پاکستان کے راستے ایران داخل ہونے کی کوشش کرنے والے بنگلہ دیش کے 33 شہری گرفتار

لائیو کوریج

1. 22 جولائی 2025روس کے ساتھ مذاکرات کا نیا دور بدھ کے روز استنبول میں ہوگا: یوکرینی صدر زیلنسکی

   یوکرین کے صدر ولادیمیر زیلنسکی کا کہنا ہے کہ روس اور یوکرین کے درمیان جنگ بندی کے لیے مذاکرات کا نیا دور بدھ کے روز استنبول میں ہوگا۔

   پیر کے روز اپنے یومیہ خطاب میں زیلنسکی کا کہنا تھا کہ انھوں نے یوکرین کی سلامتی کونسل کے سربراہ رستم عمروف کے ساتھ قیدیوں کے تبادلے اور ترکی میں روسی حکام کے ساتھ ایک اور ملاقات کی تیاریوں پر تبادلہ خیال کیا۔ ان کا کہنا تھا، ’عمروف نے بتایا کہ بدھ کے روز ملاقات طے ہے۔‘

   یاد رہے کہ یوکرینی صدر نے گذشتہ ہفتے کے آخر میں روس کو ایک بار پھر مذاکرات کی تجویز پیش کی تھی۔ اُس سے قبل امریکی صدر ڈونلڈ ٹرمپ نے دھمکی دی تھی کہ اگر ماسکو اور کئیو کے درمیان 50 دنوں کے اندر جنگ بندی نہ ہوئی تو روس کو ’سخت‘ پابندیوں کا سامنا کرنا پڑ سکتا ہے۔

   ماسکو کی جانب سے فی الحال مذاکرات کے نئے دور کے بارے میں کوئی تبصرہ سامنے نہیں آیا ہے۔

   تاہم ترک حکومت کے ترجمان نے تصدیق کی ہے کہ بدھ کے روز مذاکرات استنبول میں ہوں گے۔ ان کے مطابق، مذاکرات اسی مقام پر ہوں گے جہاں اس سے قبل مئی اور جون جنگ بندی مذاکرات ہوئے تھے جو ناکام رہے تھے۔

2. 22 جولائی 2025ڈھاکہ میں سکول پر بنگلہ دیشی فضائیہ کا تربیتی طیارہ گر کر تباہ، 25 بچوں سمیت 27 افراد ہلاک

   بنگلہ دیش کی عبوری حکومت میں معاون خصوصی ڈاکٹر محمد سید الرحمان کا کہنا ہے کہ ڈھاکہ میں بنگلہ دیشی فضائیہ کے تربیتی طیارے کے حادثے میں ہونے والی ہلاکتوں کی تعداد 27 ہو گئی ہے۔

   پیر کے روز ڈھاکہ کے اترا دیاباری علاقے میں واقع مائلسٹون سکول کی عمارت پر بنگلہ دیشی فضائیہ کا تربیتی طیارہ گر کر تباہ ہو گیا تھا۔

   منگل کی صبح نیشنل برن انسٹی ٹیوٹ میں بریفنگ کے دوران ڈاکٹر سید الرحمان نے بتایا کہ مرنے والوں میں پائلٹ کے علاوہ 25 بچے اور ایک استاد شامل ہیں۔

   ان کا کہا ہے کہ اس حادثے میں 78 افراد زخمی ہوئے ہیں جو مختلف ہسپتالوں میں زیر علاج ہیں۔

   ڈاکٹر سید الرحمان کا کہنا تھا کہ ابھی تک ہلاک ہونے والوں میں سے چھ کی شناخت کی تصدیق نہیں ہو سکی ہے۔ ان کا کہنا ہے کہ 20 افراد کی لاشیں شناخت کے بعد لواحقین کے حوالے کر دی گئی ہیں۔

3. 22 جولائی 2025برطانیہ، کینیڈا، فرانس اور جاپان سمیت 28 ممالک کی اسرائیل کے ہاتھوں امداد کے منتظر افراد کی ہلاکتوں کی مذمت

   برطانیہ، فرانس، جاپان، آسٹریلیا سمیت 28 ممالک نے ایک مشترکہ بیان میں اسرائیل کی جانب سے غزہ میں خوراک اور پانی کے حصول کے لیے جمع ہونے والے شہریوں کے ’غیر انسانی قتل‘ کی مذمت کی ہے۔

   مشترکہ بیان میں غزہ میں جنگ کے فوری خاتمے کا مطالبہ کرتے ہوئے کہا گیا ہے کہ غزہ کے شہریوں کو پہنچنے والی تکالیف نئی گہرائیوں کو چھو رہی ہے۔

