آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انڈیا میں گذشتہ 24 گھنٹوں کے دوران تین لاکھ 66 ہزار سے زائد نئے متاثرین سامنے آئے ہیں جبکہ اسی دورانیے میں 3745 افراد ہلاک ہوئے ہیں۔ پاکستان میں گذشتہ روز ساڑھے تین ہزار کے لگ بھگ افراد کورونا سے متاثر ہوئے ہیں جبکہ مجموعی طور پر ملک بھر میں 78 ہلاکتیں ہوئی ہیں۔
انڈیا میں کورونا وائرس کی دوسری لہر کے باعث گذشتہ 24 گھنٹوں کے دوران 366310 افراد میں کووڈ 19 کی تشخیص ہوئی ہے۔
انڈیا میں گذشتہ روز 3745 افراد اس وائرس کے باعث ہلاک ہوئے۔
پاکستان میں گذشتہ 24 گھنٹوں کے دوران مزید 3447 افراد میں کوووڈ کی وبا کی تصدیق ہوئی ہے۔
نیشنل کمانڈ اینڈ کنٹرول سنٹر کے مطابق ایک دن میں مزید 78 افراد کووڈ 19 وائرس کے باعث جان کی بازی ہار گئے۔
ملک بھر میں 37756 کیے گئے ٹیسٹوں میں وبا کے مثبت آنے کی شرح 9.12 فیصد رہی۔
محکمہ صحت خیبر پختونخوا کے مطابق گزشتہ 24 گھنٹوں میں کووڈ 19 سے مزید 642 افراد متاثر جبکہ 27 مریض ہلاک اور 963 صحت یاب ہوئے ہیں۔
صوبے میں کووڈ سے صحت یاب مریضوں کی تعداد 1 لاکھ 11 ہزار 143 ہو گئی ہے۔
صوبے میں کووڈ کیسز کی مجموعی تعداد 1 لاکھ 24 ہزار 484 اور اموات 3615 ہوگئی ہیں۔
خیبرپختونخوا میں فعال کیسز کی تعداد 9 ہزار 727 ہے۔ گذشتہ 24 گھنٹے کے دوران پشاور میں 113، مردان میں 64، ہری پور میں 57، ملاکنڈ میں 56 اور چارسدہ میں 52 نئے مریض سامنے آئے ہیں۔
خبر رساں ادارے روئٹرز کے مطابق انڈیا کی وزارت دفاع کا کہنا ہے کہ صحت کے نظام پر بوجھ کے باعث فوج کے سینکڑوں سابقہ میڈیکل افسران کو بڑھتے مریضوں کی مدد کے لیے بھرتی کیا جائے گا۔
ایک بیان کے مطابق قریب 400 میڈیکل افسران کو 11 ماہ تک کے لیے کنٹریکٹ پر تعینات کیا جا رہا ہے۔ اس کے علاوہ کئی فوجی ڈاکٹر آن لائن مریضوں سے رابطہ کرسکیں گے۔
ملک میں کووڈ کی دوسری لہر کے دوران وائرس کا پھیلاؤ بڑھ رہا ہے۔ اتوار کو انڈیا میں کورونا سے مسلسل دوسرے دن یومیہ چار ہزار اموات کی تصدیق ہوئی تھی۔
پی آئی اے کا ایک خصوصی طیارہ ویکسین کی مزید دس لاکھ خوراکیں لے کر پاکستان پہنچ گیا ہے۔ حکام کے مطابق ویکسین کی یہ خوراکیں چین سے اسلام آباد لائی گئی ہیں۔
سینوویک ساخت کی ویکسین حکومت پاکستان اور وزارت صحت کی ایما پر خصوصی طیارہ سے لائی گئی ہیں۔
حکام کا کہنا ہے کہ ملک میں کورونا کی شدت میں اضافے کے باعث ویکسین درآمد میں تیز کردی گئی ہے۔
اس سے قبل پی آئی اے کی چھ خصوصی پروازیں ویکسین کی لاکھوں خوراکیں لے کر پاکستان پہنچی ہیں۔
سندھ حکومت کے مطابق صوبے میں ’پاکستان کا سب سے بڑا کورونا ویکسینیشن سینٹر‘ کراچی میں قائم کر دیا گیا ہے جس کا افتتاح صوبائی وزیر صحت ڈاکٹر عذرا پیچوہو نے کیا ہے۔
