جسٹس ریٹائرڈ مقبول باقر کو نگران وزیر اعلیٰ سندھ نامزد کرنے پر ’اتفاق‘

لائیو کوریج

1. 8 اگست 2023پی ٹی آئی رہنما افتخار درانی اسلام آباد پولیس کی حراست میں نہیں ہیں: پراسیکیوٹر, شہزاد ملک، بی بی سی اُردو ڈاٹ کام

   حکومت نے اسلام آباد ہائیکورٹ کو آگاہ کیا ہے پاکستان تحریک انصاف کے مبینہ طور پر لاپتہ رہنما افتخار درانی پولیس کی حراست میں نہیں ہیں۔

   یاد رہے کہ چند روز قبل تحریک انصاف نے دعویٰ کیا تھا کہ افتخار درانی کو پولیس اور سول کپڑوں میں ملبوس چند افراد نے مبینہ طور پر اسلام آباد میں واقع ان کے گھر سے اغوا کر لیا تھا جس کے بعد سے وہ لاپتہ ہیں۔ چیئرمین تحریک انصاف عمران خان نے ان کی رہائی کا مطالبہ کرتے ہوئے کہا تھا کہ افتخار درانی کا نو مئی کے واقعات سے کچھ لینا دینا نہیں ہے۔

   ان کی گمشدگی کے خلاف اسلام آباد ہائیکورٹ میں درخواست دائر کی گئی تھی۔ منگل کے روز اس درخواست پر ہونے والی سماعت کے دوران اسلام آباد پولیس نے عدالتی حکم پر اس کیس پر پیش رفت رپورٹ عدالت میں جمع کروائی۔

   اس موقع پر پراسیکیوٹر نے عدالت کو آگاہ کیا کہ افتخار درانی اسلام آباد پولیس کی حراست میں نہیں ہیں جبکہ ان کے مبینہ اغوا کا مقدمہ اسلام آباد کے متعلقہ تھانے میں درج کر لیا گیا ہے۔

   افتخار درانی کے وکیل شیر افضل مروت راولپنڈی بینچ میں مصروفیات کے باعث کیس میں پیش نہ ہو سکے جس کے باعث عدالت نے فی الحال اس کیس کی سماعت میں وقفہ کر دیا ہے۔

2. 8 اگست 2023بریکنگ, نگراں وزیر اعظم کے لیے ابھی کسی ایک نام پر اتفاق رائے نہیں ہوا: احسن اقبال

   پاکستان کے وفاقی وزیر منصوبہ بندی اور پاکستان مسلم لیگ ن کے رہنما احسن اقبال کا کہنا ہے کہ نگراں وزیر اعظم کے لیے ابھی کسی ایک امیدوار کے نام پر اتفاق رائے نہیں ہوا ہے۔

   نجی نیوز چینل اے آر وائی نیوز کے پروگرام ’خبر مہر بخاری کے ساتھ‘ میں گفتگو کرتے ہوئے کہا کہ اس وقت اتحادی جماعتوں میں نگراں وزیر اعظم کے نام پر مشاورت کا عمل جاری ہے۔ اینکر مہر بخاری کی جانب سے اسحاق ڈار کے نگراں وزیر اعظم کی دوڑ میں شامل ہونے کے سوال کے جواب میں ان کا کہنا تھا کہ ’میں کسی قیاس آرائی یا کسی نام پر ہاں یا نہ، نہیں کروں گا۔

   ان کا مزید کہنا تھا کہ اس وقت تک ہم یہ نہیں کہہ سکتے کہ نگراں وزیر اعظم کے لیے کسی ایک امیدوار کے نام پر اتفاق رائے ہو گیا ہے۔

   احسن اقبال کا کہنا تھا کہ اگر کسی ایک نام پر اتفاق رائے ہوا ہوتا تو یقیناً وزیر اعظم اپنے ساتھیوں کے ساتھ وہ نام شیئر کرتے لیکن انھوں نے کہا کہ قومی اسمبلی توڑنے کے بعد نگران وزیر اعظم کا نام دینے کے لیے آٹھ دن کی آئینی مدت کے دوران ہی فیصلہ ہو جائے گا۔

3. 8 اگست 2023بریکنگ, ایف آئی اے سائبر کرائم ونگ نے عمران خان کے وکیل نعیم پنجوتھا کو تحقیقات کے لیے طلب کر لیا

   پاکستان کی وفاقی تحقیقاتی ایجنسی ایف آئی اے نے پی ٹی آئی چیئرمین کے وکیل نعیم حیدر پنجوتھا کو اسلام آباد کی مقامی عدالت کے جج دلاور ہمایوں کے خلاف سوشل میڈیا پر غلط معلومات دینے سے متعلق تحقیقات کے لیے طلب کر لیا ہے۔