   غزہ میں گذشتہ 21 ماہ سے جاری جنگ کے دوران اسرائیلی ہتھکنڈوں کی مذمت میں کئی بین الاقوامی بیانات سامنے آئے ہیں۔ لیکن اس مشترکہ بیان میں جیسے کھلے الفاظوں میں مذمت کی گئی ہے وہ قابل ذکر ہے۔

   اس اعلامیے پر برطانیہ، آسٹریلیا، کینیڈا، فرانس، اٹلی، جاپان، نیوزی لینڈ اور سوئٹزرلینڈ سمیت 28 ممالک کے وزرائے خارجہ نے دستخط کیے ہیں۔

   اعلامیے کا آغاز اس مطالبے سے ہوتا ہے کہ ’غزہ میں فوری جنگ ختم ہونی چاہیے۔‘

   بیان میں کہا گیا ہے اسرائیلی حکومت کا غزہ میں ’امداد کی ترسیل کا نظام خطرناک ہے جو عدم استحکام کو ہوا دیتا ہے‘۔ اعلامیے میں مزید کہا گیا ہے کہ یہ نظام انسانی وقار کے منافی ہے۔

   غزہ میں حماس کے زیرانتظام کام کرنے والی وزارت صحت کا کہنا ہے کہ گذشتہ ہفتے کے آخر میں اسرائیلی فائرنگ سے امدادی خوراک کے منتظر 100 سے زائد فلسطینی مارے گئے تھے جبکہ 19 دیگر غذائی قلت کے نتیجے میں ہلاک ہوئے ہیں۔

   ’ہم قطرہ قطرہ امداد فراہم کرنے اور پانی و خوراک کی اپنی بنیادی ضروریات کو پورا کرنے کی کوشش کرتے بچوں سمیت شہریوں کے غیر انسانی قتل کی مذمت کرتے ہیں۔‘

   ’یہ ہولناک ہے کہ امدادی سامان حاصل کرنے کی کوشش میں 800 سے زائد فلسطینی مارے گئے ہیں۔‘

4. 22 جولائی 2025’جو سیاح فیملی کے ساتھ تھے وہ بچوں کی وجہ سے بھاگ نہ سکے‘, عزیز اللہ خان، بی بی سی اردو

   ایک مقامی صحافی فخر عالم نے بی بی سی کو بتایا ہے کہ سیلابی ریلہ اتنی شدت سے آیا ہے کہ لوگوں کو سنبھلنے کا موقع بھی نہیں مل سکا اور جو گاڑیاں اس وقت سیلابی ریلے کی زد میں آئی ہیں وہ پانی میں بہہ گئی ہیں۔

   انھوں نے بتایا کہ سیلاب کی اطلاع ملنے کے بعد جب وہاں وہ گئے تھے تو ہر طرف چیخ و پکار تھی۔

   ان کا کہنا تھا کہ ’سیاح پریشانی کے عالم میں پکار رہے تھے۔ کوئی اپنے خاندان کو ڈھونڈ رہا تھا تو کوئی اپنے عزیز و اقارب کی تلاش میں تھے۔‘

   ’مقامی افراد جن کے گھر سیلاب کے زد میں آچکے تھے وہ کھلے آسمان تلے مدد کے منتظر تھے۔ مقامی لوگوں سے پوچھا تو بتایا گیا کہ لمحوں میں یہ سب کچھ ہوا ہے کئی مقامی افراد نے بھاگ کر جان بچائی ہے۔‘

   ان کے بقول انھیں لوگوں نے بتایا کہ ’اچانک آنے والے سیلابی ریلوں نے جگہ جگہ سیاحوں کو اپنے حصار میں لیا جس باعث جو بغیر فیملی کے تھے وہ بھاگ گئے جو سیاح فیملی کے ساتھ تھے وہ بچوں کی وجہ سے بھاگ نہ سکے۔‘

   مقامی عینی شاہد ابوبکر کے بقول شاہراہ بابوسر تقریباً دس سے پندرہ کلو میٹر مکمل بلاک ہے اور متاثرہ علاقے میںں تقریباً تیس سے چالیس سیاح لاپتہ ہیں۔

5. 22 جولائی 2025شاہراہِ بابوسر پر سیلابی ریلے کی زد میں آکر متعدد گاڑیاں بہہ گئیں، چار افراد ہلاک، متعدد لاپتہ, محمد زبیر خان، صحافی

   پاکستان کے زیرِ انتظام گلگت بلتستان کے ضلع چلاس میں سیاحتی مقام پر سیلابی ریلے سے اب تک کم از کم چار لاشوں کو نکالا جا چکا ہے جن میں ایک خاتون اور tتین مرد شامل ہیں جبکہ ریسیکو 1122 اور گلگت بلتستان حکومت کے مطابق کم از کم پندرہ کے قریب زخمی ہیں اور تیس سے زائد لاپتہ ہیں۔