ایکسپو سینٹر کراچی میں قائم ماس ویکسینیشن سینٹر کے افتتاح کے موقع پر این سی او سی حکام، پارلیمانی سیکریٹری قاسم سراج سومرو، سیکریرٹری صحت کاظم جتوئی اور دیگر بھی موجود تھے۔
حکام کے مطابق اس سینٹر میں ’یومیہ 25 سے 30 ہزار افراد کو ویکسین لگائی جا سکے گی۔‘
ڈاکٹر عذرا پیچوہو کا کہنا ہے کہ 16 مئی سے تمام افراد کے لیے ویکسینیشن کا سلسلہ شروع کیا جائے گا، اب 40 سال سے کم عمر کے افراد بھی ویکسین لگوا سکیں گے۔ ’سندھ میں کوویکس، ایسٹرا زینیکا، سائنو فارم اور کین سائنو ویکسینز لگائی جائیں گی۔‘
کورونا کی روک تھام کے لیے این سی او سی کی ہدایات کے مدِنظرکوئٹہ شہر میں اتوار کو دوسرے روز شہر کے مرکزی علاقوں میں تمام بڑے تجارتی مراکز بند رہے۔
اس سلسلے میں شہر میں دس مقامات پر رکاوٹیں کھڑی کرنے کے علاوہ پولیس اور فرنٹیئر کور کی بھاری نفری تعینات کی گئی تھی جبکہ شہر میں قانون نافذ کرنے والے اداروں کے اہلکار گشت بھی کرتے رہے۔
شہر کے جن علاقوں میں ناکے لگائے گئے ہیں ان میں عالمو چوک، یونیورسٹی چوک ، ٹی کراس، جوائنٹ بروری روڈ کراس، چمن پھاٹک، گوالمنڈی چوک، میزان چوک، منان چوک، آرٹ سکول میکانگی روڈ اور سائنس کالج چوک شامل ہیں۔
شہر کے تمام مراکز میں مارکیٹیں مکمل طور پر بند رہیں تاہم بنیادی اشیائے صرف کی دکانوں کے علاوہ میڈیکل سٹور وغیرہ کھلے رہے۔
درایں اثنا ڈپٹی کمشنر کوئٹہ اورنگزیب بادینی نے شہریوں سے اپیل کی ہے کہ وہ کسی زحمت سے بچنے کے لیے شہر آنے سے گریز کریں۔
ترجمان پی آئی اے کے مطابق این سی او سی کی ہدایات کی روشنی میں مقامی ائیرپورٹس پر رش کی صورتحال سے بچنے کے لیے فیصلہ کیا گیا ہے کہ:
برطانوی وزیر مائیکل گو نے گلے ملنے اور لوگوں کو ایک دوسرے کے گھروں میں جانے پر پابندی ختم ہو جانے کے حوالے سے کہا ہے کہ ’سب ٹھیک ہے‘ اور وزیر اعظم بورس جانسن کل اس بات کی تصدیق کریں گے کہ 17 مئی کو پابندیوں میں نرمی کی جا سکتی ہے۔
فی الحال لوگوں کو مشورہ دیا جاتا ہے کہ وہ ان لوگوں سے قریبی رابطے سے گریز کریں جن کے ساتھ وہ نہیں رہتے ہیں۔
اینڈریو مار شو میں گفتگو کرتے ہوئے گو نے کہا: 'معاشرتی دوری کے وسیع جائزے کے تعصب کے بغیر، دوست احباب اور کنبہ کے مابین دوستانہ رابطے، دوسرے قریبی رابطے۔۔۔ کچھ ایسی چیزیں ہیں جنھیں ہم بحال دیکھنا چاہتے ہیں۔‘
انڈیا کے زیرِ انتظام جموں وکشمیر کے تمام 20 اضلاع میں، کورونا کرفیو میں 17 مئی کی شام 7 بجے تک توسیع کردی گئی ہے۔
تازہ ترین آرڈر کے مطابق اس بار کورونا کرفیو پہلے کے مقابلے میں سخت ہوگا اور اس دوران صرف میڈیکل اور کھانے پینے جیسی ضروری خدمات ہی کھولنے کی اجازت ہوگی۔
