بریکنگ, انڈیا کی اپنا ایک طیارہ تباہ ہونے کی تصدیق, شکیل اختر، بی بی سی اردو نئی دہلی
انڈیا کی جانب سے کہا گیا ہے کہ اس کا ایک مگ 21 جنگی طیارہ پاکستانی طیاروں سے لڑائی میں گر کر تباہ ہو گیا ہے جس کا پائلٹ تاحال لاپتہ ہے۔
وزارت خارجہ کے ترجمان رویش کمار کی جانب سے ایک پریس کانفرنس میں یہ بھی کہا گیا ہے کہ پاکستان نے دعویٰ کیا ہے کہ پائلٹ اس کے زیرِ حراست ہے تاہم اس حوالے سے حقائق جاننے کی کوشش کی جا رہی ہے۔
انڈین حکام نے اس پائلٹ کے بارے میں مزید تفصیلات نہیں دیں تاہم پاکستان کی جانب سے جاری کردہ ویڈیو میں ایک انڈین پائلٹ اپنا نام ونگ کمانڈر ابھینندن بتاتا ہے۔
انڈین حکام کا یہ بھی کہنا تھا کہ پاکستانی طیاروں نے بدھ کو انڈین فوجی تنصیبات کو نشانہ بنانے کی کوشش کی تھی جس پر جوابی کارروائی کی گئی۔
انڈین حکام نے یہ دعویٰ بھی کیا کہ اس لڑائی میں ایک پاکستانی جنگی طیارہ بھی تباہ ہوا جس کو زمین پر موجود انڈین فوج نے پاکستانی حدود میں گرتے دیکھا۔
وزارت خارجہ کی اس نیوز کانفرنس میں ان کے ساتھ ایئر وائس مارشل آر جی کے کپور بھی بیٹھے ہوئے تھے۔ تاہم انھوں نے کوئی بات نہیں کی۔ رویش کمار نے صرف اپنا مختصر تحریری بیان پڑھا لیکن بیان کے بعد نامہ نگاروں کو سوال کرنے کی اجازت نہیں دی گئی۔