   حکام کے مطابق لاہتہ افراد میں سیاحوں کے علاوہ مقامی لوگ بھی شامل ہیں۔

   ریسیکو 1122 ضلع چالاس کے ترجمان پختون ولی کے مطابق یہ واقعہ سوموار کی شام تقریبا چار بجے پیش آیا تھا۔

   انھوں نے بتایا کہ ’بابو سر ٹاپ کے مقام پر جہاں پر سیاح تفریح کررہے تھے اور گاڑیاں پارک تھیں اچانک دونوں اطراف سے دائیں اور بائیں سے سیلابی ریلہ آیا۔ اس سیلابی ریلی کی وجہ قریب ہی واقع نالے اور اس کے اطراف میں تیز بارش تھی۔‘

   پختون ولی کے مطابق ’بارش کے بعد اچانک بہت تیزی سے سیلابی ریلا نکلا اور اطراف میں پھیل گیا۔ یہ اپنے ساتھ گاڑیوں اور مقامی لوگوں کو ساتھ بہا کر لے گیا تھا۔‘

   پختون ولی کا کہنا تھا کہ امدادی ٹیمیں موقع پر پہنچ گئیں تھیں۔ جنھوں نے فوری طور پر ریسیکو آپریش شروع کیا تاہم رات کا اندھیرا گہرا ہونے کے بعد اب ریسیکو آپریشن صبح روشنی کی پہلی کرن کے پھیلتی ہی شروع کردیا جائے گا۔

   ان کا کہنا تھا کہ ’سیلابی ریلہ ابھی بھی جاری ہے اور اس میں پانی کم ہورہا ہے۔ تاہم اس میں بھاری ملبہ بھی آرہا ہے۔‘

   گلگت بلتستان حکومت کے ترجمان فیض اللہ فراق کا کہنا تھا کہ ابھی تک ہمارے اندازوں کے مطابق سیلابی ریلہ میں پندرہ گاڑیاں بہہ گئی ہیں۔

   ساہیوال سے تعلق رکھنے والے سیاحوں کی ایک گاڑی کو محفوظ مقام پر منتقل کیا گیا ہے۔

   ان کا کہنا تھا کہ ’ہسپتالوں میں ایمرجنسی نافذ کردی گئی ہے۔ بابو سر ٹاپ پر ٹریفک کو بند کردیا گیا ہے جبکہ شاہراہ قراقرم پر بھی ٹریفک بند ہے۔‘

   انھوں نے بیاتا کہ اگرچہ ’کوشش کی جارہی ہے کہ ٹریفک کو جلد کھولا جاسکے۔ تاہم سیاح اور مسافر ابھی بابو سر ٹاپ والے روڈ پر سفر نہ کرئیں اور شاہراہ قراقرم پر بھی سفر میں احتیاط کریں۔‘

6. 22 جولائی 2025گذشتہ روز کی اہم خبریں

   • خیبرپختونخوا اسمبلی میں سینیٹ کی 11 نشستوں پر ہونے والے انتخاب میں پاکستان تحریک انصاف نے 6 اور اپوزیشن جماعتوں نے 5 سیٹوں پر کامیابی حاصل کرلی۔
   • بنگلہ دیشی حکام کے مطابق ڈھاکہ کے اترا دیاباری علاقے میں واقع مائلسٹون سکول کی عمارت پر بنگلہ دیشی فضائیہ کا تربیتی طیارہ گر کر تباہ ہونے کے بعد کم از کم 20 افراد ہلاک اور سینکڑوں زخمی ہیں۔
   • بنگلہ دیش کی عبوری حکومت میں معاون خصوصی ڈاکٹر محمد سید الرحمان کا کہنا ہے تربیتی طیارے کے حادثے کے 17 متاثرین بچے تھے۔
   • پاکستان کے صوبہ بلوچستان میں ایک مرد اور عورت کو مبینہ طور پر نام نہاد غیرت کے نام پر قتل کرنے کی ویڈیو منظرعام پر آنے کے بعد پولیس نے اس ’قتل کا حکم دینے والے‘ قبائلی سردار سمیت دو افراد کو گرفتار کر لیا ہے۔
   • ممبئی دھماکوں کے 19 سال بعد اور ٹرائل کورٹ کے فیصلے کے 10 سال بعد بمبئی ہائی کورٹ نے تمام 12 ملزمان کو بری کر دیا ہے۔

7. 22 جولائی 2025بی بی سی کے لائیو پیج میں خوش آمدید!

   بی بی سی کے لائیو پیج میں خوش آمدید۔ پاکستان سمیت دنیا بھر کی اہم خبروں اور تجزیوں کے متعلق جاننے کے لیے بی بی سی کی لائیو پیج کوریج جاری ہے۔

   گذشتہ روز تک کی خبریں جاننے کے لیے یہاں کلک کریں۔