اس دوران 25 سے زائد افراد کو شادی کی تقاریب میں شرکت کی اجازت نہیں ہوگی۔
اس سے قبل کورونا کرفیو کی مدت 10 تاریخ کو صبح سات بجے تک ختم ہونے والی تھی۔
قرون وسطیٰ کی ایک غیر معمولی عمارت کی بحالی کا مطلب ہے کہ چرچ میں اب ایک مجسمہ ماسک پہنے ہوئے موجود ہے۔
ہارٹ فورڈ شائر کے سینٹ البانس کیتھیڈرل میں سینٹ امفیبلس کے مزار کو نمائش کے لیے اس وقت پیش کیا جائے گا جب اس عمارت کو 17 مئی کو زائرین کے لیے دوبارہ کھولا جائے گا۔
چرچ کے ترجمان نے کہا ’یہ مجسمہ ہمیں سینٹ البانس کی تاریخ کو آگے کی طرف لیجانے اور پیچھے مڑ کر دیکھنے کی یاد دلاتا ہے۔‘
اس کام کو مکمل ہونے میں ایک سال سے زیادہ کا عرصہ لگا۔ اس کے لیے ایک گرانٹ اور ایک ہزار سے زیادہ دیگر ڈونرز نے مالی اعانت فراہم کی۔
پچھلے سال جون میں اس ے کھولا جانا تھا، لیکن کورونا وائرس کی وجہ سے کام میں تاخیر ہوئی۔
انڈیا کی ریاست اترپردیش کی حکومت نے کورونا وائرس کے پھیلاؤ کو روکنے کے لیے 17 مئی تک نافذ کرفیو میں توسیع کردی ہے۔
اس سے قبل کرفیو صبح سات بجے ختم ہونا تھا۔
ایڈیشنل چیف سکریٹری (انفارمیشن) نونیت سہگل نے ایک بیان جاری کرتے ہوئے کہا ہے کہ ریاست میں عائد کورونا کرفیو میں 17 مئی تک توسیع کردی گئی ہے۔
اتر پردیش میں سنیچر کے روز کورونا کے 26،847 نئے کیس رپورٹ ہوئے اور 298 افراد کی موت ہوگئی۔
انڈیا میں بڑھتے ہوئے انفیکشن اور ویکسین کا اثر پڑوسی ملک بنگلہ دیش پر بھی پڑ رہا ہے۔ بنگلہ دیش میں صحت کے ماہرین نے خبردار کیا ہے کہ بنگلہ دیش میں ویکسین کی کمی ہوسکتی ہے۔
ماہرین کا خیال ہے کہ ملک میں ویکسین کی مہم کو تیز کرنے کی ضرورت ہے کیونکہ وائرس کی نئی اور خطرناک شکلیں پائی جارہی ہیں۔
خبر رساں ادارے اے پی کے مطابق ملک کی وزارت صحت نے سنیچر کے روز کہا تھا کہ کورونا وائرس کی ’انڈین قسم‘ کی پہلی بار بنگلہ دیش میں تشخیص ہوئی ہے۔
کئی ہفتوں سے زیادہ تر کیسز میں جنوبی افریقن قسم پائی گئی۔ بنگلہ دیش میں حکام کو تشوی ہے کہ نئی قسم پہلے کی مختلف حالتوں کے مقابلے میں تیزی سے پھیلتی ہے اور یہ ممکن ہے کہ ویکسین کا ان پر کوئی اثر نہ پڑے۔
ماہرین کے مطابق گذشتہ دو ہفتوں میں بنگلہ دیش میں انفیکشن میں کمی واقع ہوئی ہے۔ تاہم اس کی اصل وجہ معلوم نہیں ہوسکی ہے۔
ماہرین اس کو ویکسینیشن مہم کو تیز کرنے کے لیے صحیح وقت کے طور پر لے رہے ہیں۔
بنگلہ دیش کے چائلڈ ہیلتھ ریسرچ فاؤنڈیشن سے وابستہ سائنس دان سنجوٹی ساہا نے اے پی کو بتایا ’یہ وقت ہے کہ ویکسین لگائی جائے، انفیکشن کی شرح کو کم رکھیں اور نئی قسموں کو آنے سے روکیں۔‘
