انڈیا میں سوا تین لاکھ سے زیادہ نئے یومیہ متاثرین، کورونا وارڈ میں آگ لگنے سے 13 مریض ہلاک

لائیو کوریج

1. 22 اپريل 2021لاہور: عوامی مقامات اور پبلک ٹرانسپورٹ پر کورونا ایس او پیز کی خلاف ورزی پر مقدمات

   پاکستان کے صوبہ پنجاب کے شہر لاہور میں بغیر ماسک موٹرسائیکل، گاڑیوں کے خلاف کارروائی کے دوران 157457 ہزار گاڑیوں، موٹرسائیکلوں کو چالان ٹکٹس جاری کیے گئے ہیں۔

   یاد رہے کہ صوبے میں سب سے زیادہیومیہ کورونا متاثرین کا تعلق اسی شہر سے ہے۔

   پبلک ٹرانسپورٹ میں کورونا ایس او پیز کی خلاف ورزی پر 12 مقدمات بھی درج کیے گئے ہیں۔

   شہر میں دوران سفر 50 فیصد سے زائد سواریاں بٹھانے اور کورونا ایس او پیز کی خلاف ورزی پر 1062 گاڑیاں بند کی گئی ہیں۔

   ایک لاکھ سے زائد موٹرسائیکلوں کو چالان ٹکٹ جاری کیے گئے۔

   شہر میں ماسک نہ پہننے والوںکے خلاف مجموعی طور پر 1454 مقدمات کا اندراج کیا گیا۔

2. 22 اپريل 2021ویکسینیشن کے لیے ماقی ماندہ طبی اہلکاروں کی رجسٹریشن کا عمل شروع

   پاکستان میں ویکسینیشن کے پہلے مرحلے میں رہ جانے والے باقی ماندہ طبی اہلکاروں کو ویکسینیشن کے لیے رجسٹر کیا جا رہا ہے۔

   وزیر اعظم کے معاون خصوصی برائے صحت فیصل سلطان کا کہنا ہے کہ ان طبی اہلکاروں کو ایک پورٹل پر رجسٹر کیا جا رہا ہے جو 30 اپریل تک کھلا ہے۔

   ان کا کہنا تھا کہ طبی اہلکار دی گئی ہدایات کے مطابق خود کو رجسٹر کروائیں

3. 22 اپريل 2021کورونا: لاشوں کی بڑھتی تعداد کے سبب کھیتوں میں جنازوں کی اجازت

   انڈیا کی ریاست کرناٹک میں حکومت نے کووڈ 19 کے سبب مرنے والے افراد کی بڑھتی ہوئی تعداد کے پیش نظر کھلے مقامات پر آخری رسومات اور تدفین کے لیے اجازت دے دی ہے۔

   حکومت نے وائرس کے باعث مرنے والوں کے لواحقین کو کھیتوں یا نجی اراضی پر آخری رسومات اور تدفین کی اجازت دی ہے۔

   انڈیا میں ایک سوشل میڈیا صارف نے وزیر اعظم نریندر مودی کو ٹیگ کر کے ٹویٹ کیا کہ پورے انڈیا میں اس عمل کی اجازت ہونی چاہیے۔

4. 22 اپريل 2021انڈیا کی نو ریاستوں میں کورونا کے باعث 24 گھنٹوں میں کوئی ہلاکت نہیں ہوئی

   انڈیا میں کورونا وائرس سے متاثرین کی تعداد میں ریکارڈ اضافہ تو ہوا ہے لیکن کچھ ریاستیں ایسی بھی ہیں جہاں جانی نقصان کی شرح کم ہے۔

   انڈیا کی وزرات صحت کے مطابق کم از کم نو ریاستوں میں گذشتہ 24 گھنٹوں کے دوران کووڈ 19 کے سبب کوئی ہلاکت نہیں ہوئی۔

   ان ریاستوں میں لداخ، ترپورہ، سکم، میزورام، ناگالینڈ اور ارونا چل پردیش بھی شامل ہیں۔

5. 22 اپريل 2021پنجاب میں مزید 1902 کیسز، لاہور میں وائرس کا پھیلاؤ سب سے زیادہ

   پاکستان کے صوبہ پنجاب میں کورونا وائرس کے 2902 نئے کیسز رپورٹ ہونے کے بعد صوبے میں مجموعی متاثرین کی تعداد 279,437 ہو گئی۔

