بہترین لاک ڈاؤن کو وفاقی حکومت نے سبوتاژ کردیا: بلاول

لائیو کوریج

1. 6 مئ 2020پنجاب میں اربن ڈویلپمنٹ کے تمام ذیلی اداروں کو دفاتر کھولنے کی مشروط اجازت

   پنجاب حکومت نے لاک ڈاؤن کے باوجود اربن ڈویلپمنٹ کے تمام ذیلی اداروں کو دفاتر کھولنے کی مشروط اجازت دے دی ہے۔

   اربن ڈویلپمنٹ کے تمام ذیلی اداروں جن میں ایل ڈی اے، ایف ڈی اے، آر ڈی اے، جی ڈی اے اور ایم ڈی اے شامل ہیں کو دفاتر کھولنے کی اجازت دی گئی ہے۔

   اس سلسلے میں پنجاب امتناع وبائی امراض آرڈیننس 2020 کے تحت سیکرٹری پرائمری اینڈ سکینڈری ہیلتھ کئیر نے اجازت نامہ جاری کر دیا ہے۔

   سیکرٹری پرائمری اینڈ سکینڈری ہیلتھ نے خط میں ہدایت کی ہے کہ تمام دفاتر میں ایس او پیز پر عمل درآمد یقینی بنایا جائے اور ساتھ ہی سماجی فاصلے، ذاتی صفائی، کام کرنے کی جگہ، ضرورت کے مطابق ماسک کا استعمال یقینی بنایا جائے، دفاتر میں اجلاس سے پہلے، دوران اور بعد میں تمام احتیاطی تدابیر اختیار کی جائیں۔

2. 6 مئ 2020کوئٹہ کے صحافیوں میں کورونا وائرس کی تشخیص, 50 صحافیوں کے نمونے تشخیص کے لیے لیبارٹری بھجوا دیے گئے

   کوئٹہ میں دو نجی ٹی وی اداروں کے چھ رپورٹروں اور دیگر کارکنوں کے کورونا سے متاثر ہونے کے بعد کوئٹہ میں الیکٹرانک میڈیا سے تعلق رکھنے والے کارکنوں کے ٹیسٹ کروانے کا سلسلہ شروع کردیا گیا ہے۔

   یہ ٹیسٹ کوئٹہ پریس کلب اور بلوچستان یونین آف جرنلسٹس کی درخواست پر محکمہ صحت کی جانب سے کیے جارہے ہیں۔

   اس سلسلے میں کوئٹہ پریس کلب میں پہلے روز پچاس کیمرہ مین اور رپورٹروں کے نمونے لیکر ٹیسٹ کے لیے لیباریٹری بھیجوا دیے گئے ہیں۔

   صحافتی تنظیموں کے مطابق پہلے مرحلے میں کیمرہ مین اور رپورٹروں کا ٹیسٹ کرایا جائے گا جبکہ اس کے بعد دوسرے کارکنوں کا ٹیسٹ کیا جائے گا۔

   متاثرہ کارکنوں میں دو خواتین کارکن بھی شامل ہیں۔

3. 6 مئ 2020این سی او سی اجلاس: تمام صوبوں کی ٹرین سروس کی بحالی کی مخالفت

   وفاقی وزیر اسد عمر کی زیر صدارت نیشنل کمانڈ اینڈ آپریشن سینٹر کے اجلاس میں وزیر ریلوے شیخ رشید نے ٹرین سروس کی بحالی کا مطالبہ کیا تاہم سندھ سمیت تمام صوبوں نے ٹرین آپریشن بحال کرنے کی مخالفت کی ہے۔

   بی بی سی کی نامہ نگار سحر بلوچ کے مطابق اجلاس میں لاک ڈاؤن میں نرمی اور کاروباری سرگرمیوں کی بحالی کے حوالے سے مختلف تجاویز پر غور کیا گیا۔

   سندھ حکومت نے تجویز دی کہ مکمل کاروباری سرگرمیاں بحال کرنے کے بجائے انھیں مرحلہ وار بحال کیا جائے اور دیہی علاقوں میں دکانیں کھولنے کی اجازت دی جائے۔

   وفاقی وزیر برائے اطلاعات شبلی فراز نے کل کابینہ کے اجلاس کے بعد میڈیا سے بات کرتے ہوئے کہا تھا کہ آج یعنی بدھ کے روز قومی رابطہ کمیٹی کا اجلاس متوقع ہے لیکن چند ارکان کی غیر موجودگی کے باعث آج اجلاس نہیں ہو سکا۔ اب یہ اجلاس کل متوقع ہے۔

