایک قطرہ‘ ہوں گے۔

   اب 20 ٹرکوں نے اس کراسنگ کو عبور کر لیا ہے، جس پر اسرائیل نے پہلے اتفاق کیا تھا۔

   خبر رساں ادارے اے ایف پی کے مطابق امریکہ نے اس کا خیر مقدم کیا ہے لیکن وزیر خارجہ انٹونی بلنکن نے بھی تمام فریقین پر زور دیا ہے کہ وہ غزہ کے عوام کی فلاح و بہبود کے لیے ضروری امداد کی مسلسل نقل و حرکت کو ممکن بنانے کے لیے رفح کراسنگ کو کھلا رکھیں۔

   بلنکن نے کہا کہ ’ہم واضح کر چکے ہیں کہ حماس کو امداد شروع ہونے والے سلسلے میں مداخلت نہیں کرنی چاہیے۔‘

   اینٹونی بلنکن کا مزید کہنا تھا کہ ’فلسطینی شہری حماس کی پُرتشدد کاروائیوں کے ذمہ دار نہیں ہیں اور انھیں حماس کی مذموم کارروائیوں کا خمیازہ نہیں بھگتنا چاہیے۔‘

9. 22 اکتوبر 2023اسرائیلی فوج لبنان کی سرحد پر جنگ کی تیاری کر رہی ہے, اینا فوسٹر، بی بی سی نیوز اسرائیل

   

   لبنان کے ساتھ اسرائیل کی سرحد پر بڑی تعداد میں اسرائیلی فوجی اس جنگ میں ممکنہ طور پر نئے شمالی محاذ کی تیاری کر رہے ہیں۔

   سرحدی علاقے کو ایک نئی فوجی آڈے میں تبدیل کیا جا رہا ہے، توپ خانہ بھی تیار ہے اور بکتر بند گاڑیاں بھی تیار کی جا رہی ہیں۔

   اسرائیل اس سرحد کو مضبوط بنانے کے لئے ہر ممکن کوشش کر رہا ہے، مقامی قصبوں اور دیہاتوں کو منتقل کیا جا رہا ہے اور فوجیوں کو وہاں بھیجا جا رہا ہے۔

   اسرائیلی دفاعی افواج کے فوجی نے بی بی سی کی اینا فوسٹر کو بتایا ’یہ میری پہلی جنگ نہیں ہے کیونکہ ہمارے ارد گرد اندھیرا چھا جاتا ہے تو ایک ہیلی کاپٹر سرحد پر حزب اللہ کے ٹھکانوں کو شعلوں سے روشن کرتا ہے۔‘

   ’میں نے پورے اسرائیل میں اتنی بڑی تعداد میں شدت پسندوں کے ٹھکانے کبھی نہیں دیکھے۔ سب کے حوصلے بلند ہیں، اور ہم ہر قسم کے حالات سے نمٹنے کی صلاحیت رکھتے ہیں۔‘

   اسرائیلی دفاعی افواج کے رُکن نے بتایا کہ ’اسرائیل میں ہر کوئی کسی ایسے شخص کو جانتا ہے جس نے اس ہفتے میں اپنی جان گنوائی۔ لیکن جب ہم یہاں ہوتے ہیں، تو ہم خوف کے بارے میں نہیں سوچتے، ہم جیتنے اور خطرے کو ختم کرنے کے بارے میں سوچ رہے ہیں تاکہ یہ دوبارہ کبھی نہ ہو۔

10. 22 اکتوبر 2023بی بی سی اردو کے لائیو پیج میں خوش آمدید

    بی بی سی اردو کے لائیو پیج میں خوش آمدید۔ یہاں ہم آپ کے لیے غزہ اسرائیل جنگ سے متعلق تازہ ترین اپ ڈیٹس شامل کر رہے ہیں۔

    21 اکتوبر کی خبروں کو جاننے کے لیے آپ یہاں کلک کر سکتے ہیں۔

11. 22 اکتوبر 2023غزہ پر بمباری کے بعد ہسپتال میں کفن میں لپٹی لاشوں کے مناظر، نتن یاہو کی حزب اللہ کو تنبیہ