   ترجمان پرائمری اینڈ سیکنڈری ہیلتھ کیئر کے مطابق سب سے زیادہ متاثر ہونے والا شہر لاہور ہے جہاں مزید 1466 کیسز رپورٹ ہوئے ہیں جبکہ اس کے بعد راولپنڈی 133، فیصل آباد 179، سرگودھا 110، بہاولپور 103اور ملتان 204 کیسز کے ساتھ زیادہ پھیلاؤ والے شہر ہیں۔

   24 گھنٹوں میں مزید 54 ہلاکتوں کے بعد صوبے میں کورونا سے ہونے والی اموات کی کل تعداد 7718 ہوچکی ہے۔

   اب تک 4,404,301 ٹیسٹ کیے جا چکے ہیں۔ جبکہ صوبے میں کورونا وائرس سے صحت یاب ہونے والوں کی تعداد 226,380 ہو چکی ہے۔

6. 22 اپريل 2021عمان نے انڈیا ، پاکستان اور بنگلہ دیش پر سفری پابندی عائد کردی

   عمان نے 24 اپریل سے انڈیا، پاکستان اور بنگلہ دیش سے آنے والے لوگوں کے داخلے پر پابندی کا اعلان کیا ہے۔

   خلج ٹائمز کے مطابق ، یہ فیصلہ ملک کی اعلیٰ ترین کمیٹی نے لیا ہے ، جو کورونا وائرس کے انفیکشن کے پھیلاؤ کو روکنے کے لیے کام کرتی ہے۔

   ایک بیان کے مطابق ، پابندی کا اطلاق ان مسافروں پر بھی ہوگا جو گذشتہ 24 گھنٹوں کے دوران ان تینوں ممالک سے پروازیں منتقل کرچکے ہیں۔ یہ پابندی 21 اپریل کی شام 6 بجے سے لاگو ہوگی۔

   عمانی شہری ، سفارت کار ، صحت کے کارکنان اور ان کے اہل خانہ کو ان لوگوں میں شامل ہیں جنہیں اس پابندی سے مستثنیٰ کیا گیا ہے۔

   پاکستان ، انڈیا اور بنگلہ دیش میں حالیہ دنوں میں کورونا وائرس کے کیسز میں زبردست اضافہ دیکھا گیا ہے۔

   نئے تارکین وطن ان ممالک کے لیے بہت مشکل ثابت ہورہے ہیں۔پچھلے چوبیس گھنٹوں میں تین لاکھ سے زیادہ کیسز کے ساتھ ، انڈیا ایک دن میں رپورٹ ہونے والے کورونا کیسز کے لحاظ سے دنیا کا سب سے متاثرہ ملک بن گیا ہے۔

7. 22 اپريل 2021پشاور کے لیڈی ریڈنگ ہسپتال میں کورونا سے متاثرہ مریضوں کی ریکارڈ تعداد

   پاکستان کے صوبہ خیبر پختثنخوا کے شہر پشاور میں لیڈی ریڈنگ ہسپتال کے ترجمان کے مطابق ہسپتال میں کورونا وائرس سے متاثرہ مریضوں کی تعداد آج تک کی بلند ترین 422 تک پہنچ گئی ہے۔

   ترجمان محمد عاصم کے مطابق آئی سی یو میں 32 مریض داخل ہیں۔

   انھوں نے بتایا کہ ایل آر ایچ میں کورونا کے مریضوں کے لیے 485 بیڈز مختص کیے گئے ہیں۔ جبکہ صوبے کے مختلف اضلاع سے مریض ایل آر ایچ شفٹ ہو رہے ہیں۔

   ان کا کہنا تھا کہ ’اس وبا سے نمٹنے کے لیے عوام کا تعاون انتہائی ضروری ہے وبا تیزی سے پھیل رہی ہے۔‘

8. 22 اپريل 2021بریکنگ, پاکستان: چوبیس گھنٹوں میں مزید 5857 افراد کورونا سے متاثر، 98 ہلاکتیں

   پاکستان میں نیشنل کمانڈ اینڈ کنٹرول سینٹر کے مطابق گذشتہ چوبیس گھنٹوں میں مزید 5857 افراد میں کورونا وائرس کی تصدیق ہوئی ہے۔