   واضح رہے چیئرمین پی ٹی آئی عمران خان کو توشہ خانہ ریفرنس میں تین سال کی قید سنانے والے جج دلاور ہمایوں ہی ہیں۔

   پی ٹی آئی چیئرمین نعیم پنجوتھا کو ایف آئی اے اسلام آباد سائبر کرائم ونگ میں منگل کو صبح دس بجے طلب کیا گیا ہے۔ ان کے خلاف تحقیقات اسلام آباد ہائیکورٹ کی جانب سے ہدایات پر شروع کی گئی ہیں۔

4. 8 اگست 2023بریکنگ, قومی اسمبلی سے آفیشل سیکریٹس ایکٹ معمولی تبدیلیوں کے بعد منظور

   پاکستان کے ایوان زیریں یعنی قومی اسمبلی نے سوموار کو آفیشل سیکریٹس ایکٹ (ترمیمی) بل 2023 کے اصل مسودے میں کچھ تبدیلیاں کرنے کے بعد منظور کر لیا ہے۔

   اس سے قبل اتوار کو یہ بل ایوان بالا یعنی سینیٹ سے منظور کیا گیا تھا۔

   آفیشل سیکرٹس ایکٹ (ترمیمی) بل کے منظور شدہ مسودے میں سب سے اہم تبدیلی ایک شق کو ہٹانا تھی جس کے تحت خفیہ ایجنسیوں کو مشتبہ افراد کو گرفتار کرنے یا وارنٹ کے بغیر تلاشی لینے کا اختیار دیا گیا تھا۔ یہ ترمیم سینیٹ کی ایک کمیٹی نے بل کی جانچ کے عمل کے دوران کی تھی۔

   بل کی شق نمبر پانچ میں ایک اور تبدیلی کی گئی ہے، جس میں پہلے کہا گیا تھا: ’اگر کوئی شخص کسی دشمن یا کسی غیر ملکی ایجنٹ کے ساتھ رابطے میں رہا ہے، اور اگر پاکستان کے اندر یا بیرون ملک اس نے کسی غیر ملکی ایجنٹ سے ملاقات کی ہے یا کسی دشمن یا کسی غیر ملکی ایجنٹ کے ساتھ رابطے میں رہا ہے یا اس سے کوئی تعلق ہے۔۔۔‘

   ترمیم کے بعد اس شق میں لفظ ’جان بوجھ کر‘ کا اضافہ کر دیا گیا ہے جسے اب پڑھا جائے گا کہ ’...اگر اس نے پاکستان کے اندر یا اس بیرون ملک ’جان بوجھ کر‘ کسی دشمن یا غیر ملکی ایجنٹ سے ملاقات کی ہو۔۔۔‘

   واضح رہے کہ گذشتہ ہفتے، اس ترمیمی بل کو سینیٹ میں پیش کیے جانے کے بعد حکومتی اور اپوزیشن ارکان کی جانب سے سخت مخالفت کا سامنا کرنا پڑا تھا جس کے بعد اس پر مزید غور و خوض کے لیے ایوان کی متعلقہ قائمہ کمیٹی کے پاس بھیج دیا گیا تھا۔ متعلقہ قائمہ کمیٹی نے بل میں ترامیم کی تجویز دی تھی اور اسے منظوری کے لیے ایوان بالا کو واپس بھیج دیا تھا جس اتوار کو منطور کر لیا گیا۔

   یاد رہے کہ سبکدوش ہونے والی حکومت نے پہلے یہ بل یکم اگست کو قومی اسمبلی میں منظوری کے لیے پیش کیا تھا تاہم بعض قانون سازوں کی شدید مخالفت کے باعث بل کو سینیٹ کی متعلقہ کمیٹی کو جانچ کے لیے بھیج دیا گیا تھا۔

   سوموار کو قومی اسمبلی کے اجلاس میں وزیر قانون اعظم نذیر تارڑ نے ترمیم شدہ بل دوبارہ پیش کیا اور ترمیم کی شق بہ شق پڑھ کر سنائی جس کی متفقہ منظوری دی گئی۔

   اس بل کو اب قانون بنانے کے لیے صدر مملکت کی منظوری کی ضرورت ہے۔

5. 8 اگست 2023بریکنگ, گذشتہ 15 ماہ میں اداروں کو ان کے دائرہ کار میں نہیں لا سکے: بلاول بھٹو

   پاکستان کے وزیرخارجہ بلاول بھٹو نے قومی اسمبلی میں خطاب کرتے ہوئے کہا کہ اب ہم الیکشن کی طرف بڑھ رہے ہیں۔ سیاسی جماعت کو سیاست اس طریقے سے کرنی چاہیے کہ صورتحال کو مفاہمت کی طرف کیسے لے کر جائیں۔