لیکن انڈیا نے اپنے ملک میں بڑھتیے متاثرین کے پیش نظر ویکسین کی برآمد پر پابندی عائد کردی ہے۔
سیرم انسٹی ٹیوٹ آف انڈیا کو جون تک بنگلہ دیش میں تیس ملین خوراک مہیا کرنا تھیں، ہر ماہ 50 لاکھ۔ لیکن اب تک یہ کمپنی صرف 70 لاکھ خوراکیں فراہم کرنے میں کامیاب رہی ہے۔
ایران میں کورونا کی چوتھی لہر کو روکنے کے لیے، پورے ملک میں پانچ دن تک ٹریفک پابندیوں کا اعلان کیا گیا ہے۔ تیزی سے ویکسین لگوانے کی ضرورت پر زور دیتے ہوئے صدر حسن روحانی کا کہنا ہے کہ پہلے دستیاب کوئی بھی ویکسین ’بہترین ویکسین‘ ہے۔
ایران میں نیشنل کورونا ہیڈ کوارٹر کے ترجمان، علیرضی رائے نے اعلان کیا ہے کہ منگل 11 مئی بروز پیر سے ہفتہ 15 مئی دوپہر 12 بجے تک ایران کے تمام شہروں میں ٹریفک کی پابندی ہوگی اور خلاف ورزی کرنے والوں پر جرمانہ عائد کیا جائے گا۔
ایران میں عید الفطر کی چھٹی کے ساتھ ہی مختلف صوبوں کے درمیان سفر پر پابندی عائد کردی گئی ہے۔
ایران کی وزارت صحت کے سرکاری اعدادوشمار کے مطابق 283 افراد کی ہلاکت کے ساتھ کووڈ 19 کے متاثرین کی تعداد 74،000 سے زیادہ ہوگئی ہے۔
پچھلے تخمینے سے ظاہر ہوا ہے کہ اصل اعدادوشمار سرکاری اعدادوشمار سے دوگنا زیادہ ہیں۔
ایرانی وزارت صحت کا کہنا ہے کہ اس وقت 5،500 شدید مریضوں کو انتہائی نگہداشت کے یونٹ میں داخل کیا جارہا ہے۔
وزارت صحت نے اعلان کیا کہ سنیچر تک 1286000 افراد نے ویکسین کی پہلی خوراک حاصل کی تھی اور 262000 افراد نے دونوں خوراکیں وصول کی تھیں۔
کورونا کے ترجمان نے کہا کہ 80 سال سے زیادہ عمر کے افراد جن کو ابھی تک قطرے نہیں پلائے گئے تھے وہ سنیچرسے آن لائن رجسٹریشن کرواسکتے ہیں۔
دہلی کے وزیر اعلی اروند کیجریوال نے دہلی میں لاک ڈاؤن میں مزید ایک ہفتے کی توسیع کردی ہے۔ وزیراعلیٰ نے کہا کہ اس مرتبہ لاک ڈاؤن میں مزید سختی کی جائے گی۔
کیجریوال نے کہا کہ لاک ڈاؤن سے پہلے کورونا میں انفیکشن کی شرح 35 فیصد تھی جو اب 23 فیصد ہوگئی ہے۔
اروند کیجریوال نے کہا کہ لاک ڈاؤن میں توسیع کی جا رہی ہے۔ اس بار لاک ڈاؤن سخت ہوگا۔ میٹرو بھی کل یعنی پیر سے نہیں چلے گی۔
انڈیا میں کورونا کی دوسری لہر کی تباہ کاریاں جاری ہیں اور اب ڈاکٹر کووڈ 19 سے صحتیاب ہونے والے مریضوں میں ایک غیر معمولی انفیکشن کی اطلاع دے رہے ہیں۔
Mucormycosis ایک بہت ہی نایاب انفیکشن ہے۔ یہ عام طور پر مٹی، پودوں، کھاد اور بوسیدہ پھلوں اور سبزیوں میں پایا جاتا ہے۔
ممبئی سے تعلق رکھنے والے آنکھوں کے سرجن ڈاکٹر اکشے نائر کہتے ہیں ’یہ مادہ اور ہوا اور یہاں تک کہ صحت مند لوگوں کی ناک اور بلغم میں پایا جاتا ہے۔‘