   مجموعی طور پر 57591 ٹیسٹ کیے گئے جن میں مثبت کیسز کی شرح 10.16 فیصد رہی۔

   24 گھنٹوں کے دوران مزید 98 افراد جان کی بازی ہارگئے۔ سب سے زیادہ ہلاکتیں صوبہ پنجاب میں ہوئیں جبکہ دوسرے نمبر پر خیبرپختونخوا ہے۔

   91 افراد ہسپتالوں میں ہلاک ہوئے۔

   اب تک پاکستان میں اس وائرس سے صحت یاب ہونے والے افراد کی تعداد 676605 ہے۔

9. 22 اپريل 2021دلی ہائی کورٹ: ’بھیک مانگیں، قرض لیں یا چوری کریں لیکن آکسیجن کی دستیابی کو یقینی بنائیں‘

   انڈیا میں دلی ہائی کورٹ نے مرکزی حکومت کو دارالحکومت دلی میں آکسیجن کی فراہمی کو یقینی بنانے کا حکم دیا ہے۔

   عدالت نے آکسیجن کی فراہمی کے لیے ایک ہسپتال کی درخواست پر فوری سماعت کرتے ہوئے مرکزی حکومت کو کہا: ’ہمیں فرق نہیں پڑتا، بھیک مانگیں، قرض لیں یا چوری کریں لیکن آکسیجن کی دستیابی کو یقینی بنائیں۔‘

   واضح رہے کہ دلی میں کل ایک ہسپتال نے الزام لگایا تھا کہ پڑوسی ریاست ہریانہ کے اہلکاروں نے اپنے دائرہ اختیار میں ایک پلانٹ سے ریاست سے باہر آکسیجن کی فراہمی کو روک دیا ہے۔

   وہیں ہریانہ کے ایک وزیر نے دلی پر ان کی ریاست کی آکسیجن چرانے کا الزام بھی لگایا۔

   دلی حکومت نے اس سے قبل ریاست اتر پردیش پر بھی دارالحکومت کو آکسیجن کی فراہمی روکنے کا الزام عائد کیا تھا اور انہی الزامات اور جوابی الزامات کے درمیان کال شام دلی کے وزیر اعلی اروند کیجریوال نے ریاست کا آکسیجن ’کوٹہ‘ بڑھانے پر مرکزی حکومت کا شکریہ بھی ادا کیا۔

   واضح رہے کہ انڈیا میں گزشتہ 24 گھنٹوں میں 3 لاکھ سے زائد انفیکشن جبکہ 2000 اموات ریکارڈ ہوئی ہیں۔

10. 21 اپريل 2021مہاراشٹر: ناسک کے ایک ہسپتال میں آکسیجن کی کمی سے کورونا کے 22 مریض ہلاک

    انڈیا کی ریاست مہاراشٹر میں ، ناسک شہر کے ڈاکٹر ذاکر حسین اسپتال میں آکسیجن لیک ہونے سے کم از کم 22 کوووڈ مریض ہلاک ہو گئے ہیں۔

    ناسک میونسپل کارپوریشن کے کمشنر نے 22 افراد کی ہلاکت کی تصدیق کردی ہے۔ان کے مطابق ، مجموعی طور پر 150 افراد ہسپتال میں داخل ہیں اور ان میں سے 23 وینٹیلیٹر پر تھے۔

    آکسیجن لیک ہونے کی وجہ سے تقریبا آدھے گھنٹے تک ہسپتال میں آکسیجن کی رسد معطل رہی۔ خبررساں ادارے اے این آئی کے مطابق ، یہ واقعہ اس وقت پیش آیا جب ٹینکروں کے ذریعہ آکسیجن بھری جارہی تھی۔

    ناسک میونسپل کارپوریشن کے کمشنر کیلاش جادھو نے کہا ، ’ٹیکنیکل انجینئر کی مدد سے ، رساؤ کو روک دیا گیا ہے۔ لیکن اب صرف 25 فیصد آکسیجن باقی ہے ہسپتال میں۔ آکسیجن کی فراہمی کم ہونے کی وجہ سے لوگ زندہ رہ سکتے ہیں۔ ، لیکن جو لوگ وینٹیلیٹر پر ہیں وہ زندہ نہیں رہ سکتے۔ ہم اس حادثے کی تحقیقات کریں گے اور مجرموں کے خلاف سخت کارروائی کریں گے۔

    ناسک کو روزانہ 139 میٹرک ٹن آکسیجن کی ضرورت ہوتی ہے ، لیکن اسے روزانہ 84 میٹرک ٹن آکسیجن مل رہی ہے۔