   بلاول بھٹو نے کہا کہ وہ بچپن سے دیکھ رہے ہیں کہ کبھی سیاستدان حکومت میں تو کبھی جیل میں ہوتا ہے۔ ان کے مطابق وہ اپنی حکومت کے 16 ماہ میں اداروں کو اپنے دائرہ کار میں کام کرنے پر آمادہ کرنے پر کامیاب نہیں ہو سکے ہیں۔

   بلاول بھٹو نے کہا کہ ’سابق صدر آصف زرداری اور نواز شریف ایسے فیصلے کریں کہ آئندہ میرے اور مریم کے لیے سیاست آسان ہو۔‘ ان کے مطابق آج اگر عمران خان جیل میں ہیں تو کل وہ آزاد ہوں گے اور پھر اگر وہی دھرنے اور احتجاج اور پرانا سلسلہ چل پڑے گا تو پھر نظام آگے کیسے بڑھے گا۔

   ان کے مطابق جب سیاست کو آگے دشمنی اور وہ بھی ذاتی دشمنی تک لے کر جایا جائے تو تو اس کا نقصان ریاست کو اور سب کو ہوتا ہے۔ بلاول بھٹو کے مطابق لگتا ہے کہ ہمارے بڑوں نے یہ فیصلہ کیا ہے کہ جیسے انھوں نے 30 سال تک سیاست بھگتی ہے اب مریم اور میں بھی ایسے ہی سیاست کریں۔

   ان کے مطابق یہ سیاست دیکھتے دیکھتے اب نوجوان تنگ آ چکے ہیں اور وہ اب نہ ہم پر بھروسہ کرتے ہیں اور نہ کسی اور پر بھروسہ کرتے ہیں۔ ہمیں اپنا رویہ ایسا کرنا ہوگا کہ جس سے 65 فیصد سے زیادہ نوجوان بھروسہ کر سکیں۔

   اپنے خطاب کے اختتام پر بلاول بھٹو نے کہا کہ ’جناب سپیکر اب الیکشن میں ملیں گے۔‘

6. 8 اگست 2023بریکنگ, بلوچستان کے ضلع پنجگورمیں بم دھماکہ، سات افراد ہلاک, محمد کاظم، بی بی سی اردو ڈاٹ کام، کوئٹہ

   پاکستان کے صوبے بلوچستان کے ضلع پنجگورمیں ایک دھماکے میں سات افراد ہلاک ہوگئے ہیں۔

   مکران ڈویژن کے ایک سینیئرسرکاری اہلکارنے اس کی تصدیق کرتے ہوئے بتایا ہلاک ہونے والے افراد میں یونین کونسل کا ایک چیئرمین بھی شامل ہے۔

   یونین کونسل کے چیئرمین کی شناخت اسحاق یعقوب کے نام سے ہوئی ہے۔ اہلکار نے بتایا کہ یہ تمام افراد ایک گاڑی میں سفرکررہے تھے۔ دھماکے سے گاڑی کو شدید نقصان پہنچا۔

   بلوچستان کے وزیرداخلہ نے فون پر بی بی سی کوبتایا کہ یونین کونسل کے چیئرمین دیگر افراد کے ہمراہ شادی کی ایک تقریب میں شرکت کے بعد واپس جارہے تھے کہ نامعلوم افراد نے ان کی گاڑی کو بارودی سرنگ کا نشانہ بنایا۔ تاحال اس واقعے کی ذمہ داری کسی نے قبول نہیں کی ہے۔

   بلوچستان کے وزیرداخلہ میر ضیاء اللہ لانگو نے اس واقعے کی مذمت کرتے ہوئے کہا کہ اس سے قبل کالعدم بلوچ لبریشن فرنٹ نے آج مارے جانے والے یونین کونسل کے چیئرمین کے والد سمیت 11افراد کوہلاک کیا تھا۔ انھوں نے بتایا کہ ملزمان کو انصاف کے کٹہرے میں لانے کے لیے تمام وسائل کو بروئے کارلایا جائے گا۔

   ایران سے متصل ضلع پنجگوربلوچستان کے مکران ڈویژن کا حصہ ہے۔ مکران ڈویژن کے دیگرحصوں کی طرح پنجگوربھی طویل عرصے سے شورش سے متاثر ہے تاہم سرکاری حکام کا کہنا ہے کہ امن و امان کی بہتری کے لیے اٹھائے جانے والے اقدامات کے نتیجے پنجگورسمیت مکران ڈویژن کے دیگرعلاقوں میں بہتری آئی ہے۔

7. 8 اگست 2023بی بی سی کے لائیو پیج میں خوش آمدید!

   پاکستان کی سیاسی صورتحال پر بی بی سی اردو کی خصوصی لائیو کوریج میں خوش آمدید۔

   سات اگست تک کی خبروں کو جاننے کے لیے یہاں کلک کریں۔