مشال قتل کیس کا فیصلہ: کب کیا ہوا؟

لائیو کوریج

ذیشان حیدر، طاہر عمران، ذیشان ظفر شیراز حسن، ظفر سید

1. 7 فروری 2018لاش کو جلانے کی کوشش

   مردان پولیس کے افسر عالم شنواری نے بی بی سی کو بتایا کہ ہجوم نے مشال کی لاش کو جلانے کی کوشش کی تھی۔ 'جب ہم یونیورسٹی داخل ہوئے تو اس وقت تک مشعل خان کو قتل کیا جا چکا تھا اور ہجوم اس کی لاش کو جلانے کی کوششیں کر رہا تھا۔‘

2. 7 فروری 2018’قاتلوں نے توہین رسالت کا بہانہ بنایا تھا‘

   پاکستان تحریک انصاف کے سربراہ عمران خان نے کہا تھا کہ مردان کی عبدالولی خان یونیورسٹی میں طالبعلم مشال خان کے قتل میں توہین رسالت کو ایک بہانے کے طور پر استعمال کیا گیا تھا۔

3. 7 فروری 2018مشال قتل: پاکستانی پارلیمان توہینِ رسالت کے قانون کا غلط استعمال روکنے کے لیے پرعزم

   پاکستان کی قومی اسمبلی نے صوبہ خیبرپختونخواہ کے ضلع مردان میں توہینِ مذہب کے الزام پر عبدالولی خان یونیورسٹی کے طالبعلم مشال خان کے قتل کی شدید مذمت کرتے ہوئے وفاقی اور صوبائی حکومتوں سے ذمہ داران کے خلاف سخت کارروائی کا مطالبہ کیا تھا۔

4. 7 فروری 2018توہین کا کوئی ثبوت نہیں ملا

   مشال خان کے ایک دوست نے ان کے قتل کے چند دن کے بعد بی بی سی کو بتایا تھا کہ مشال ایک متجسس طبیعت رکھنے والے طالبعلم تھے، جنھوں نے ہمیشہ اسلام سے اپنی محبت کا اظہار کیا لیکن ساتھ ساتھ وہ سوالات بھی اٹھاتے تھے۔

   مشال خان کے ایک استاد نے بتایا کہ ’وہ ہمیشہ کھل کے بات کرتے تھے لیکن انھیں احساس نہیں تھا کہ وہ کیسے ماحول میں رہ رہے ہیں۔‘

   مشال خان کے ہوسٹل میں کام کرنے والے عزیز الرحمان جس نے مشال کی ساتھی طلبہ کے ساتھ بحث دیکھی تھی، کہا کہ وہ ہمیشہ پیچیدہ اور مختلف نوع کے موضوعات پر بات کرتا تھا۔

   پولیس کی تفتیش کے مطابق انھیں ایسے کوئی ثبوت نہیں ملے جن سے ظاہر ہو کہ مشال نے توہین مذہب کی ہو۔

5. 7 فروری 2018’وہ بہت آگے جانے والا تھا‘

   ’مشال تو میرا اثاثہ تھا۔ وہ اثاثہ ہم سے چھین لیا گیا۔ ہم تو یہ کہتے ہیں کہ ہر بچے کا مستقبل روشن ہو۔‘ پڑھیے مشال خان کے والد سے بی بی سی اردو کے ہارون رشید کی بات چیت

6. 7 فروری 2018مشتعل ہجوم

   توہینِ رسالت کے الزام کا سنتے ہی مشتعل ہجوم نے پہلے تو مشال کے دوستوں کو مارنا شروع کیا تاہم وہاں موجود چند لوگوں نے جب انھیں بتایا کہ ان میں سے کوئی بھی مشال نہیں تو ان افراد نے ان دو طالب علموں کو شدید زخمی کرنے کے بعد چھوڑ دیا۔

   اطلاعات کے مطابق بعد میں چند طالب علموں نے مشال کو ڈھونڈ کر پہلے تو مبینہ طور پر گولیاں ماریں اور پھر مبینہ طور پر ان کی لاش کو گھسیٹے ہوئے لے کر آئے۔

7. 7 فروری 2018توہینِ رسالت کا الزام

   گذشتہ برس 13 اپریل کو مردان کی عبدالولی خان یونیورسٹی میں مشتعل طلبہ نے توہین رسالت کے الزام پر یونیورسٹی میں شعبۂ صحافت کے طالب علم مشال خان کو تشدد کرکے ہلاک کر دیا تھا۔

   یہ جھگڑا مبینہ گستاخانہ گفتگو کی بنیاد پر شروع ہوا جس پر کچھ طالب علم مشتعل ہو گئے۔ جس کے نتیجے میں مشال خان ہلاک اور دو زخمی ہو گئے۔

   یونیورسٹی انتظامیہ نے اس واقعے کے بعد یونیورسٹی کو غیر معینہ مدت کے لیے بند کر دیا تھا۔

   ,

8. 7 فروری 2018مشال خان قتل کیس کا فیصلہ

   پاکستان کے صوبہ خیبر پختونخو کے ضلع ایبٹ آباد میں انسداد دہشت گردی کی عدالت کے جج مشال خان قتل کے مقدمے کا فیصلہ بدھ کو سنٹرل جیل ہری پور میں سنائیں گے جس کے لیے انتظامیہ نے شہر میں سخت حفاظتی انتظامات کیے ہیں۔