   سندھ حکومت نے پہلے مرحلے میں چھوٹی مارکیٹس کھولنے اور بڑے شہروں میں تجارتی مراکز فی الحال نہ کھولنے کی تجویز دی ہے جبکہ سندھ حکومت نے عیدالفطر کے لیے بھی ایس او پیز بنانے کی تجویز دی ہے۔

   دوسری جانب سندھ حکومت نے اندرونِ شہر ٹرانسپورٹ سروس بحال کرنے کا فیصلہ کیا ہے تاہم انٹراسٹی ٹرانسپورٹ کی بحالی کے لیے ایس اوپی بنائی جائیں گی۔

   لاک ڈاؤن اور پابندیوں سے متعلق صوبوں کی تجاویز پر حتمی فیصلہ وزیراعظم کی زیرصدارت اجلاس میں ہو گا۔

4. 6 مئ 2020پاکستان میں متاثرین کی تعداد 23 ہزار سے تجاوز کر گئی, پاکستان میں کل متاثرین: 23276 | اموات: 535 | صحتیاب: 6291

   پاکستان میں کورونا وائرس کی عالمی وبا کے باعث متاثرہ افراد کی کل تعداد 23 ہزار سے تجاوز کر گئی ہے۔

   اب تک ملک میں 535 اموات ہو چکی ہیں جبکہ 6291 افراد اب تک صحتیاب بھی ہوئے ہیں۔

   آج صوبہ سندھ میں 451، پنجاب میں 273 اور پاکستان کے زیرِ انتظام کشیمر میں دو نئے مریض سامنے آ چکے ہیں۔

   اس کے علاوہ صوبہ سندھ میں مزید نو اموات بھی رپورٹ ہوئی ہیں۔

5. 6 مئ 2020بریکنگ, گلگت بلتستان میں لاک ڈاؤن میں مشروط نرمی، ماسک کا استعمال لازمی قرار

   گلگت بلتستان کے وزیر اطلاعات شمس میر کے مطابق گلگت بلتستان حکومت نے لاک ڈاؤن کے تیسرے فیز کا اعلان کیا ہے اور اس کو سمارٹ لاک ڈاؤن قرار دیتے ہوئے لاک ڈاؤن میں نرمی کا فیصلہ کر لیا ہے۔

   صحافی محمد زبیر خان سے بات کرتے ہوئے انھوں نے کہا کہ سمارٹ لاک ڈاؤن میں حکومت کے لازمی ایس او پی کے مطابق ماسک کا استعمال، سماجی فاصلہ برقرار رکھنا اور سینی ٹائزر کا استعمال لازمی قرار دیا گیا ہے۔

   ان کا کہنا تھا کہ ’خواتین، بچوں اور ضعیف العمر افراد کی مارکیٹس میں کم سے کم آنے کی ہدایت دی گئی ہے۔‘

   انھوں نے بتایا کہ 10 مئی کے بعد ماسک کا استعمال نہ کرنے والوں پر جرمانہ کیا جا سکے گا، اس جرمانے سے ماسک عوام کو دیں گے۔

   احتیاطی تدابیر کے حوالے سے بتاتے ہوئے ان کا مزید کہنا تھا کہ بازار اور مارکیٹس میں بھیڑ کرنے کی اجازت نہیں ہو گی۔

   تمام کاروبار سمارٹ لاک ڈاون کے شیڈول اور ڈسپلن میں مطابق عمل کریں گے اور تاجران سے گزارش ہے کہ وہ ان قوائد پر عملدرآمد کرائیں۔ نظم و ضبط کی خلاف ورزی پر جرمانے اور سزا ہو سکتی ہے۔

6. 6 مئ 2020بریکنگ, پاکستان کے زیرِ انتظام کشمیر میں دو بچوں میں کورونا وائرس کی تصدیق

   پاکستان کے زیر انتظام کشمیر میں ضلع مظفرآباد کے ضلعی ہیلتھ افسر ڈاکٹر سعید کے مطابق سعودی عرب سے سفر کرنے والے دو بچوں میں کورونا وائرس کی تشخیص ہوئی ہے جس کے بعد اس خطے میں کورونا وائرس سے متاثر ہونے والے افراد کی تعداد 78 ہو گئی ہے۔

   انھوں نے صحافی ایم اے جرال سے بات کرتے ہوئے بتایا کہ بچوں کا تعلق ہٹیاں سے ہے جن کی عمر 5 اور 14 برس ہے جنھوں نے اپنی والدہ اور دادی کے ہمراہ سعودی عرب سے سفر کیا ہے۔