11. 21 اپريل 2021بریکنگ, جمعے سے نئی پابندیاں، پاکستان کے بڑے شہر بند کرنے پڑ سکتے ہیں

    وفاقی وزیر برائے پلاننگ اسد عمر کا کہنا ہے کہ اگر کورونا پھیلتا رہا تو بڑے شہروں کو بند کیا جا سکتا ہے۔

    ان کا کہنا تھا کہ پاکستان میں کورونا وائرس کی صورتحال ’انتہائی سنگین‘ ہو چکی ہے اور اگر وائرس کی پھیلاؤ کی موجودہ صورتحال مزید جاری رہی تو ملک کے بڑے شہروں میں لاک ڈاؤن نافذ کیا جا سکتا ہے۔

    این سی او سی کے اجلاس کی صدرات کے بعد میڈیا سے گفتگو کرتے ہوئے اسد عمر کا کہنا تھا کہ عوام کو چاہیے کہ وہ معاملے کی سنگینی کو سمجھیں اور حفاظتی اقدامات کو یقینی بنائیں۔

    انھوں نے کہا کہ این سی او سی نے چند نئی پابندیوں کی تجاویز پر غور کیا ہے تاکہ کورونا کا پھیلاؤ روکا جا سکے۔

    انھوں نے کہا کہ ان تجاویز کے حوالے سے صوبوں سے جلد بات کی جائے گی اور جمعے کے روز نئی پابندیوں کا اعلان کیا جائے گا۔

    انھوں نے کہا کہ ملک کے چند بڑے شہروں میں کیسز کے مثبت آنے کی شرح خطرناک حد تک بڑھی ہے جس کے پیش نظر نئے اقدامات اٹھانے ضروری ہیں۔

12. 21 اپريل 2021انڈیا میں کورونا کے متاثرین میں ریکارڈ اضافہ، حکومت کا ویکسین اور دیگر دواؤں کے پروڈکشن بڑھانے کا اعلان

    انڈیا میں کورونا کے تیزی سے پھیلنے کا سلسلہ جاری ہے۔ گزشتہ چوبیس گھنٹوں کے اعداد و شمار کے مطابق قریبا تین لاکھ افراد متاثر ہوئے۔ یہ تعداد دنیا کے کسی بھی ملک میں ایک دن میں ریکارڈ کی گئی کورونا سے متاثر ہونے والوں والوں کی دوسری سب سے بڑی تعداد ہے ۔ صرف ریاست مہاراشٹر میں 519 اموات ہوئی ہیں۔

    دارالحکومت دلی میں چوبیس گھنٹے میں 28395 نئے کیسز درج کیے گئے۔ یہاں ایک دن میں 277 اموات ہوئی ہیں۔

    شہرکے ہسپتالوں میں افراتفری کا عالم ہے۔ ہسپتال پوری طرح بھر چکے ہیں اور اکسیجن کی شدید قلت کی خبریں مل رہی ہیں۔

    وزیر اعظم نریندر مودی نے گذشتہ شب قوم سے اپنے خطاب میں کہا کہ ویکسین اور دوسری تمام دواؤں کے پروڈکشن میں اضافہ کیا جا رہا ہے۔

    انھوں نے ریاستوں پر زور دیا کہ کہ وہ کورونا پر قابو پانے کے لیے ہرممکن اقدامات کریں تاکہ ملک کو لاک ڈاؤن کی صورحال سے بچایا جا سکے۔

    کورونا کی بگڑتی ہوئی صورتحال کے پیش نظر برطانیہ، امریکہ، سنگا پور، ہانگ کانگ اور بعض دوسرے ممالک نے اپنے شہریوں کو انڈیا سفر نہ کرنے کا مشورہ دیا ہے۔

13. 21 اپريل 2021بریکنگ, 24 گھنٹوں کے دوران انڈیا میں 2،95،000 افراد کورونا سے متاثر

    انڈیا میں گذشتہ 24 گھنٹوں میں کورونا انفیکشن کے 2،95،041 واقعات رپورٹ ہوئے ہیں۔

    منگل کو کووڈ انفیکشن کی وجہ سے مجموعی طور پر 2023 افراد ہلاک ہوئے۔ پہلی بار 2000 سے زیادہ افراد ہلاک ہوئے ہیں۔

