مقبوضہ بیت المقدس میں امریکی سفارتخانے کے افتتاح سے قبل غزہ میں اسرائیلی فوج اور فلسطینیوں کے درمیان شدید جھڑپوں میں درجنوں فلسطینی ہلاک اور سینکڑوں زخمی ہو گئے ہیں۔ بی بی سی اردو کی لائیو کوریج
ذیشان حیدر، شیراز حسن
امریکی محکمۂ خزانہ کے وزیر سٹیو منوچن اور صدر ٹرمپ کی بیٹی ایوانکا ٹرمپ نے اس عمارت کے باہر نصب تختی کی نقاب کشائی کی ہے جو بیت المقدس میں عارضی طور پر امریکی سفارتخانہ بنے گی۔
اس موقع پر ایوانکا ٹرمپ کا کہنا تھا کہ ’امریکہ کے 45ویں صدر کی جانب سے ہم آپ کو پہلی مرتبہ یروشلم میں امریکی سفارتخانے میں خوش آمدید کہتے ہیں۔‘
،تصویر کا ذریعہEPA
لبنان کے وزیراعظم سعد حریری نے متعدد ٹویٹس میں امریکی سفارت خانے کی منتقلی کو ’اشتعال انگیزی‘ قرار دیتے ہوئے کہا ہے کہ اس سے خطے میں ’مزید شدت‘ پیدا ہوگی۔
انھوں نے کہا کہ وہ فلسطینی بھائیوں کی اس قانونی جدوجہد میں ان کے ساتھ مکمل اظہار یکجہتی کرتے ہیں۔
انسانی حقوق کی تنظیموں نے غزہ سرحد پر اسرائیل فوج کی جانب سے مظاہرین طاقت کے استعمال کی مذمت کی ہے۔ ایمنیسٹی انٹرنیشنل نے اسے ’بین الاقوامی قوانین کی گھناؤنی خلاف ورزی‘ قرار دیا ہے۔
فلسطینی محکمۂ صحت کے حکام کے مطابق غزہ میں اسرائیلی سرحد پر حفاظتی باڑ کے نزدیک جھڑپوں میں ہلاک ہونے والے فلسطینیوں کی تعداد 41 تک پہنچ گئی ہے جبکہ 1800 افراد زخمی ہیں
،تصویر کا ذریعہReuters
اسرائيل یروشلم کو اپنا ازلی اور غیر منقسم دارالحکومت کہتا ہے جبکہ فلسطینی مشرقی یروشلم پر اپنا دعویٰ پیش کرتے ہیں جس پر اسرائیل نے سنہ 1967 کی مشرق وسطی کی جنگ میں قبضہ کر لیا تھا۔ فلسطینی اسے اپنی مستقبل ریاست کا دارالحکومت کہتے ہیں۔
،تصویر کا ذریعہGetty Images
غزہ میں اسرائیلی سرحد کے قریب چھ ہفتوں سے مظاہرے جاری ہیں لیکن امریکہ کا سفارتخانہ تل ابیب سے یروشلم میں منتقل کیے جانے کے موقع پر ان میں شدت آئی ہے۔
،تصویر کا ذریعہReuters
اسرائیلی فوج کا کہنا ہے کہ 35 ہزار فلسطینی حفاظتی باڑ ساتھ ہونے والے پرتشدد مظاہروں میں شریک ہیں اور اس کے فوجی ضابطۂ کار کے تحت کارروائی کر رہے ہیں۔
،تصویر کا ذریعہAFP
حکام کے مطابق ان مظاہروں میں 1300 فلسطینی زخمی بھی ہوئے ہیں۔ مظاہروں کے دوران فلسطینیوں نے ٹائر جلائے اور اسرائیلی فوجیوں پر پتھراؤ کیا اور پیٹرول بم پھینکے جبکہ فوجی نشانے بازوں نے مظاہرین پر فائرنگ کی۔
فلسطینی حکام کا کہنا ہے کہ اسرائیلی فوجیوں نے یروشلم میں امریکی سفارتخانے کے افتتاح کے موقع پر غزہ میں ہونے والے مظاہروں کے دوران کم از کم 37 فلسطینیوں کو گولی مار کر ہلاک کر دیا ہے۔
،تصویر کا ذریعہEPA