   ان کے مطابق دونوں بچوں اور ان کے ہمراہ سفر کرنے والی فیملی کی دو خواتین کو آئیسولیشن ہسپتال مظفرآباد میں منتقل کر دیا گیا ہے جہاں ان کے خاندان کے اراکین کے بھی ٹیسٹ لیے جائیں گے۔

   حکام کے مطابق اس خطے میں کورونا وائرس کا مزید ایک مریض صحتیاب ہو کر گھر چلا گیا ہے جس کے بعد یہاں صحتیاب ہونے والے مریضوں کی تعداد 55 ہو گئی ہے۔

7. 6 مئ 2020بریکنگ, کورونا وائرس: سندھ میں 451 نئے مریض، مزید نو اموات, صوبہ سندھ میں متاثرین: 8640 | اموات: 157 | صحتیاب: 1731

   پاکستان کے صوبہ سندھ کے وزیرِ اعلیٰ مراد علی شاہ کے مطابق گذشتہ 24 گھنٹوں کے دوران صوبے میں 3671 ٹیسٹ کیے گئے جس کے بعد صوبے میں کیے ٹیسٹس کی تعداد 72544 ہو چکی ہے۔

   انھوں نے بتایا کہ گذشتہ 24 گھنٹوں کے دوران سامنے آنے والے 451 نئے مریض کل ٹیسٹس کا 12 اعشاریہ تین فیصد ہے۔

   اس طرح صوبے میں کل کیسز کی تعداد 8640 ہے جبکہ 1731 افراد صحتیاب بھی ہوئے ہیں۔

   اب تک صوبے میں شرح اموات ایک اعشاریہ آٹھ فیصد ہے۔

   اسی طرح اس وقت صوبے 5528 گھروں میں آئسولیشن میں ہیں، 1721 حکومت کے زیرِ انتظام آئسولیشن مراکز میں جبکہ 503 ہسپتالوں میں ہیں۔

   وزیرِ اعلیٰ نے بتایا کہ ہسپتالوں میں موجود 503 افراد میں سے 89 انتہائی نگہداشت یونٹس میں ہیں جبکہ ان میں سے 14 وینٹی لیٹرز پر ہیں۔

8. 6 مئ 2020کورونا وائرس مختلف سطحوں پر کتنی دیر تک زندہ رہ سکتا ہے؟

   جیسے جیسے کورونا وائرس کی وبا پھیل رہی ہے، ہمارا سرفیسز یعنی کسی بھی چیز کی سطح جیسے کہ ٹیبل یا دروازے کا خوف بڑھتا جا رہا ہے۔

   اب عوامی مقامات پر بہت سے مناظر عام ہو گئے ہیں جیسے کہ لوگوں کا دروازے اپنی کہنیوں سے کھولنے کی کوشش کرنا، ٹرین کا سفر کرتے ہوئے کسی ہینڈل کو نہ پکڑنا، دفاتر میں ہر روز ملازمین کا اپنی میزوں کو صاف کرنا۔

   مزید جانیے بی بی سی فیوچررچرڈ گرے کیاس تحریر میں۔

9. 6 مئ 2020پاکستان میں پھنسے افغان شہریوں کے لیے طورخم بارڈر ایک روز کے لیے کھول دیا گیا

   پاکستان میں پھنسے افغان شہریوں کے لیے پاک افغان طورخم بارڈر کھول دیا گیا جہاں سے سینکڑوں افغان شہری بارڈر کراس کرکے افغانستان داخل ہو گئے۔

   انسانی ہمدردی اور جذبہ خیر سگالی کے تحت سرحد کھول دی گئی۔

   بارڈر ایک دن کے لئے کھلا رہے گا۔ پاکستان میں پھنسے تمام افراد آج طورخم سرحد کراس کر سکیں گے۔

10. 6 مئ 2020لاک ڈاؤن کے حوالے سے قومی رابطہ کمیٹی کے فیصلوں پر عمل کریں گے: اجمل وزیر

    پاکستان کے صوبہ خیبرپختونخوا کے مشیر اطلاعات اجمل وزیر کا کہنا ہے کہ قومی رابطہ کمیٹی کے فیصلوں پر عمل کیا جائے گا۔

    انھوں نے کہاں کہ کچھ سفارشات ہمارے صوبے کی جانب سے بھی رکھی جائیں گی جو ہمارے صوبے میں اس وائرس کے پھیلاؤ کی صورتحال کے حساب سے ہوں گی۔

    انھوں نے کہا کہ صوبے میں ٹیسٹنگ کی سہولیات کو بہتر بنانے کے لیے جنگی بنیادوں پر کام کیا جا رہا ہے اور جلد یہ تعداد دو ہزار سے زیادہ ہو جائے گی۔