    یہ لگاتار ساتواں دن ہے جب کورونا کے نئے کیس دو لاکھ سے اوپر آئے ہیں۔ اب تک انڈیا میں کورونا انفیکشن سے مرنے والے افراد کی تعداد 1،82،553 ہوگئی ہے۔

    اب تک انڈیا میں 1.56 کروڑ افراد اس بیماری کا شکار ہوچکے ہیں جو امریکہ کے بعد دوسرے نمبر پر ہے اور برازیل سے آگے ہے۔ انڈیا کی وزارت صحت کے مطابق اس وقت 21 لاکھ 57 ہزار 538 کورونا کے ایکٹو کیسز ہیں۔

14. 21 اپريل 2021دہلی کے اسپتالوں میں آکسیجن کی کمی

    منگل کی رات دہلی میں کووڈ مریضوں کے لیے ہسپتالوں میں میڈیکل آکسیجن کی فراہمی کچھ گھنٹوں کے لیے روک دی گئی۔

    دہلی کے وزیر اعلی نے ٹویٹ کیا تھا اور کہا تھا کہ اگر آکسیجن کی فراہمی فوری طور پر نہ کی گئی تو تباہ کن صورتحال پیدا ہوسکتی ہے۔

    خبر رساں ادارے پی ٹی آئی کے مطابق بدھ کی صبح دہلی کے بڑے سرکاری اور نجی اسپتالوں میں میڈیکل آکسیجن فراہم کردی گئی ہے۔

    دہلی کے وزیر صحت ستیندر جین نے منگل کی شب ٹویٹ کیا تھا کہ جی ٹی بی اسپتال میں آکسیجن چار گھنٹے سے زیادہ نہیں چل پائے گی جبکہ کوویڈ کے 500 سے زیادہ مریض آکسیجن پر ہیں۔

15. 21 اپريل 2021پنجاب میں مزید 2969 کورونا کیسز، مزید 103 ہلاکتیں

    پرائمری اینڈسکینڈری ہیلتھ کیئر ڈیپارٹمنٹ کے مطابق پنجاب میں کورونا وائرس کے 2969 نئے کیسز رپورٹ ہونے کے بعد مجموعی کیسز کی تعداد 276,535 ہو گئی۔ سب سے زیادہ کیسز لاہور میں 1454 رپورٹ ہوئے۔

    صوبے میں کورونا وائرس سے مزید 103 ہلاکتیں ہوئی ہیں جس کے بعد اموات کی کل تعداد 7664 ہوچکی ہے۔

    ترجمان پرائمری اینڈ سیکنڈری ہیلتھ کیئر کورونا وائرس کو شکست دینے والوں کی تعداد 224,029 ہو چکی ہے۔ پرائمری اینڈ سیکنڈری ہیلتھ کیئر کورونا وائرس کی علامات ظاہر ہونے پر فوراً 1033 پر رابطہ کریں۔

16. 21 اپريل 2021عوام کی سہولت کے لیے پنجاب میں پبلک ٹرانسپورٹ پر پابندی ختم

    پاکستان میں صوبہ پنجاب حکومت نے ماس ٹرانزٹ اور شہر کے اندر چلنے والی ٹرانسپورٹ پر پابندی ختم کر دی ہے۔

    ٹرانسپورٹ ڈیپارٹمنٹ نے پابندی کے خاتمے کا نوٹیفکیشن جاری کر دیا ہے۔

    نوٹیفیکیشن کے مطابق عوام کی سہولت کے لیے آج سے میٹرو بس اور اورنج لائن ٹرین چلنا شروع ہو جائے گی۔

    نوٹیفکیشن میں کہا گیا ہے کہ یہ فیصلہ عوام کی سفری مشکلات کو کم کرنے کے لیے کیا گیا ہے۔

17. 20 اپريل 2021محکمہ خارجہ کی امریکیوں کو 80 فیصد ممالک میں جانے سے گریز کرنے کا مشورہ

    امریکہ کے محکمہ خارجہ نے کورونا وائرس کی عالمی وبا کے باعث امریکیوں کو دنیا بھر کے ممالک میں سے 80 فیصد میں جانے سے پرہیز کرنے کی ہدایت کی ہے۔

    میڈیا کو جاری کیے گئے اعلامیے کے مطابق محکمہ خارجہ نے میڈیا کو بتایا کہ عالمی وبا کے باعث ’سیاحوں کو شدید خطرہ لاحق ہو سکتا ہے۔‘