یہ ہڈیوں، دماغ اور پھیپھڑوں کو متاثر کرتا ہے اور ذیابیطس یا شدید مدافعتی افراد جیسے کینسر کے مریضوں یا ایچ آئی وی / ایڈز کے شکار افراد میں جان لیوا ثابت ہوسکتا ہے۔
ڈاکٹر کا خیال ہے کہ میوکورمائکوسیس mucormycosis، جس میں اموات کی مجموعی شرح 50 فیصد ہے، ہوسکتا ہے کہ شدید بیمار کووڈ 19 مریضوں کی زندگی بچانے کے لیے استعمال ہونے والے سٹیرائڈز اس کی وجہ بنے ہوں۔
سٹیرائڈز، کووڈ 19 مریضوں کے پھیپھڑوں میں سوجن کو کم کرتے ہیں اور جب جسم کا مدافعتی نظام کورونا وائرس سے لڑنے کے لیے اوور ڈرائیو میں جاتا ہے، اس وقت کچھ نقصان کو کم کرنے میں مددگار ہوتے ہیں۔
لیکن وہ ذیابیطس اور غیر ذیابیطس کووڈ 19 مریضوں دونوں میں قوتِ مدافعت کو کم کرتے ہیں اور بلڈ شوگر کی سطح کو بڑھاتے ہیں۔
ڈاکٹروں کا ماننا ہے کہ قوتِ مدافعت میں کمی mucormycosis کا باعث بن سکتی ہے۔
دنیا کے مشہور میڈیکل جریدے دی لانسیٹ نے ایک اداریہ شائع کیا جس میں انڈین وزیر اعظم مودی پر تنقید کرتے ہوئے لکھا گیا ہے کہ ان کی توجہ ٹویٹر پر اپنی تنقید کو دبانے پر زیادہ اور کووڈ 19 وبا کو کنٹرول کرنے پر کم ہے۔
جرنل نے لکھا ’ایسے مشکل وقت میں مودی کی خود پر تنقید اور بحث دبانے کی کوشش معافی کے لائق نہیں ہے۔‘
اس رپورٹ کے مطابق انسٹی ٹیوٹ آف ہیلتھ میٹرکس اینڈ ایویلیواشن کے اندازوں کے مطابق انڈیا میں کورونا وبا کی وجہ سے اموات کی تعداد یکم اگست تک دس لاکھ تک جا سکتی ہے۔
لانسیٹ کے مطابق کورونا کے خلاف ابتدائی کامیابی کے بعد سے حکومت کی ٹاسک فورس اپریل تک ایک بار بھی نہیں ملی۔
جریدے کے مطابق اس فیصلے کا نتیجہ ہمارے سامنے ہے۔ اب وبا بڑھتی جارہی ہے اور انڈیا کو نئے اقدامات کرنا ہوں گے۔ اس کی کامیابی کا انحصار اس بات پر ہوگا کہ حکومت اپنی غلطیوں کو قبول کرکے شفافیت کے ساتھ ملک کو چلاتی ہے یا نہیں۔
پاکستان میں گذشتہ روز کووڈ 19 سے 118 افراد ہلاک ہوئے جبکہ 3785 افراد میں اس وائرس کی موجودگی کی تصدیق ہوئی۔
گذشتہ 24 گھنٹوں کے دوران ملک میں 40,736 ٹیسٹ کیے گئے جبکہ مثبت کیسز کی شرح 9.29 رہی۔
انڈیا میں کورونا وائرس کی دوسری لہر کے باعث مسلسل چوتھے روز چار لاکھ سے زیادہ افراد (403738) میں کووڈ 19 کی تشخیص ہوئی۔
انڈیا میں گذشتہ روز 4092 افراد اس وائرس کے باعث ہلاک بھی ہوئے۔
سری لنکا میں محکمہ صحت کے ایک اعلیٰ عہدیدار ڈاکٹر چندیما جیوردنا نے کہا ہے کہ کولمبو میں ایک شخص میں کووڈ 19 کی انڈین قسم کی تشخیص ہوئی ہے۔
ان کا کہنا تھا کہ متاثرہ شخص میں علامات ظاہر ہونے کے بعد اس کا کووڈ ٹیسٹ کیا گیا تھا اور کولمبو کے ایک نجی ہسپتال میں نمونے بھیجے گئے تھے جس کے بعد کورونا کی انڈین قسم کی تصدیق ہوئی۔
یہ شخص حال ہی میں انڈیا سے سری لنکا آیا تھا۔