11. 6 مئ 2020مری: مال روڈ پر مشہور پوسٹ آفس کی عمارت کو ’ڈس انفیکٹ‘ کرنے کی مناظر

12. 6 مئ 2020’خیرپور کے آئسولیشن مرکز میں 20 وینٹی لیٹرز موجود‘

    صوبہ سندھ کے ترجمان مرتضیٰ وہاب کے مطابق ضلع خیرپور میں جو آئسولیشن مرکز قائم کیا گیا ہے اس میں 20 وینٹی لیٹرز کورونا وائرس کے مریضوں کے لیے موجود ہیں۔

    مرتضیٰ وہاب کے مطابق اب تک خیرپور میں 238 مریض سامنے آ چکے ہیں جن میں سے 123 صحتیاب بھی ہوئے ہیں۔

13. 6 مئ 2020کورونا وائرس سے متعلق بی بی سی اردو کا مُختصر دورانیے کا خصوصی بُلیٹن

14. 6 مئ 2020سمارٹ لاک ڈاؤن کا مقصد لوگوں کو اس وبا سے بچانا ہے: عثمان بزدار

    پنجاب کے وزیراعلیٰ سردار عثمان خان بزدار نے عوام پر زور دیا ہے کہ کوروناوائرس سے خود کو محفوظ رکھنے کے لیے احتیاطی تدابیر پر سختی سے عمل کریں۔

    ریڈیو پاکستان کے مطابق آج وزیراعلیٰ سیکرٹریٹ لاہور کی جانب سے جاری کیے گئے ایک پیغام میں انھوں نے لوگوں پر زور دیا کہ وہ گھر پر رہنے کی ہدایت پر عمل کرتے ہوئے خود اور دوسروں کو کورونا وائرس سے محفوظ رکھیں۔

    انھوں نے کہا کہ سمارٹ لاک ڈاؤن کا مقصد لوگوں کو اس وبا سے بچانا اور محفوظ رکھنا ہے۔

15. 6 مئ 2020وزیرِ اعلیٰ سندھ کی ویڈیو لنک کے ذریعے نیشنل کمانڈ اینڈ آپریشن سینٹر کے اجلاس میں شرکت

    ترجمان وزیراعلیٰ سندھ عبدالرشید چنا کے مطابق نیشنل کمانڈ اینڈ آپریشن سینٹر کے اجلاس میں لاک ڈاؤن سے متعلق اتفاق رائے سے فیصلے ہوں گے۔

    انھوں نے بتایا کہ تمام صوبوں نے بھی اجلاس میں اپنی تجاویز دیں گے اور ان تجاویز کے مطابق سفارشات مرتب کر کے قومی سطح پر فیصلے کیے جائیں گے۔

    ایسے میں وزیرِ اعلیٰ سندھ نے کہا کہ عوام کو سہولت دینے کے ساتھ کورونا وائرس کی وبا سے بچانا بھی ہے۔

    انھوں نے کہا کہ لاک ڈائون سے فائدہ ہوا ہے لیکن اموات کی شرح اور نئے کیسز بڑھ رہے ہیں۔

16. 6 مئ 2020صوبہ سندھ میں ٹیسٹنگ کی تعداد میں کمی کی کیا وجہ ہے؟

    صوبہ سندھ میں گذشتہ تین روز سے کورونا وائرس کی ٹیسٹنگ کی تعداد میں بتدریج کمی دیکھنے میں آ رہی ہے۔

    گذشتہ ہفتے سندھ میں ٹیسٹنگ کی تعداد صوبہ پنجاب سے زیادہ تھی تاہم گذشتہ تین روز سے اس تعدد ہوئی ہے۔

    خیال رہے کہ صوبے میں 28 اپریل کو ایک دن میں ریکارڈ 4112 ٹیسٹ کیے گئے تھے۔

    گذشتہ روز ایک نجی ٹی وی چینل کے پروگرام میں بات کرتے ہوئے سندھ حکومت کے ترجمان سینیٹر مرتضیٰ وہاب کا کہنا تھا کہ صوبے میں ٹیسٹنگ کے اعداد و شمار میں بتدریج کمی کی وجہ لوگوں میں ٹیسٹ کروانے کے حوالے سے ہچکچاہٹ موجود ہے۔

    انھوں نے کہا کہ لوگ سماجی دباؤ میں آ کر اس ہچکچاہٹ کا شکار ہوتے ہیں اور اس حوالے سے میڈیا کو اپنا کردار ادا کرنا ہو گا۔