    اس وقت دنیا کے 200 ممالک میں سے 34 ایسے ہیں امریکیوں کو ’سفر نہ کرنے‘ کی ہدایت دی گئی ہے تاہم ان میں پاکستان یا انڈیا شامل نہیں ہیں۔

    اب تک دنیا بھر میں کورونا وائرس سے تیس لاکھ سے زیادہ افراد ہلاک ہوچکے ہیں جن میں سے پانچ لاکھ سے زیادہ کی ہلاکت امریکہ میں ہوئی ہے۔

    عالمی ادارہ صحت کی جانب سے خبردار کیا گیا ہے کہ دنیا میں ’ٹیسٹ مثبت آنے کی شرح ریکارڈ حد‘ تک پہنچنے والی ہے۔

18. 20 اپريل 2021بریکنگ, راہل گاندھی میں کورونا وائرس کی تشخیص

    انڈیا کی حذبِ اختلاف کی جماعت کے سابق سربراہ راہل گاندھی نے ایک ٹویٹ کے ذریعے اعلان کیا ہے کہ ان کا کورونا وائرس ٹیسٹ مثبت آیا ہے۔

    انھوں نے ان تمام افراد سے کورونا ٹیسٹ کروانے کی گزارش کی جن کی ان سے گذشتہ دنوں میں ملاقات ہوئی تھی۔

    خیال رہے کہ انڈیا میں کورونا وائرس کی دوسری لہر کے آغاز کے بعد سے متاثرین میں تیزی سے اضافہ ہو رہا ہے جبکہ گذشتہ روز ملک میں 1700 سے زائد افراد ہلاک بھی ہوئے ہیں۔

19. 20 اپريل 2021انڈیا میں کورونا کی دوسری لہر: دہلی میں لاک ڈاؤن کے اعلان کے بعد کے مناظر

    دہلی کے وزیر اعلی اروند کیجریوال نے دہلی میں 26 اپریل تک لاک ڈاؤن نافذ کرنے کا اعلان کیا تھا اور ساتھ ہی یہ اپیل بھی کی تھی کہ کوئی بھی تارکین وطن مزدور دہلی نہ چھوڑے۔ تاہم اس اعلان کے کچھ ہی گھنٹوں بعد بس اڈوں اور ریلوے سٹیشنز پر شدید رش دیکھنے کو ملا۔

20. 20 اپريل 2021فائزر ویکسین وائرس کی انڈین قسم کے خلاف جزوی طور پر موثر، چین میں ایک دن میں 29 لاکھ ویکسینیشنز

    اسرائیل میں پہلی بار انڈیا میں شناخت کی جانے والی کورونا وائرس کی نئی قسم کے آٹھ کیسز ریکارڈ کیے گئے اور محمکہ صحت کے ایک اہلکار کا کہنا ہے کہ فائزر کی بائیوٹیک ویکسین اس کے خلاف کم از کم جزوی طور پر موثر ہے۔

    وزارت صحت نے بتایا کہ س نئی قسم کے مریض گذشتہ ہفتے اسرائیل میں بیرونِ ملک سے آنے والوں مسافروں میں سامنے آئے تھے جن کی ابتدائی ٹیسٹنگ کی گئی ہے۔

    وزارت کے ڈائریکٹر جنرل ہیزی لیوی نے کان پبلک ریڈیو کو بتایا کہ ’تاثر یہ ہے کہ فائزر ویکسین اس کے خلاف موثر ہے ، اگرچہ اس کی افادیت کم ہے۔‘

    برطانیہ اور آئرلینڈ نے بھی کہا ہے کہ وہ وائرس کی اس نئی قسم پر تحقیق کر رہے ہیں۔

    اسرائیل، جس کی آبادی 9.3 ملین ہے، وہاں 16 سال سے زیادہ عمر کے لگ بھگ 81 فیصد شہریوں یا رہائشیوں کو مکمل طور پر کورونا وائرس سے بچاؤ کی ویکسین لگا دی گئی ہے۔

    ادھر چین نے گذشتہ روز کووڈ 19 سے بچاؤ کے لیے ایک ہی دن میں 29 لاکھ افراد کو ویکسین لگائی۔

    چین کے ادارہ برائے صحت کے مطابق منگل تک چین میں 19 کروڑ سے زیادہ افراد کو ویکسین لگائی جا چکی ہے۔