الیکشن کمیشن نے خیبرپختونخوا سے قومی اسمبلی کے 36 حلقوں سے کامیاب امیدواروں کے نوٹیفیکیشن جاری کر دیے, شہزاد ملک، بی بی سی اردو
الیکشن کمیشن آف پاکستان نے صوبہ خیبرپختونخوا کے 45 قومی اسممبلی کے حلقوں میں سے 36 کے حتمی نتائج جاری کرتے ہوئے کامیاب امیدواروں کے نوٹیفیکشنز کا اجرا کر دیا ہے۔
انتخابی عذرداریوں کی وجہ سے کچھ امیدواروں کی کامیابی کے نوٹیفیکیشن جاری نہیں ہو سکے ہیں۔ یاد رہے کہ صوبے میں قومی اسمبلی کے ایک حلقے میں انتخابات کا انعقاد نہیں ہوا تھا۔
الیکشن کمیشن کے جاری کردہ نوٹیفیکیشن کے مطابق جیتنے والے 36 امیدواروں میں سے 33 آزاد اراکین ہیں۔ ان آزاد امیدواروں میں سے بیشتر پاکستان تحریک انصاف کے حمایت یافتہ ہیں۔
الیکشن کمیشن کی جانب سے ان آزاد امیدواروں کو کہا گیا ہے کہ وہ نوٹیفیکیشن کے اجرا کے تین روز کے اندر کسی سیاسی جماعت میں شمولیت اختیار کر سکتے ہیں۔
یاد رہے کہ یہ آزاد اراکین کسی پارٹی میں شمولیت اختیار کرنے کے بجائے اپنا الگ آزاد گروپ بھی تشکیل دے سکتے ہیں مگر ایسا کرنے کی صورت میں اُن کا مخصوص نشستوں سے استحقاق ختم ہو جائے گا تاہم کسی پارٹی میں شمولیت سے خواتین اور اقلیتوں کی مخصوص نشستیں بھی حاصل کی جا سکتی ہیں۔
پاکستان تحریک انصاف کی جانب سے ابتدا میں کہا گیا تھا کہ ان کے اراکین خیبرپختونخوا کی حد تک جماعت اسلامی میں شمولیت اختیار کریں گے جبکہ پنجاب اور وفاق میں مجلس وحدت المسلمین میں شامل ہوا جائے گا۔ تاہم اس ضمن میں اب تک کوئی ٹھوس پیش رفت نہیں ہو سکی ہے۔
واضح رہے کہ پاکستان بھر میں قومی اسمبلی کے 266 حلقوں میں براہ راست انتخابات ہوتے ہیں جبکہ دس نشستیں اقلیتوں کے لیے مختص ہیں اور خواتین کے 60 نشستیں ہیں، جنھیں مخصوص نشستیں بھی کہا جاتا ہے۔ سیاسی جماعتیں انمخصوص نشستوں کے لیے اپنے اقلیتی ارکان اور خواتین امیدواران کے نام الیکشن کمیشن کو جمع کراتی ہیں۔
جو سیاسی جماعت براہ راست انتخابات میں زیادہ نشستیں حاصل کرتی ہے، اسے مخصوص نشستیں بھی زیادہ ملتی ہیں۔