    ان کا مزید کہنا تھا کہ صوبے میں ٹیسٹنگ کی صلاحیت چار ہزار سے زیادہ ہے تاہم جب لوگ ہمارے پاس ٹیسٹ کروانے آئیں گے نہیں تو ہم کیسے ٹیسٹ کریں گے۔

17. 6 مئ 2020کورونا وائرس کی مقامی منتقلی سے بلوچستان کے 17 اضلاع متاثر

    بلوچستان میں کورونا وائرس کے مقامی منتقلی کے کیسز سے متائثرہ اضلاع کی تعداد 17 ہو گئی ہے۔

    بلوچستان کے 33 اضلاع میں سے جن نئے اضلاع سے کورونا وائرس کے کیسز رپورٹ ہوئے ہیں ان میں لسبیلہ، پنجگور، قلعہ سیف اللہ اور کوہلو شامل ہیں۔

    محکمہ صحت حکومت بلوچستان کی رپورٹ کے مطابق ضلع لسبیلہ سے رپورٹ ہونے والے کیسز کی تعداد نو، پنجگور سے چار، قلعہ سیف اللہ سے تین اور کوہلو سے ایک ہے۔

    رپورٹ کے مطابق بلوچستان میں کورونا وائرس کے مجموعی 1495 کیسز میں سے مقامی منتقلی کے 1339 کیسز میں سب سے زیادہ کوئٹہ شہر سے رپورٹ ہوئے ہیں جن کی تعداد 1156 ہے جبکہ باقی 12 اضلاع میں سے ضلع چاغی سے 17، لورالائی سے سات، جعفرآباد سے22، خضدار سے ایک، مستونگ سے 14، خاران سے تین، پشین سے57، نوشکی سے تین، قلعہ عبداللہ سے23، سبی سے نو، زیارت سے آٹھ اور ہرنائی سے دو کیسز رپورٹ ہوئے ہیں۔

18. 6 مئ 2020گذشتہ روز صوبہ خیبر پختونخوا میں ریکارڈ 1422 کورونا وائرس ٹیسٹ ہوئے: تیمور جھگڑا

    صوبہ خیبرپختونخوا کے صوبائی وزیرِ صحت تیمور سلیم جھ۔گڑا نے ایک ٹویٹ میں کہا ہے کہ گذشتہ روز صوبہ خیبر پختونخوا میں ایک دن میں اب تک کے سب سے زیادہ 1422 ٹیسٹ ہوئے۔

    انھوں نے بتایا کہ اب ہمارا اگلا ہدف یومیہ دوہزار ٹیسٹ کرنا ہے جبکہ ہم چاہیں گے کہ ہم روزانہ کی بنیاد پر پانچ ہزار ٹیسٹ کر سکیں۔

19. 6 مئ 2020بریکنگ, کورونا وائرس: پنجاب میں 273 نئے مریض، کل 8693 متاثرین, پنجاب میں کل متاثرین: 8693 | اموات: 156 | صحتیاب: 3086

    پاکستان کے صوبہ پنجاب میں مزید 273 افراد میں کورونا وائرس کی تصدیق ہوئی ہے جس کے بعد صوبے میں متاثرین کی کل تعداد 8693 ہو گئی ہے۔

    اب تک صوبے میں 156 افراد ہلاک ہوئے ہیں جبکہ 3086 صحتیاب بھی ہوئے ہیں۔

    صوبے میں اب تک 106927 ٹیسٹ کیے جا چکے ہیں۔

    گذشتہ روز سامنے آنے والے 560 نئے مریضوں میں سب سے بڑی تعداد لاہور کی تھی جہاں 329 افراد میں اس وائرس کی تصدیق ہوئی۔

    صوبائی دارالحکومت لاہور اس وقت ملک میں3210 کیسز کے ساتھ سب سے زیادہ متاثرہ شہر ہے۔

    لاہور کے بعد گوجرانوالہ میں 82 افراد میں اس وائرس کی تصدیق ہوئی، فیصل آباد میں 41، راولپنڈی میں 30 جبکہ ملتان میں 20 نئے مریض سامنے آئے۔

20. 6 مئ 2020لاک ڈاؤن کے دوران گھر بیٹھے ورزش کیسے کی جائے؟

    کورونا وائرس کی وجہ سے بہت سے لوگوں کو اپنی فٹنس کی فکر ہے۔

    بی بی سی نے اس حوالے سے کنگ فو کی ایک قسم "ووشو" کے ماسٹر شہاب لودھی سے بات کی جو گذشتہ دس سال سے ووشو کوچنگ کر رہے ہیں۔

    شہاب ہمیں بتا رہے ہیں کہ لاک ڈاؤن کے دوران ہم کیسے آسان ورزش کر کے فٹ رہ سکتے ہیں۔